Iwomo 26
26
Ɔpɔlu A Gbɛ Ɛnwu Ma Midu Iyi Agiripa
1Akwɛyi Ɔsu Agiripa a za la Ɔpɔlu te, <<Kekelele mi shi ŋɔ kapa ka siso.>> Akwɛyi Ɔpɔlu eyefaa a gbɛlