LUK 16
16
Nge ngɔ̄m̄ yá̰á̰ kə́ sew aĺ
1Jeju əda ngé ndóō yá̰a̰ yān gə̄ ɓáý to̰ na:
Deē kógə̄ḿ kə́ ənge yá̰á̰ ngá̰ý əndā deē kógə̄ḿ dɔ yá̰a̰ yān gə̄ tə́ kadə̄ ngɔ̄m̄. Anī sə̄lān̄ gír deē ngeé ń toō rɔ̄n tə́ na nujə yá̰a̰ yān gə̄ ngá̰ý. 2Ni ɓārə́n ba dəjen na: I najə̄ kə́ ba̰ý n m-ōō dɔí tə́ toō? Ī-tə́da kɔ̄r̄ yá̰a̰ yāí gə̄ ń ī-ngɔ̄m̄ ní ādə̄ m-á̰a̰ā̰, tɔdɔ̄ ngɔlaā ní gír gān̄g tā, ḭ̄ ā ī-ngɔ̄m̄ yá̰a̰ yāḿ to̰ alé. 3Deē ní əda kə̄ kemən tə́ na: Ń toō ní, kɔ́ɔ̄ḿ a ɔrə̄m̄ kɔ̄ɔ́ kem ngɔ̄m̄ yá̰a̰ gə̄ tə́ ní, kə m̄-rāā i rí tā? Kə m̄-ndɔr̄ i mbée a? Mā tɔ́gə́ḿ kə́ yā ndɔrə̄ń gətóo ō. Kə m̄-gəde i yá̰a̰ a? Rɔ̄ḿ sɔlə̄m̄ ngá̰ý loon tə́ ō. 4Yá̰á̰ ń kadə̄ m̄-rāā tá kadə̄ ré ɔr̄mə̄n̄ kəlaá anī, m-ə́ngeń de gə̄ kə́ kadə̄ əhɔmə̄n̄ kə̄ rɔ̄də́ tə́ kem kújə yādə́ gə̄ tə́ ní, m̄-ger̄ tā! 5Ni ɓāŕ de gə̄ ń kə̄rā yā kɔ́ɔ̄n i dɔdə́ tə́ ní adə̄ reēn̄ kógə̄ḿ kógə̄ḿ, ba əda nge kə́ ta kəga dɔ na: Kə̄rā yā kɔ́ɔ̄ḿ kə́ dɔí tə́ i kóndóńg? 6Deē ní əda na: Kū yibə̄ ɓú. Anī ni-tél ədan na: Ī-taā makətūbə̄ kə̄rā yāí ní ń toō, ba ī-ndi nang tə́, ī-ndang láẃ tū tə́ na i kutə mí. 7Gō tə́ anī əda nge kə́ rang na: Ba ḭ̄, kə́ dɔí tə́ i kóndóńg? Deē ní əda na: I mbɔr̄ gémē ɓú. Anī tél ədan na: Ī-taā makətūbə̄ kə̄rā yāí ní ń toō ba ī-ndang kemeé na i kutə sɔ́sɔ́. 8Anī kɔ́ɔ̄ nge kəla kə́ sew aĺ ngeé ń toō tɔ̄yn, tɔdɔ̄ ni-rāā yá̰a̰ yān ní i kə kum kedēé ngá̰ý. Tām̄ ngáń kə́ dɔ nang tə́ laā gə̄ ní, kumdə́ edə̄ kə madə̄də́ gēé mān̄ yā ngán kə́ kum loo kə́ unjə̄ kow tə́ gə̄.
