3 JA̰A̰ 1
1
Ja̰a̰ rāā ngé taā kem gə̄ lápə́ya
1I mā kum kɔɔ̄ n m̄-ndang makətūbə̄ ń toō m-ə́lań m-ādə̄ kó tár yāḿ Gayus ń m̄-tárən rɔ̄kum ní.
2Kó tár yāḿ, m̄-ndə̄ngā kadə̄ yá̰a̰ malang i kə́ majə tām̄ yāí tə́ ō, kadə̄ dā̰ rɔ̄í ndi kə lápə́yaá tītə̄ ń ndílí ndiń kə lápə́yaá ní ō.
3Ngákó̰ó̰jí gə̄ ń reēn̄ ní ədan̄ na ḭ̄ na ī-ra dɔ najə̄ kə́ rɔ̄kum tə́ ō, na yá̰a̰ rāāí na i yá̰á̰ kə́ rɔ̄kum ō, adə̄ dan ń m-ōō ní nelə̄m̄ ngá̰ý. 4Rɔ̄nel̄ yāḿ kə́ ngá̰ý i kadə̄ m-ōō na ngánə́ḿ gə̄ na njə̄rān̄ gō najə̄ kə́ rɔ̄kum tə́.
Gayus ra dɔ yá̰á̰ kə́ rɔ̄kum tə́
5Kó tár yāḿ, ḭ̄ ɔ́jə kə̄ ndágá kadə̄ ḭ̄ i de kə́ nge ra dɔ ndūí tə́ tū yá̰a̰ rāāí gə̄ tə́ kə ngákó̰ó̰jí gēé, kə ngákó̰ó̰jí gə̄ ń nin̄ i tə̄rā gə̄ ní. 6Nin̄-ədan̄ najə̄ tár yāí ta kum de gə̄ kə́ kem Egəlijə tə́. Ī-rāā sedə́ rāā kə́ kadə̄ nel̄ Nə́ɓā, kadə̄ unənəń ta njə̄rā mbā yādə́ kum kə̄ kété. 7Tɔdɔ̄ i tām̄ yā Kərist tə́ n nin̄-əsōn̄neé róbó aw̄n̄ kanjə̄ taā yá̰á̰ kógə̄ḿ jī de kə́ ndágá gə̄ tə́ ní. 8Adə̄ majə kadə̄ j-əhɔī de kə́ beé gə̄ kə̄ rɔ̄jí tə́, yā kadə̄ jə-téliīneé ngé rāā kəla sedə́ gə̄ tām̄ yā najə̄ kə́ rɔ̄kum tə́.
Diotərep ō Demetrius ō
9m̄-ndang najə̄ kógə̄ḿ m-ādə̄ de gə̄ kə́ kem Egəlijə tə́. Banī Diotərep ń#1.9 Diotərep ń ndi dɔ de gə̄ kə́ kem Egəlijə tə́ ní, gḛy kadə̄ oōn̄ najə̄ gə̄ ń Ja̰a̰ ndang makətūbūú adə̄də́ ní aĺ ō, najə̄ yā ngé gə̄ ń Ja̰a̰ əladə́ rɔ̄də́ tə́ ní aĺ ō. Majanī ni-sāā tūr̄ taā kem yādə́ kadə̄ i kə gō yá̰á̰ ndóō yā ngámbang kəla yā Jeju gə̄ to̰ alé. Á̰a̰ī 2Ja̰a̰ 7-9; 1Ja̰a̰ 2.18-23 gḛy kadə̄ ni i de kə́ kété dɔ madə̄n gə̄ tə́ ní ndigə alé. 10Adə̄ ré m-ā m-āw̄ anī, m-ā m̄-ter̄ kemən dɔ kəla rāān gə̄ tə́. Ni-ɔr̄ najə̄ kə́ majaĺ ngá̰ý gə̄ dɔjí tə́, banī nge ń noō asən aĺ ɓáý, adə̄ əhɔ ngákó̰ó̰jí gə̄ kə̄ rɔ̄n tə́ aĺ ō, de gə̄ ń gḛyn̄ kəhɔdə́ kə̄ rɔ̄də́ tə́ ni a, ni ɔgə̄də́ kɔ̄ɔ́ ō, tə̄ɓādə́ kɔ̄ɔ́ Egəlijə tə́ ō.
11Kó tár yāḿ, ī-lōō ndájə̄ yá̰á̰ kə́ majaĺ, ba ī-ndájə̄ yá̰á̰ kə́ majə. Deē ń rāā yá̰á̰ kə́ majə ní, ni i deē yā Nə́ɓā. Banī deē ń rāā yá̰á̰ kə́ majaĺ ní, a̰a̰ Nə́ɓā alé.
12Demetrius tā anī de gə̄ malang ədan̄ najə̄ yān majə. Najə̄ kə́ rɔ̄kum nəkɔ́ gə̄gē əda najə̄ yān kə́ majə. Jḭḭ gə̄gē a j-əda najə̄ yān majə ō, tá ḭ̄ ī-ger̄ kadə̄ najə̄ yān ń j-əda ní i najə̄ kə́ rɔ̄kum.
Lápə́ya kə́ ta tɔ̄l̄ ta tə́
13Yá̰a̰ gə̄ i ngá̰ý kadə̄ m̄-ndang najə̄ kə́ dɔ tə́ m-ādī. Ba m̄-gḛy ndang kə man̄ ndang makətūbūú ō, kə bel̄ ndang makətūbūú ō kadī alé. 14Tɔdɔ̄ m-ə̄ndā kemḿ dɔ tə́ kadə̄ m-ā m-á̰a̰ī ngɔr, yā kadə̄ j-ɔr̄ najə̄ kə naá kə tají.
15Ādə̄ kemií sɔl̄ lɔm.
Madí gə̄ rāānī lápə́ya. Ī-rāā madə̄jí gə̄ lápə́ya kógə̄ḿ kógə̄ḿ kə dɔdə́ gēé.
Currently Selected:
3 JA̰A̰ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.