LUK 1
1
Luk ɔjə Teopil najə̄ kə́ dɔ makətūbə̄ yān tə́
1Kó tár yāḿ Teopil,
yá̰á̰ kə́ bo bo gə̄ ń rāān̄ yá̰a̰ dɔ dáńjí tə́ ní, de gə̄ ngá̰ý ndangən̄ najə̄n kem makətūbə̄ tə́. 2Ndangən̄ i kə gō ń ngé ka̰a̰ kə kumdə́ gə̄ ənīn̄neé gotə adə̄n̄jí ní. Ngé ka̰a̰ kə kumdə́ gə̄ ní télən̄ i ngé kɔjə najə̄ kə́ bo gə̄ yā Nə́ɓā. 3Teopil, de kə́ bo yāḿ, dan ń m̄-ndəle gíŕ yá̰a̰ gə̄ ń rāān̄ yá̰á̰ ní kə gōó bátə́ ta kəla gíŕ tə́ ní, m-á̰a̰ kadə̄ majə kadə̄ m̄-ndangdə́ kə gō naá kem makətūbūú m-ādī. 4I beé tá ā ī-gerə̄ń kadə̄ yá̰a̰ gə̄ ń ndóōnī ní i yá̰á̰ kə́ rɔ̄kum gə̄.
De kə́ dɔ rā̰ tə́ kógə̄ḿ əda na ojən̄ Ja̰a̰ Batistə
5Dan ń Herod i mban̄g kə́ Jude tə́ ní, nge tun̄ yá̰á̰ kógə̄ḿ ndi noó, rīn na i Jakari, ni i de kə́ gír ɓūtə̄ yā Abia tə́. Nə̄yá̰n i de kə́ gír kaa Aaro̰ tə́ ō, rī nə̄yá̰n ní na i Elijabet ō. 6Nin̄ jōó mbak i de kə́ súmūú gə̄ ta kum Nə́ɓā tə́. Gō míndə gə̄ malang yā Kɔ́ɔ̄ɓē ō, yá̰a̰ malang ń Kɔ́ɔ̄ɓē əda kadə̄ yā rāā ō ní, nin̄-tetən̄ rɔ̄də́ gō tə́ rāān̄ kə gōó majə, adə̄ najə̄ gətóo dɔdə́ tə́. 7Banī nin̄-ojən̄ ngōn̄ alé, tɔdɔ̄ Elijabet i dəyá̰ kə́ kujə ō, nin̄ jōó mbak tɔgən̄ ɓə́gá ngá̰ý kɔ̄ɔ́ ō.
8Kum mbang tun̄ yá̰a̰ ta kum Nə́ɓā tə́ yā Jakari ugə̄, tɔdɔ̄ ta tun̄ yá̰a̰ i dɔ gír ɓūtə̄ yān tə́. 9Kə gō ń ngé tun̄ yá̰a̰ gə̄ a rāān̄neé dejə ní, túgə̄n̄ wə̄lā anī, wə̄lā ɔjə i dɔ Jakari kadə̄ róō ndujə̄ yá̰á̰ kə́ kotə majə. Adə̄ ni-udə kújə yā Kɔ́ɔ̄ɓē tə́. 10Kósə ngán Israel gə̄ malang ran̄ ndágá ra a ndɔ̄ȳn̄ kum mbang ndējə̄ Nə́ɓā ndujə̄ yá̰á̰ kə́ kotə majə tə́. 11Anī de kə́ dɔ rā̰ tə́ yā Kɔ́ɔ̄ɓē ndɔ̄bə̄ Jakari. Ré deē ra loo róō ndujə̄ yá̰á̰ kə́ kotə majə tə́ anī, nge kəla ní ra i loo kə́ to rɔȳ tə́, dām̄ kə́ jī ko̰ tə́ kə njan kə́ dɔɔ́. 12Dan ń Jakari a̰a̰n anī ndílən a̰ȳ, adə̄ ɓōĺ rāān. 13Banī de kə́ dɔ rā̰ tə́ ní ədan na:
