Mavanga 26

Kinzonzi ki Pawuli ha ntadisi yi ntinu Angilipa

1Angilipa wuta ku Pawuli ti: «Wuu na luve mu zonza mu nwanina nitu aku.» Pawuli wulambula kooko mu nwanina nitu andi na wuta ti: 2«Ntinu Angilipa, kyese kii nani bubedidi mu nwanina nitu ani ha ntadisi aku, mu misamu mimvimba mimfundidi Bayudayo, 3mu dyambu ti tomini zaba bumbote kinkulu ki Bayudayo na nyuma zawu. Ndemvokila, nakulombidi luvibudulu mu nyuwa.

4Bayudayo bamvimba bazebi bwedi bubeela luzingu lwani, tuka kintwenya kyani. Bazebi bwedi nakudila ha kati di kanda dyani na ku mbanza yi Yelusalemi. 5Banzebi tuka ntama, mpe tala ti batiidi, balendi ta kimbangi ti meno nedi zinganga bonso mufalisi mu kabu dikwe toma vuminanga mu ngolo Misiku mu dibundu dyeto. 6Bubedidi nina fundusu mu dyambu di kivuvu kyani mu nsilulu yisa Nzambi ku matata meto. 7Mpe makanda meto kumi na mole makwe sadilanga Nzambi mu vema, mpimpa na mwini, mu dyambu ti maa na kivuvu mu yena ti nsilulu beyoyo yilungidi. Ntinu, ni mu dyambu di kivuvu bekyokyo Bayudayo bamfundidi. 8Nki luna yenina dyo dyambu dimpasi mu kwikila ti Nzambi kafulukisa bafwa e? 9Meno bende nedi banzilanga ti mfweti nwanisa mu nzila zimvimba, nkumbu yi Yesu mwisi-Nazaleti. 10Bwabobo mpe nedi sadilanga ku mbanza yi Yelusalemi. Natambula luve lu zimfumu zi zinganga-Nzambi mpe natuula mu boloko minsambidi mimingi. Bu bedi bazengilanga lufwa, meno mpe nedi singisanga. 11Mu nzo zimvimba zi lusambulu zi Bayudayo, nedi lombanga babahaana kitumbu kingolo mpe nedi bakwikisanga babiika mu sa kiminu kyawu mu Yesu. Mbalu zani mu yawu zedi sanga ti nabafyetikisa natee mu zi mbanza zinzenza.

Pawuli wuna yala mvilukulu andi

(9.1-19; 22.6-16)

12Ni hahoho na yendila ku mbanza yi Damasi, na bumfumu bumvimba mu ntumunu yi mpeka zimfumu zi zinganga-Nzambi. 13Ntinu, bu naba mu nzila, mu ntangu ha mbata, nayena kya kikingi kifuma ku yulu, kitumbu nzungidila na bakundi bani banzyetolo, kyezezi kyandi kyedi lezima kuhyoka ku lezima ku ntangu. 14Tumana bwa bamvimba ha nsi, mpe nayuwa ndinga yedi nteela mu ki-Ebeleo ti: “Sawuli, Sawuli, bila nki wuna mfyetikisila e?” Mpasi zimpamba wuna yena, bonso kibulu kina vibidila mpasi zi muhangu wu mfumu andi. 15Namufuula ti: “Mfumu, ngeye ni nani e?” Wumvutudila ti: “Meno ni Yesu yondowo wu wuna fyetikisa. 16Kansi vumbuka na telama. Mu dyambu ti nakuyenikini mwanki wuba kisadi kyani mpe mbangi mu misamu mi yeni na mi naakulonka. 17Naakukuula mu moko ma Bayudayo na ku balembolo ba Bayudayo ku nakutambikidi. 18Nina kutambika mu bazibula meso, mu baduukisa mu tombe mwanki benda ku kya, mpe mu bakuula mu lulendo lu Nkadyampemba na benda ku Nzambi, mwanki batambula mu kiminu kyawu mu meno, ndemvokolo yi masumu na kikunku ki difwa, ha kimosi na bantu balongo.” »

Pawuli wuna zonzila kisalu kyandi

19Ni bwabobo ntinu Angilipa, nalembolo bisila mu tumimina mbweno beyoyo yifuma ku yulu. 20Nalonga musamu wumbote ntete ku bantu ba mbanza yi Damasi na bantu ba mbanza yi Yelusalemi, mboki mu kizunga kimvimba ki Yuda na ku balembolo ba Bayudayo. Nabalonga bavilula madyela, bavutuka ku Nzambi na balonka mu mavanga mawu ti bavilukidi. 21Musamu wawowo Bayudayo bankangila mu nzo-Nzambi, mpe basosa mu mponda. 22Natee mu kilumbu bekiki, Nzambi kwandi wuna kwe nkebingi. Mpe nina tatamana mu ta kimbangi ku bantu ba mfunu na ku bantu bampamba. Nina kwe te kimbangi kihiika ko, kansi ni kyo kwandi ki samuna mimbikudi na Mose ti kya lungusu. 23Klisto waayena mpasi, waaba wuntete mu fuluka mu bafwa, mpe waasamuna kya ki mpulusu ku Bayudayo na ku balembolo ba Bayudayo.

Pawuli lombidi ntinu Angilipa kakwikila

24Pawuli bu kedi nwaninanga nitu andi, Fesituse wuzonza mu ngolo ti: «Pawuli! Ngeye lahukidi, madyela makuhitidi, ni hahoho weka kilahuki!» 25Kansi Pawuli wuvutula ti: «Mfumu Fesituse, nii kilahuki ko. Misamu mi nina duukisa ha munwa ani, mikedika midi na misungama.» 26Misamu mimvimba bemyomyo ntinu Angilipa mya kazebi. Ni hahoho, nina zonzila na kivuvu kimvimba ha ntadisi andi. Nkwikidi ti kuu dyambu di kalembolo zaba ko. Mu dyambu ti, mihyokila mu mansweki ko. 27Ntinu Angilipa, kwikidi mu misamu mibikula mimbikudi e? Nzebi ti myakwikidi. 28Angilipa wuta ku Pawuli ti: «Ha sidi ntama ko buna nkitudi mu-Klisto.» 29Pawuli wuvutula ti: «Ni diba bubedidi ni diba mbazi, nina sambila Nzambi mu dyambu dyaku kaka ko, kansi mu bamvimba bebaba bana nyuwa bubedidi, lukituka bonso bu nidi, kansi balembolo kangu misinga mi bisengo.»

30Ntinu wutelama ha kimosi na Munyadi, na Belenise na yobobo bazakala ha kimosi nawu. 31Bayenda ku mfundu na bata kuna ti: «Bakala bedidi kahidikidi dyambu dimbi ko dye muzengila lufwa hoti mu mutuula boloko.» 32Angilipa wuta ku Fesituse ti: «Muntu bewuwu keti baka kimpwanza tala ti kalombidi ko ti ntinu yi Loma kamufundisa.»

Currently Selected:

Mavanga 26: dde Ddo

Highlight

Copy