Oroma 1
1
1Kwupu kwɔlɛ kwu ngyi munyi mi, Imi Ɔpɔlu, umɛgba mbala uzilɔ uwu Okrasi Ɔzhizɔsi. Ukpo a ya mi ma akwɛyi a ŋa mi kaa la mi tanu iyi iso iyesheshi iyi Ukpo. 2Iso iyesheshi ɛlɛ Ukpo e so e shi mɛzhi ngbaa mekyekyi iyi bɔkɔ anukenzu wu ɔ ka mu Kwokpo ungwu iso iyi Ukpo. 3Iso iyesheshi ɛlɛ akwu meka iyi umɛ wu, Ɔkwu nzu Ɔzhizɔsi Okrasi uwu bɔkɔ a vindɔ onzu akwɛyi a wɔ mu ɛdɔ iyi Odevidi awu; 4meka iwomo iyi Kwundu uwu Ukpo, ɔ zɔ wu te lakwu Umɛ uwu Ukpo mu ekpasu iyɛku bɔkɔ o yi wu mo mu kwuvɔ awu: Onzu ele akwu Ɔzhizɔsi Okrasi Ɔkwu nzu. 5Meka wu gba Ukpo e shi mi esheshi wu akwɛyi mi kwu uzilɔ kaa la mi ya enzu umba kwudu kwɔlɛ lɛɛbi kaa lo kwu idu lu fulo akwɛyi lo lomo le. 6Lunyi tete lu kyo mu enzu umba bɔkɔ Ukpo a ya mba ma kaa lɔ kwu umba Ɔzhizɔsi Okrasi.
7Kwupu kwɔlɛ mi ka yi lunyi lɛɛbi umba bɔkɔ lu yi mu Oromu, bɔkɔ Ukpo e pwu idɛnyi yi akwɛyi a ŋa yi kaa la lu mbwalu wu awu:
Ukpo Ete nzu mbala Ɔkwu nzu Ɔzhizɔsi Okrasi le shi yi esheshi mbala egbo iyi oloto.
Ukpo Ilɛma Iyi Ɛnyi Igbɛlɛma
8Iyi kwonze, mi gbɛlɛ Ukpo ɛnyi mu Ɔzhizɔsi Okrasi kwuwo yi, kwuwongu ikwu idu lu fulo yi, enzu o yi mu ɛza yi ipwama munamuna mu kwudu kwɔlɛ. 9Ukpo uwu bɔkɔ mi wo wu ɛduma la egbo mi lɛɛbi mu anu itama iyi iso iyesheshi iyi Umɛ wu awu, akwu u uzɔgɔ mi tee mi lolo yi iyɔkpɔɔ 10mu Ukpo ilɛma mi kwuyengwunanguna. Imi mii nda Ukpo tee gba akwu mu inyama wu, la wu mi ɔgwuzɛ ma kaa la mi so munyi yi kekelele.
11Moo mi gyi tee la mi ma yi kaa la mi shi yi rɛshi ingyi kwundu uwu Ukpo ingyi bɔkɔ ri shi yi lu kɔma. 12Iyi mi so gba i yi tee, lunyi mbala mi la ki ka esu ɛnwu ma, la mi ka yi ɛnwu ma mu ikwu idu lu fulo mi, lunyi tete la lu ka mi ɛnwu ma mu ikwu idu lu fulo yi. 13Ɛmɛnɛ mi wa mbwalu, mi gyi te la lu yitu te izhi riba mi gyi te la mi bo munyi yi ɔgwuzɛ u semo iyɔkpɔɔ. Mi gyi te la mi fya wa mbwalu meka yi kyamate bɔkɔ mi fya meka iyi umba bɔkɔ akwu Azhu mo awu.
14Moo ɔlu uwu enzu lɛɛbi u yi mu reshi mi, umba bɔkɔ o wu eyi mo mbala umba bɔkɔ o wu eyi mo mo, umba bɔkɔ akwu egbuduru mbala umba bɔkɔ akwu egbuduru mo. 15Inyi gba i shi mi gyikpɔɔ tee la mi tanu iyi iso iyeshi la lunyi umba bɔkɔ lu yi mu Oromu le.
