2 MAKABE GƏ̄ 1
1
Makətūbə̄ kə́ ta kəga dɔ ń ndang adə̄n̄ Jipə gə̄ kə́ Ejiptə tə́ ní
1Jḭḭ Jipə kə́ Jerusalem gə̄ ō, kə́ Jude tə́ malang ō, jə-rāā ngákṵ́ṵ́jí Jipə kə́ Ejiptə tə́ gə̄ lápə́ya ō, jə-ndə̄ngā kadə̄ ndin̄ lápə́ya ō, teēn̄ deē ō. 2Ādə̄ Nə́ɓā rāā majə sesí ngá̰ý ō, ādə̄ əga kemən dɔ madə̄ naā ń əhɔ kə ngé kəla yān gə̄ kə́ ngé ra dɔ ndūdə́ tə́ gə̄ ń i Abəraham ō, Ijaak ō, Jakob ō ní tə́. 3Ādə̄ sḭḭ̄ malang ní, ni adə̄sí kem kə́ yā rɔȳnəń ō, kə́ yā rāań kem ndigə yān ngá̰ý ō, kə gō kem ndigə yāsí sḭḭ̄ kɔ́ gɔ̄ɔ́ ō. 4Ādə̄ ni teē ngarā̰ kemsí adə̄ Ndū najə̄ yān ō, gō míndən gə̄ ō, ādə̄ ni rāā adə̄ lɔm to ō. 5Ādə̄ ni dal ndɔ̄ȳ yāsí gə̄ ō, tél əndā najə̄ naā tə́ sesí gogə́ ō. Kum mbang kə́ majaĺ tə́ anī, ādə̄ ni əya̰sí kɔ̄ɔ́ aĺ ō. 6Najə̄ ń j-ɔr̄ seneé lo nəkɔ́ ń toō tə́, kum mbang ń toō tə́ tām̄ yāsí tə́ ní n nuú. 7Ɓāl̄ kṵ ɓē yā Demetəriyus tə́, adə̄ i ɓāl̄ kə́ nge kṵ ɓú kə kutə mehḛ́ kə kalən kə́ ndōhó tə́ ní, najə̄ ń jḭḭ Jipə gə̄ jə-ndang j-əlań j-adə̄sí ní n toó: əla gír ndɔ̄ ń Jaso̰ kə de gə̄ yān gēé əya̰nə̄ń najə̄ yā dɔ nang kə́ táĺ ō, ɓē kṵ ō kɔ̄ɔ́ tə́ ní, yá̰á̰ kə́ tōr̄ gə̄ rāān̄jí ngá̰ý. 8De gə̄ ngeé ń nuū əlan̄ hor tū bápə́ kə́ ta róbə́ kújə́ kə́ bo yā Kɔ́ɔ̄ɓē tə́ ō, tɔ̄lə̄n̄ de kə́ kanjə̄ najə̄ dɔdə́ tə́ gə̄ ō. Banī jə-ndɔ̄ȳ Kɔ́ɔ̄ɓē, anī ni oō ndɔ̄ȳ yājí. Jə-ndējə̄n yá̰á̰ kə́ tun̄ gə̄ ō, j-adə̄ ndujə̄ kadə̄ karī tə́ ō. J-əndā hor ta bay hor gə̄ kə́ kem kújə yā Kɔ́ɔ̄ɓē tə́ ō, jə-ɓōkə́ mápá kə́ ndējə̄ gə̄ dɔ tábəl tə́ ō. 9Ba ngɔlaā ní jə-ndang makətūbə̄ j-adə̄sí, i yā mērəńsí rāā nāā kújə́ kámbə gə̄ kem nāā Kislew tə́, 10kem ɓāl̄ kə́ nge kṵ ɓú kə kutə sɔ́sɔ́ kə kalən kə́ sɔ́sɔ́ tə́.
