LUK 5
5
Jeju ɓāŕ ngé ndóō yá̰a̰ yān kə́ ta kəga dɔ gə̄
(Á̰a̰ī Mat 4.18-22; Mark 1.16-20)
1Ndɔ̄ kógə̄ḿ tə́ Jeju ra kadə bā kə́ Jenejaret tə́, anī kósə de gə̄ reēn̄ rɔ̄n tə́ koō najə̄ yā Nə́ɓā tə́. Nin̄-ndan̄ dɔn tə́ jululu. 2Ni-a̰a̰ to gə̄ jōó kə́ əhɔn̄də́ kum kā̰ā̰ tə́. Ngé ndo̰o̰ gə̄ risən̄ kemeé kɔ̄ɔ́ ba a tə́gon̄ i réng yādə́ gə̄. 3Anī ni-al̄ kem toó kə́ kógə̄ḿ ń i yā Simo̰ ní tə́, ba əda Simo̰ na kə ɔsə to ní kə̄ gogə́ sḛ́ý kum kə̄ ɓūlūú. Gō tə́ anī ndi nang tə́ kem toó a ndóoń kósə de gə̄ yá̰a̰.
4Dan ń ɔr̄ najə̄ oy anī əda Simo̰ na kə ɔsə to kə aw̄ń dan ɓūlūú ba kə ɓōkə́n̄ réng yādə́ kə əhɔn̄neé kānjə̄.
5Banī Simo̰ tél ədan na:
Ngoljí, j-a̰a̰ tápə̄ ndɔ̄ɔ́ laā bátə́ loo tīī dɔ jí tə́ kanjə̄ kəhɔ yá̰á̰ kógə̄ḿ. Ba dan ń i ḭ̄ n ə́da najə̄ ní, m-ā m-ə̄nā réng maná.
6Nin̄-ənīn̄ réng maná əhɔn̄neé kānjə̄ ngá̰ý adə̄ réng yādə́ a sāā i gán̄g. 7Nin̄-kɔryɔ̄n̄ madə̄ ndo̰o̰də́ gə̄ kem to kə́ rang tə́ kadə̄ reē dḭḭ̄n̄də́. Madə̄də́ gə̄ ní reēn̄ adə̄ nin̄-əhɔn̄ kānjə̄ rosə kem to gə̄ ní jōó mbak, adə̄ to gə̄ ní a rāān̄ i loo nduȳ. 8Dan ń Simo̰ Piyer a̰ā̰ tītə̄ ń noō anī əsō nang tə́ nja Jeju tə́ ba ədan na:
Kɔ́ɔ̄ɓē, ī-tél kə̄ gogə́ na mā i nge rāā majaĺ.
9Ɓōĺ rāā Simo̰ ō, de gə̄ malang ń seneé ní ō najə̄ yā kānjə̄ ń nin̄-əhɔn̄ ngá̰ý tə́ ní. 10Madə̄ Simo̰ gə̄ kə́ ngán Jebede gə̄ ń i Jakə nin̄ kə Ja̰a̰ ní ɓōĺ rāādə́ ō. Banī Jeju əda Simo̰ na:
Ī-lōō ɓōĺ, tām̄ əla gír ɓōólaā ní bátə́ kə no tə́ ḭ̄ i nge ndo̰ de gə̄.
11Loo ń noō tə́ Simo̰ ō madə̄n gə̄ ō, tél reēn̄ kə to yādə́ gēé gogə́ ta gógə́ tə́. Nin̄-əya̰n̄ yá̰a̰ yādə́ malang ba unən gō Jeju.
Jeju rāā adə̄ bānjə̄ kə́ rɔ̄ dəngam kógə̄ḿ tə́ ur̄
(Á̰a̰ī Mat 8.1-4; Mark 1.40-45)
12Tā anī Jeju ugə̄ kem ɓē kə́rēý tə́. Deē kógə̄ḿ kə́ rɔ̄n i bānjə̄ malang i tū tə́ noō ō. Dan ni-a̰a̰ Jeju anī əsō ɔsə non nang tə́ non tə́ ba rāān ɓɔ́ əda na:
Kɔ́ɔ̄ɓē, ré ī-ndigə anī ásə rāā kadə̄ rɔ̄ḿ unjə̄ njáý njáý.
13Jeju əla jīn ɔdənəń ba əda na:
m̄-ndigə, ādə̄ rɔ̄í unjə̄ njáý njáý! Anī kə̄ ta jī tə́ noō bānjə̄ ur̄ rɔ̄ deē ní tə́ kɔ̄ɔ́. 14Anī Jeju ɔgə̄n kəda gotə, ba kə aw̄ kə ɔjə nge tun̄ yá̰a̰ rɔ̄n kadə̄ a̰ā̰ ō, kə adə̄ yá̰a̰ ndējə̄ kə́ tām̄ yā majaĺ kə́ kun dɔn tə́ kɔ̄ɔ́ ń Moijə əda najə̄n ní ō kadə̄ yá̰á̰ ń rāā yá̰a̰ toó téləń kə́ kum tə́ yāḿ tām̄ yādə́ tə́.
