LUK 2
2
Ɔjən̄ Jeju Betlehem
(Á̰a̰ī Mat 1.18-25)
1Dan ngeé ń noō tə́ ní, Sejar Ogustə ndang yá̰a̰ kadə̄ yā rāā adə̄ ənīn̄ mbēr̄ rāā sānjə̄mā dɔ nang tə́ malang kə taá. 2Rāā sānjə̄mā ngeé ń toō i nge kə́ ta kəga dɔ ɓáý, dan ń Kirinius a o̰o̰ń ɓē dɔ nang kə́ Siri tə́ ní. 3Adə̄ de gə̄ malang aw̄n̄ kə̄ ɓē kojədə́ gə̄ tə́ kadə̄ əndān̄ rīdə́ makətūbūú loo rāā sānjə̄mā tə́.
4Jəjep aw̄ ō. Ni-ḭḭ Najaret, ɓē kə́ gō nang kə́ Galile tə́, aw̄ Betlehem ɓē kojə mban̄g Dabid tə́ gō nang kə́ Jude tə́, tɔdɔ̄ ni i de kə́ gír kaa Dabid tə́. 5Aw̄n̄ nin̄ i kə Mari, dəyá̰ nong yān ń ndān̄ ngōn̄ ní, kadə̄ əndān̄ rīdə́ makətūbūú loo rāā sānjə̄mā tə́. 6Dan ń nin̄ i noó anī, ndɔ̄ kojə yā Mari ugə̄. 7Ni ojə ngōn̄ kə́ dəngam, i ngōn̄ hágən. Ni ɓírə̄n kə kūbūú, ba ənīn kem kōr̄ kāgə̄ kəsa yá̰a̰ yā dā̰ gə̄ tə́, tɔdɔ̄ loo kə́ kadə̄ ton̄neé kújə ɓīī mbā gə̄ tə́ gətóo.
De kə́ dɔ rā̰ tə́ teē ra no ngé kul̄ yá̰a̰ gə̄ tə́
8Ngé kul̄ yá̰a̰ gə̄ ndin̄ bembeé gō nang ngeé ń noō tə́. Ndɔ̄ɔ́ anī nin̄ a mbélə̄n̄ gír naā yā ngɔ̄məń yá̰a̰ kul̄ yādə́ gə̄ kadə̄ loo tīī. 9De kə́ dɔ rā̰ tə́ kógə̄ḿ yā Kɔ́ɔ̄ɓē teē ra nodə́ tə́ ō, kɔsə gɔn yā Kɔ́ɔ̄ɓē unjə̄ kow gīr̄ gidədə́ ō. Anī ɓōĺ rāādə́ ngá̰ý. 10Banī de kə́ dɔ rā̰ tə́ ní ədadə́ na:
Ī-lōōī ɓōĺ, tɔdɔ̄ m̄-reē i kədasí najə̄ kə́ majə tə́, i najə̄ kə́ to rɔ̄nel̄ ngá̰ý tām̄ yā de gə̄ tə́ malang. 11Ojən̄ nge kajəsí ɓōólaā kem ɓē yā Dabid tə́. Ni i Kərist, Kɔ́ɔ̄ɓē. 12Yá̰á̰ ń a ɔjəsí dɔn ní n toó: Ā ə́ngeī ngōn̄ kə́ kásə́ kə́ ɓír̄nən̄ kə kūbūú, ba ənīnən̄ kem kōr̄ kāgə̄ kəsa yá̰a̰ yā dā̰ gə̄ tə́.
13Kə̄ ta jī tə́ noō kósə de kə́ dɔ rā̰ tə́ kə́ ngá̰ý gə̄ reē ɓoon̄ rɔ̄də́ tū yā de kə́ dɔ rā̰ ní tə́, ba unən̄ pā tɔ̄ȳn̄neé Nə́ɓā, ədan̄ na:
14Ɔsən̄ gɔn Nə́ɓā dɔ rā̰ tə́ dɔɔ́ ō,
de gə̄ ń ni-táŕdə́ ní sɔlə̄n̄ kemdə́ dɔ nang tə́ ō.
