Iwomo 28
28
Ɔpɔlu A Ka Mu Omalita
1Tabɔkɔ ki la mɛzhi moloto, akwɛyi ki dama te kutashi kwɔngu o ya ngwu te Omalita. 2Enzu umba kwutashi kwɔngu o na nzu ewepo. Kwuye kwɔngu Ukpo e yi mu itumo, kizɛ ba ki tumo akwɛyi o kpala nzu ɔyi kaa la ki vye. 3Ɔpɔlu a kpala aka iyi ɛwɛyi ɛlu akwɛyi tabɔkɔ a gyi te le fu yi mɔyi, uzu uwɔyi u ra laa ogbazhi ma akwɛyi a la wu ɛnyi akwɛyi a tɛ wu mu kwuwo. 4Tabɔkɔ enzu umba kwutashi kwɔngu o ma ogbazhi te a tɛ Ɔpɔlu mu kwuwo, akwɛyi o za la esu te, <<Onzu ele akwu u ngbɛ enzu, moo Ukpo a wa wu ma mu embyi mu risu, tetete ira wu i de gbo i ye wu mu imbwaluma.>> 5Ɔpɔlu ba a vu kwuwo wu fuu akwɛyi ogbazhi awu a luma a ta mu ɔyi, uwu ba e wo Ɔpɔlu ira mo. 6Enzu mbamba o fulo eyi te Ɔpɔlu a nyɛma naa a ta gbuu mɛzhi e kpomo, o rima ngbɛɛ ba o ma kiya kinyinyi te ki wo wu mo, akwɛyi o fulo egbo wa akwɛyi o zɔ te onzu ele akwu ukpo.
7Onzu uwufo o ya wu te Ɔpubilɔ u to keyi uwu kutashi kwɔngu e yi agba kɛlɛ mɔmɔ. Onzu ele a na nzu ewepo, ki ŋɔ mogba wu nzhii ba afyi ela. 8Ete wu Ɔpubilɔ a nɔma mɛzhi iyi ofya umbu emi ifumo mbala okpakyi. Akwɛyi Ɔpɔlu a ka te la ma wu, mizhikembo iyi Ɔpɔlu a lɛ Ukpo, e fulo wu ewo akwɛyi ofya wu u bomo. 9Tabɔkɔ ɛlɛ i wo akwɛyi enzu umba bɔkɔ o yi mu efya ipwuma mu kutashi kwɔngu o bo akwɛyi o bo mbo efya ma. 10O mu o kpo nzu gyɔɔ, akwɛyi kwuyengwu bɔkɔ ki yi ɛnwu ma iyi ifulomo mu kwoda ungwu embyi, o kwu apula gyɔɔ i ki yi ugɔ yi mu luzɛ ndɔlɛ o shi nzu.
Ɔpɔlu A Lafya Laa Omalita A Ka Mu Oromu
11Mizhikembo iyi evya ela, ki fye mu kwoda ungwu bɔkɔ kwu to ɔnɛka ngyɔɔ kwu rima mu kutashi ungwu Omalita, kwu wɔ mu Alɛkizanda o ka ngwu ɛzu te ukpo apiri umba bɔkɔ o ya mba te Ɔkasitɔ mbala Opolusi awu. 12Ki bo mu Osiraku akwɛyi ki ŋɔ mɔmɔ afyi ela. 13Ki wɔ mɔmɔ ki zɛ mu kwoda ungwu embyi ki bo mu Oregiyumu. Eyi i lama kwokpo ungwu ononoyo kwu yi mo, tabɔkɔ eyi i lama, ki fye mu Oputeyo. 14Ki du wa mbwalu umbafo mɔmɔ akwɛyi o za nzu te la ki wo orondo mbala mba, akwɛyi ki ka mu Oromu. 15Wambwalu umba bɔkɔ o yi mu Oromu, o pwa te ki yi mu inyɔma akwɛyi o lɔ enzu te lo kpolo nzu mu kwuse ungwu o ya ngwu te rishi ingyi Apiyɔsi mbala kizɛ ingyi ɛnwu igbomo ingyi bɔkɔ o ya ngyi te igwu ela iyi ɛnwu igbomo awu. Tabɔkɔ Ɔpɔlu a ma mba, ɛnwu i ka wu ma akwɛyi a gbɛlɛ Ukpo ɛnyi.
Ɔpɔlu A Ta Anu Mu Oromu
16Tabɔkɔ ki fye mu Oromu, o lafya la Ɔpɔlu te la ŋɔ iya wu mbala osozha ukpɛnyi kaa le gbo wu mo.