Jakari, ī-ɓōĺ alé, tɔdɔ̄ Nə́ɓā oō ndɔ̄ȳ yāí. Nə̄yá̰í Elijabet a ojə ngōn̄ kə́ dəngam yā kadī, ba ā ə̄ndā rīn na i Ja̰a̰. 14Rɔ̄í a nelī ngá̰ý najə̄ yā ngōn̄ ní tə́ ō, de gə̄ ngá̰ý a rāān̄ rɔ̄nel̄ kojən ō. 15Tɔdɔ̄ ni a tél de kə́ bo ta kum Kɔ́ɔ̄ɓē tə́. Ni a a̰ȳ kasə kan̄ kāgə̄ nduú aĺ ō, a a̰ȳ kasə kə́ rang kə́ ngan̄g aĺ ō. Ndíĺ kə́ Táĺ a rosən dan ń ni i kem kó̰o̰n tə́ ɓáý ní. 16Ni a tél kə ngán Israel gə̄ ngá̰ý yā reē sedə́ gogə́ rɔ̄ Kɔ́ɔ̄ɓē ń i Nə́ɓā yādə́ ní tə́. 17Ni a njə̄rā kété no Nə́ɓā tə́ kə Ndíl yā Nə́ɓā kə́ tɔ́gən i ngá̰ý ń Eli nge koō ta a rāań yá̰á̰ kété ní ō, a tūr̄ kem bɔbə̄ ngán gə̄ kə̄ rɔ̄ ngáńdə́ gə̄ tə́ ō, a rāā kadə̄ ngé mbātə́ najə̄ ta Nə́ɓā tə́ gə̄ gírə̄n̄ yá̰á̰ ń de kə́ súmūú gə̄ a gírə̄n̄ ní ō, yā kadə̄ ngán Israel gə̄ ngá̰ý əndān̄neé dɔ rɔ̄də́ danaá tām̄ yā Kɔ́ɔ̄ɓē tə́.
18Banī Jakari dəje de kə́ dɔ rā̰ tə́ ní na ké i rí n a ɔjən kadə̄ yá̰á̰ ní a rāā yá̰á̰ ní wa. Tɔdɔ̄ na n-tɔgə ɓə́ga kɔ̄ɔ́ ō, ɓāl̄ nə̄yá̰n na i ngá̰ý kɔ̄ɔ́ ō.
19Anī de kə́ dɔ rā̰ tə́ ní tūr̄ ədan na:
Mā i Gabəriyel, nge ra ta kum Nə́ɓā tə́ yā kaw̄ń kəla yān. Nə́ɓā əlam̄ kadə̄ m̄-reē m-ɔ̄r̄ najə̄ seí ō, kadə̄ m̄-reē kə Najə̄ kə́ Majə ń toō m-ə́daī ō. 20Banī ḭ̄ ī-taā kem najə̄ yāḿ ń a rāā yá̰a̰ i kə kum mbangneé ní alé. I beé ní kəlā ndo̰o̰í a do̰ō̰ naā adə̄ ā ásə kɔr̄ najə̄ alé, bátə́ ndɔ̄ ń yá̰a̰ gə̄ ń noō a rāān̄neé yá̰á̰ tə́ ní.
21Kósə de gə̄ ra a ngóōn̄ Jakari ō, ɔr kumdə́ tām̄ ni-na̰y ngá̰ý kem kújə yā Kɔ́ɔ̄ɓē tə́ ō. 22Ba dan ń ni teē anī asə kɔr̄ najə̄ sedə́ alé. Loo ń noō tə́ nin̄-gerə̄n̄ kadə̄ ni-a̰a̰ yá̰á̰ kógə̄ḿ kem kújə yā Kɔ́ɔ̄ɓē tə́. Ni ɔjədə́ yá̰a̰ i kə jīneé tá ba asə kɔr̄ najə̄ sedə́ alé.
23Dan ń ndɔ̄ kəla yān təgā anī ni-tél aw̄ gogə́ ɓēé. 24Gō tə́ sḛ́ý anī nə̄yá̰n Elijabet ndān̄ ngōn̄, ba ɓɔ̄ɔ̄ rɔ̄n kɔ̄ɔ́ nāā mí. Ba dan ń a ɓɔ̄ɔń rɔ̄n tə́ ní ni-əda kə̄ kemən tə́ na: 25Kɔ́ɔ̄ɓē a̰a̰ kum to ndoō yāḿ. Tɔdɔ̄ yá̰á̰ ń əla rɔ̄sɔl̄ dɔḿ tə́ dan de gə̄ tə́ ní, ni-un dɔḿ tə́ kɔ̄ɔ́.
