JUD 1
1
Jud rāā de gə̄ lápə́ya
1I mā Jud, nge kəla yā Jeju Kərist kə́ ngōkó̰o̰ Jakə n m̄-ndang makətūbə̄ ń toō m-ə́lań m-ādə̄ ngé gə̄ ń Nə́ɓā ɓāŕdə́ ní, adə̄ i ngé gə̄ ń Bɔbə̄jí Nə́ɓā táŕdə́ ō, Jeju Kərist ngɔ̄m̄də́ ō ní.
2Ādə̄ mā̰ȳn̄ rɔ̄də́ dɔsí tə́ ngá̰ý ō, sɔlə̄n̄ kemsí ngá̰ý ō, tárən̄sí ngá̰ý ō.
Ngé ndóō de gə̄ yá̰á̰ kə́ rɔ̄kum aĺ gə̄
(Á̰a̰ī 2Pi 2.1-17)
3Kó tár yāḿ gə̄, najə̄ kə́ dɔ kajə deē tə́ ń i najə̄ kə́ sɔɔ̄jí malang ní, m̄-gḛy ngá̰ý kadə̄ m̄-ndang makətūbūú m-ādə̄sí. M-á̰a̰ā̰ ní majə kadə̄ m̄-ndang m-ə́lań go̰ kemsí tə́, kadə̄ ī-rɔ̄ɔ̄īneé dɔ taā kem ń i yá̰á̰ kə́ Nə́ɓā adə̄ deē yān gə̄ i nja kógə̄ḿ beē ngóý ní tə́. 4Tɔdɔ̄ de kə́rēý kə́ ngé kem ndul gə̄ udən̄ dansí tə́ jəke. Nin̄-tūrə̄n̄ gír rajə ń Nə́ɓā rajə de gə̄ ní kɔ̄ɔ́ adə̄ rāān̄ i yá̰a̰ kutə̄ gidə rɔ̄ yādə́ tə́, yā rāań yá̰á̰ kə́ majaĺ kə́ tayā tayā gə̄ ń ngurən i kemdə́ tə́ ní. Ba Jeju Kərist ń i ni ngóy n i ngoljí ō, Kɔ́ɔ̄ɓē yājí ō ní, nin̄-mbātə́nən̄ kɔ̄ɔ́. Sarya ń gāngə̄n̄ dɔdə́ tə́ ní, ndangən̄ najə̄n kem makətūbə̄ yā Nə́ɓā tə́ i kété jóo#1.4 K. 4: Á̰a̰ī Pā 69.28-29.
5Ká ré sḭḭ̄ ī-gerī yá̰á̰ ń toō kɔ̄ɔ́ majə ngá̰ý gə̄gē anī, m̄-sāā ter̄ kemsí dɔ tə́ ɓáý. Tām̄ dan ń Kɔ́ɔ̄ɓē ajə gír deē yān gə̄ kem ɓē kə́ Ejiptə tə́ ní, gō tə́ anī ni-rāā adə̄ ngé gə̄ ń taān̄ kemən aĺ ní oyn̄ kɔ̄ɔ́. 6Ādə̄ əgā kemsí dɔ tə́ na de kə́ dɔ rā̰ tə́ gə̄ ń əya̰n̄ loo kə́ bo yādə́ ba ndɔ́tə̄n̄ kɔ̄ɔ́ loo ndidə́ tə́ ní, Nə́ɓā ngɔ̄m̄də́ gírí nang tə́, kum loo kə́ risə til nding tə́, kə súĺ kə́ a to ngándáńg, tām̄ yā ndɔ̄ ngān̄g sarya kə́ bo tə́. 7Ādə̄ əga kemsí dɔ ɓē kə́ Sodom tə́ ō, kə́ Gomor tə́ ō, ɓē gə̄ kə́ kadədə́ gə̄ tə́ ō. De kə́ kemeé gə̄ rāān̄ yá̰á̰ kə́ majaĺ tītə̄ yā de kə́ dɔ rā̰ tə́ gə̄ ń noō. Nin̄-ɓōkə́n̄ rɔ̄də́ tū sāā naā kə́ kə gō róbəneé aĺ tə́, adə̄ dəngam gə̄ a sāān̄ dəngam madə̄də́ gə̄ tām̄ yā rɔ̄nel̄ yādə́ tə́#1.7 K. 7: Á̰a̰ī Tkg 19.1-25. Nin̄-əngen̄ ndéý kə́ tām̄ yā yá̰a̰ rāādə́ kə́ gō tə́ aĺ tə́. Ndéy yādə́ ní i hor kə́ to ngándáńg kə́ o̰o̰də́ ō, yá̰á̰ ń rāādə́ ní téĺ i tāā kə́ kumən unjə̄ ngá̰ý tām̄ yā de gə̄ malang tə́ ō.
