1 SAMUEL 1
1
Ana aw̄ loo kə́ táĺ kə́ Silo tə́
1De kógə̄ḿ ndi Ramataim Sopim, gō nang kə́ mbalá yā Epəraim tə́. Rī deē ní na i Elkana. Ni i ngōn̄ Yeroam kə́ ngōn̄ Elihu, kə́ ngōn̄ Tohu, kə́ ngōn̄ Supə ń i de kə́ Epərata ní. 2Nə̄yá̰n gə̄ i jōó. Kógə̄ḿ rīn na i Ana, ba kə́rēý rīn na i Penina. Penina ojə ngán gə̄, banī Ana ojə ngōn̄ alé. 3Dəngam ní a ḭḭ ɓē yān tə́ kə dɔ ɓāl̄ gə̄ a aw̄ Silo kɔsə non nang tə́ no Kɔ́ɔ̄ɓē nge tɔgə yá̰a̰ malang tə́ ō, tun̄ yá̰a̰ kadə̄n tə́ ō. Ngán Eli kə́ jōó gə̄ ń i Hopəni nin̄ kə Pinas ní n i ngé tun̄ yá̰a̰ gə̄ yā Kɔ́ɔ̄ɓē kə́ kem ɓē kə́ Silo tə́ ní.
4Kə dɔ tun̄ yá̰a̰ gə̄ malang ń noō Elkana a kēgə̄ núsə dā̰ kə́ tun̄ a adə̄ nə̄yá̰n Penina ō, ngán Penina gə̄ ō. 5Ba a adə̄ Ana i loo nja tə́ jōó tām̄ ni tár Ana ngá̰ý. Kɔ́ɔ̄ɓē adə̄ Ana ngōn̄ alé ɓá tā ba Elkana tárən ngá̰ý. 6Banī Penina a əda Ana i najə̄ kə́ tōr tōr̄ gə̄ dejə a əlań rɔ̄sɔl̄ dɔn tə́ tām̄ ngōn̄ ń Kɔ́ɔ̄ɓē adə̄n aĺ ní tə́. 7Adə̄ kə dɔ ɓāl̄ gə̄ ń noō ré Ana aw̄ kem kújə yā Kɔ́ɔ̄ɓē tə́ anī, yá̰á̰ ń Elkana a rāā seneé ní n noó ō, yá̰á̰ ń Penina a rāā seneé ní n noó ō. Ɓāl̄ kə́rēý tə́ dan ń Ana mbātə́ kəsa yá̰a̰ ba ndi a nōō ní anī, 8ngaan dəjen najə̄ əda na: Ana ā ī-nōō i rí? Ī-mbātə́ kəsa yá̰a̰ i tām̄ rí tə́? I ba̰ý á rɔ̄í nelī aĺ beē? Mā i só tə́ ngá̰ý tām̄ yāí tə́ tɔȳ ngání kə́ dəngam gə̄ kutə kógə̄ḿ aĺ a?
9Dan ń əsan̄ yá̰a̰ ō, a̰ȳn̄ yá̰a̰ ō, loo kə́ Silo tə́ gír gān̄g anī, Ana ḭḭ dɔɔ́ aw̄ ta róbə́ kə́ yā kudəń kə̄ kem kújə yā Kɔ́ɔ̄ɓē tə́ tə́. Eli ń i nge tun̄ yá̰á̰ ní ndi dɔ kōmbēré yān tə́ ta róbə́ kújə́ ní tə́. 10Wur Ana ɔlən ngá̰ý, adə̄ ni ndɔ̄ȳ Kɔ́ɔ̄ɓē i kə man̄ nōó kumən tə́. 11Ni-ənī ndūn əda na: Kɔ́ɔ̄ɓē kə́ bo kə́ tɔ́gən i ngá̰ý, ré á̰a̰ kum tō ndoō yāḿ mā nge kəla yāí ō, əga kemií dɔḿ tə́ ō, dɔí ndígə̄naləḿ aĺ ō, adə̄ ādə̄m̄ ngōn̄ kə́ dəngam anī, m-ā m-ɔ̄r̄ kamə̄n tayā tām̄ yāí tə́ kə dɔ ndɔ̄ gə̄ malang ń a ndiń kə kumneé ní ō, deē a əndā nə́nga dɔn tə́ yā dəsāń dɔn aĺ ō.
12Ana ndɔ̄ȳ Kɔ́ɔ̄ɓē dan i ngá̰ý. Eli əndā ma̰ȳn 13anī a̰a̰ i ndāŕ tan ngóy n a yéȳ banī oō ndūn alé, tām̄ ndɔ̄ȳ i kə̄ kemən tə́. Eli rāān i nge kasə rāā tə́, 14adə̄ ədan na: Kasə ní a rāāī ngá̰ý ɓáý a? Āw̄ ī-to ī-ɓīī ādə̄ kasə gán̄g kumií tə́. 15Ana tél ədan na: Kɔ́ɔ̄ḿ, mā i dəyá̰ kə́ wurəḿ ɔlə̄m̄ ngá̰ý. M-ā̰ȳ kasə nduú aĺ ō, m-ā̰ȳ yá̰á̰ kógə̄ḿ kə́ rāā deē kasə tə́ aĺ ō, ba m-ɔ́jə i Kɔ́ɔ̄ɓē yá̰á̰ kə́ kemḿ tə́. 16Ī-lōō rāām̄ mā nge kəla yāí dəyá̰ kə́ hálən nujə kɔ̄ɔ́ tə́. Tɔdɔ̄ i gír̄ najə̄ kə́ tɔȳ dɔḿ ngá̰ý ō, i wurəḿ kə́ ɔlə̄m̄ ngá̰ý ō n ndḛḛ̄ kadə̄ m-ɔ̄rəń najə̄ dan i ngá̰ý ní. 17Tā anī Eli əda na: Āw̄ kə kem sɔlɔ́ ō, ādə̄ Nə́ɓā yā Israel adī yá̰á̰ ń ī-dəjen ní ō. 18Ana tél ədan na: Ī-rāā kem majə seḿ mā nge kəla yāí kə̄ noí tə́. Ana ɔtə aw̄. Ni-əsa yá̰a̰ tā ō, dɔ kumən nelə̄n aĺ tītə̄ kə́ kété to̰ aĺ tā ō.
19Elkana nin̄ kə deē yān gēé ḭḭn̄ dɔɔ́ kə gír looí ɓatə ngá̰ý ba aw̄ ɔsən̄ nodə́ nang tə́ no Kɔ́ɔ̄ɓē tə́ rɔȳnən̄neé. Gō tə́ anī tél aw̄n̄ gogə́ ɓē yādə́ tə́ Rama.
Kojə Samuel
Elkana ɓīī kə nə̄yá̰n Ana, anī əga kem Kɔ́ɔ̄ɓē dɔ Ana tə́, 20adə̄ Ana ndān̄ ngōn̄. Dan ń ndɔ̄ kojə yān asə anī ojə ngōn̄ kə́ dəngam, ba əndā rīn na i Samuel, tɔdɔ̄ ni-əda na n-gəden na i jī Kɔ́ɔ̄ɓē tə́. 21Teē ɓāl̄ kə́ rang tə́ anī ngaan Elkana aw̄n̄ nin̄ kə de kə́ ta kújə yān tə́ gə̄ malang kadə̄ Kɔ́ɔ̄ɓē yá̰a̰ tun̄ kə́ kə dɔ ɓāl̄ gə̄ tə́ ō, rāā yá̰á̰ ń ni-ənī ndūn yā rāā kadə̄ Kɔ́ɔ̄ɓē tə́ ní ō, 22banī Ana aw̄ sedə́ alé. Ni-əda ngaan na n-ngóō kadə̄ ré n-ɔr̄ ngōn̄ ta mba tə́ pá tá n-aw̄ seneé Silo ta kum Kɔ́ɔ̄ɓē tə́ ɓáý ō, n-əya̰n kadə̄ ra kə̄ noó kə́ njɔ́ḿ gə̄ tə́ ō. 23Ngaan Elkana tél ədan na yá̰á̰ ń a̰a̰ ta kumən tə́ kadə̄ i yá̰á̰ kə́ majə ní kə rāā. Kə ndi kə ngōn̄ ní bátə́ kadə̄ ɔrə̄n ta mba tə́, ba kadə̄ Kɔ́ɔ̄ɓē rāā yá̰á̰ ń ənī ndūn yā rāā ní. Adə̄ Ana tél ndi gogə́ Rama adə̄ń ngōn̄ mba bátə́ ɔrə̄nneé ta mba tə́.
Ana ndējə̄ Samuel ō, ndadə̄ Kɔ́ɔ̄ɓē ō
24Dan ń ɔrə̄n ta mba tə́ kɔ̄ɔ́ anī aw̄ seneé kem kújə yā Kɔ́ɔ̄ɓē tə́. Nin̄ kə ngaaneé əhɔn̄ man̄g kə́ bəra kə́ ɓālə̄n i mətá jīdə́ tə́ ō. Unən̄ ndujə̄ kem káĺ kə́ bo kógə̄ḿ tə́ ō, kasə nduú jīdə́ tə́ kem sɔlɔɔ́ ō. Adə̄ Samuel tél nge rāā kəla yā Kɔ́ɔ̄ɓē. 25Ana nin̄ kə ngaaneé tɔ̄lə̄n̄ man̄g kə́ bəra ní ba tun̄ adə̄n̄ Nə́ɓā. Gō tə́ anī aw̄n̄ kə ngōn̄ ní rɔ̄ Eli tə́. 26Ana əda Eli na: Kɔ́ɔ̄ḿ, tītə̄ ń ī-ndiń kə kumií noō, dəyá̰ ń ndɔ̄ tə́ gēé ra rɔ̄í tə́ loo ń toō tə́ laā a ndɔ̄yń Kɔ́ɔ̄ɓē ní i mā. 27Ngōn̄ ń m̄-gəde Kɔ́ɔ̄ɓē kem ndɔ̄ȳ yāḿ tə́ ní n toó, Kɔ́ɔ̄ɓē adə̄m̄ yá̰á̰ ń m̄-gəden ní. 28Ba mā m̄-ndigə téləń kadə̄n. Adə̄ kə dɔ ndɔ̄ gə̄ malang ń a ndiń kə kumneé ní ni i deē yā Kɔ́ɔ̄ɓē. Gō tə́ anī ɔsə non nang tə́ ta kum Kɔ́ɔ̄ɓē tə́, rɔȳnneé.
Currently Selected:
1 SAMUEL 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.