De kə́ dɔ rā̰ tə́ kógə̄ḿ əda na a ojən̄ Jeju
26Elijabet ndān̄ ngōn̄ rāā nāā mehḛ́ anī, Nə́ɓā əla de kə́ dɔ rā̰ tə́ ń rīn na i Gabəriyel ní kem ɓē kógə̄ḿ kə́ gō nang kə́ Galile tə́. Rī ɓē ní na i Najaret. 27Əlan i rɔ̄ ngōmandə kógə̄ḿ kə́ adə̄nən̄ kə dəngameé kadə̄ taā tə́. Rī dəngam ní na i Jəjep. Ni i de kə́ giŕ kojə yā mban̄g Dabid tə́. Rī ngōmandə ní na i Mari. 28De kə́ dɔ rā̰ tə́ ní udə kújú gō ngōmandə ní tə́ ba rāān lápə́ya ədan na:
Ī-rāā rɔ̄nel̄, ḭ̄ ń Nə́ɓā rāā kem majə seí ní, Kɔ́ɔ̄ɓē i naā tə́ seí.
29Dan ń Mari oō najə̄ gə̄ ń noō ní anī, ndílən a̰ȳ. Adə̄ ni-əda kə̄ kemən tə́ na ké kum lápə́ya ń noō na i rí wa. 30Anī de kə́ dɔ rā̰ tə́ ní ədan na:
Mari, ī-ɓōĺ alé, tɔdɔ̄ Nə́ɓā rajiī. 31Á̰a̰ā̰, ā ī-ndān̄ ngōn̄, ā ójə ngōn̄ kə́ dəngam ba ā ə̄ndā rīn na i Jeju. 32Ni a tél de kə́ bo ō, a ɓāŕnən̄ na i Ngōn̄ Nə́ɓā kə́ dɔɔ́ ō. Kɔ́ɔ̄ɓē Nə́ɓā a rāā kadə̄ ni a ndi dɔ kōr̄ kāgə̄ mbang tə́ gotə kaan Dabid tə́. 33Ni a o̰o̰ ɓē dɔ gír kojə yā Jakob tə́ ngándáńg ō, gír ko̰o̰ ɓē yān dan a gān̄g aĺ ō.
34Anī Mari əda de kə́ dɔ rā̰ tə́ ní na:
m̄-ger̄ dəngam aĺ ɓáý ní yá̰á̰ ní a rāā yá̰a̰ i ba̰ý?
35De kə́ dɔ rā̰ tə́ ní tél ədan na:
Ndíĺ kə́ Táĺ a reē dɔí tə́ ō, tɔ́gə yā Nə́ɓā kə́ dɔɔ́ a il̄ dɔí tə́ nding ō. I tām̄ najə̄ ń noō tə́ n ngōn̄ ń ā ójən ní i de kə́ táĺ ō, a ɓāŕnən̄ na i Ngōn̄ Nə́ɓā ō ní. 36Á̰a̰ā̰, ngeeí Elijabet ń de gə̄ ədan̄ na i dəyá̰ kə́ kujə ní, ndān̄ ngōn̄ dɔ ɓə́gan tə́ rāā nāā mehḛ́ kɔ̄ɔ́. 37Tɔdɔ̄ yá̰á̰ kə́ dum̄ Nə́ɓā gətóo.
38Tā anī Mari əda na:
Mā i nge kəla yā Kɔ́ɔ̄ɓē. Ādə̄ yá̰a̰ malang rāā yá̰a̰ tām̄ yāḿ tə́ kə gō najə̄ kə́ taí tə́.
Anī de kə́ dɔ rā̰ tə́ yā Nə́ɓā ní əya̰n ba aw̄.
Mari aw̄ go̰ō̰ Elijabet tə́
39Gō tə́ sḛ́ý anī Mari ḭḭ aw̄ kə nāgá ta kaw̄ kə̄ ɓē kógə̄ḿ kə́ gō nang kə́ mbalá dɔ nang kə́ Jude tə́. 40Ni-aw̄ udə kújú ɓē Jakari, ba rāā Elijabet lápə́ya. 41Dan ń Elijabet oō lápə́ya ń Mari rāān ní anī ngōn̄ jənga rik rik kemən tə́. Ndíĺ kə́ Táĺ rosə Elijabet, 42anī ni əga kɔŕ ngá̰ý əda na:
Nə́ɓā rāā majə seí tɔȳ yā gotə dəyá̰ gə̄ malang ō, ni rāā majə kə ngōn̄ kə́ kemií tə́ ō! 43Mā i náā á kó̰ó̰ Kɔ́ɔ̄ɓē yāḿ n reē looḿ ní? 44Tām̄ dan ń m-ōō ndūí kə́ ī-rāāməń lápə́ya ní anī ngōn̄ jənga rik rik kemḿ tə́ kə rɔ̄nelēé. 45Rɔ̄nel̄ i kə dəyá̰ ń taā kem ní. Tɔdɔ̄ yá̰á̰ ń Kɔ́ɔ̄ɓē əla ədan najə̄n ní a rāā yá̰a̰ rɔ̄kum.