Ngé kul̄ yá̰a̰ gə̄ aw̄n̄ Betlehem
15Dan ń de kə́ dɔ rā̰ tə́ gə̄ əya̰n̄ ngé kul̄ yá̰a̰ gə̄ ba tél aw̄n̄ gogə́ dɔ rā̰ tə́ anī, ngé kul̄ yá̰a̰ gə̄ ədan̄ naā na yá̰á̰ ń na rāā yá̰a̰ Betlehem á Kɔ́ɔ̄ɓē na ədadə́ najə̄n ní kə n-aw̄ kə n-a̰a̰n̄.
16Nin̄-nāgə́n̄ láẃ aw̄n̄ Betlehem anī əngen̄ Mari ō, Jəjep ō, ngōn̄ kásə̄ kə́ to kem kōr̄ kāgə̄ kəsa yá̰a̰ yā dā̰ gə̄ tə́ ō. 17Dan ń nin̄-a̰a̰nən̄ anī, ɔjən̄ de gə̄ gotə yá̰á̰ ń de kə́ dɔ rā̰ tə́ ədadə́ dɔn tə́ ní. 18De gə̄ malang ń oōn̄ najə̄ ń ngé kul̄ yá̰a̰ gə̄ ədan̄də́ ní ɔr kumdə́. 19Mari ngɔ̄m̄ yá̰a̰ gə̄ ń noō malang kemən tə́ ō, gír dɔ tə́ ō. 20Gō tə́ anī ngé kul̄ yá̰a̰ gə̄ télən̄ dɔ tə́ ta kaw̄ gogə́ bembeé. Nin̄-ɔsən̄ gɔn Nə́ɓā ō, tɔ̄ynən̄ ō, tām̄ yá̰a̰ malang ń nin̄-oōn̄ ō, a̰a̰n̄ ō, ní to i tītə̄ ń de kə́ dɔ rā̰ tə́ ədańdə́ ní.
Əndān̄ rī Jeju
21Ojənən̄ rāā ndɔ̄ sɔ́sɔ́ anī ndɔ̄ kəja mɔtən asə. Nin̄-əndān̄ rīn na i Jeju. I rī ngeé ń kó̰o̰n ndānən aĺ ɓáý anī de kə́ dɔ rā̰ tə́ əndā dɔn tə́ ní.
Ndējə̄n̄ Jeju kem kújə yā Kɔ́ɔ̄ɓē tə́
22Dan ń ndɔ̄ ń kadə̄ Jəjep nin̄ kə Mari unən̄neé majaĺ dɔdə́ tə́ kɔ̄ɔ́ kə gō ndū najə̄ yā Moijə ugə̄ ní anī, aw̄n̄ kə ngōn̄ ní Jerusalem yā kaw̄ ndējə̄n kə Kɔ́ɔ̄ɓēé 23tītə̄ ń ndangən̄neé kem ndū najə̄ yā Kɔ́ɔ̄ɓē tə́ ní na: A ɔrə̄n̄ kam̄ ngáń hágə́ kə́ dəngam gə̄ malang tayā tām̄ yā Kɔ́ɔ̄ɓē tə́ ní. 24Nin̄-aw̄n̄ kə yá̰a̰ tun̄ gə̄ ń ndū najə̄ əda ní ō. Ndū najə̄ ɔjə kadə̄ i dér gutə gə̄ jōó, aláa i ngáń dér gə̄ jōó#2.24 Dér gutə: Á̰a̰ī Leb 12.8.
