JAKARI 1
1
Yá̰a̰ gə̄ ń Jakari a̰ā̰ ní
(1—6)
Kɔ́ɔ̄ɓē ɓāŕ ngán Israel gə̄
1Kem ɓāl̄ ko̰o̰ ɓē kə́ nge ko̰ jōó yā Darius mban̄g kə́ Persə tə́, kem nāā kə́ nge ko̰ sɔ́sɔ́ tə́, anī Kɔ́ɔ̄ɓē ɔr̄ najə̄ kə Jakari nge koō ta kə́ ngōn̄ Berekia kə́ ngōn̄ Ido.
2-3Ni mērə̄n kəda ngán Israel gə̄ najə̄ ń toō, əda na: Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý əda kadə̄ i rɔ̄kum ní n toó: Wōn̄g rāām̄ ngá̰ý kə kaasí gēé. Banī ī-tél ī-reēī kə̄ rɔ̄ḿ mā Kɔ́ɔ̄ɓē tə́, anī m-ā m̄-tél yā kaw̄ kə̄ rɔ̄sí tə́. I Kɔ́ɔ̄ɓē kə́ bo kə́ tɔ́gən i ngá̰ý ń əda najə̄ ń noō ní. 4Ī-lōōī ndájə̄ kaasí gə̄. Kété ní, m-ə̄ndā ɓār̄ yāḿ ta ngé koō ta gə̄ tə́ adə̄ ɓārə́n̄də́, ədan̄ na: Ī-lōōī gíŕ háĺsí kə́ majaĺ tə́ ō, gíŕ yá̰a̰ rāāsí gə̄ kə́ majaĺ tə́ ō. Banī nin̄ oōn̄ najə̄ yāḿ aĺ ō, usədə́ dɔḿ tə́ aĺ ō. 5Kaasí gə̄ gətóon̄ kɔ̄ɔ́ ō, ngé koō ta gə̄ oyn̄ kɔ̄ɔ́ ō. 6Ɓá tā banī najə̄ yāḿ gə̄ ō, yá̰a̰ gə̄ ń m-ə́dá ngé kəla yāḿ gə̄ ń i ngé koō ta gə̄ ní kadə̄ rāān̄ ní, ta tɔ̄l̄ ta anī, yá̰a̰ gə̄ ní rāān̄ kaasí gə̄. Loo ń noō tə́ nin̄ tūrə̄n̄ háĺdə́ adə̄ ədan̄ na: Kɔ́ɔ̄ɓē kə́ bo kə́ tɔ́gən i ngá̰ý gḛy rāā yá̰á̰ kógə̄ḿ sejí sɔɔ̄ ń háĺjí ō, yá̰a̰ rāājí gə̄ ō. Adə̄ i yá̰á̰ ń noō n ni-rāā ní.
Yá̰á̰ kə́ ta kəga dɔ ń Jakari a̰ā̰ ní, i Sə́nda gə̄
7Kem ɓāl̄ ko̰o̰ ɓē kə́ nge ko̰o̰ jōó yā Darius tə́, kem nāā kə́ nge ko̰ kutə gidə i kógə̄ḿ tə́, adə̄ i kem nāā Sebat#1.7: Sebat: Á̰a̰ī Rī Nāā gə̄ tū «Kum Najə̄ kə́ Ngón̄g Ngón̄g gə̄» tə́. tə́ ní, kə ndɔ̄ nāā kə́ nge ko̰ kutə jōó gidə i sɔ́ anī, Kɔ́ɔ̄ɓē ɔr̄ najə̄ kə Jakari nge koō ta kə́ ngōn̄ Berekia, kə́ ngōn̄ Ido.
