Mavanga 13

Nzyetolo yi kisalu yi Banabase na Sawuli

1Mu dibundu di ku mbanza yi Antiose, muba na mimbikudi mpe na milongisi: Banabase, Simeoni wuba kwe tumisina dyaka ti Ndombe, Lusyuse mwisi-Sileni, Manane wuba nkayi yi bulezi yi Elode, yondowo wedi yaalanga kizunga ki Ngalili na Sawuli. 2Kilumbu kimosi, bu bedi sambilanga Nzambi na kumina nsoki, Mpeve Yilongo yibateela ti: «Tuleno Banabase na Sawuli ha luhengo mu dyambu di kisalu ki nabatumisini.» 3Ni hahoho, bu bamana sambila na kumina nsoki, ni babatentika moko na bababika benda.

Banabase na Sawuli ku mbanza yi Sipeli

4Mu lutumu lu Mpeve Yilongo wubafidisa, Banabase na Sawuli bakulumuka ku mbanza Selesi ku bakotila mu masuwa mu kwenda ku mbanza yi Sipeli. 5Bu batuula ha mbanza yi Salamine, basamuna Mambu ma Nzambi mu zinzo zi lusambulu zi Bayudayo. Yoane-Malako wuba nawu mu kwe babakisi. 6Bu bamana sabuka kizanga natee ku mbanza yi Pafosi, bayena koko nganga yimosi, nkumbu andi Bali-Yesu, wuba Muyudayo. Wedi kitumpidikanga ti yandi ni mumbikudi. 7Bali-Yesu wuba mu kati di yobobo bedi salanga kintwadi na Munyadi Selengiyusi Pawulusi, muntu wu madyela. Wulomba batumisa Banabase na Sawuli, mu dyambu ti wutya mu yuwa Mambu ma Nzambi. 8Kansi nganga Elimasi, bonso buu mbangululu yi nkumbu andi, wedi bakanga nzila mu sosa mu zezisa kiminu ki Munyadi. 9Ni hahoho, Sawuli wuba kwe tumisinanga mpe ti Pawuli, wufuluka mu Mpeve Yilongo, wusungimina bumbote Elimase na wuta ti: 10«Mwana Satana wudi, ngeye muntu wufuluka mu luvunu na mbalu, mpe wukwe lembolo tyanga lunungu. Nga waabika ko mu tengimisa nzila zisungama zi Mfumu e? 11Tala bwabu kooko ku Mfumu ku lambukidi mu ngeye: mpofo waaba na mwa bilumbu bifwana waayena dyaka mwini ko. Hansi na nsi, meso ma Elimase mazibama na wukota mu tombe.» Mpe wudyengila ndambu ka ndambu mu sosa muntu wulenda musimba mu kooko mu kwe munati. 12Bu kayena misamu bemyomyo mihyoka, Munyadi wukwikila na wuyituku mu ndongosolo yi Mfumu.

Pawuli na Balanabase ku mbanza yi Antiose yi Pisidi

13Pawuli na zinkayi zandi bakota mu masuwa ha mbanza yi Pafosi na bayenda ku mbanza yi Pelezi mu kizunga ki Pamfili. Kansi Yoane-Malako wukabuka nawu hoho na wuvutuka ku mbanza yi Yelusalemi. 14Balandila nzila awu ku tonina ku mbanza yi Pelezi natee bu batuula ku mbanza yi Antiose yi Pisidi. Kilumbu ki saba, bakota mu nzo yi lusambulu yi Bayudayo na bazakala. 15Bu bamana tanga mii mu Misiku na mu mimbikudi, zimfumu zi nzo yi lusambulu yi Bayudayo babateela ti: «Yeno zimpangi, tala ti mwa dyambu dye syamisina mukangu di neeno, zonzeeno bwabu!» 16Pawuli wutelama, wubalabikisa mu kooko na wuta ti: «Ba-Isaeli, yeno luna bunkuta bu Nzambi, yuweeno! 17Nzambi yi Isaeli, mukangu eto, wusoola zinkaka zeto. Wunyekisa mukangu bewuwu ku nsi yi Ngipiti ku wuba, na wuduukisa wo mu koko kwandi ku lulendo. 18Bavividila kampe mvula makumaya ku nsi yinkatu. 19Bu kamana honda bantu ba zinsi nsambwadi mu kizunga ki Kana, ni kabahaana butoto bwawu bonso fwa, 20mu zimvula nkama ya na makumatanu. Mboki ku manima, wubatambika mimfundisi natee mu ntangu yi mumbikudi Samueli. 21Mboki balomba ntinu, Nzambi ni kabahaana Sawuli, mwana wu Kise mu kanda di Benyami, wuyaala makumaya ma mvula. 22Nzambi bu kakatula Sawuli, wubahaana Davidi bonso ntinu. Ni kamuteela kimbangi ti: “Nsodidi Davidi, mwana wu Yese, bakala di yangikidi mutima ani. Yandi waalungisa luzolo lwani lumvimba.” 23Mu nkuna yi Davidi, bonso bu kasila nsilulu andi, Nzambi kasoodila Yesu Muvuukisi yi Isaeli. 24Tekila nyizulu andi, Yoane wusamuna ku mukangu wumvimba wu Isaeli mbotokolo yi mvilukulu yi madyela. 25Yoane mpe bu katuula ku nsukunu yi kisalu kyandi, wuta ti: “Yeno nani luna banzila nidi e? Meno nii yandi ko! Kansi yondowo wuna kwiza ku manima mani, nidi wulunga ko mu munyanguna misinga mi nsampatu zandi.”»