8Adə̄ de gə̄ ngeé ń m-ɔ̄r̄ najə̄ yādə́ toō ní, rāān̄ yá̰a̰ i tītə̄ yādə́: Nin̄-rāān̄ majaĺ kə rɔ̄də́ nin̄ kɔ́ gɔ̄ɔ́ sɔɔ̄ń yá̰a̰ gə̄ ń nī rāādə́ dɔ tə́ ní ō, əya̰n̄ Nə́ɓā kɔ̄ɔ́ ō, tájə̄n̄ de kə́ to kɔsə gɔndə́ gə̄ kə́ dɔ rā̰ tə́ ō. 9Yá̰á̰ ń nin̄-rāān̄ ní, Mikael ń i ngol de kə́ dɔ rā̰ tə́ gə̄ kə dɔneé ní gə̄gē rāā beé alé. Tɔdɔ̄ dan ń Mikael mbātə́ najə̄ gō diabəl tə́ adə̄ tɔ́tə̄n̄ naā dɔ nīń Moijə tə́ ní, ni-gān̄g sarya tájəń nge gól̄ loo gə̄ alé. Najə̄ ń ni ədan ní n toó ngóy: Kadə̄ Kɔ́ɔ̄ɓē əndaī tām̄ yā yá̰a̰ rāāí kə́ majaĺ tə́! 10De gə̄ ngeé ń toō ní, yá̰á̰ ń nin̄-gerə̄n̄ aĺ ɓáa tájə̄n̄ yá̰á̰ ní, ba yá̰á̰ ń nin̄-gerə̄n̄ láẃ ngá̰ý tītə̄ dā̰ kə́ bembeé gə̄ beé kanjə̄ gír̄ yá̰á̰ dɔ tə́ ní, i yá̰á̰ kə́ a tḭ̄ḭ̄ i tadə́. 11Yá̰á̰ kə́ to kum kaȳ aĺ a əsō dɔdə́ tə́ tām̄ nin̄-unən̄ i róbə́ ń Kain un ní. Nin̄-ndúmə̄n̄ tām̄ yā nar tə́ tītə̄ yā Balam ō, udən̄ kɔ̄ɔ́ sɔɔ̄ń mbātə́ najə̄ yādə́ kə́ tītə̄ yā Kore ō. 12Dan ń ī-ndiī ā ə́saī yá̰a̰ kə naá kə́ loo ngákó̰o̰ naā gə̄ tə́ ɓáa, nin̄ i yá̰á̰ kə́ adə̄ deē wōn̄g gə̄ dansí tə́. Nin̄ i de kə́ ngé kəsa wa kanjə̄ kadə̄ rɔ̄də́ sɔl̄də́ gə̄ ō, gírə̄n̄ i dɔ rɔ̄də́ nin̄ kɔ́ gə̄ tə́ ngóy ō. Nin̄-ton̄ i tītə̄ man̄ kə́ il̄ kanjə̄ kedə kə́ nél tə̄ndā tḭ̄ḭ̄ kɔ̄ɔ́ beē ō, ton̄ i tītə̄ kāgə̄ gə̄ kə́ nāā kan̄də́ ugə̄ banī anə̄n̄ aĺ gə̄ beé ō, ton̄ i tītə̄ kāgə̄ gə̄ kə́ ɔrə̄n̄də́ kɔ̄ɔ́ kə ngəradə́ gēé adə̄ oyn̄ kɔ̄ɔ́ beé ō. 13Nin̄-ton̄ i tītə̄ bəngál bā bo gə̄ beé, adə̄ húūlú dɔdə́ i yá̰a̰ rāādə́ kə́ to rɔ̄sɔl̄ gə̄ ō, ton̄ i tītə̄ tə́yō̰ gə̄ kə́ a dáȳn̄ dɔɔ́, kə́ Nə́ɓā ngɔ̄m̄ loo kə́ risə til nding tām̄ yādə́ tə́ kadə̄ ndin̄ kum tə́ ngándáńg beé ō.