Makətūbə̄ kə́ nge kṵ jōó: Jipə gə̄ tɔ̄ȳn̄ Kɔ́ɔ̄ɓē gō yo A̰tiyokus tə́
De kə́ Jerusalem gə̄ ō, kə́ Jude gə̄ ō, kum kɔɔ̄ gə̄ kə́ ngé kadə̄ kɔjə̄ gə̄ ō, Judas ō, rāān̄ Aristobul ń i de kə́ gír kojə yā ngé tun̄ yá̰a̰ gə̄ kə́ urən̄ yibə̄ dɔdə́ tə́ ɔr̄nəń kam̄də́ ō, i nge kadə̄ mban̄g Pətoleme kɔjə̄ ō ní, lápə́ya. Jə-rāā Jipə gə̄ kə́ Ejiptə lápə́ya ō, jə-ndə̄ngā kadə̄ ndin̄ kə rɔ̄ɔ̄ ngangá ō. 11Jə-rāā Nə́ɓā kə́ra kə ngarā̰ kemjí gēé malang, tām̄ ɔr̄jí kɔ̄ɔ́ ta yá̰á̰ kə́ to yo ngá̰ý tə́ ō, rɔ̄ɔ̄ mban̄g dɔjí tə́ ō. 12Nəkɔ́ tə̄ɓā ngé gə̄ ń reēn̄ kənī ɓē kə́ táĺ rɔ̄ɔ̄ tə́ ní ō. 13Tɔdɔ̄ dan ń mban̄g A̰tiyokus aw̄ dɔ nang kə́ Persə tə́ ní, to tītə̄ kə́ de kə́ asə tetədə́ rɔ̄ɔ̄ gətóo beé. Banī tɔ̄lə̄n̄də́ malang kem kújə ɓesə̄ Naneya ń i ɓesə̄ kə́ dəyá̰ ní tə́, sɔɔ̄ń ngam kógə̄ḿ kə́ ngé tun̄ yá̰a̰ yā ɓesə̄ Naneya gə̄ rāān̄. 14A̰tiyokus aw̄ kújə ɓesé kə madə̄ tan gēé, i rāā yá̰a̰ kūjə́ taā naā yān tə́ kə ɓesə̄ kə́ dəyá̰. Kə́ rɔ̄kum tə́ ní, ndigə i taā nar gírən ń i yá̰a̰ kənge kə́ ngá̰ý kə́ kem kújə ɓesé ní. 15Ngé tun̄ yá̰a̰ gə̄ yā ɓesə̄ Naneya əndān̄də́ ndágá adə̄ de gə̄ a̰a̰n̄də́. Gō tə́ anī A̰tiyokus ō, de kə́rēý gə̄ kə́ gōn tə́ ō, udən̄ kújə ɓesé. Ba dan nəkɔ́ ń udə kemeé oy anī, ngé tun̄ yá̰a̰ gə̄ utə̄n̄ ta róbə gə̄ kɔ̄ɔ́. 16Nin̄ teēn̄ ta ko̰rō̰ lo kə́ to lo ɓɔ̄ɔ̄ tə́ gār̄ kújə́ tə́, ba tə́nīn̄ A̰tiyokus kə de gə̄ yān gēé ko̰rō̰ lo ní tə́ kə mbalá ō, gángə̄n̄ jīdə́ gə̄ kə njadə́ gə̄ kə dɔdə́ gə̄ ō, ba tə́nī adə̄n̄ de gə̄ ń ran̄ ndágá ní. 17Tɔ̄ȳ i kə̄ dɔ Nə́ɓā yājí tə́, tām̄ yā yá̰a̰ malang ń ni rāā tə́ ní. Ngé gə̄ ń kídə̄nən̄ ní, ni əladə́ ta yo tə́.
