Mavanga 25

Pawuli ha ntadisi yi Munyadi Fesituse

1Ku manima ma bilumbu bitatu bu katula mu kizunga ki Yuda, Fesituse wusisa mbanza yi Sezale mu tomboka ku mbanza yi Yelusalemi. 2Mfumu zi zinganga-Nzambi na mfumu zi Bayudayo bayenda ha ntadisi andi mu funda Pawuli. Batoma mubombidila 3mu mulomba kavutula Pawuli ku mbanza yi Yelusalemi. Mu dyambu ti balebikila Pawuli mutambu mwanki bamuhonda mu nzila. 4Kansi, Fesituse wubavutudila ti: «Pawuli wuu mu boloko ku mbanza yi Sezale, mpe neka lukufi, meno bende mu vutuka koko.» 5Wubwesa ta ti: «Bika tukulumuka ha kimosi na zimfumu zeno ku mbanza yi Sezale. Tala ti kibila babeki mu bakala bedyodyo, bamufunda.» 6Fesituse wuhyokisa kaka bilumbu nana hoti kumi ha kati dyawu, ku manima, ni kavutuka ku mbanza yi Sezale. Kilumbu kilanda, wuyenda zakala mu nzo yi lufundusu na wutuma banata Pawuli. 7Pawuli bu katula, Bayudayo bafuma ku mbanza yi Yelusalemi bamuzungidila na bamufunda mu bibila bibingi. Kansi, balembana mu lonka kikedika ki bibila bebyobyo. 8Pawuli mu nwanina nitu andi, wuta ti: «Meno nasidi musamu wumbi ko ha ntadisi yi Misiku mi Bayudayo ko, ha natadisi yi nzo-Nzambi, na ha ntadisi yi ntinu ko.»

9Mu yangidika Bayudayo, Fesituse wusa ndombolo eyi ku Pawuli ti: «Nga tiidi tutomboka ku Yelusalemi mwanki bazenga musamu aku ha ntadisi ani e?» 10Kansi, Pawuli wuvutula ti: «Meno natelamani ha ntadisi yi lufundusu lu Kayisali, hahaha nafweti fundusulu. Nge bende watomini zaba ti, nahidikidi musamu wumbi ku Bayudayo ko.» 11Tala ti ku mbedi nidi, mpe tala ti musamu wumbi nahidikidi wuna sa ti nafwa, nabisidi mu fwa ko. Kansi, tala ti misamu mina mfundila bantu bebaba mii mikedika ko, kuu muntu wuna luve mu nyekola mu moko mawu ko. Meno ndombidi naba ha ntadisi yi Kayisali. 12Fesituse bu kamana zonza na milwengisi myandi, wuvutula ti: «Lombidi mu fundusu ha ntadisi yi Kayisali, mbo wenda ha ntadisi andi.»

Pawuli ha ntadisi yi Angilipa na Belenise

13Mwa bilumbu bihyoka, ntinu Angilipa na kibusi kyandi Belenise batula ha mbanza yi Sezale mu haana Fesituse mbote. 14Bu kazaba ti bazingila bilumbu bibingi ha mbanza, Fesituse wuyadila ntinu mpolo yi Pawuli. Wuta ti: «Muntu wuu haha, wusisa Felikise mu boloko.» 15Bu naba ku mbanza yi Yelusalemi, mfumu zi zinganga-Nzambi na bakuluntu ba Bayudayo bayiza mufunda, mpe balomba bamuzengila kitumbu. 16Ni nabavutudila ti: «Bisi-Loma baa na kifu kye zengila muntu kitumbu ko, tala ti bamubwabisi na mimfundi myandi ko, na bamuheeni luve lwe nwanina nitu andi ko.» 17Bayiza ha kimosi nani ehaha. Mpe nakingila ko, kilumbu kilanda ni nazakala ha kyandu mu nzo yi lufundusu, mpe nalomba banata muntu bewowo. 18Mimfundi myandi bu mituula, mita kani kibila kimosi ko mu myo mi nedi yindula. 19Nyuma kaka ziba nawu mu misamu mitadidi dibundu dyawu, mpe mu muntu wumosi nkumbu andi Yesu, wufwa, kansi Pawuli wuna singisa ti wumoyo kadi. 20Meno nazaba dyaka ko nki nalendi sa mu musamu bewuwu, nina mulomba kenda ku mbanza yi Yelusalemi mwanki bazenga musamu andi. 21Kansi, Pawuli wulomba bazenga musamu andi ku Kayisali. Ni hahoho, natuma bamukeba mu boloko natee bu namutambika ku Kayisali Angustu. 22Angilipa wuta ku Fesituse ti: «Natiidi mebende mpe nayuwa muntu bewowo.» Wumuvutudila ti: «Mbazi, waamuyuwa.»

23Kilumbu kilanda, Angilipa na Belenise bayizila mu mukembo wuwunene. Bakota mu nzo yi lufundusu ha kimosi na mfumu zi zimbulu-mbulu na minanga mi mbanza. Mu lutumu lu Fesituse, banata Pawuli. 24Fesituse wuta ti: «Ntinu Angilipa na yeno bamvimba luu kintwadi neto, luyeni muntu bewuwu. Mukangu wumvimba wu Bayudayo wumufundidi ku meno, bu nabedi ku mbanza yi Yelusalemi natee ehaha, mwanki bamuzengila lufwa.» 25Mu meno, namubeki kibila ki balendi muzengila lufwa ko. Kansi, yandi bende lombidi ku Kayisali Angustu kazenga musamu andi. Ni hahoho nabongidi zengolo mu mutambika koko. 26Mpeleko nabeki dyambu dye sonika ku Mfumu mu dyambu dyandi ko, kansi namufundisi ha ntadisi eno, vula-vula ha ntadisi yi ngeye ntinu Angilipa, mwanki nabaka mwa dyambu dye sonika, bu lwaamanisa mu muzika byuhu. 27Mu dyambu ti, buu bumbote ko mu tambika nkole wulembolo sonika kibila ki bamufundidi.

Currently Selected:

Mavanga 25: dde Ddo

Highlight

Copy