14Henok ń i de kə́ gír kojə yā Adam tə́ kə́ nge ko̰ sīrí ní, i ni n əda najə̄ kə́ Nə́ɓā əndā tan tə́ tām̄ yā de gə̄ ngeé ń toō tə́ ní. Ni-əda kété jóo na: Ōōī a, Kɔ́ɔ̄ɓē a reē kə deē yān kə́ táĺ gə̄ kə́ dɔ rā̰ tə́ kə́ dūbūúdə́ i nja kutə, 15yā rāań sarya kə de gēé malang ō, yā kɔsəń ngóýdə́ ō, tām̄ yā yá̰á̰ kə́ majaĺ gə̄ malang ń nin̄-rāān̄ loo ngé mbātə́ rāā yá̰a̰ kə gō ń Nə́ɓā ndigə tə́ ní ō, tām̄ yā najə̄ kə́ tōr̄ gə̄ malang ń ngé rāā majaĺ kə́ ngé ɓōĺ ndíl de gə̄ aĺ gə̄ ń noō ədan̄ dɔn tə́ ní ō.
16De gə̄ ngeé ń toō ní, nin̄ i ngé tām̄ bujə bujə gə̄ ō, rɔ̄də́ nel̄də́ aĺ ō, a nōōn̄ i rɔ̄də́ kə dɔ ndɔ̄ gə̄ ō, a ɔrə̄n̄ i najə̄ kə́ al̄ tadə́ gə̄ ō, nin̄ i ngé gól̄ kum de gə̄ yā kəngeń yá̰a̰ ō.
Tāā gə̄ ō, kɔjə̄ gə̄ ō
17Banī sḭḭ̄ kó tár yāḿ gə̄, ādə̄ əga kemsí dɔ yá̰á̰ ń ngámbang kəla yā Kɔ́ɔ̄ɓē yājí Jeju Kərist gə̄ tāān̄sí dɔ tə́ kété ní. 18Nin̄-ədan̄sí na: Ta ngóy ndɔ̄ gə̄ tə́ anī ngé mbóo kə de gēé gə̄ na a ḭḭn̄ yā mbóo kə de gēé ō, i yá̰á̰ kə́ majaĺ gə̄ ń kemdə́ gḛy ngá̰ý ní n a ndɔ́r̄də́ ta róbə́ ní ō. 19I nin̄ n i ngé rāā yá̰a̰ kadə̄ de gə̄ mbātə́n̄ naā ní. I háĺdə́ n o̰o̰ ɓē dɔdə́ tə́ ba i Ndíĺ Nə́ɓā alé. 20Banī sḭḭ̄ kó tár yāḿ gə̄, ī-raī dɔ taā kem yāsí tə́ kə háĺ kə́ kɔr̄ kam̄ tām̄ yā Nə́ɓā tə́ ō, ə̄ndāī tɔ́gə́sí dɔ tə́ ī-rāāīneé yá̰a̰ kum kə̄ kété kété ō. Ī-ndɔ̄yī Nə́ɓā kə ta kūl̄ Ndíĺ kə́ Táĺ. 21Sḭḭ̄ kɔ́ gə̄ ī-ngɔ̄mī rɔ̄sí. Ī-raī dɔ táŕ ń Nə́ɓā táŕsí tə́ ní ī-ngóōīneé ta ndi kə kumuú kə́ ngándáńg ń Kɔ́ɔ̄ɓē Jeju Kərist a adə̄sí kə ta kūl̄ kem majə yānneé ní.
22Ādī kumsí o̰o̰sí kə ngé gə̄ ń kemdə́ a rāādə́ ɓáý ní. 23Ájiīdə́ kɔ̄ɔ́ kum hor tə́. Kə́ tām̄ yā gotə gə̄ tə́ ɓáa ādī kumsí o̰o̰sí sedə́, ba ādī kum ko̰o̰ yāsí ní i kum ko̰o̰ kə́ kə ɓōló danaá. Kūbə̄ yādə́ gə̄ ń dā̰ rɔ̄də́ ɔdə rɔ̄ ní gə̄gē ādī nel̄sí aĺ ngá̰ý.
Tɔ̄ȳ kə́ ta tɔ̄l̄ ta tə́
24Nə́ɓā kə́ to kɔsə gɔn ń asə ngɔ̄m̄sí kadə̄ ə̄sōī aĺ ō, asə rāā kadə̄ ī-raī kə rɔ̄nelēé kanjə̄ najə̄ dɔsí tə́ ta kumən tə́ ō ní, 25ni ń i Nə́ɓā kə́ kal kógə̄ḿ beē kə́ nge kajəjí kə ta kūl̄ Kɔ́ɔ̄ɓē yājí Jeju Kərist ní, kɔsə gɔn i yān ō, i ni n i de kə́ bo ō, tɔ́gə i yān ō, ko̰o̰ ɓē i yān ō, kem ɓāl̄ gə̄ ń mānə̄n̄ kɔ̄ɔ́ tə́ ní ō, ngɔlaā ō, mbóńg kə̄ no tə́ ō. Adə̄ i tītə̄ ń noō.
Currently Selected:
JUD 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.