ROM 1
1
Pol rāā de kə́ Rom tə́ gə̄ lápə́ya
1I mā Pol n m-ə́la kə makətūbūú mādə̄sí ní. Mā i nge kəla yā Jeju Kərist. Ni ɓārə́m̄ kadə̄ mā i ngōmbang kəla yān ō, ɔrə̄m̄ tayā kadə̄ m-ə̄nā mbēr̄ Najə̄ kə́ Majə yā Nə́ɓā ō.
2Najə̄ kə́ Majə ní sɔɔ̄ i dɔ Ngōnən Jeju Kərist ń i Kɔ́ɔ̄ɓē yājí ní. Nə́ɓā nəkɔ́ ənī míndən najə̄n tə́ kété kɔ̄ɔ́, adə̄ ngé koō ta yān gə̄ ndangən̄ kem makətūbə̄ yān tə́. 3Ta yā deē ndul gə̄ tə́ ní, ojən̄ Jeju i gír kaa yā Dabid tə́. 4Ta yā Nə́ɓā tə́ ɓáa, Nə́ɓā ɔjə kadə̄ ni i Ngōnən i dan ń ni-ndólən dan de kə́ koy gə̄ tə́ kə tɔ́gə yā Ndíĺ kə́ Tálá ní. 5I kə ta kūl̄neé n Nə́ɓā rajəmə̄ń, adə̄ m̄-tél ngōmbang kəla yā kɔsəń gɔn Kərist ní. I yā kadə̄ m̄-rāāń kadə̄ de gə̄ kə́ dan nápar de gə̄ tə́ malang taān̄ kemən ō oōn̄ tan ō. 6Sḭḭ̄ ń Jeju Kərist ɓāŕsí ní, sḭḭ̄ i dan nápar de gə̄ ń toō tə́ ō.
7Ní, m-ə́la kə makətūbūú m-ādə̄sí, sḭḭ̄ kó tár yā Nə́ɓā gə̄ ń ī-ndiī Rom á Nə́ɓā ɓāŕsí kadə̄ ī-téliī ngé yān gə̄ ní. Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.
Pol ndə̄ngā kaw̄ ka̰a̰ ngé taā kem kə́ Rom gə̄
8Yá̰á̰ kə́ ta kəga dɔ ní, m̄-ndadə̄ Nə́ɓā yāḿ kə ta kūl̄ Jeju Kərist tām̄ yāsí tə́ malang. Tɔdɔ̄ kə gō dɔ nang malang ní najə̄ taā kem yāsí ɓār̄ ngá̰ý. 9Tɔdɔ̄ Nə́ɓā i de kə́ kum tə́ yāḿ tām̄ yā najə̄ ń noō tə́. Ni ń m̄-rāā kəla yān kə ngarān̄g kemḿ gēé malang loo kɔjə Najə̄ kə́ Majə yā Ngōnən tə́ ní. Mā m-ɔ̄r̄ najə̄ yāsí ngándáńg, 10kem ndɔ̄ȳ yāḿ tə́ ní, m̄-dəje Nə́ɓā kə ndɔ̄ gə̄ ndɔ̄ gə̄ kadə̄ ré ndigə anī, kə adə̄m̄ ta róbə kadə̄ m-āw̄ m-á̰á̰sí. 11Ngur kaw̄ ka̰a̰sí rāām̄ ngá̰ý, yā kadə̄ m-āw̄ m-ādə̄sí kadə̄ karī yā Ndíl kadə̄ ə́ngeīneé tɔ́gə. 12I tām̄ ń noō tə́ ngóy alé, ba i yā kadə̄ taā kem yāsí adə̄m̄ tɔ́gə ō, taā kem yāḿ mā adə̄sí tɔ́gə ō.
13Ngákó̰ó̰ḿ gə̄, m̄-sāā kadə̄ ī-gerī na m-ɔ́jə kaw̄ loosí nja i ngá̰ý, ba dum̄ dɔḿ i mbée. m̄-sāā kaw̄ loosí kadə̄ kəla yāḿ teē yá̰a̰, tītə̄ ń teēń yá̰a̰ ɓē nápar de gēé tə́ ní. 14Sɔɔ̄ kadə̄ i mā n m-āw̄ ɓē yā Gərek gə̄ tə́ ō, ɓē yā tə̄rā kɔr̄ gə̄ tə́ ō, ɓē ngé ger̄ yá̰á̰ ngá̰ý gə̄, aké i ngé ger̄ yá̰a̰ aĺ gə̄ tə́ ō ní. 15Adə̄ i tām̄ ń toō tə́ n sḭḭ̄ ń ī-ndiī Rom ní, ngur kaw̄ kɔjəsí Najə̄ kə́ Majə rāām̄ ngá̰ý ní.
