TOBI 1
1
Yá̰a̰ gə̄ ń rāān̄ yá̰á̰ kété no najə̄ ń toō tə́ ní
1Makətūbə̄ kəla gə̄ ń Tobi rāā ní. Tobi i ngōn̄ Tobiyel kə́ ngōn̄ Ananiyel, kə́ ngōn̄ Aduwel, kə́ ngōn̄ Gabayel, kə́ ngōn̄ Rapayel, kə́ ngōn̄ Raguwel, kə́ gíŕ kaa yā Aryel tə́, kə́ gíŕ ɓē yā Nepətali tə́. 2Əhɔn̄ Tobi kem ɓē kə́ Tisbe tə́ aw̄n̄ seneé dɔ nang kə́ rang tə́ dɔ gúú tə́, ɓāl̄ kṵ ɓē yā Salmanasar, mban̄g kə́ Asiri tə́. Ré deē ra Kidiyos kə́ Nepətali tə́ anī, ɓē kə́ Tisbe i kə̄ dām̄ mbɔ́r ɓē kə́ geleé tə́, dɔ nang kə́ Galile kə́ ḭḭ kə̄ dɔɔ́ tə́, dɔ Ajer tə́ kə̄ dɔɔ́, kum kə̄ gogə́ sḛ́ý dām̄ kə́ no ɓē tə́. Ré deē ra Pogor anī, Tisbe i kə̄ dām̄ mbɔ́r ɓē kə́ kṵṵ́ tə́.
Yá̰a̰ gə̄ ń əga kem Tobi dɔ tə́ ní
3Mā Tobi, m-ə́hɔ gō róbə najə̄ kə́ rɔ̄kum ō, m̄-rāā yá̰á̰ kə́ majə gə̄ kə dɔ ndɔ̄ gə̄ malang ń m̄-ndiń kə kumḿ ní ō. Ngákṵ́ṵ́ḿ gə̄ ō, de kə́ kem ɓē yāḿ tə́ gə̄ ō, ń de gə̄ ɔyn̄jí dɔ gúú tə́ reēn̄ sejí dɔ nang kə́ Asiri tə́, kem ɓē kə́ Ninibə tə́ ní, m-ādə̄də́ kadə̄ karī gə̄ ngá̰ý.
4Kété dan ń mā i kem ɓē yāḿ tə́, dɔ nang kə́ Israel tə́ ní, dan ń mā i balsáá ɓáý ní, gír ɓē gə̄ malang yā kaaḿ Nepətali ɔrə̄n̄ rɔ̄də́ kɔ̄ɔ́ gír kojə yā Dabid tə́ ō, rɔ̄ ɓē kə́ Jerusalem tə́ ō. Tá ɓē kə́ Jerusalem i ɓē kə́ kal kógə̄ḿ beē ń Nə́ɓā gə̄rā dɔ nang kə́ Israel tə́, yā kadə̄ gír ɓē gə̄ malang reē ndējə̄n̄ yá̰a̰ tū tə́ ní. Rāān̄ kújə yā Kɔ́ɔ̄ɓē ń i lo ndi yā Nə́ɓā ní i lo ń nuū tə́ ō, ɔrə̄n̄ kamə̄n tayā tām̄ yā gír kojə gə̄ ń a reēn̄ ɓáý tə́ ní ō. 5Ngákṵ́ṵ́ḿ gə̄ malang ō, de gə̄ kə́ gír kojə yā kaaḿ Nepətali tə́ ō, nin̄ a tunə̄n̄ yá̰a̰ i dɔ mbal̄ gə̄ malang kə́ dɔ nang kə́ Galile tə́. Nin̄ a tunə̄n̄ yá̰a̰ gə̄ ní a adə̄n̄ i ngōn̄ man̄g ń Jeroboam, mban̄g kə́ Israel tə́ udə kem ɓē kə́ Dan tə́ ní. 6Ba mā ɓáa m-ā m-āw̄ rāā nāā gə̄ tə́ i Jerusalem tītə̄ ń Ndū najə̄ kə́ a to ngándáńg ədań tām̄ yā ngán Israel gə̄ tə́ ní, i kə kérə́ḿ dejə. Kété ní, mā m-ā̰ȳ ngɔ̄də̄ kə̄ Jerusalem i kə dɔ kōō yāḿ kə́ teē ta kəga dɔ gə̄ ō, i kə ngán dɔ mandə yá̰a̰ kul̄ yāḿ gə̄ ō, dɔ yá̰a̰ kul̄ kə kɔr̄ kógə̄ḿ dan kə́ kutə tə́ ō, bḭḭ̄ batə̄ yāḿ kə́ kəja ta kəga dɔ gə̄ ō, 7m-āwń m-ādə̄ ngé tun̄ yá̰a̰ gə̄ ń i ngán Aaro̰ gə̄ ní, tām̄ yā dabə tun̄ yá̰á̰ tə́. Gémē yāḿ ō, kasə nduú yāḿ ō, kan̄ kāgə̄ olibə yāḿ gə̄ ō, kan̄ kāgə̄ gərenādə#1.7 Kan̄ kāgə̄ gərenādə: To tītə̄ kan̄ dūȳ beé. yāḿ gə̄ ō, kan̄ kótə̄ yāḿ gə̄ ō, tá gotə kan̄ kāgə̄ kə́ rang yāḿ gə̄ ō ní, m-ādə̄ ngán Lebi kə́ ngé rāā kəla Jerusalem gə̄. Dɔ yá̰á̰ kə́ nge kṵ kutə kə́ rang kə́ nge kṵ jōó ní, i nge kə́ tū nar tə́ n m-ɔ̄r̄ m-āwń Jerusalem kə dɔ ɓāl̄ gə̄ á m-ā m-ə́sá ní. 8Ni kə́ nge kṵ mətá ní, m-ādə̄ i ngán hal gə̄ ō, dəyá̰ kə́ ngé kəlā ndoō gə̄ ō, tə̄rā gə̄ ń ndin̄ dan ngán Israel gə̄ tə́ ní ō. M-ā m-āwń m-ādə̄ i kə dɔ ɓāl̄ kə́ mətá gə̄ malang ō, j-a j-əsa i kə gō ndū najə̄ yā Moyijə ń ɔjə ní ō, i kə gō ń Debora kə́ kṵ́ṵ bɔbə̄jí Ananiyel ɔjəń ní ō. Tɔdɔ̄ bɔbə́ḿ oy taḿ tə́ kɔ̄ɔ́, adə̄ mā i hal. 9Dan ń m̄-tɔgə deē ní, m̄-taā dəyá̰ kə́ gír yā kaají gə̄ tə́ m-ójəń ngōn̄ kə́ dəngam kógə̄ḿ kə́ m-ə̄ndā rīn na i Tobiyas.
10Gō tə́ anī, ɔyn̄ de gə̄ dɔ gúú tə́ aw̄n̄ sedə́ dɔ nang kə́ Asiri tə́ ō, mā ń aw̄n̄ seḿ dɔ gúú tə́ ní, m̄-reē Ninibə ō. Ngákṵ́ṵ́ḿ gə̄ malang ō, de gə̄ kə́ gír kaa yāḿ tə́ ō, a əsan̄ i yá̰a̰ kəsa de ké ngé taā kem Nə́ɓā aĺ gə̄, 11ba mā m̄-mbātə́ kəsa kɔ̄ɔ́. 12M-ə́hɔ gō Nə́ɓā yāḿ kə ngarā̰ kemḿ gēé malang, 13i tām̄ najə̄ ń nuū tə́ n Nge Ndi dɔ rā̰ tə́ rāā adə̄ nelə̄ń Salmanasar seḿ ní. Adə̄ yá̰a̰ malang ń Salmanasar gḛy ní, ni əndā kəla mangən i dɔḿ mā tə́. 14M̄-njə̄rā mbā m-āw̄ dɔ nang kə́ Medi tə́ mang yá̰á̰ tām̄ yān tə́, bátə́ kadə̄ ni oyń. I beé n m̄-tə́ndań sə́lē gində̄ arjā̰a̰ kə́ kum madə̄ gə̄ kutə kógə̄ḿ kə ngong gēé, ɓē Gabayel kə́ ngōkṵ́ṵ Gabəri, dɔ nang kə́ Medi tə́ ní. 15Dan ń Salmanasar oy ní, ngōnən Senakerib ṵṵ ɓē gotən tə́. Róbə kə́ ta kaw̄ kə̄ dɔ nang kə́ Medi tə́ tél i róbə́ kə́ deē un anī kemən taā lo alé, tɔdɔ̄ de gə̄ əsōn̄ wūn̄g adə̄ a rɔ̄ɔ̄n̄ i ngé kṵ ɓē gə̄. Lo ń nuū tə́ lo kadə̄ m-āw̄ dɔ nang kə́ Medi tə́ tṵ ní gətóo.