25Dan ngeé ń noō tə́ ní dəngam kógə̄ḿ ndi Jerusalem noó, rīn na i Simeo̰. Ni i de kə́ súmūú ō, i de kə́ ɓōĺ ndíĺ Nə́ɓā ō. Ni a ngóō i ta ndɔ̄ ń Israel gə̄ a əngen̄neé kem sɔl̄ ní ō, Ndíĺ kə́ Táĺ i dɔn tə́ ō. 26Ndíĺ kə́ Táĺ ədan na a a̰a̰ Kərist yā Kɔ́ɔ̄ɓē pá tá na a oy ɓáý. 27Ndíĺ kə́ Táĺ ɔsə seneé adə̄ aw̄ kem kújə yā Kɔ́ɔ̄ɓē tə́. Dan ń ngé kojə Jeju gə̄ reēn̄ kə kásə̄ Jeju yā rāā yá̰á̰ ń ndū najə̄ əda dɔn tə́ ní anī, 28ni-taān jī kó̰o̰n tə́, ba tɔ̄ȳ Nə́ɓā, əda na:
29Kɔ́ɔ̄ɓē, yá̰á̰ ń ə̄nī míndí yā rāā ní ngɔlaā ī-rāā kɔ̄ɔ́ ɓá,
adə̄ ə́ya̰ nge kəla yāí ādə̄ aw̄ kə kem sɔl̄ lɔmɔɔ́ tā.
30Tɔdɔ̄ kumḿ a̰a̰ kajə yāí ń
31ə̄ndā dɔ danaá ta kum de gə̄ tə́ malang ní kɔ̄ɔ́.
32Ni i loo kə́ unjə̄ kow tām̄ yā nápar de kə́ rang gə̄ tə́ ō,
a ɔsə gɔn Israel ń i gír deē yāí gə̄ ní ō.
Simeo̰ ɔr̄ najə̄ kə́ nge koō ta tə́
33Yá̰á̰ ń Simeo̰ əda dɔ ngōn̄ tə́ ní ɔr kum bɔbə̄ ngōn̄ nin̄ kə kó̰o̰neé ngá̰ý. 34Simeo̰ tɔ́r̄ tan dɔdə́ tə́ ba əda Mari kó̰o̰ ngōn̄ na:
Nə́ɓā gə̄rā ngōn̄ ń toō i yā rāań kadə̄ Israel gə̄ ngá̰ý tə́sōn̄ najə̄n tə́ ō, Israel gə̄ ngá̰ý a ḭḭn̄ dɔɔ́ kə kūl̄neé ō. Ni i yá̰a̰ kɔjə kə́ de gə̄ ngá̰ý a tɔ́sə̄n̄ gātə̄ ō. I tītə̄ ń noō n ni-rāań adə̄ dɔ gír̄ kə́ kem de kə́ ngá̰ý gə̄ tə́ teēń ndágá ní. 35Īkɔ́ tā a wurií a ɔliī tītə̄ kə́ deē ɔsiī i kə kəyāá adə̄ teē dām̄ kə́rēý tə́ beē.
Nge koō ta kə́ dəyá̰ kə́ rīn na i Ana
36 Nge koō ta kə́ dəyá̰ kógə̄ḿ ndi noó ō, rīn na i Ana. Ni i ngōn̄ Panuel, kə́ gír ɓē yā Aser tə́. Ni tɔgə ɓə́ga kɔ̄ɔ́. Dan ń ni-ḭḭ kə̄ nang tə́ á taā dəngam ní, ndi seneé ɓāl̄ sīrí. 37Gō tə́ anī dəngam ní oy kɔ̄ɔ́, adə̄ tél ndi kanjə̄ taā dəngam kə́ rang bátə́ kadə̄ ɓālə̄n i kutə sɔ́sɔ́ gidə i sɔ́. Ni-ɔr̄ rɔ̄n kɔ̄ɔ́ kadə kújə́ yā Kɔ́ɔ̄ɓē tə́ alé. Ni-rāā kəla kadaá ō ndɔ̄ɔ́ ō adə̄ Kɔ́ɔ̄ɓē: A ndi ɓō tām̄ yā Nə́ɓā tə́ ō, a ndɔ̄ȳ Nə́ɓā ō. 38Ni-reē ɔtə̄ kum mbang ngeé ń noō tə́ ō anī, udə kə̄ rɔ̄ tɔ̄ȳ Nə́ɓā tə́ ō, kə̄ rɔ̄ kɔr̄ najə̄ yā ngōn̄ ní tə́ kə de gə̄ malang ń a ngóōn̄ i kadə̄ Nə́ɓā gān̄g dɔ ɓē kə́ Jerusalem ní ō.