Ɛkpasu Iyi Iso Iyi Ukpo
16Imi mi wo lovya undu iso iyesheshi ɛlɛ mo, kwuwongu inyi gba akwu ekpasu iyi Ukpo iyi bɔkɔ i sa onzu uwunawuna uwu bɔkɔ e kwidu e fulo ma wu le, la Azhu keyi dɛ akwɛyi mbala umba bɔkɔ akwu Azhu mo. 17Moo mu iso iyesheshi ɛlɛ gba, Ukpo a wa la ototo wu kwudu le, ototo uwu bɔkɔ o fya wu mu ɔgwuzɛ uwu ikwu idu lu fulo mu iyemo nzhii ba imbwama, kyamate bɔkɔ ɔ ka mu kwokpo ungwu iso iyi Ukpo tee: <<Onzu ototo ee yi kwunyɔ kwuwongu ikwu idu lu fulo wu.>>
Onzu Ɔsɛkɛnɛ E Yi Mo
18Ukpo moshi a zɔ tee e yi mu amba iwomo, mekeka iyi ingbomo mbala ira iyi enzu umba bɔkɔ o kpa ongbulolo kwota mu ira mba iwomo 19Ukpo e lo mbo inyashi kwuwongu iyi bɔkɔ ifate lo yitu meka iyi Ukpo i nvyemo mo, moo Ukpo mafyi wu a ta yi mba kwudu ndunduu. 20Moo ngba bɔkɔ Ukpo e wo kwudu kwɔlɛ le, apula wiyifo iyi bɔkɔ eyi iyi onzu e do te i ma yi mo, ekpasu wu iyɔkpɔɔ ba ɔkpɔɔ mbala i yi mo wiyi Ukpo tetete o ma yi gedegede mu apula iyi bɔkɔ e wo. Kwuwo kwɔlɛ onzu uwunawuna e yi kwuyi ungwu bɔkɔ a zɔ tee ungwu gba ku shi gba e yi Ukpo mo le mo.
21Moo umba o yitu iyi Ukpo, ɔbulɛ ŋa o du wu ma mo kwuwongu akwu Ukpo ba o gbɛlɛ wu ɛnyi mo. Egbo ibyima mba iyɔkpɔɔ ba akwiyi umbwa akwɛyi o nyɔlɔ egbo mbo mo mu ipwu. 22Umba o zɔ tee o yi amasa, ɔbulɛ akwu erendo; 23akwɛyi o to inzumbɛku iyi Ukpo uwu bɔkɔ e kpomo mo akwɛyi o shi yi apula iyi bɔkɔ o wo yi kyamate onzu mbala afyi mbala izɔfyi mbala apula iyi bɔkɔ i pyipyi mubu tayi iyi bɔkɔ i kpomo.
24Kwuwo kwɔlɛ, Ukpo a ra la enzu mbɔlɛ te e shi kaa lo wo iyira iyi bɔkɔ egbo mbo i gyi mbala ɛnwu mba akwɛyi oo wo apula iyi kashi, iyi lovya mbala esu. 25Umba o ŋanga ongbulolo uwu Ukpo ma mbala angba, o lɛ akwɛyi o gbo ɔya la apula iyi bɔkɔ Ukpo e wo, moo akwu Uwu uwu bɔkɔ e wo apula ɛnyi awu mo. Iduma akwu iyawu iyɔkpɔɔ! Li yi tayi.
26Kwuwo kwɔlɛ, Ukpo a ra mba e shi kaa lo wo apula iyi lovya. Eko mbo lala o ŋanga inɔma iyi oko mbala ɔnzɔnu iyi bɔkɔ Ukpo e wo le mo, akwɛyi eko ɔ nɔ mbala eko iyi bɔkɔ akwu ɔgwuzɛ uwu Ukpo e wo le mo. 27Tatayi anzɔnu o lafya la inɔma mbala eko iyi bɔkɔ akwu ɔgwuzɛ uwu Ukpo e wo le akwɛyi kwofya ungwesu kwu nyɔlɔ mba ma. Anzɔnu o wo apula iyi lovya mbala anzɔnu umbafo, kwuwo kwɔlɛ o ka la ɛmba inyashi iyi bɔkɔ ifama mba kwuwongu iwomo iyira mba.
28Kwuwongwu o shi iyitu iyi Ukpo mu egbo mbo mo, Ukpo a ra mba e shi la egbo mbo iyira kaa lo wo apula iyi bɔkɔ ifate lo wo mo. 29Ɔ nyɔlɔma mbala inzumbira iyinayina, ira, ekweyi mbala ira iwomo mbala esu. O nyɔlɔma mbala rise, mbala enzu ingbɛma, mbala ovyo, mbala kwukyoro mbala i ra la onzu makɔ. Umba akwu wakyɛ enzu ma, 30wa tutu esu mo, ɔ gyi Ukpo mo, o lomo mo, ɔ zɔ te o iyitu o ka uwewe ma mbala ɛnwu ikwumo; ɔ gagyi ɛgwuzɛ iyi ira iwomo iyɔkpɔɔ; o lomo la umba ete mbo mbala anyi mba mo; 31o bi egbo mo, oo wo iyi bɔkɔ umba o so te oo wo mo, o yi idɛnyi iyi enzu mo, o yi inyashi iyi onzu mo. 32Umba o yitu iso iyi Ukpo i zɔ tee enzu umba bɔkɔ o wo apula ɛnyi tayi lukwu gba lu fa ma mba le. Tetete, akwu apula ɛlɛ iwomo kɛɛkyi gba o so wu mu iwomo le mo, umba o kyo o mbwama la enzu umba bɔkɔ o wo yi.
Currently Selected:
Oroma 1: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
