1 KORḚNTƏ 1
1
Pol rāā Korḛntə gə̄ lápə́ya
1I mā Pol ń ɓāŕmə̄n̄ kadə̄ mā i ngōmbang kəla yā Jeju Kərist kə gō kem ndigə yā Nə́ɓāá ní, nin̄ kə ngōkó̰ó̰jí Sosten n 2əlan̄ kə makətūbə̄ ń toō adə̄n̄ Egəlijə yā Nə́ɓā ń ndin̄ kem ɓē kə́ Korḛntə tə́ ní. Nin̄-adə̄n̄ ngé gə̄ ń ɓārə́n̄də́ kadə̄ ndin̄ tām̄ yā Nə́ɓā tə́ á nin̄ i de gə̄ yā Nə́ɓā kə ta kūl̄ ɓoo naā yādə́ kə Jeju Kərist ní ō, adə̄n̄ de gə̄ malang ń ndin̄ kə̄ loo gə̄ tə́ malang ba a ɓārə́n̄ rī Kɔ́ɔ̄ɓē yājí Jeju Kərist ní ō, tām̄ ni i Kɔ́ɔ̄ɓē yādə́ ō, Kɔ́ɔ̄ɓē yājí ō mbak. 3Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.
Yá̰á̰ kə́ kənge kə ta kūl̄ Jeju Kərist
4m̄-ndadə̄ Nə́ɓā yāḿ ngándáńg tām̄ yāsí tə́, najə̄ yá̰a̰ gə̄ ń ni-adə̄sí kə gō kem majə yānneé sɔɔ̄ń Kərist Jeju ní. 5Tɔdɔ̄ dan ń ī-ɓooī naā kə Kərist Jeju ní, ə́ngeī yá̰a̰ gə̄ malang kum asə naā, ə́ngeī tɔ́gə yā kɔrə̄ń najə̄ dɔ yá̰a̰ gə̄ tə́ malang ō, yā gerə̄ń yá̰a̰ malang ō. 6Tɔdɔ̄ najə̄ kə́ kum tə́ kə́ kəda dɔ Kərist tə́ əla ngəran ngan̄g ngá̰ý dansí tə́, 7adə̄ sḭḭ̄ ń ī-ndi ā ī-ngóōī kum mbang ń Kɔ́ɔ̄ɓē yājí Jeju Kərist a teēń hɔy tə́ ní, yá̰á̰ kógə̄ḿ kə́ Nə́ɓā a adə̄ de gə̄ kə ta kūl̄ kem ndaa yānneé kə́ sḭḭ̄ ī-nalī ní gətóo. 8I ni n a mbūsə̄sí kadə̄ ī-raī ngan̄g bátə́ ta tɔ̄l̄ ta tə́, yā kadə̄ sḭḭ̄ i kə́ kanjə̄ najə̄ dɔsí tə́ ndɔ̄ yā Kɔ́ɔ̄ɓē yājí Jeju Kərist tə́ ō ní. 9Nə́ɓā ń ɓāŕsí kadə̄ ī-ɓooī naā kə Ngōnən Jeju Kərist ń i Kɔ́ɔ̄ɓē yājí ní, i Nə́ɓā kə́ nge ra dɔ ndūn tə́.