17Mizhikembo iyi afyi ela, Ɔpɔlu a ya enzumbakɔ umba Azhu ma, kwuye ungwu o kpala ɛlu akwɛyi a za mba te: <<Ɛmɛnɛ mi, imi mi wo kiya ingyira mo naa mi towo ɔgwuzɛ uwu bɔkɔ asɔkwu nzu o zɔ nzu ma mo, umba asɔkwu nzu ba o yi mi mo, akwɛyi o ka mya mu Ɔzhɛrusalɛ o ka mya mu Oroma. 18Enzu umba Oroma o yo mi eyo akwɛyi o gyi te lo lu mi afyima, mo o ma ombu uwu ira bɔkɔ mi wo bɔkɔ i do te lɔ ngbɛ mi ma mo. 19Azhu ba o nyama mo, kwuwo kwɔngu akwa mi mɛga ka la mi bo la ombu midu iyi Osiza, moo akwu te mi yi ewa mbala enzu mi le mo. 20kwuwo ngwɔlɛ gba mi gyi te la mi ma yi kaa la mi siso mbala yi le. O lo mi ɛyɛ kwongwu usama uwu bɔkɔ enzu nzu, Izirɛ o yi mu eyi ifulomo ma wu.>>
21Enzu wu, Azhu, o gba wu opwu te, <<Ki di na kwupwu mba Ozhudiya mu reshi ŋɔ mo bɛnɛ; ɛmɛnɛ umba bɔkɔ o wɔ mɔmɔ le ba o bo lo ewa ŋa mo ba o so iso iyira ŋa mo. 22Kinzu ba ki gyi te la ki pwa egbo iya ŋa, mo ki yitu te enzu munamuna o yi mu iso iyira isomo iyi uzhi ɔlɛ.>>
23Akwɛyi wa to keyi umba Azhu o nyama te lo kpolo esu mbala Ɔpɔlu mu kwɔfyi kwowa, akwɛyi umba gyɔɔ o bo mbaa bɔkɔ Ɔpɔlu e yi awu. Ɔpɔlu e so mbo iso iyi irɛsu iyi Ukpo i na mu kwoto nzhii ba mu onoyo akwɛyi a gyite la na mba egbo mo mu iso iyi Ɔzhizɔsi laa ɛzu iwama iyi ɛrama iyi Omosisi mbala kwokpo ungwu bɔkɔ anukenzu o ka. 24Enzumbako umbafo o nyama mu iso iyi bɔkɔ Ɔpɔlu e so, umbafo ba o nyama mo. 25I ta mba kambwu akwɛyi o le mu i fulomo mizhikembo iyi bɔkɔ Ɔpɔlu a mbwa opwu te: <<Kwundu uwu Ukpo e so ongbulolo umba asɔkwu yi kwuyengwu bɔkɔ e so mu kenzu unga anukenzu Azaya te:
26<< <So mba enzu mbɔlɛ ka za mba te, <<Lu koko lu pwa ngbɛɛ, ba
lu zɔngɔma yi ma mo; lu koko li yese mo ngbɛɛ, ba lu ma mo.>>
27Moo egbo iyi enzu mbɔlɛ i kɔma,
o se alu mba ma ka lo pwama mo,
O kpala eyi mbo mo.
O wo ɛlɛ kaa lɔ ma ongbulolo mo,
ba lɔ pwa iso wu mo, Kwuwongwu o zɔngɔma yi ma mu egbo mbo ba o ta mɛzhi, akwɛyi Mii na mba.
28Akwɛyi Ɔpɔlu a mbwa yi te: <<Mi gyi te la lu yitu te Ukpo a lɔ iso iyi isama la enzu umba bɔkɔ akwu Azhu mo, umba o ngbɛ alu akwɛyi o na yi!>> 29Mizhikembo iyi bɔkɔ Ɔpɔlu e so ɛlɛ, akwɛyi Azhu o kama iyamba, la kambwu irimo mbala esu. 30Lɔri lopo ngyɔɔ Ɔpɔlu a ŋɔ mu ugu uwu bɔkɔ a na le akwɛyi enzu umba bɔkɔ o bo munyi wu lɛɛbi a na mba la ɔnyɛ. 31Kwuye kwɔngu a tanu iyi irɛsu iyi Ukpo gedegede mbala ɛzu izɔma meka iyi Ɔzhizɔsi Okrasi ba o yi wu mo mo.
Currently Selected:
Iwomo 28: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
