Atnutnu 17
17
Dna n Tasalonika
1She Bwulus n əwo anugwnudoi ɓa ɓəə la duya n Ampyipwolis n Apwoloninyai, ɓa ɓe Tasalonika, aba n Ayahudiyibwokwnu ɓə gnyi nyi. 2She wo ɓə dami woi zhni, Bwulus wa ɓwa Sibyiwyi ngwnu-ata, woi lodna n Ayahudiyibwokwnu, woi zhni ɓənubwo n ɓai dna n Anyakagyigyiyi, 3woi kna ɓa awyeya jesnu woi wu ɓa nge kwo zhni ɓəshishi nu ge, Kirisiti ɓə gyeazhnì jesnu woi laka n əfyi. Wa gna, “Yeisu ye n mi gnyi mii da fye əwo əɓo nyi, əwo nu zhni Kirisiti.” 4Kwa kwu Ayahudiyi ho kwnuawye jesnu ɓa dnaɓwado n Bwulusii ɓədo n Silai n ɓwasnu she Agirikiyi Shekwodnawoyi bəgyé ɓədo n anyikwoza awyekpmiyii fyewyi ɓə zhni nyi.
5Ama Ayahudiyi aje ɓə zhi n nuwnui; ntulonu ɓa ye aza zhi n ɓa ɓə n alu nukwoi, agyikicizhniyi ɓai kwnu ń gnyikwo, ɓa pa ɓa anyàwu, jesnu ɓa ya gyikicizhni fyi n əzhiyaakwo. Ɓa bwusi lo Jason pwuwa ɓai zna Bwulus shni n Silai nabai ɓa kwnu ɓa ɓe deeji ncei. 6Ama she ɓa to ɓə gye ɓa əwye m, ɓa gnyì Jason ɓədo n avyiyi ajei, ɓa lo n ɓai n əzhiyaakwo atukwoda aba ɓai ɓəwyi: “Aza ye n ɓa la gbuzui laka gnyi ń anyì vnyanya nyi, ɓa kwu ɓe n ya, 7jesnu Jason wo la ɓa gwo fyi n əwo pwuwa. Ɓa zhi ɓai znu Kaisa aɓəgbetu əgna nu vnyanya, ɓai gna nge əsu ədo lo, n a yi ge Yeisu.” 8Shi ɓa ɓə wo dəye, deeji n əzhiyaakwo atukwodai ɓa kwu jeje. 9Nlonu ɓa zhni Jason n azajei ɓa gwo əɓahni əɓwa n atukwoda aba, ɓa ya ɓa, ɓa lo.
Fyi n Byeriya
10She sukwo ɓə zè zhnizhni, avyiyi ɓa gna Bwulus ami n Silai lo ncei n Byeriya. N ɓa sisii n ɓo, ɓa lofyi n Ayahudiyibwokwnu. 11Nsayii Abyeriyayi Ayahudiyi ɓə du aza yi n ɓa ɓə fyi n Tasalonika nyi n alu manai; ntuge ɓa ɓə la ɓəda gwo n pwawo yaakwoi jesnu ɓa pmi Anyakagyigyiyi fyegyifyegyi, ɓa kpe kwo ngye əɓo n Bwulus ɓə da nyi, nge kwo zhni gaiciya nu. 12Ntu dəye ɓo, bəgyé n ɓa, ɓa kwu gaiciyaga, n ɓwasnu she Agirikiyi anyikwoza awyekpmiwuyi bəgyé n azanugbayii ce, ɓə kwu gaiciyaga nyi.
13Ama she Ayahudiyi n ɓa fyi n Tasalonika ɓə wo nge Bwulus zhni waazi Shekwoyi ɓədagbma nya lo n Byeriya, azaho n ɓa, ɓa lo ɓo ce, ɓai fyi deeji ya njesnu ɓai kwu ɓa abwugbakala. 14N əsagbmanyii avyiyi ɓa gna Bwulus ami lo shikwo əgbe, ama Sila n Timotii ɓa kwu kpefyi n Byeriya. 15Aza yi n ɓa ɓə gna Bwulus ami nyi, ɓa ɓe n woi n Atens jesnu ɓa kwuka n ɓo n gbegai ntu Sila ɓo n Timotii nge ɓa zhni ɓa ɓə da wo shi kwo ɓa yezhni ntna əsa gyii.