Yá̰á̰ kə́ to kɔr kum ń i hor kə́ dɔ dabə tun̄ yá̰á̰ tə́ ní
18Kə ndɔ̄ kə́ nge kṵ kutə jōó gidə i mí yā nāā Kislew anī, j-a jə-rāā nāā tə́go kem kújə yā Kɔ́ɔ̄ɓē kadə̄ unjə̄. J-a̰ā̰ ní majə kadə̄ j-əla j-ədasí kadə̄ ī-rāāī nāā ní tītə̄ lo rāā nāā kújə́ kámbə gə̄ beé. Anī a əga kemsí dɔ hor ń teē tə́ ní. Hor ní teē i dan ń Nehemi tunə̄ń yá̰a̰ adə̄ Nə́ɓā gō rāā kújə yā Kɔ́ɔ̄ɓē tə́ ō, dabə tun̄ yá̰á̰ tə́ ō, gogə́ rang tə́ ní. 19Dan ń əhɔn̄ kaají gə̄ aw̄n̄ sedə́ dɔ nang kə́ Persə tə́ ní, ngé tun̄ yá̰á̰ kə́ ngé ra dɔ ndūdə́ tə́ gə̄ kə́ dan ngeé ń nuū tə́ unən̄ hor kə́ dɔ dabə tun̄ yá̰á̰ tə́ aw̄ ɓɔ̄ɔ̄n̄ gə́le bəlo man̄ kə́ mūndō tə́. Nin̄ ɓɔ̄ɔ̄n̄ majə ngá̰ý, adə̄ deē teē dɔ tə́ alé. 20Ɓāl̄ gə̄ mānə̄n̄ ngá̰ý gō tə́. Dan ń Nə́ɓā a̰ā̰ kadə̄ i kum mbang kə́ majə tā anī, mban̄g kə́ Persə əla Nehemi Jerusalem. Ngé tun̄ yá̰a̰ gə̄ ń ɓɔ̄ɔ̄n̄ hor ní, Nehemi mēr̄ de gə̄ kə́ gír kojə yādə́ tə́ kadə̄ aw̄ sāān̄ hor ní. De gə̄ ní ədan̄ na n-əngen̄ hor alé, ba na n-əngen̄ na i yibə̄ kógə̄ḿ kə́ ɓɔ luy. Anī Nehemi ədadə́ na kə aw̄ kə ɔdən̄ yibə̄ ní kə reēnəń. 21Dan ń əndān̄ dɔ yá̰a̰ malang kə́ yā tun̄ danaá oy anī, Nehemi əda ngé tun̄ yá̰á̰ gə̄ na kə ɓōkə́n̄ yibə̄ ní dɔ kīr̄ tə́ ō, dɔ yá̰a̰ tun̄ kə́ dɔ kīr̄ ní tə́ ō. 22Nin̄ rāān̄ yá̰á̰ ní ba asə kum mbang kóndóńg wań gō tə́ anī, mbang ń kil̄ man̄ ūtə̄ kum ní tél ɔsə gogə́. Kum mbang ngeé ń nuū tə́ ɓáa hor kógə̄ḿ kə́ bo əɓa bup dɔ lo tun̄ yá̰á̰ tə́, adə̄ ɔr kum de gə̄ malang. 23Dan ń hor a ṵṵ dā̰ kə́ ndējə̄ Nə́ɓā anī, ngé tun̄ yá̰a̰ gə̄ ō, de gə̄ malang ń ran̄ nuú ní ō, ədan̄ ndɔ̄ȳ kógə̄ḿ. Jonata̰ əla gír, ba gotə de gə̄ tūr̄ ədan̄ naā tə́ kə Nehemi. 24Ndɔ̄ȳ ní n toó:
Kɔ́ɔ̄ɓē, Kɔ́ɔ̄ɓē Nə́ɓā, i ḭ̄ n ī-rāā yá̰a̰ malang ní ō, ī-to ɓōĺ ō, tɔ́gí to ō. Ḭ̄ i nge rāā yá̰á̰ kə́ gōtə́ ō, tár i ngá̰ý kemií tə́ ō. I ḭ̄kɔ́ kal kógə̄ḿ beē ngóy n i mban̄g ō, de kə́ majə ō, 25nge rāā kem ndaa ō, nge rāā yá̰á̰ kə́ gō tə́ ō, tɔ́gí i ngá̰ý ō ní. I ḭ̄kɔ́ kal kógə̄ḿ beē ngóy n ī-ndi ngándáńg ní. Ī-gə̄rā kaají gə̄ ō, ɔ̄r̄ kam̄də́ tayā kə rī rāā kəla yāí ō, ī-teē