Mavanga 11

Petelo ha ntadisi yi dibundu di Yelusalemi

1Zintumwa na zimpangi ziba ku kizunga ki Yuda ziyuwa ti, bantu balembolo ba Bayudayo batambudi yawu mpe Mambu ma Nzambi. 2Petelo bu katomboka ku Yelusalemi, minkwikidi mi Bayudayo mimusemba. 3Bata ti: «Bwedi ngeye wuyenzi kotila ku zinzo yi bantu balembolo zengoso bubakala bwawu na didi ha kimosi nawu!» 4Ni hahoho, Petelo katonina mu bateela bwedi musamu wuhyokila. Wuta ti :

5«Ku mbanza yi Zope naba. Mu ntangu yi nedi sambila, na kota mu mpeve, nina yena mbweno: kima kimosi kifwanakana bonso mulele wuwunene, wukangu mu makonzi maya, kifuma ku yulu na kiyiza natee ku meno. 6Bu nasungimina kyo bumbote, ni nayena bibulu bi ha butoto bii na malu maya, bibulu bi musitu, byo bikwe kwe syelomokingi ha butoto na zinuni zi yulu. 7Ku manima, nina yuwa ndinga yi nteela ti : “Petelo telama, honda na dya!” 8Kansi nina vutula ti: “Kaani Mfumu, mu dyambu ti nadidi bima bi bakanikina na bi sumuka ko.” 9Tuka ku yulu, ndinga yi bwesa yuwakana dyaka nkumbu yi nzole ti: “Bima bi bikidi Nzambi bivedila, ngeye kubikandi byo bisumuka ko!” 10Nkumbu zitatu kisa bobo. Mboki, bimvimba bitumbu tombolo ku yulu. 11Mu ntangu beyoyo kwandi, babakala batatu bafuma ku mbanza yi Sezale, batula ku nzo yi nedi zakidilanga. 12Mpeve yinteela nenda nawu wulembolo sa maketiketi. Mpangi zisambanu bezizi ziyenda ha kimosi nani, zikota nani mu nzo yi Koneye. 13Yandi wutuyadila bwedi mbazi yi Nzambi yi muyenikina mu kati di nzo andi na yi muteela ti: “Tambika muntu ku mbanza yi Zope mwanki kenda kateela Simoni kiza, yondowo wu bakwe tumisinanga dyaka ti Petelo. 14Mpolo zi kaaluyadila zaaluvuukisa, ngeye na kanda dyaku dimvimba.” 15Bu natona mu zonza, Mpeve Yilongo yi kulumuka ku yawu bonso bu yikulumuka ku yeto ku ntonono. 16Mboki nina bambuka moyo ndinga yi Mfumu yita ti: “Yoane wubotika mu mamba, kansi yeno mu Mpeve Yilongo balubotikila.” 17Tala ti Nzambi wubaheeni munkayulu wumosi bonso wukatuhaana yeto bu tukwikila mu Mfumu Yesu-Klisto, buna meno nani nidi mu kakidila Nzambi e?» 18Bu bamana yuwa misamu bemyomyo, bantu badingama na batona mu kembila Nzambi, mpe bata ti: «Nzambi heeni bwabu ku balembolo ba Bayudayo hwahwa dye vilula madyela, mwanki ba baka luzingu lukedika.»

Ntonono yi dibundu di Antiose

19Yobobo bamana mwangana mu dyambu di Mfyetokoso zibwa ku manima ma lufwa lu Tyeni, bayenda natee ku kizunga ki Fenisi, ku Sipeli na ku mbanza yi Antiose. Kansi ku Bayudayo kaka basamuna Mambu ma Nzambi. 20Bantu bahiika ha kati dyawu baba bisi-Sipeli na bisi-Sileni, bu batuula ku mbanza yi Antiose, basamuna Musamu Wumbote wu Mfumu Yesu ku Bayudayo bakwe zonzanga ndinga yi kingeleke. 21Lulendo lu Mfumu luba mu yawu, mu dyambu ti bantu babingi bakwikila na bahaana luzingu lwawu ku Mfumu.

22Dibundu di Yelusalemi bu diyuwa musamu bewowo, ditambika Banabase ku mbanza yi Antiose. 23Bu katuula koko, wuyena bwedi Nzambi ka basakumunina. Wuyangalala na wubasyamisa bamvimba batatama mu ba bakwikama mu Mfumu. 24Banabase wuba muntu wumbote, wufuluka mu kiminu na mu Mpeve Yilongo. Mpumbu yiyinene yi bantu bakwikila mu Mfumu.

25Banabase wuyenda bwabu ku mbanza yi Talisi mu kwe bonga Sawuli. 26Bu kamuyena, wumunata ku mbanza yi Antiose. Bahyokisa ya babole mvula yimvimba mu dibundu bedyodyo, na bedi longanga bantu babingi. Ni ku mbanza yi Antiose batumisina milongoki mu nkumbu yintete ti: ba-Klisto.

Lusadusu ku zimpangi zii ku kizunga ki Yuda

27Mu ntangu beyoyo, mimbikudi mituuka ku mbanza yi Yelusalemi mpe mikulumuka ku mbanza yi Antiose. 28Wumosi mu ya babole nkumbu andi Angabusi, wutelama na wubikula mu lulendo lu Mpeve Yilongo ti nsatu yiyinene yaabwa mu nza yimvimba. Nsatu mpe ni yibwa mu ntangu yi ntinu Kolode. 29Ni hahoho, milongoki mibongila zengolo mu tambika lusadusu ku zimpangi zikwe zinganga ku kizunga ki Yuda. Bonso budi mbakulu yi kadi muntu. 30Ni basadila bobo. Batambika lo ku bakuluntu mu moko ma Banabase na Sawuli.

Currently Selected:

Mavanga 11: dde Ddo

Highlight

Copy