Pā yā Mari
46Anī Mari əda na:
M-ā m̄-tɔ̄ȳ Kɔ́ɔ̄ɓē tām̄ ni i de kə́ bo.
47Kɔ́ɔ̄ɓē Nə́ɓā nge kajəḿ
rāām̄ adə̄ rɔ̄ḿ nelə̄m̄ ngá̰ý.
48Tām̄ ni gír̄ dɔḿ mā nge kəla yān kə́ dəyá̰ tə́,
mā ń i yá̰á̰ kógə̄ḿ aĺ bátə́ ní.
Tɔdɔ̄ əla gír ngɔr ń toō tə́ bátə́ kə̄ no tə́ ní
ngán deē ndul gə̄ malang a ədamə̄n̄ kə gō naá
na yāḿ i rɔ̄nel̄.
49Tɔdɔ̄ Nə́ɓā kə́ bo kə́ tɔ́gən i ngá̰ý
rāā yá̰á̰ kə́ majə ngá̰ý gə̄ tām̄ yāḿ mā tə́.
Ni i kə́ táĺ.
50Kem majə yān a to ngándáńg
tām̄ yā ngé ɓōĺ ndílən gə̄ tə́.
51Ni ɔjə tɔ́gən kə́ ngá̰ý kə̄ ndágá.
Tə̄ndā de gə̄ ń kɔjə rɔ̄ i kemdə́ tə́ ní,
tə̄ndā tḭ̄ḭ̄də́ kɔ̄ɔ́.
52Ni mbə́rē mban̄g gə̄
dɔ kōr̄ kāgə̄ mbang yādə́ gə̄ tə́ tə́nīdə́ ō,
ngé gə̄ ń najə̄də́ gətóó bátə́ ní,
ni-ɔsədə́ kə̄ dɔɔ́ ō.
53Ngé gə̄ ń ɓō rāādə́ ní,
ni-adə̄də́ yá̰a̰ kəsa kə́ majə gə̄
ādə̄ əsa ndānə̄n̄,
ba tə̄ɓā ngé kənge yá̰a̰ gə̄
ādə̄ ɔtə aw̄n̄ jīdə́ karī.
54-55Ni-ənī míndən yā rāā kem majə kə kaají gēé,
yā rāā kem majə ngándáńg kə Abəraham ō,
ngánən gə̄ ō, ngán kaan gə̄ ō.
Əga kemən dɔ kem majə yān ní tə́,
adə̄ ni-rāā kə ngán Israel gə̄
ń i ngé kəla yān gə̄ ní.
56Mari ndi kə Elijabeté asə nāā mətá pá tá kadə̄ tél aw̄ ɓēé ɓáý.
Elijabet ojə ngōn̄ kə́ dəngam
57Dan ń ndɔ̄ kojə ngōn̄ yā Elijabet ugə̄ anī, ni-ojə ngōn̄ kə́ dəngam. 58Madə̄ ɓēn gə̄ ō, ngéén gə̄ ō oōn̄ kadə̄ Kɔ́ɔ̄ɓē rāā kem majə seneé, anī nin̄-rāān̄ rɔ̄nel̄ seneé najə̄n tə́. 59Reēn̄ kə ngōn̄ ní kə ndɔ̄ kə́ nge ko̰ sɔ́sɔ́ yā kəja mɔtən. Nin̄-sāān̄ kəndā rī bɔbə̄n Jakari dɔn tə́. 60Ba kó̰o̰n əda na i tītə̄ ń noō alé, a ɓāŕnən̄ na i Ja̰a̰.
61Anī ədanən̄ na:
Ba ń deē kógə̄ḿ dan ngééí gə̄ tə́ kə́ rīn to tītə̄ ń noō gətóó ní?
62Nin̄-ɔrə̄n̄ najə̄ kə bɔbə̄ ngōnōó kə jīdə́, dəjenən̄ na ké gḛy kəndā rī ngōn̄ ní na i rí wa. 63Anī Jakari dəje kadə̄ adə̄nən̄ bar ndang yá̰á̰ kógə̄ḿ, anī ni-ndang najə̄ dɔ tə́ na: Rīn na i Ja̰a̰. Loo ń noō tə́ ɔr kumdə́ malang. 64Anī kə̄ ta jī tə́ noō ta Jakari ndɔ̄bə̄ ō, gír kəlā ndo̰n tútə ō, adə̄ a ɔr̄ najə̄ ō, tɔ̄ȳ Nə́ɓā ō. 65Loo ń noō tə́ ɓōĺ rāā madə̄ ɓēdə́ gə̄ malang ō, de gə̄ a ənīn̄ i gotə yá̰a̰ gə̄ ń rāān̄ yá̰á̰ ní gō nang kə́ mbalá yā dɔ nang kə́ Jude tə́ malang ō. 66De gə̄ malang ń oōn̄ najə̄ gə̄ ń noō ní gírə̄n̄ yá̰a̰ dɔ tə́, ba dəjen̄ rɔ̄də́ najə̄ ədan̄ na ké ngōn̄ nəkɔ́ ń toō ní ké a tél i de kə́ ba̰ý wa. Tɔdɔ̄ tɔ́gə yā Kɔ́ɔ̄ɓē i kə ngōn̄ ní rɔ̄kum.