9Ba mā, ādə̄ m-ə́dásí:
Ī-rāāī madə̄ naā kə gúrsə ń i yá̰a̰ yā de kə́ sew aĺ gə̄ ní, yā kadə̄ ré ndɔ̄ ń gətóo jīsí tə́ anī, madə̄sí gə̄ əhɔn̄sí kə̄ rɔ̄də́ tə́ gíŕ kújə tandā gə̄ ń a ton̄ ngándáńg tə́ ní. 10Deē ń ni i de kə́ sew loo ngɔ̄m̄ yá̰á̰ kə́ sḛ́ý beē gə̄ tə́ ní, ni a tél de kə́ sew loo ngɔ̄m̄ yá̰á̰ kə́ ngá̰ý gə̄ tə́ ō. Ba deē ń ni i de kə́ sew alé loo ngɔ̄m̄ yá̰á̰ kə́ sḛ́ý beē gə̄ tə́ ní, ni a tél de kə́ sew alé loo ngɔ̄m̄ yá̰á̰ kə́ ngá̰ý gə̄ tə́ ō. 11Ré sḭḭ̄ ī-téliī de kə́ sew gə̄ loo ngɔ̄m̄ gúrsə ń i yá̰a̰ yā de kə́ sew aĺ gə̄ tə́ ní anī, i náā ɓáý n a adə̄sí yāsí sḭḭ̄ kɔ́ gə̄ ní? 12Yá̰a̰ kənge gə̄ ń rāān̄ rɔ̄də́ i mbā tə́ ní, ré sḭḭ̄ ī-téliī de kə́ sew gə̄ loo ngɔ̄m̄də́ tə́ aĺ anī, i náā ɓáý n a adə̄sí yāsí sḭḭ̄ kɔ́ gə̄ ní?
13De kə́ nge rāā kəla kə́ kem kújú kə́ asə rāā kəla yā kɔ́ɔ̄n gə̄ jōó gətóo. Ré ni-im̄ kə́ kógə̄ḿ ba táŕ kə́rēý aĺ ɓáa, a əhɔ gō nge kógə̄ḿ ba a kídə̄ kə́rēý. Sḭḭ̄ ásiī rāā kəla yā Nə́ɓā ō, yā nar ō naā tə́ mbak alé.
Najə̄ kə́ dɔ Ɓē ko̰o̰ yā Nə́ɓā tə́ ō, ndū najə̄ kə́ dɔ tə́ ō
(Mat 11.12-13; 5.31-32; Mark 10.11-12)
14 Parijiyḛ gə̄ nel̄də́ nar ngá̰ý, adə̄ dan ń nin̄-oōn̄ najə̄ gə̄ ń toō anī, lurən̄ Jeju. 15Ba Jeju ədadə́ na:
Sḭḭ̄ i ngé kɔjə rɔ̄sí gə̄ ta kum de gə̄ tə́, kadə̄ sḭḭ̄ na i de kə́ súmūú gə̄, ba Nə́ɓā ger̄ kemsí, tɔdɔ̄ yá̰á̰ ń de gə̄ ɔsən̄ kə̄ dɔɔ́ ní i yá̰á̰ kə́ to yḛr kum ngá̰ý ta kum Nə́ɓā tə́.
16 Ndū najə̄ yā Moijə ō, makətūbə̄ yā ngé koō ta gə̄ ō, ton̄ bátə́ ugə̄ń ɓāl̄ yā Ja̰a̰ tə́. Ba əla gír ndɔ̄ nəkɔ́ ń noō tə́ ní, ənīn̄ mbēr̄ Najə̄ kə́ Majə kə́ dɔ Ɓē ko̰o̰ yā Nə́ɓā tə́, adə̄ i ngé gə̄ ń a rɔ̄ɔ̄n̄ kə ngangāá ngá̰ý ní n a taān̄ ní. 17Kadə̄ dɔ rā̰ ō, dɔ nang ō mānə̄n̄ ní, nge ń noō i yá̰á̰ kə́ ngan̄g aĺ bátə́ tɔȳ kadə̄ kal ndə̄já makətūbə̄ ndū najə̄ yā Nə́ɓā kə́ kógə̄ḿ udə kɔ̄ɔ́.
18Deē ń mbātə́ nə̄yá̰n ba taāń kə́ rang ní, rāȳ i mbée ō, tá deē ń taā dəyá̰ kə́ ngaan mbātə́n ní, rāȳ i mbée ō.