26«Mpangi zani, yeno luu baala mu nkuna yi Abalahami na yeno lukwe banga na bunkuta mu Nzambi, mambu bemama ma mpulusu, ku yeto mafidusu. 27Mu dyambu ti, bisi-Yelusalemi na mfumu zawu babakula ko Yesu nani kaba. Mpe babakula ko misamu mi mimbikudi mi bakwe tanga kadi saba, kansi bu bamuzengila lufwa, balungisa myo. 28Mpeleko bamubakila kibila kye mu zengila lufwa ko, kansi balomba ku Pilatu kamuhondoso. 29Bu balungisa mimvimba misonama mu nkumbu andi, bamukulumuna ha kulunsi na bamutuula mu ndyamu. 30Kansi Nzambi wumufulukisa mu bafwa. 31Wuyenika bilumbu bibingi ku yobobo bedi kwe zyeti nandi, kutonina ku kizunga ki Ngalili natee ku mbanza yi Yelusalemi. Yawu beka bwabu zimbangi zandi ha ntadisi yi mukangu. 32Yeto mpe, tulusamunini Musamu bewuwu Wumbote: nsilulu yi basa ku zinkaka zeto, 33Nzambi wutoma lungisa yo ku yeto baala bawu, bu kafulukisa Yesu mu bafwa, bonso bu wusonama mu mukunga wunzole ti:

“Ngeye Mwana ani wudi,

Bubedidi neka Tata aku.”

34Wumufulukisa mu bafwa mwanki ka lembolo bola. Bwabobo kateela ti:

Mbo naluhaana bima bilongo bi Davidi,

byo bi na mu siila nsilulu.

35Ni hahoho kabwesa ta dyaka mu kibuku kihiika ti:

“Waabika ko ti nitu yi kisadi kyaku kilongo yibodila mu ndyamu.”

36Davidi, bu kamanisa mu sadila, mu ntangu andi, luzolo lu Nzambi, wufwa. Bamuzika ha bazikila zi zinkaka zandi na wubola. 37Kansi yondowo Nzambi wukafulukisa mu bafwa, kabola ko. 38Mpangi zani, zabeeno wo ti: mu dyambu dyandi balusamunina ndemvokolo yi masumu, na luyiza ba bantu ba lunungu ko mu dyambu di Misiku mi Mose. 39Mu dyambu dyandi mpe, wonso muntu waakwikila mu yandi, waaba muntu wu lunungu. 40Kebeno kweno mwanki misonika mimbikudi mi lembolo lutudila:

41“Taleno, yeno mintinguni,

Beno bayituku na zimbaleeno!

Mu dyambu ti meno mbo nasala mu ntangu eno dyambu dyaasa ti lulembolo kwikila tala ti muntu wuluyadidi wo.”»

42Bu baduuka mu nzo yi lusambulu yi Bayudayo, bababombidila bavutuka mu saba dina kwiza, mwanki babwesa zonzila musamu bewowo kwandi. 43Lukutukunu bu lumwangana, Bayudayo babingi na banzenza bakota mu dibundu di Bayudayo, balanda Pawuli na Banabase. Bu bedi mokananga nawu, ni bedi basyamisa baba bakwikama mu mulemvo wu Nzambi.

44Saba dilanda, fisala kwa nga bantu bamvimba ba mbanza bakutakana mu yuwa Mambu ma Mfumu. 45Bayudayo bu bayena mpumbu beyoyo yi bantu, mitima myawu mifuluka mu musoki. Ni bedi bangisa Pawuli na kutuka. 46Pawuli na Banabase babateela mu kedika kimvimba ti: «Nga ku yeno Mambu ma Nzambi mafwanakana ntete mu samuna. Kansi bu lulosidi mo na bu lubisidi mu tambula luzingu lu mimvu ka mimvu, yeto twenzi kweto bwabu ku balembolo ba Bayudayo. 47Mu dyambu ti Mfumu wutuheeni ntumunu eyi:

“Nakusodidi mu ba mwinda ku bantu ba zinsi zihiika,

Mwanki wunata mpulusu,

Natee ku sukina butoto.”»

48Balembolo ba Bayudayo bayangalala bu bayuwa bobo, bakembila Mambu ma Mfumu, na yobobo bamvimba basoolo mu tambula luzingu lu mimvu ka mimvu, bakwikila. 49Mambu ma Mfumu mamwangana mu nsi yimvimba. 50Kansi Bayudayo basindisila bakento bazangama na bakwe toma sambilanga Nzambi mpe bakuluntu ba mbanza banangumuka. Basosila Pawuli na Banabase mfyetokoso, ni babakuma mu kizunga kyawu. 51Yawu bu babakubudila fundu-fundu di bitambi byawu, ni bayenda ku mbanza yi Ikonyomi. 52Milongoki, yawu miba mifuluka mu kyese na mu Mpeve Yilongo.

Currently Selected:

Mavanga 13: dde Ddo

Highlight

Copy