15Rī Jeju ɓār̄ ba tél ɓār̄ ɓáý to̰, adə̄ kósə de gə̄ ngá̰ý kánə̄n̄ naā yā koō najə̄ kɔrə̄n ō, yā kadə̄ ni-rāādə́ kadə̄ rɔ̄də́ ngáā ō. 16Ba Jeju a ɔr̄ rɔ̄n i kə kérneé i kem loo gə̄ kə́ ɓē gətóo tū tə́ n a ndɔ̄ȳń ní.
Jeju rāā adə̄ rɔ̄ deē kógə̄ḿ kə́ lígə̄rī ngáā.
(Á̰a̰ī Mat 9.1-8; Mark 2.1-12)
17Ndɔ̄ kógə̄ḿ tə́ Jeju a ndóō de gə̄ yá̰a̰ anī, Parijiyḛ kə ngé ndóō de gə̄ ndū najə̄ gə̄ i dan de gə̄ ní tə́. Nin̄-ḭḭn̄ i kə̄ ngán ɓē gə̄ malang kə gō nang kə́ Galile tə́ ō, kə́ Jude tə́ ō, ḭḭn̄ i Jerusalem ō n reēn̄ ní. Tɔ́gə yā Kɔ́ɔ̄ɓē i naā tə́ kə Jeju. Tɔ́gə́ ní rāā adə̄ kə ta kūl̄ Jeju de gə̄ ngá̰ý rɔ̄də́ ngáā. 18Anī de kə́rēý gə̄ teēn̄ tū tə́ noō kə de kə́ lígə̄rīí reēn̄ seneé, ətōnən̄ i kə waá. Sāān̄ kudə seneé kújú yā kaw̄ kəndān no Jeju tə́, 19banī əngen̄ ta róbə alé, tɔdɔ̄ kósə de gə̄ i ngá̰ý. Anī nin̄-tútən̄ dɔ kújə ba əlanən̄ tū tə́ kə̄ nang tə́ kə waá gēé, adə̄ ugə̄ dan de gə̄ tə́, no Jeju tə́ bang. 20Dan ń Jeju a̰a̰ taā kem yādə́ anī əda na:
Madə́ḿ, yá̰á̰ kə́ majaĺ gə̄ ń ī-rāā ní mā̰ȳn̄ rɔ̄də́ dɔ tə́ kɔ̄ɔ́ kadī.
21Ngé ndóō de gə̄ ndū najə̄ gə̄ ō, Parijiyḛ gə̄ ō, ədan̄ kə̄ kemdə́ tə́ na:
Deē nəkɔ́ ń toō i náā á a tə́da najə̄ kə́ to ngonjə̄ gə̄ dɔ Nə́ɓā tə́ beē? De kə́ asə mā̰ȳ rɔ̄n dɔ yá̰a̰ rāā kə́ majaĺ tə́ i náā, má i Nə́ɓā ngóy aĺ a?
22Jeju ń ger̄ gír̄ yādə́ ní tél ədadə́ na:
Āwī kə gír kə́ beé kemsí tə́ i tām̄ rí tə́. 23I nge kə́ rá n i kə́ ngan̄g aĺ ngá̰ý ní? I kəda na: Majaĺ ń ī-rāā ní mā̰ȳn̄ rɔ̄də́ dɔ tə́ kadī, aké i kəda na: Ḭ́ḭ dɔɔ́ ī-njə̄rā ḿ? 24Ba m̄-sāā kadə̄ ī-gerī na Ngōn̄ deē i kə tɔ́gə mā̰ȳ rɔ̄n dɔ majaĺ gə̄ tə́ dɔ nang tə́. Loo ń ni-əda beé anī tūr̄ tan əda nge lígə̄rī ní na:
Ḭ́ḭ dɔɔ́ ún waá yāí ba āw̄ ɓēé!
25Dəngam ní ḭḭ dɔɔ́ kə̄ ta jī tə́ noō ta kum de gə̄ tə́ malang, un yá̰a̰ ton ba aw̄ ta kaw̄ ɓēé. Ni-ɔsə gɔn Nə́ɓā dɔɔ́ dɔɔ́. 26Ɔr kum de gə̄ malang ō, nin̄-tél a ɔsən̄ i gɔn Nə́ɓā ō, ɓōĺ rāādə́ ngá̰ý adə̄ ədan̄ na n-a̰a̰n̄ yá̰á̰ kə́ jákə́ ngá̰ý ɓōólaā.