Nge kənge yá̰á̰ ngá̰ý ō, Lajar kə́ nge rɔ̄ ndoō ō
19Dəngam kógə̄ḿ kə́ ənge yá̰á̰ ngá̰ý ō, o̰ō̰ kūbə̄ kə́ kərē ning ō, sɔl̄ lɔ́ḿ lɔ́ḿ gə̄ ō, a əsa i yá̰á̰ kə́ majə majə gə̄ kə dɔ ndɔ̄ gə̄ ō, ndi kem ɓē kógə̄ḿ tə́ noō. 20Deē kógə̄ḿ kə́ nge ndoō kə́ rīn na i Lajar, rɔ̄n bə́gā do malang, to ta róbə́ tə́ ndágá tan tə́. 21Ndɔ̄ kumən kəsa yá̰a̰ gə̄ ń a tə́sōn̄ kɔ̄ɔ́ ta kār̄ kəsa yā nge kənge yá̰á̰ tə́ ní tā, ba loon gə̄ tóo, adə̄ bísə gə̄ reē tɔ̄nə́n̄ kum don gə̄ ní. 22Gō tə́ anī, nge ndoō ní oy, adə̄ de kə́ dɔ rā̰ tə́ gə̄ un aw̄n̄ seneé, əndānən̄ kadə Abəraham tə́ ngɔr. Nge kənge yá̰á̰ ní oy yān ō, adə̄ dubə̄nən̄. 23Dan ń nge kənge yá̰a̰ ngeé ń toō a̰a̰ tápə̄ ngá̰ý loo kə́ ɓádá tə́ ní a, ənī kumən kə̄ dɔɔ́ anī, a̰a̰ Abəraham sa̰y ō, Lajar kə́ ndi kadən tə́ ngɔr ō. 24Loo ń noō tə́ ní un ndūn kə̄ dɔɔ́ ngá̰ý, ədań na: Bɔbə́ḿ Abəraham, á̰a̰ kum tō ndoō yāḿ, ba ə́la Lajar kadə̄ əla ta ngōn̄ jīn kum man̄ tə́, reē sɔlə̄ń ta ndo̰ḿ, tɔdɔ̄ rɔ̄ḿ tōrə̄m̄ ngá̰ý kum hor ń toō tə́. 25Anī Abəraham tél ədan na: Ngōnə̄ḿ, ādə̄ əga kemií na, dan ń ḭ̄ ī-ndi dɔ nang tə́ ɓáý ní, ḭ̄ ə́ngé yá̰á̰ kə́ majə yāí gə̄ ō, Lajar ní ənge i yá̰á̰ kə́ majaĺ gə̄ ō. Ngɔlaā ní ni-ənge kem sɔl̄ banī yāí i kadə̄ ə́ngé yá̰á̰ kə́ tōr̄. 26Banī yá̰á̰ kə́ rang ɓáý to̰ ní, bəlo kə́ bo ngá̰ý i mbo̰ō̰jí jḭḭ tə́ ō sḭḭ̄ tə́ ō, adə̄ ngé gə̄ ń gḛyn̄ kḭḭ laā kaw̄ kə̄ rɔ̄sí tə́ ní a asən̄ kaw̄ aĺ ō, deē kə ḭḭ rɔ̄sí tə́ nú reē rɔ̄jí tə́ laā aĺ ō. 27Anī əda na: Ré i beé anī, m̄-rāāī ɓɔ́ kadə̄ ə́la Lajar kem kújə yā bɔbə́ḿ tə́, 28tɔdɔ̄ m-āw̄ kə ngákó̰ó̰ḿ gə̄ noó i mí ní, ādə̄ tāādə́ ɓang ɓang kadə̄ reēn̄ kem loo rɔ̄ tōr̄ ń toō tə́ ɓáý to̰ alé. 29Anī Abəraham ədan na: Najə̄ń Moijə ō, ngé koō ta gə̄ ō ndangən̄ ní i jīdə́ tə́ noō, ādə̄ nin̄-rāān̄ yá̰á̰ ń əda ní! 30Anī əda na: A oōn̄ alé, bɔbə́ḿ Abəraham, ba ré i de kə́ teē ɓádá aw̄ rɔ̄də́ tə́ ní anī, a tūrə̄n̄ háĺdə́. 31Banī Abəraham tél ədan ɓáý to̰ na: Ré nin̄-oōn̄ ta Moijə ō, ngé koō ta gə̄ ō aĺ anī, de kə́ rang, ká i kə́ ndól̄ dan de kə́ koy gə̄ tə́ gə̄gē anī, nin̄ a taān̄ kemən alé.
Currently Selected:
LUK 16: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.