Kēgə̄ naā kə́ to dan ngé kán̄ naā gə̄ tə́
10Ngákó̰ó̰ḿ gə̄, m̄-dəjesí kə rī Kɔ́ɔ̄ɓē yājí Jeju Kərist, ōōī naā ba ādī kēgə̄ naā gətóo dansí tə́. Ādī gír̄ yāsí i kógə̄ḿ ō, yá̰á̰ ń ī-gḛyiī rāā ní i yá̰á̰ kə́ kógə̄ḿ beē ō. 11Ngákó̰ó̰ḿ gə̄, yá̰á̰ ń mēr̄ kadə̄ m-ɔ̄rəń najə̄ ń toō sesí ní, i tām̄ koō kə́ m-ōō ta de gə̄ yā Kəlowe tə́ na kɔ̄l̄ naā na i dansí tə́. 12Yá̰á̰ ń m̄-gḛy kədasí ní n toó: Sḭḭ̄ kógə̄ḿ kógə̄ḿ ní, najə̄ kɔr̄sí gə̄ i tayā tayā. Ngé kə́rēý gə̄ ədan̄ na: Mā i yā Pol. Kə́ madə̄ gə̄ ədan̄ na: Mā i yā Apolos. Kə́ rang gə̄ ədan̄ na: Mā i yā Kepas. Tá ngé kə́rēý gə̄ ədan̄ na: Mā i yā Kərist. 13Ní, Kərist i kə́ gán̄gnən̄ naā tə́ a? I Pol n əndanən̄ kə máyá̰ tū kāgə̄ kə́ dēsə́ tə́ tām̄ yāsí tə́ ní a? Rāān̄sí batém i kə rī Poló a?
14m̄-ndadə̄ m-ādə̄ Nə́ɓā tām̄ m̄-rāā deē kógə̄ḿ dansí tə́ batém alé, banī i Kərispus nin̄ kə Gayus ngóy. 15I beé ní, deē kógə̄ḿ kə́ asə kəda na rāān̄sí batém na i kə rīḿ māá ní gətóo. 16Á, dɔḿ ndígə̄nal, m̄-rāā de kə́ kem kújə yā Esətepanas tə́ gə̄ batém ō. Banī kə́ tām̄ yā gotə gə̄ tə́ ní, de kə́ rang kə́ m̄-rāān batém ní m̄-ger̄ alé. 17Tɔdɔ̄ Kərist əlam̄ i rāā de gə̄ batém tə́ alé, ba i kɔjə de gə̄ Najə̄ kə́ Majə tə́, kanjə̄ kɔjədə́ kə kum kedə̄ najə̄ yā deé. Tɔdɔ̄ ré i beé anī, koy ń Kərist oy tū kāgə̄ kə́ dēsə́ tə́ ní, a tél i yá̰á̰ kə́ karī.
Jeju Kərist i tɔ́gə yā Nə́ɓā ō, i kum kedə̄ yā Nə́ɓā ō
18Tɔdɔ̄ najə̄ kə́ dɔ koy ń Jeju oy tū kāgə̄ kə́ dēsə́ tə́ ní, i najə̄ kə́ to mbóo tām̄ yā ngé gə̄ ń a udən̄ kɔ̄ɔ́ tə́ ní, banī i tɔ́gə yā Nə́ɓā tām̄ yājí jḭḭ̄ ń j-a j-ajiī tə́ ní. 19Tɔdɔ̄ ndangən̄ kem makətūbə̄ yā Nə́ɓā tə́ na:
M-ā m̄-nujə kum kedə̄ yā ngé kum kedə̄ gə̄ kɔ̄ɔ́ ō,
m-ā m̄-mbātə́ yá̰a̰ ger̄ yā ngé ger̄ kum najə̄ gə̄ kɔ̄ɔ́ ō.
20Ní, nge kum kedə̄, aláa nge ger̄ yá̰a̰, aláa nge tɔ́sə̄ najə̄ kə̄ ndágá kə́ ngɔlaā ń toō a əda na i rí ɓáý? Nə́ɓā ɔjə kə̄ ndágá kadə̄ kum kedə̄ kə́ dɔ nang tə́ laā i mbóó yá̰a̰ karī aĺ a!