Jakari ənī gotə əda na:
8Ndɔ̄ɔ́ ndɔ̄ ngeé ń noō tə́ ní, m-á̰a̰ dəngam kógə̄ḿ ndi gidə sə́ndá kə́ kərē tə́. Ni-ra i dan ngán kāgə̄ mirtə gə̄ kə́ mbīdə́ to mbōl̄ tə́, kum wól loo tə́. Sə́ndá kə́rē gə̄ ō, kə́ kərē kasə gə̄ ō, kə́ ndaa gə̄ ō, ran̄ gidən tə́. 9m̄-dəje nge kal̄ sə́ndá ní na: Kɔ́ɔ̄ḿ, sə́nda gə̄ ń toō ɔsən̄ i kum gotə rí? De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, tél ədam̄ na: M-ā m-ɔ́jiī kum. 10Ni-ra kə̄ dan ngán kāgə̄ mirtə gə̄ kə́ mbīdə́ to mbōl̄ tə́ ədamə̄ń na: Kɔ́ɔ̄ɓē əladə́ i kadə̄ aw̄n̄ kə̄ loo gə̄ tə́ dɔ nang tə́. 11Loo ń noō tə́ ngé kal̄ sə́nda gə̄ ədan̄ deē yā Kɔ́ɔ̄ɓē kə́ dɔ rā̰ tə́ ń ra dan ngán kāgə̄ mirtə gə̄ kə́ mbīdə́ to mbōl̄ tə́ ní na: Jə-njə̄rā dɔ nang tə́ malang kə taá, banī kōō yá̰á̰ kógə̄ḿ kə́ ɓār̄ gətóo ō, loo malang to jəke ō. 12Anī nge kaw̄ kəla yā Kɔ́ɔ̄ɓē əda na: Kɔ́ɔ̄ɓē nge rāā dɔ rā̰ ō dɔ nang ō, ń toō asə ɓāl̄ kutə sīrí kɔ̄ɔ́ tā n ī-rāań wōn̄g kə ɓē kə́ Jerusalem ō, kə gotə ɓē kə́ rang gə̄ kə́ Juda tə́ ō ní. Ní, ā ī-ngóō i ɓāl̄ kóndóńg ɓáý to̰ tá kadə̄ kumií a o̰o̰īń tām̄ yān tə́ ní? 13Loo ń noō tə́ nge kaw̄ kəla ń a ɔr̄ najə̄ seḿ ní, Kɔ́ɔ̄ɓē tūr̄ ədan najə̄ kə míndə́ kə́ majaá. Najə̄ ń ni-ɔr̄ seneé ní, i najə̄ kə́ a əla go̰ kem deē tə́.
Kɔ́ɔ̄ɓē a gə̄rā ɓē kə́ Jerusalem ɓáý to̰
14 De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, mērə̄m̄ kəda najə̄ yā Kɔ́ɔ̄ɓē kə́ bo kə́ tɔ́gən i ngá̰ý ń toō:
Ɓē kə́ Jerusalem ō,
mbal̄ bo kə́ Siyo̰ ō ní, nelə̄m̄ sedə́ ngá̰ý.
15Banī wōn̄g rāām̄ ngá̰ý
kə nápar de gə̄ ń nin̄ taān̄ kem
rɔ̄də́ nin̄ kɔ́ gə̄ adə̄ al̄ naā tə́ ní.
Tɔdɔ̄ dan ń wōn̄g ń rāām̄
kə Israel ní i ngá̰ý aĺ ɓáý ní,
gír de gə̄ ń toō rāān̄
adə̄ yá̰á̰ kə́ to kum kaȳ aĺ yān
reē kə̄ dɔ madə̄ tə́.
16I tām̄ najə̄ ń toō tə́ n m-ə́da najə̄ ń toō ní,
mā ń i Kɔ́ɔ̄ɓē kə́ bo kə́ tɔ́gə́ḿ i ngá̰ý ní.
M-ā m̄-tūr̄ rɔ̄ḿ kə̄ rɔ̄ Jerusalem tə́
ɓáý to̰ kə kem kə́ majaá.
Loo ń noō tə́ a télən̄ yā rāā kújə́
kə́ bo yāḿ gogə́ rang ō,
a télən̄ yā rāā ɓē gogə́ rang ō.
17Gō tə́ anī, de kə́ dɔ rā̰ tə́ ní
mērə̄m̄ kəda najə̄ kə́ rang
yā Kɔ́ɔ̄ɓē kə́ bo kə́ tɔ́gən i ngá̰ý ń toō:
Yá̰á̰ kə́ majə gə̄ a télən̄
yā taā loo gogə́ kem ɓē
yāḿ gə̄ tə́ ɓáý to̰ ō.
M-ā m̄-tél yā gə̄rā ɓē kə́ Jerusalem
gogə́ ɓáý to̰ ō,
m-ā m̄-tél kə kəhɔ rɔ̄ tɔgɔɔ́ yā kadə̄n gogə́ ō.
Currently Selected:
JAKARI 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.