OJEE 1
1
1Najə̄ ń Kɔ́ɔ̄ɓē əda Ojee kə́ ngōn̄ Beri, dan ń Jeroboam kə́ ngōn̄ Joas i mban̄g kə́ Israel tə́ ní n toó. Dan ngeé ń noō tə́ ní, Ojias ō, Yotam ō, Akaj ō, Ejekias ō, nin̄ i mban̄g gə̄ kə́ Juda.
Kojə yā nge koō ta ō, najə̄ kə́ ta kəga dɔ ń Nə́ɓā ɔr̄ ní ō
2Ta kəla gír najə̄ ń Kɔ́ɔ̄ɓē əda gír deē yān gə̄ kə ta kūl̄ Ojee ní n toó. Ni-əda Ojee na:
Āw̄ ī-taā dəyá̰ kə́ nge rāā ájə́ba gíŕ kújə ɓesēé#1.2 Dəyá̰ kə́ nge rāā ájə́ba gíŕ kújə ɓesēé i dəyá̰ kə́ dəngam gə̄ ń a reēn̄ rāā ɓesə̄ Baal tə́ ō, ɓesə̄ Astarte tə́ ō ní, a ɓīīn̄ seneé..
Ngán gə̄ ń ni a ojə yā kadī ní, i ngán dəyá̰ kə́ nge rāā ájə́ba.
Tɔdɔ̄ de kə́ kem ɓē ń toō tə́ gə̄ rāān̄ ájə́ba,
tām̄ nin̄ rɔyn̄ nə́ɓā kə́ rang gə̄ kanjə̄ kadə̄ i mā Kɔ́ɔ̄ɓē.
3Loo ń noō tə́ Ojee aw̄ taā Gomer kə́ ngōn̄ Dibəlaim. Dəyá̰ ní ojə ngōn̄ kə́ dəngam kógə̄ḿ adə̄n. 4Anī Kɔ́ɔ̄ɓē əda Ojee na
kə əndā rīn na i Isreel,
tɔdɔ̄ sḛ́ý laā anī, m-ā m̄ rɔ̄ɔ̄ kə kojə yā mban̄g Yehu
najə̄ yā mósə́ ń ɓōkə́n̄ nang tə́ wól loo kə́ Jisreel tə́ ní.
M-ā m̄-nujə ko̰o̰ ɓē yā mban̄g kə́ dɔ nang kə́ Israel tə́ kɔ̄ɔ́.
5Ndɔ̄ ń noō tə́ ní,
m-ā m̄-tetə ga̰ gərā kə́ Israel tə́ kɔ̄ɔ́
wól loo kə́ Jisreel tə́.
6Gomer ndān̄ ngōn̄ ɓáý to̰ ba ojə ngōn̄ kógə̄ḿ kə́ dəyá̰. Anī Kɔ́ɔ̄ɓē əda Ojee na
kə əndā rī ngōn̄ ní na i Loo Ruhama ń
kumən na i tárəm̄ alé ní.
Tɔdɔ̄ m-ā m̄-ɔ́jə́ tár kə̄ ndágá
tām̄ yā de gə̄ kə́ Israel tə́ to̰ alé,
m-ā m̄-táŕdə́ to̰ aĺ i kə́ bátə́ gə̄ tə́.
7Banī m-ā m̄-tár de kə́ Juda gə̄ ngándáńg. Mā Kɔ́ɔ̄ɓē Nə́ɓā yādə́ m-ā m-ájə́də́, ba i kanjə̄ ga̰ gərā ō, kaskar ō, gotə yá̰a̰ rɔ̄ɔ̄ kə́ rang gə̄ ō, kanjə̄ sə́nda gə̄ ō, ngé kal̄ sə́nda gə̄ ō.
8Gomer ɔr̄ Tarəmale ta mba tə́. Gō tə́ anī ni ndān̄ ngōn̄ ɓáý to̰, ba ojə ngōn̄ kə́ dəngam kə́ rang. 9Anī Kɔ́ɔ̄ɓē əda Ojee na
kə əndā rī ngōn̄ ní na i Loo Ami ń
kumən na i gír deē yāḿ gə̄ aĺ ní.
Tɔdɔ̄ sḭḭ̄ Israel gə̄, sḭḭ̄ i gír deē yāḿ gə̄ to̰ alé ō,
mā i yá̰á̰ kógə̄ḿ tām̄ yāsí to̰ aĺ ō.
Currently Selected:
OJEE 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.