16Ɓāl̄ yā Salmanasar tə́ ní, m-ādə̄ ngákṵ́ṵ́ḿ kə́ gír kaa yāḿ tə́ gə̄ kadə̄ karī gə̄ ngá̰ý. 17Ngé gə̄ ń ɓōō rāādə́ ní, m-ādə̄də́ yá̰a̰ kəsa yāḿ ō, ngé gə̄ ń rɔ̄də́ i karī ní, m-ādə̄də́ kūbə̄ ō. Ré m-á̰a̰ i nīń ngōn̄ nge ɓē madə́ḿ kógə̄ḿ n ənīn̄ gidə ndogə̄ mbal̄ kə́ gidə ɓē kə́ Ninibə tə́ anī, m̄-dubə̄ ō. 18De gə̄ malang ń Senakerib tɔ̄l̄də́ dan ń rɔ̄ɔ̄ rāanəń tə́, adə̄ ni ḭḭ dɔ nang kə́ Jude tə́ reē gogə́ ɓēé ní, i mā n m̄-dubə̄də́ ní. Dan ngeé ń nuū tə́ ní, i kum mbang ń mban̄g kə́ dɔ rā̰ tə́ əndanəń tām̄ ngonjə̄ kə́ ni ngonjə̄ dɔn tə́ ní. Tɔdɔ̄ dan ń wūn̄g rāan ní, ni tɔ̄l̄ ngán Israel gə̄ ngá̰ý, banī m̄-ɓogə nīńdə́ m̄-dubə̄. Senakerib əla sāādə́ tə́ ba əngedə́ alé. 19De kógə̄ḿ kə́ Ninibə aw̄ əda mban̄g na i mā n i nge dūbə̄ nīńdə́ ní. Anī m̄-ɓɔ̄ɔ̄ rɔ̄ḿ kɔ̄ɔ́. Ba dan ń m̄-reē m-ōō kadə̄ mban̄g na ger̄ najə̄ kə́ dɔḿ tə́ malang ō, na əla de gə̄ adə̄ a sāāmə̄n̄ yā tɔ̄lə̄m̄ ō anī, ɓōĺ rāām̄, adə̄ m-ā̰ȳ. 20De gə̄ ɔyn̄ yá̰a̰ kənge yāḿ malang aw̄nəń lo ngɔ̄m̄ yá̰a̰ yā mban̄g tə́. I nə̄yá̰ḿ Ana ō, ngōnə̄ḿ Tobiyas ō ngóy n əya̰n̄ adə̄mə̄n̄ ní. 21Ndɔ̄ kutə sɔ́ asə aĺ ɓáý anī, ngán mban̄g kə́ dəngam gə̄ jōó tɔ̄lə̄n̄ mban̄g ba a̰ȳ aw̄n̄ mbo̰ō̰ mbal̄ gə̄ kə́ Arara tə́ kɔ̄ɔ́. Ngōnən Asaradon un gotən. Ni əndā Ahikar kə́ ngōn̄ ngōkṵ́ṵ́ḿ Anayel dɔ kəla nar malang kə́ kem ɓē kṵ yān tə́ tə́ ō, əndān dɔ kəla kṵ ɓē malang yā mban̄g tə́ ō. 22Ahikar ɔr̄ najə̄ yāḿ kə mban̄g Asaradon, i lo ń nuū tə́ n m̄-tél m̄-reēń gogə́ Ninibə ní. Ɓāl̄ yā Senakerib tə́ ní, Ahikar i nge kadə̄ mban̄g yá̰a̰ ka̰ȳ, adə̄ ni i de kə́ bo ō, i nge ngɔ̄m̄ mbō̰ yā mban̄g ō, ni i dɔ kəla kṵ ɓē tə́ ō, dɔ kəla nar kə́ Asiri tə́ ō. I ni n Asaradon tél adə̄n kəla yān kə́ kógə̄ḿ beē nəkɔ́ ń nuū gogə́ ɓáý tṵ ní, Ahikar i de kə́ gír kojə yāḿ tə́, ni i nānə̄ḿ.
Currently Selected:
TOBI 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.