Maliko 6

Want'hu wa Nazaleti wakumulema Yesu

Matayo 13:53,58; Luka 4:16-30

1Yesu akasegela hant'hu hala na kwita kuna dibululu dya Nazaleti hant'hu akulile, kuno akukolwa na wanahina wake. 2Siku ya Humulo ivo ifikile, Yesu akandusa kuwafunza muna ikaya ya kufikanila Wayahudi. Want'hu wengi wamtegelezile wakakangawala na wakaiuza, “Vino mafunzo yano kayapata kwani? Ni umanyi wa vilihi uno enk'hingwe hadi akudaha kutenda uzonza uno?” 3Vino ino sio ila msongola miti, mwana wa Malia, na ndungu zake Yakobo na Josefu na Yuda na Saimoni? Na lumbu zake sio wano chiukala nao? Nao wakaihilwa nk'hani na wakambela.

4Yesu akawalongela, “Mlotezi wa Mulungu akutogoligwa na want'hu wamwenga, mbali hakutogolwa na want'hu wa mui isi yake na want'hu wa kaya yake na walukolo lwake.” 5Yesu hatendile uzonza kumwao, mbali kawalombela watamu wadodo na kuwahonya. 6Yesu akakangawala nk'hani kwa vila hawamtogole.

Yesu akuwatuma wanahina kumi na waidi

Matayo 10:5,15; Luka 9:1-6

Kamala Yesu kakala akwita mvibululu vikalile haguhi na hala na kuwafunza want'hu.

7Yesu akawatanga hamwe wala wanahina kumi na waidi na kuwenk'ha udahi wa kubwakila vinyamkela nakuwatuma waidiwaidi. 8Kamala Yesu akawalongela, “Mse kusola chint'hu chochote mwint'hambo yenu, mbali soleni milugwa muhala. Mse kusola ndia wala sanduku wala hela mvibindo venu. 9Valeni vilatu mbali msekusola myenda ya kuongezela.” 10“Kaya yoyote mkulonda kuhokeligwe goya, kaleni aho hadi mkeza kuhalawa kuna dibululu idyo. 11Na hant'hu hohote mkulonda kuingila ikawa hamuhokelwe na kutegelezwa, segeleni na kung'untheni matibwisi ya mmigulu yenu. Na idyo nadiwe kanyo kumwao kuwa Mulungu kawalema.”

12Kamala wakaita kuwalongela want'hu Mbuli za Mulungu na kuwalonda wazileke zambi zawe. 13Wakala wakuwalava want'hu vinyamkela na wakuwahaka mavuta watamu wengi na kuwahonya.

Kudanganika kwa Yohana Mbatizi

Matayo 14:1,12; Luka 9:7,9

14Mwene Helode akazihulika mbuli izo zose, kwa vila Yesu kakala akumanyika nk'hani. Want'hu wamwenga wakalonga, “Yohana Mbatizi kabwela muna ugima, kwa vila kakala mulotezi wa Mulungu ndo mana akutenda udahi wa kutenda uzonza.” 15Want'hu wamwenga wakala wakulonga, “Mnt'hu ino ni Eliya Mulotezi wa Mulungu” Wamwenga wakulonga, “Ino ni mulotezi wa Mulungu imwe wa walotezi wa umwaka kabwelile muugima.” 16Mbali Helode ivo azihulike mbuli izo, akalonga, “Ino ndo Yohana mbatizi nimkant'hile mutwi, kabwela muugima!” 17Helode katenda ivo kwavila yeye kakala kamkoma Yohana kwa ajili ya Helodia mkake, mwanawachike iyo kakala mkake Filipo ndugu yake Helode. 18Helode kamtendela ivo Yohana Mbatizi kwa vila kakala kamulongela, “Havidamane Helode kumsola mke wa ndugu yako.”

19Ivo Helodia akamwihila nk'hani Yohana na kakala akulonda kumkoma mbali akapotwa, 20kwa vila Helode kakala akumwamila. Helode kakala akumuogoha Yohana kwa vila kakala akumanya Yohana kakala mnt'hu adamane halongozi ha Mulungu. Helode kakala akubweda kumtegeleza Yohana, mbali ivo akomeleze kumtegeleza akalumila muna umoyo wake.

21Mui siku nk'hulu ya kwelekwa kwa Helode, Helode kawatendela ndiya vilongozi wakulu na vilongozi wa waamizi na vilongozi wa want'hu wa dibululu da Galilaya na aho ndo Helodia akapata nyafasi ya kumkomela Yohana. 22Ivo, mndele wa Helodia akengila na kuvina goya. Helode na want'hu wose awatangile wakabwendezwa nae Helode akamulongela, “Nilombe chochote icho ukulonda na nie nanikwink'he.” 23Kamala Helode akaiapiza akamulongela, “Nilombe chochote icho ukulonda na nie nanikwink'he hata ukalonda nusu ya umwene wangu.”