21Tɔdɔ̄ loo ń kum kedə̄ yā Nə́ɓā ɔjə rɔ̄n kə̄ ndágá tū tə́ ní, de kə́ dɔ nang tə́ laā gə̄ a̰a̰n̄ Nə́ɓā tū tə́ gerə̄n̄ kə ta kūl̄ kum kedə̄ yādə́ alé. I tām̄ najə̄ ń noō tə́ n Nə́ɓā gḛyń kajə ngé taā kem gə̄ kə ta kūl̄ najə̄ kə́ to mbóó ń j-ɔjə ní. 22Jipə gə̄ dəjen̄ kadə̄ rāān̄ yá̰a̰ gə̄ kə́ ɔjən̄ kəla rāā Nə́ɓā kə̄ ndágá ō, Gərek gə̄ a sāān̄ i kum kedə̄ ō. 23Banī jḭḭ j-ɔjə i najə̄ yā Kərist kə́ əndanən̄ kə máyá̰ tū kāgə̄ kə́ dēsə́ tə́. I najə̄ kə́ əga Jipə gə̄ bə̄dē tə́, banī de gə̄ ń nin̄ i Jipə aĺ gə̄ ní, i najə̄ kə́ to mbóo ta kumdə́ nin̄ tə́. 24Banī tām̄ yā ngé gə̄ ń Nə́ɓā ɓāŕdə́ tə́ ní, Jipə gə̄ aké Gərek gə̄ ní, ni i Kərist, adə̄ i tɔ́gə yā Nə́ɓā ō kum kedə̄ yā Nə́ɓā ō. 25Tɔdɔ̄ yá̰á̰ ń deē a̰ā̰ anī to tītə̄ kə́ Nə́ɓā mbóo i mbéé ní, kum kedə̄ kə́ tū tə́ tɔȳ kum kedə̄ yā de gə̄ ō, yá̰á̰ ń deē a̰ā̰ anī to tītə̄ kə́ tɔ́gə́ Nə́ɓā gətóo i mbéé ní, yá̰á̰ ń noō tɔ́gən tɔȳ tɔ́gə deē ndul gə̄ ō.
26Ngákó̰ó̰ḿ gə̄, sḭḭ̄ ń Nə́ɓā ɓāŕsí ní, ə̄ndāī ma̰ȳ rɔ̄sí sḭḭ̄ kɔ́ gə̄ á̰a̰ī ké sḭḭ̄ i naā gə̄ wa. Ta kum deē tə́ ní, ngé kum kedə̄ gə̄ i ngá̰ý dansí tə́ aĺ ō, ngé kə́ kə tɔ́gə́də́ gə̄ i ngá̰ý dansí tə́ aĺ ō, de kə́ gír kaa yā de kə́ bo gə̄ tə́ i ngá̰ý aĺ ō. 27Banī Nə́ɓā gə̄rā i yá̰á̰ kə́ to mbóo ta kum de kə́ dɔ nang tə́ gə̄ tə́ n əlań rɔ̄sɔl̄ dɔ ngé kum kedə̄ gə̄ tə́ ō, ni-gə̄rā i yá̰á̰ kə́ tɔ́gən gətóo ta kum de gə̄ tə́ n əlań rɔ̄sɔl̄ dɔ yá̰á̰ kə́ tɔ́gən to tə́ ō, 28gə̄rā i yá̰á̰ kə́ ngár̄ aĺ bátə́ ta kum de gə̄ tə́ ō, yá̰á̰ kə́ de gə̄ kídə̄n̄ kɔ̄ɔ́ ō, kə́ de gə̄ rāān̄ i yá̰á̰ aĺ bátə́ tə́ ō n i yā nujəń yá̰á̰ kə́ to yá̰a̰ ta kum de gə̄ tə́ ní. 29I beé n deē ndul a asəń kɔjə rɔ̄n ta kum Nə́ɓā tə́ aĺ ní. 30Banī Nə́ɓā ɓoosí naā tə́ kə Jeju Kərist ō, ni-rāā Kərist ní i kum kedə̄ yājí kə́ ḭḭ rɔ̄ Nə́ɓā tə́ ō, yá̰á̰ kə́ gōtə́ yājí tə́ ō, kə́ kɔr̄ kam̄ tām̄ yā Nə́ɓā yājí tə́ ō, gān̄g dɔ yājí tə́ ō. 31Tɔdɔ̄ ndangən̄ kem makətūbə̄ yā Nə́ɓā na:
Yā kadə̄ náā nəkɔ́ ɓáa ɔr ta rɔ̄n i kem Kɔ́ɔ̄ɓē tə́#1.31 K. 31: Á̰a̰ī Jer 9.23.
Currently Selected:
1 KORḚNTƏ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.