Tɔ́gə yā Najə̄ kə́ Majə
16Tɔdɔ̄ rɔ̄ḿ sɔlə̄m̄ loo kɔjə Najə̄ kə́ Majə tə́ alé. Najə̄ kə́ Majə i tɔ́gə yā Nə́ɓā kə́ yā kajəń deē malang ń a taā kem ní. Kété i Jipə gə̄, tá gō tə́ i de gə̄ ń nin̄ i Jipə aĺ gə̄ ní. 17Tɔdɔ̄ Najə̄ kə́ Majə ɔjə loo rāā ń Nə́ɓā rāā de gə̄ adə̄ télən̄ de kə́ gōtə́ gə̄ ta kumən tə́ ní: I kə gō taā kemeé ngóy, ta kəla gíŕ tə́ bátə́ ta tɔ̄l̄ ta tə́, tītə̄ ń ndangən̄neé kem makətūbūú na:
Deē ń i de kə́ gōtə́ ta kum Nə́ɓā tə́ kə ta kūl̄ taā kem yān ní, a ndi kə kumneé i kə ta kūl̄ taā kem#1.17 K. 17b: Á̰a̰ī Hab 2.4; Heb 10.38; Gal 3.11.
Najə̄ i dɔ de gə̄ tə́ malang
18Nə́ɓā ndi dɔɔ́ dɔ rā̰ tə́ rāāń wōn̄g kə yá̰a̰ malang kə́ majaĺ ō, kə́ gō tə́ aĺ ō ń de gə̄ rāān̄ ní. Tɔdɔ̄ nin̄-ɔgə̄n̄ najə̄ kə́ rɔ̄kum rāā kəla sɔɔ̄ń yá̰a̰ rāādə́ kə́ majaĺ gə̄. 19Tām̄ yá̰á̰ kə́ dɔ Nə́ɓā tə́ ń deē asə ger̄ ní kumən i kə́ unjə̄ tām̄ yādə́ nin̄ tə́. Nə́ɓā nəkɔ́ ɔjədə́ kum kə̄ ndágá wáńg. 20Tɔdɔ̄ jóo nəkɔ́ ń Nə́ɓā rāań dɔ rā̰ ō dɔ nang ō toó ní, hálən kə́ majə kə́ dum̄ ka̰ā̰ gə̄, adə̄ i kə́ to ngándáńg ō, ngarān̄g kumən nəkɔ́ Nə́ɓā ō ní, deē a a̰a̰də́ i tū kəla rāān gə̄ tə́. I loo ń noō tə́ n najə̄ i dɔ de gə̄ tə́ malang ní. 21Tɔdɔ̄ nin̄-gerə̄n̄ Nə́ɓā ba ɔsən̄ gɔnən aĺ ō, ndadə̄nən̄ sḛ́ý tītə̄ ń de gə̄ a rāān̄neé kə Nə́ɓāá ní aĺ ō. Ba gír̄ yā de gə̄ i gír̄ kə́ ro karī ō, ger̄ yá̰a̰ aĺ kə́ kemdə́ tə́ ənī til kumdə́ tə́ kɔ̄ɔ́ ō. 22Ədan̄ na nin̄ i ngé kum kedə̄ gə̄ banī nin̄ i mbóo gə̄. 23Kadə̄ ndɔ̄ȳn̄ Nə́ɓā ń i de kə́ bo kə́ ta ngóyn gətóó ní a, nin̄-ndɔ̄ȳn̄ ndíĺ yá̰á̰ kə́ tɔ́sə̄ kum gotə de gə̄ ō, yel̄ gə̄ ō, dā̰ gə̄ ō, kur̄ kə́ kagə nang tə́ gə̄ ō ń i yá̰á̰ kə́ a ndumən̄ karī gə̄ ní#1.23 K. 23: Á̰a̰ī Pā 106.20.