24Ivo ila mndele akaita kumuuza mamiyake, “Nilombe chibwani?” Na mamiyake akamulongela, “Lomba mutwi wa Yohana mbatizi.” 25Ahoaho ila mndele akamwitila hima Mwene Helode akamulongela, “Hulonda unink'he haluse hivi mutwi wa Yohana mbatizi muulungo.” 26Mbuli iyo imtenda Mwene Helode awe na usungu nk'hani, mbali hadaile kulema kwa vila kaipiza na kalonga mbuli iyo halongozi ha watafi wake. 27Ivo, Mwene Helode akamulagiliza mwamizi kuugala mutwi wa Yohana mbatizi. Nio ila mwamizi akaita mdigeleza na kumkant'ha mutwi Yohana, 28kamala akeza na ula mutwi wa Yohana muulungo, akamwink'ha ila mndele nae akamwink'ha mami yake. 29Wanahina wa Yohana ivo wahuluke mbuli izo zilawile, wakaita kuusola mtufi wa Yohana na kuuzika.

Yesu akuwenk'ha ndia want'hu elufu tano

Matayo 14:13,21; Luka 9:10,17; Yohana 6:1,14

30Wala watumigwa wakabwela na kuiduganya halongozi ha Yesu na kumulongela mbuli zose wazitendile na kuzifunza. 31Yesu akawalongela, “Chiteni hant'hu habule want'hu mkahumule chidogo.” Kalonga ivo kwa vila kukala na want'hu wengi nk'hani wakalile wakufika hant'hu hala na kusegela ivo Yesu na wanahina wake wakala hawakupata nyafasi ya kudya ndia kwa vila wakala wakuwatendela kazi. 32Ivo wakakwela mdidalu na kwita hant'hu habule want'hu.

33Mbali want'hu wawaona ivo wakalile wakusegela, wakamanya uko wakwita. Nio want'hu kulawa kila bululu wakasumkila uko eli Yesu na wanahina wake waitile na ao want'hu wakalongola kufika. 34Yesu ivo atelemke kulawa mdidalu, akawaona want'hu wengi nk'hani na akawaonela ubazi kwa vila wakala gesa ngoto wabule mdima. Na akandusa kuwafunza mbuli nyingi.

35Zuwa ivo diswile wanahina wakamwitila Yesu na wakamulongela, “Hano chimchiwala na zuwa dikwingila. 36Ivo ikufaya uwalage want'hu waite kuna amabululu na vibululu va haguhi waite wakagule ndia.” 37Mbali Yesu akawalongela “Wenk'heni mweye ndiya.” Nao wakamuuza, “Vino chite chikagule migate ya hela dinali mia mbili chiwenk'he wadye?”#6:37 Dinali miambili kwa chipindi kila ni maliho ya miezi minana 38Yesu akawauza wanahina wake, “Muna migate mingahi? Gendeni mkailole.” Ivo waitile kuilola, wakamulongela, “Kuna migate mitano na somba waidi.” 39Ivo, Yesu akawalongela wanahina wake wawalongele wala want'hu wakale mmapelela hasi mmazani. 40Nao wakakala mmapelela ya want'hu hano mia na hano want'hu hamsini. 41Kamala Yesu akasola ila migate mitano na wala somba waidi, akalola kuchanya kuulanga, akamshukulu Mulungu kamala akaimegula akawenk'ha wanahina wake wawagawile want'hu. Na wala somba waidi akawenk'ha wakawagawile want'hu wose. 42Want'hu wose wakadya na kwiguta. 43Wanahina wake wakavidondola vibenza visigale va migate na somba na kumemeza visege kumi na vidi. 44Want'hu wadile migate iyo wanaalume wakala gesa elufu tano.

Yesu akugenda mchanya mmazi

Matayo 14:22,33; Yohana 6:15,21

45Ahoaho Yesu akawalongela wanahina wake wakwele mdidalu walongole kwita kudibululu da Betisaida mwambo mwa ziwa, chipindi icho Yesu kakala akuwalaga want'hu. 46Yesu ivo akomeleze kulaga want'hu, akaita kudigamba kulomba. 47Ichilo ivo ifikile dalu dikala hagati ya ziwa, nae Yesu kakala adumwe mnk'handa nk'handa ya ziwa. 48Ivo, Yesu akaona wanahina wake vila wakuvumba mdidalu, kwavila wakala wakupinzana na beho kulu. Ivo ifikile haguhi na kucha, Yesu akawaitila wanahina wake kuno akugenda mchanya mmazi akalonda kuwafosa, 49ivo wamuonile akugenda mchanya mmazi wakagesa mzimu, wakaguta nk'hondo. 50Kwa vila wose wamuona wakaogoha nk'hani.

Yesu akawalongela, “Msekuogoha nie ni Yesu.” 51Kamala akakwela mdidalu dya wanahina wake na mp'heho ikaziziwala na wanahina wake wakakangawala nk'hani, 52kwa vila wakala wank'hali hawakumanya mana ya uzozo wa migate. Umanyi wawe ukala mdala kutogola.

Yesu akuwahonya watamu kudibululu dya Genezaleti

Matayo 14:34,36

53Wakavuka ziwa wakeingila muna isi ya Genezaleti na uko wakatimalisa nt'hambo yawe. 54Ivo watelemke kulawa mdidalu aho hao want'hu wakammanya Yesu. 55Na ao want'hu wakazunguluka muna isi yose na wakaandusa kuwasola watamu mmakomwa yawe na kuwagala hant'hu hohote wahulike Yesu ayaho. 56Hant'hu hohote Yesu aitile mvibululu egu mmabululu egu hohote want'hu wakawaika watamu mulubuga wakamulomba nk'hani Yesu hata wadose mp'hindo ya mwenda wake na wose wamdosile wakahona.

Currently Selected:

Maliko 6: DBV

Highlight

Copy