Jakari tɔ̄ȳ Nə́ɓā ō, ɔr̄ najə̄ kə́ nge koō ta tə́ ō
67 Ndíĺ kə́ Táĺ rosə kem bɔbə̄n Jakari, adə̄ ɔr̄ najə̄ kə́ nge koō ta tə́ əda na:
68Kɔ́ɔ̄ɓē ń i Nə́ɓā yā ngán Israel gə̄ ní,
asə kadə̄ de gə̄ tɔ̄ȳnən̄!
Tām̄ ni-əndā kumən gō
gír deē yān gə̄ tə́ ba ajədə́.
69Ni teē kə nge kajə de gə̄ kógə̄ḿ kə́ tɔ́gən i ngá̰ý adə̄jí,
teē seneé i dan de gə̄
kə́ gír kaa yā nge kəla yān Dabid tə́.
70I yá̰á̰ ń noō n ni-əda najə̄n kété jóó ní,
əndā najə̄ ní i ta ngé koō ta kə́ táĺ gə̄ tə́.
71Ni-ənī míndən adə̄jí,
əda na n-a n-gān̄g dɔjí jī madə̄ ba̰ā̰jí gə̄ tə́ ō,
de gə̄ malang ń imə̄n̄jí ní,
na n-a n-taājí jīdə́ tə́ yā kəya̰jí dɔɔ́ ō.
72Əda na n-a n-ɔjə kaají gə̄ kem majə yān ō,
na a əga kemən dɔ madə̄ naā yān kə́ táĺ tə́ ō.
73Tɔdɔ̄ kété ní Nə́ɓā ənī míndən adə̄ kaají Abəraham
74yā taājí jī madə̄ ba̰ā̰jí gə̄ tə́ yā kəya̰jí dɔɔ́,
kadə̄ jə-rāā kəla j-adə̄n kanjə̄ ɓōĺ.
75Kadə̄ ta kumən tə́ ɓáa jḭḭ i de kə́ táĺ gə̄ ō, kə́ gōtə́ gə̄ ō,
kə dɔ ndɔ̄ gə̄ malang ń jə-ndiń kə kumjí ní.
76Ba ḭ̄ ngōnə̄ḿ, a ɓāŕnī na i nge koō ta yā Nə́ɓā kə́ dɔɔ́,
tɔdɔ̄ ā ī-njə̄rā kété no Kɔ́ɔ̄ɓē tə́ yā rāā gō róbə yān ō,
77yā rāā kadə̄ gír deē yān gə̄ gerə̄n̄
kadə̄ a ajədə́ kə ta kūl̄ mā̰ȳ kə́ a mā̰ȳ rɔ̄n dɔ majaĺ yādə́ gə̄ tə́ ō.
78Tɔdɔ̄ kum Nə́ɓā yājí o̰o̰n ngá̰ý ō,
kemən majə ngá̰ý ō.
Ni a rāā kadə̄ loo kə́ unjə̄ kow kógə̄ḿ ḭḭ dɔ rā̰ tə́ unjə̄ dɔjí tə́ kow
tītə̄ mbang kə́ əɓa gír ɓē tə́ beé.
79Yā kadə̄ ngé gə̄ ń ndin̄ tilií ō,
ndíl yo tə́ ō ní a̰a̰n̄neé loo ō,
yā kɔjəń njají loo njə̄rā dɔ róbə kem sɔl̄ tə́ ō.
Ja̰a̰ Batistə tɔgə
80Ngōn̄ ní tɔgə kum kə̄ kété kété ō, ngan̄g ō. Ni a ndi i loo gə̄ kə́ de gə̄ gətóon̄ tū tə́ tə́, bátə́ ndɔ̄ ń ni-rāań adə̄ ngán Israel gə̄ ger̄nən̄ tə́ ní.
Currently Selected:
LUK 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.