Dna n Atens
16Bwulus woi ye dna woi pmi ɓa dna n Atens, bwugba kwaa wo wnuya n mwa, she wo ɓə gye əzhiyaakwo n nunui gnyi n ashnai. 17Ntulonu wa kwnuɓənubwozhni dna n Ayahudiyibwokwnu n Ayahudiyii ɓədo n Agirikiyii n ɓa wo Shekwoyi ədna, jesnu gnyi n adubayaakwo n aza yii fyegyifyegyi, n ɓa ɓə zhi n abaayi nyi. 18Əpyikwuriya okwu ɓədo n Sitoyiki aɓoajekwuyi okwui n ɓa ta ye nge a wu agbmada kwo snasna nyi m, ɓa ɓe ɓa naɓo kpeaje n woi. Azaho n ɓa, ɓa nyaɓo, “Ɓədankwolo nya ye gnyi woi ye wa da knyiɓei nu a?” Azaje ɓa gna, “Wo wulo ngye wo gnyi woi da ashna azhiɓeyi nya ho nu ɓo,” Ɓa ɓə da dəye ntuge Bwulus ɓə gnyi woi zhni waazi nabagyi manai nya nu, ntu Yeisu ɓo ɓədo n əwo kalalai n əfyi. 19Nlonu ɓa la wo ɓa lo n woi n Arepagwus ayezhiba, aba n ɓa ɓə gna wo ge, “Kwo ɓa yezhni ya kpé nyawu woiwoi ye ɓəgənyi, n ho gnyi hoi wu nyi? 20Ho gnyi hoi ɓe n aɓo azhiɓeyi nyai nu fyi n əyi atnubwa, jesnu yi ncei pmalo ya kpé əɓa ɓətukwo ye.” 21(Ateniyi vnyanya ɓədo n azhiɓeyii n ɓa ɓə fyi n ɓo, ɓa ɓə zhni ɓa la əsa n mwa toge ɓai zhni ɓəho m, akpəge ɓai daɓo jesnu ɓai kna aɓo awoiwoyi tnubwa.)
22Nlonu Bwulus wa laka gnyiagnyi dna n Arepagwus yezhi wa gna: “Ateniyi! Mi kwu gye nge n zokwo dəhodəhoi, fye zhni Shekwoyi aznashniyi nu. 23Ntuge əsa n ma sheɓa ncei ma shi anya awye n fye ga ɓa mwamwa nyi pəceye, kwo bəgədi ho n ma gyewye nyi, kwo ɓə n ənya yei kakpe n kwo:
Ntu n Shekwoyi ɓo n a ta Kpe Əwo Əye Lo M.
Ntulonu fye n tnayekpei lo, ənya nya n fye gba kwo nyi; əɓo nu nyi, n mi ye ma gna fye.
24“Shekwoyi n wo ɓə zhni anyì n anyai vnyanya n ɓa fyi n kwo nyi, əwo nu zhni Dagayi əshemi nya n əknyii, jesnu wo to dna n dagayipwuwa nu, ń a mi n azanyikwoci aɓwai nyi m. 25Njesnu a ta zhni wo tnutnu n azanyikwoci aɓwai nu, ngye wo gyi nyaho əsna lo m. N əkwoɓwi, əwo n əwohni tukwoi, əwo nu ga zahozahoyi wyewyeyi n əsnui ɓədo n anya ajei n ɓa ce nyi. 26N zaknayii, wa zhni abye vnyanya, nabai n ɓa ɓá fyi n anyì vnyanya; jesnu wa kwu asa kpe ɓa fyi n nabagyiɓopá, ɓədo n əɓa aknyignai. 27Shekwoyi ɓə zhni dəye nabai n ɓa ɓə zna wo shni nu, kpesnu ɓa su wo kpe jesnu ɓa ɓwa wo; kwo shikwonyi wo to mwakpa lo n zahozahoyii n yi m. 28‘Ntuge yi gyianyì fyi n wo nu, yii znazna fyi n wo jesnu yii ɓwa əyihni fyi n wo.’ Ngye she əfyehni aɓəkpedayi ho ncei da lo, ‘Yi zhni əwo aɓyi nu.’
29“Ntucenu shikwonyi yi zhni Shekwoyi aɓyi nu, yi to zhninubwo ge ikwoda vnyanya wo wulo ngye zinali nu kwo azulufa kwo kwuta nakwoi m; ənyadogbe n azanyikwoci aɓwa nu ncei zhni shi n əgbai nyi m. 30N sapa Shekwoyi ɓə kwu tnagənyikpe ye pya myinawyei, ama nsaiye wo ga aza vnyanya ɓəgbetu lo, n ɓwahoɓwahoi nge ɓa yeabwi. 31Ntuge wo la nyipyei shi n wo ɓə da anyì owa ncei ntnagyifyi, n əzai n wo la knyignyi nyi. Wo la dəye pəwu n zahozahoyi aba, əsa n wo ɓə la wo kala ncei n əfyi.”
32She ɓa ɓə wo əɓo ntu əfyikalakwu ɓo, azaho n əɓa mi, ɓa ma asnaɓwugyi, ama azaje ɓa gna, “Yi ncei pmalo yii je ho tnubwakna ntu ɓəye ɓo.” 33N dəyei, Bwulus wa gbmiya n bwokwnu. 34Azaho ɓa kwu zhni Bwulus avyiyi jesnu ɓa kwu gaiciyaga. Aza n ɓa ɓə ga gaiciya nu nyi; Diyonisis əza n wo ɓə dna n Arepagwus avyiyi, jesnu nyikwozai ai yi wo ge Damaris, ɓədo n azajei n mwa bəgyé.
Currently Selected:
Atnutnu 17: OGNB
Highlight
Share
Copy
Want to have your highlights saved across all your devices? Sign up or sign in
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
