Mavanga 14

Pawuli na Banabase ku mbanza yi Ikonyomi

1Ku mbanza yi Ikonyomi, Pawuli na Banabase bayenda kota mu nzo yi lusambulu yi Bayudayo mpe balonga Mambu ma Nzambi ma sa ti Bayudayo babingi na Bangeleke bakwikila. 2Kansi Bayudayo babisa mu kwikila, basindisila yobobo balembolo ba Bayudayo mwanki banangumukina zimpangi zawu. 3Pawuli na Banabase bazingila ku mbanza yi Ikonyomi. Bedi longanga mu kivuvu kimvimba misamu mitadidi Mfumu. Mfumu wedi bahaananga lulendo mu hidika bidimbu na bimangu mu lonka kikedika ki kimbangi ki bedi kwe samuni. 4Nkabani yikota ha kati di mukangu mu mbanza: kuba na bantu baba ku sambu di Bayudayo, bahiika ku sambu di zintumwa. 5Balembolo ba Bayudayo na Bayudayo, ha kimosi na zimfumu zawu, bakubama mu bayenisa mpasi na mu bawinda matadi, 6bu babakula bobo, bayenda swama ku kizunga ki Likaoni, mu mbanza yi Lisiteli na yi Delebi na mu mabwala ma kizunga bekyokyo. 7Basamuna koko mpe Musamu Wumbote.

Pawuli na Banabase ku mbanza yi Lisiteli

8Ku mbanza yi Lisiteli, kuba na muntu wumosi wuba wedi lembolo telamanga, wuba kikata tuka mbutukulu andi na kedi kwe yenzingi ko. 9Wedi yuwa Pawuli bu kedi zonza. Pawuli wumusungimina, bu kayena ti wuba na kiminu mu vuuka, 10wumuteela mu ngolo ti: «Telama na sikama mu malu maku!» Muntu wo wudumuka na wutona mu kwe dyati. 11Bu bayena myo mihiidika Pawuli, mpumbu yi bantu yi lookana mu ngolo mu ndinga yi bisi-Likawoni ti: «Zinzambi zi bongidi kifwani ki bantu zizidi ku yeto.» 12Bantu bedi tumisina Banabase ti «Zuse», na Pawuli ti «Elemesi», mu dyambu ti yandi wedi kwe zonzi. 13Nganga-Nzambi yi Zuse wuba ha nkotolo yi mbanza, wunata zingombe zimbakala zi balwatisa bifulu ha nkotolo yi lupangu. Yandi na mpumbu yi bantu batya mu haana munkayulu. 14Bu bayuwa bobo, Banabase na Pawuli bakyakuna binkutu byawu na banookisa ku bela mpumbu yi bantu buna bana kwe zonzi mu ngolo ti: 15«Mpangi zani, bila nki luna hidikila misamu mibububu e? Yeto mpe bantu kwandi tudi bonso yeno, na tulutwadidi Musamu Wumbote wuna lulomba mu loosa biteki bebyobyo bimpamba-mpamba, mwanki lwiza ku Nzambi yimoyo yihidika Yulu, butoto, mubu na bimvimba bimomo. 16Mu mbandu zihyoka, wuhaana kimpwanza ku zinsi zimvimba zilanda nzila zawu zi batiidi mu landa, 17mpeleko kabika ko mu balonka mambote mandi: wuluheeni zimvula zikwe fumanga ku yulu na mbutu zizingi mu ntangu yi nyonzokolo. Wuluheeni bindya na fulusi mitima myeno mu kyese.» 18Mpeleko bedi bazonzila bobo, mu mpasi balendila mu sa mpumbu yitambudila mu lembolo bahaana munkayulu.

19Bayudayo bafuma ku mbanza yi Antiose na yi Ikonyomi, bayiza leba mpumbu yi bantu mwanki banangumukina Pawuli. Bawinda Pawuli matadi mu muhonda. Mboki, ni bedi kwe mukokomoni natee ku mbazi yi mbanza, mu dyambu ti babanzila ti fwidi. 20Kansi, milongoki bu mi muzungidila, wusungama na wukota mu kati di mbanza. Kilumbu kilanda, wuyenda ha kimosi na Banabase ku mbanza yi Delebi.

Pawuli na Banabase bavutuka ku mbanza yi Antiose

21Basamuna Musamu Wumbote mu mbanza beyoyo mpe ba baka milongoki mimingi, ku manima bavutuka ku mbanza yi Lisiteli, yi Ikonyomi na yi Antiose. 22Bedi kwe kindisi milongoki mu mbanza bezozo na bedi kwe balombi baba bakwikama mu kiminu, mu bateela ti: «Mu mpasi zizingi twaakotila mu kimfumu ki Nzambi.» 23Basoola bankuluntu mu kadi dibundu, mpe bu bamana sambila na kumina nsoki, ni babayekola mu moko ma Mfumu, yondowo wu basila kiminu.

24Bu bahyokila yi kizunga ki Pisidi, bayenda ku mbanza yi Pamfili, 25basamuna Mambu ma Nzambi ku mbanza yi Pelezi, mboki bakulumuka ku mbanza yi Ataliya. 26Ha mbanza yi Ataliya bakotila masuwa mu kwenda ku mbanza yi Antiose ku nsi yi Siliya. Ha mbanza beyoyo babayekodila mu moko ma Nzambi mu dyambu di kisalu bekyokyo ki basedi. 27Bu batuula, Pawuli na Banabase bayonzika dibundu na babayadila misamu mimvimba Nzambi mi kahidika nawu, mpe bwedi kazibudila nzila ku balembolo ba Bayudayo bakwikila. 28Ni bahyokisa bilumbu bibingi na milongoki.

Currently Selected:

Mavanga 14: dde Ddo

Highlight

Copy