24I tām̄ ń noō tə́ n Nə́ɓā əya̰də́ adə̄ rāān̄ yá̰á̰ kə́ to yḛr kum gə̄ kə́ ngurən i kemdə́ tə́ ní. Ba yá̰a̰ gə̄ ní tél ənīn̄ rɔ̄sɔl̄ dɔdə́ tə́. 25Nin̄-unən̄ yá̰á̰ kə́ rɔ̄kum aĺ gə̄ tá əndān̄ kum gotə Nə́ɓā kə́ rɔ̄kum. Nin̄-rɔȳn̄ yá̰á̰ ń Nə́ɓā rāā ní ō, rāān̄ kəla adə̄nən̄ ō. Banī Nə́ɓā nge rāā yá̰a̰ gə̄ ń noō ń kadə̄ tɔ̄ȳnən̄ ngáńdáńg ní, nin̄-rɔȳnən̄ aĺ ō, rāān̄ kəla adə̄nən̄ aĺ ō. Adə̄ i tītə̄ ń noō.
26I tām̄ najə̄ ń noō tə́ n Nə́ɓā əya̰də́ jī ngur yá̰á̰ kə́ to rɔ̄sɔl̄ gə̄ ń rāādə́ tə́ ní. I beé n nə̄yá̰də́ gə̄ a sāān̄ i dəngam gə̄ alé, ba a sāān̄ i dəyá̰ madə̄də́ gə̄ ní. 27Tá dəngam gə̄ əya̰n̄ sāā naā kə́ kə gō gēé ń i sāā naā yā dəyá̰ nin̄ kə dəngameé ní kɔ̄ɔ́, ba ngur kə́ ngá̰ý rāādə́ dɔ naā tə́. Adə̄ nin̄-rāān̄ yá̰á̰ kə́ to rɔ̄sɔl̄ kə́ naá. I tītə̄ ń noō n nin̄-əngenə̄ń ndéý kə́ tām̄ yā ndúm̄ ń nin̄-ndúmə̄n̄ tə́ ní.
28Dan ń nin̄-mbātə́n̄ ger̄ Nə́ɓā ní, Nə́ɓā əya̰də́ kə ger̄ yá̰a̰ aĺ yādə́ adə̄ nin̄-rāān̄ yá̰á̰ ń sɔɔ̄ kadə̄ nin̄-rāān̄ aĺ ní. 29Kemdə́ i yá̰a̰ malang kə́ gō tə́ aĺ gə̄, kə yá̰á̰ kə́ majaĺ gə̄, kə ndə̄ngā yá̰a̰ yā naā gə̄, kə kem ndul gə̄, kə rāā nii gə̄, kə ngur tɔ̄l̄ naā gə̄, kə kɔ̄l̄ gə̄, kə gól̄ loo gə̄, kə háĺ kə́ majaĺ gə̄. Nin̄ i ngé haalo gə̄ ō, 30ngé rāā mə́naā gə̄ ō, madə̄ kɔ̄l̄ Nə́ɓā gə̄ ō. Nin̄ i ngé sāā najə̄ gə̄ ō, ngé kɔjə rɔ̄də́ gə̄ ō, ngé kɔr ta rɔ̄də́ gə̄ ō. Nin̄ i ngé sāā kum kedə̄ kə́ rang gə̄ yā rāāń yá̰á̰ kə́ majaĺ gə̄ ō, ngé mbātə́ najə̄ ta bɔbə̄də́ kə kó̰ó̰də́ gə̄ tə́ ō. 31Kur̄ dɔdə́ gətóo, tá ənīn̄ míndə́də́ anī ran̄ dɔ tə́ aĺ ō. Ndér̄də́ loo rāā madə̄də́ gə̄ yá̰á̰ kə́ tōr̄ tə́ kɔ̄ɔ́ ō, kumdə́ o̰o̰də́ kə deé aĺ ō. 32De gə̄ ń rāān̄ yá̰á̰ kə́ tītə̄ ń noō gə̄ ní gerə̄n̄ majə kadə̄ sarya ń Nə́ɓā gān̄g dɔdə́ tə́ ní i kadə̄ a oyn̄. Nge ń noō nin̄-gerə̄n̄ majə tā, ba rāān̄ i mbéé ngóy alé, ba ré de kə́ rang gə̄ rāān̄ anī, nin̄-ndigən̄də́ loon tə́ ō.
Currently Selected:
ROM 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.