kə Israel kum yá̰a̰ malang kə́ majə aĺ tə́ ō. 26Ngɔlaā ní, ī-ndigə yá̰á̰ kə́ tun̄ kadī ń toō, tām̄ yā gír deē yāí gə̄ malang ń i Israel ní tə́. Ī-ngɔ̄m̄ Israel tɔdɔ̄ ni i deē yāí ō, ī-rāan ādə̄ majə tām̄ yā kəla yāí tə́ ō. 27Deē yājí gə̄ ń tḭ̄ḭ̄n̄ naā kə̄ lo gə̄ tə́ ní, ɔ́sə dɔdə́ kə̄ naā tə́. Ngé gə̄ ń nin̄ i ɓəlo gə̄ dan nápar de kə́ rang gə̄ tə́ ní, ɔ̄r̄də́ ɓəloó kɔ̄ɔ́. Ngé gə̄ ń kídə̄n̄də́ ō, nel̄ de gə̄ sedə́ aĺ ngá̰ý ō ní, á̰á̰də́ kə kumií kə́ majaá, ādə̄ nápar de kə́ rang gə̄ ger̄nəń kadə̄ ḭ̄ i Nə́ɓā yājí. 28Ngé gə̄ ń rāān̄jí ndoō tə́ ō, tájə̄n̄jí ō, ɔjən̄ rɔ̄də́ dɔjí tə́ ō ní, ī-rāādə́ yá̰á̰ kə́ tōr̄ tām̄ majaĺ yādə́ tə́. 29Ə̄ndā gír deē yāí gə̄ dɔ nang yāí kə́ táĺ tə́ tītə̄ ń Moyijə ədań ní.
30Ngé tun̄ yá̰a̰ gə̄ ənīn̄ pā gə̄ rɔȳnəń Nə́ɓā. 31Dan ń hor ṵṵ yá̰á̰ ń ndējə̄n̄ Nə́ɓā ní anī, Nehemi əda kadə̄ ɓōkə́n̄ gotə yibə̄ kə́ ɓɔ luy ń nay ní dɔ mbal̄ kə́ bo gə̄ tə́. 32Dan ń rāān̄ yá̰á̰ ń nuū oy anī, hor kógə̄ḿ mbutə ṵṵ. Banī hor kə́ dɔ dabə tun̄ yá̰á̰ tə́ ndə́lē tɔȳ hor ní, adə̄ hor ní oy kɔ̄ɔ́. 33Yá̰á̰ ń rāā yá̰a̰ ní de gə̄ oōn̄ gotə kə̄ lo gə̄ tə́, anī ənīn̄ mban̄g kə́ Persə gotə najə̄ ń toō, ədanən̄ na: Lo ń ngé tun̄ yá̰a̰ gə̄ ɓɔ̄ɔ̄n̄ hor kə́ yā ɓōĺ gidə tū tə́ pá tá kadə̄ ɔyn̄də́ aw̄n̄ sedə́ dɔ ɓē kə́ rang tə́ ní, əngen̄ yibə̄ kógə̄ḿ kə́ ɓɔ luy tū tə́. Nehemi ō, de gə̄ ń ra gīrə̄n̄ gidən ní ō, əlan̄ hor dɔ yá̰á̰ kə́ ndējə̄ Nə́ɓā tə́ i kə yibə̄ ngeé ń nuū. 34Dan ń mban̄g ndəle gír najə̄ ní ba a̰ā̰ kadə̄ i rɔ̄kum anī, ni adə̄ ənīn̄ ndogə̄ mbal̄ dɔ lo ní tə́ ō, əda kadə̄ de gə̄ ɓōlə́n̄ gidə lo ní ō. 35Ni ənge yá̰a̰ ngá̰ý gír lo ní tə́ ō, de gə̄ ń i madə̄ tan gə̄ ní, adə̄də́ kadə̄ karī gə̄ ngá̰ý ō. 36Nehemi nin̄ kə de gə̄ ń seneé ní a ɓārə́n̄ yibə̄ kə́ ɓɔ luy ní na i Nepətár, kumən na i tə́gó yá̰a̰ kadə̄ unjə̄ njáý njáý. Banī de gə̄ ngá̰ý a ɓārə́n̄ yá̰á̰ ní na i Nápətə.#1.36 Nápətə: i petərōl, ba i yibə̄ hor kə́ deē ndejə aĺ ɓáý, de gə̄ gerə̄n̄ yá̰á̰ ń nuū i jóó ngá̰ý.
Currently Selected:
2 MAKABE GƏ̄ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.