Ngé kojə Jeju gə̄ tél aw̄n̄ seneé gogə́ Najaret
39Dan ń Jəjep nin̄ kə Mari rāān̄ yá̰a̰ malang ń ndū najə̄ yā Kɔ́ɔ̄ɓē əda kadə̄ yā rāā ní anī, tél aw̄n̄ gogə́ ɓē yādə́ tə́ Najaret gō nang kə́ Galile tə́. 40Jeju tɔgə ō, ngan̄g ō, kumən edə̄ ngá̰ý ō, Nə́ɓā rāā kem majə seneé ō.
Ɓāl̄ Jeju i kutə gidə i jōó
41Ngé kojə Jeju gə̄ a aw̄n̄ Jerusalem rāā nāā Pákə tə́ i kə dɔ ɓāl̄ gə̄. 42Dan ń ɓāl̄ Jeju i kutə gidə i jōó ní anī, aw̄n̄ seneé Jerusalem rāā nāā Pákə tə́, tɔdɔ̄ i yá̰a̰ kāgə̄ ɓē. 43Dan ń rāān̄ nāā gír gān̄g anī, télən̄ dɔ tə́ ta kaw̄ gogə́ ɓēé, banī Jeju ń i ngōn̄ ɓáý ní na̰y gogə́ Jerusalem, kanjə̄ kadə̄ ngé kojən gerə̄n̄ gōn. 44Nin̄-ɔjən̄neé na ni na i dan madə̄ mbādə́ gə̄ tə́, adə̄ njə̄rān̄ rāā ndɔ̄ kógə̄ḿ tá kadə̄ a sāānən̄ dan ngéédə́ gə̄ tə́ ō, dan de kə́ nin̄-gerə̄n̄də́ gə̄ tə́ ō. 45Banī əngenən̄ alé, adə̄ tél aw̄n̄ gogə́ Jerusalem sāān tə́. 46Kə ndɔ̄ kə́ nge ko̰ mətá anī əngenən̄ kem kújə yā Kɔ́ɔ̄ɓē tə́, ndi nang tə́ dan ngé kɔjə de gə̄ yá̰a̰ gə̄ tə́ a oōń najə̄ yādə́ ō, a dəjeńdə́ najə̄ ō. 47De gə̄ malang ń oōn̄ najə̄ kɔrə̄n ní, ger̄ najə̄ yān ō, kum najə̄ gə̄ ń tél tūr̄ a əda ō ní ɔr kumdə́ ngá̰ý. 48Dan ń ngé kojən gə̄ a̰a̰nən̄ ní ɔr kumdə́ ngá̰ý, adə̄ kó̰o̰n dəjen na:
Ngōnə̄ḿ, ī-rāā yá̰á̰ kə́ beé sejí i tām̄ rí tə́? Á̰a̰ā̰, bɔbí ō, mā ō, jə-ndəleī kə sōlōó ngá̰ý.
49Anī ni-tél ədadə́ na:
Ī-sāāmī i najə̄ yā rí tə́? I gáŕ kadə̄ m̄-ndi kem kújə yā Bɔbə́ḿ tə́ ní, sḭḭ̄ ī-gerī aĺ a?
50Banī najə̄ ń ni ədadə́ ní nin̄-gerə̄n̄ kum alé.
51Loo ń noō tə́ ni-tél aw̄ sedə́ gogə́ Najaret, ba oō najə̄ tadə́ tə́. Kó̰o̰n ngɔ̄m̄ yá̰a̰ gə̄ ń noō malang kemən tə́. 52Kum Jeju edə̄ kə̄ kété kété ō, ni-tɔgə kə̄ dɔɔ́ dɔɔ́ ō, nel̄ de gə̄ gə̄gē Nə́ɓā gə̄gē ngá̰ý ō.
Currently Selected:
LUK 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.