Jeju ɓāŕ Lebi
(Á̰a̰ī Mat 9.9-13; Mark 2.13-17)
27Gō tə́ ɓáa Jeju teē ndágá, anī ni-a̰a̰ nge taā lambóó kógə̄ḿ kə́ rīn na i Lebi ndi loo taā lambóó tə́. Ni ədan na:
Ún gōḿ.
28Lebi ḭḭ dɔɔ́, əya̰ yá̰a̰ malang ba un gōn.
29Gō tə́ anī Lebi mēr̄ rāā yá̰a̰ kəsa kə́ ngá̰ý adə̄ Jeju əsa ɓēé looneé. Ngé taā lambóo gə̄ ngá̰ý ō, de kə́ rang gə̄ ō, əsan̄ yá̰a̰ sedə́. 30Anī Parijiyḛ gə̄ ō, ngé ndóō de gə̄ ndū najə̄ gə̄ ń nin̄ i gír yā Parijiyḛ gə̄ tə́ ō ní, yṵ́rə̄n̄ najə̄ ba ədan̄ ngé ndóō yá̰a̰ yā Jeju gə̄ na: I tām̄ rí tə́ á ə́saī yá̰a̰ ō, ā̰yī ō naā tə́ kə ngé taā lambóo gə̄ ō, ngé rāā majaĺ gə̄ ō ní?
31Jeju tūr̄ ədadə́ na:
I ngé rɔ̄ ngan̄g gə̄ n i ngé sāā nja doktóŕ ní alé, banī i ngé mo̰y gə̄ n i ngé sāān gə̄ ní. 32m̄-reē i ɓāŕ de kə́ súmūú gə̄ tə́ alé, ba i ɓāŕ ngé rāā majaĺ gə̄ tə́ kadə̄ tūrə̄n̄ háĺdə́.
Najə̄ kə́ dɔ ndi ɓō tām̄ yā Nə́ɓā tə́
(Á̰a̰ī Mat 9.14-17; Mark 2.18-22)
33Nin̄-ədan̄ Jeju na:
Ngé ndóō yá̰a̰ yā Ja̰a̰ gə̄ a ndin̄ ɓō tām̄ yā Nə́ɓā tə́ dejə ō, a ndɔ̄ȳn̄ ō, ngé yā Parijiyḛ gə̄ rāān tītə̄ ń noō ō, ba i ba̰ý á ngé yāí gə̄ ran̄ i dan kəsa yá̰á̰ kə́ njɔ́ḿ gə̄ tə́ ō, ka̰ȳ yá̰a̰ ō ní?
34Jeju tūr̄ ədadə́ na:
Dan ń ngaa dəyá̰ kijə ndiń kə madə̄n gə̄ ń ni-ɓāŕdə́ ta kəsa yá̰a̰ yā rɔ̄nel̄ taā naā tə́ ní, tɔ́gə́sí asə ra sedə́ ta ndi ɓō tām̄ yā Nə́ɓā tə́ a? 35Banī ndɔ̄ gə̄ a reēn̄ noó, kem ndɔ̄ gə̄ ngeé ń noō tə́ ní a unən̄ ngaa dəyá̰ tadə́ tə́ kɔ̄ɔ́. Loo ń noō tə́ nin̄ a ndin̄ ɓō tām̄ yā Nə́ɓā tə́ tā.
36Ni-ɔr̄ najə̄ kə kūjə́ najá sedə́ ɓáý to̰, ədadə́ na:
Deē a gān̄g ta kūbə̄ kə́ kijə yā kənīń kum ngísə kūbə̄ alé. Ré ḭ̄ deē ī-rāā beé anī kūbə̄ kə́ kijə ní tan i kə́ gān̄g kɔ̄ɔ́ ō, tan kə́ gān̄g ní a əhɔn̄ ta naā kə ngísə kūbə̄ ní aĺ ō. 37Tá deē a tūr̄ kasə kə́ tām̄ ngōn̄ kem sɔl kə́ lōō kōkə̄ gə̄ tə́ aĺ ō. Ré i beé aĺ anī kasə kə́ tām̄ ngōn̄ ní a rāā kadə̄ sɔl gə̄ ní a ndūbə̄n̄ yā kadə̄, kasə ní a aw̄ nang tə́ kɔ̄ɔ́ ō, sɔl gə̄ ní a nujən̄ kɔ̄ɔ́ ō. 38Banī a tūrə̄n̄ kasə kə́ tām̄ ngōn̄ i kem sɔl kə́ kijə gə̄ tə́. 39Deē ń a̰ȳ kasə kə́ tɔgə ní a sāā nge kə́ tām̄ ngōn̄ alé, tɔdɔ̄ ni a əda na kasə kə́ tɔgə na nel̄ tɔȳ nge kə́ tām̄ ngōn̄.
Currently Selected:
LUK 5: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.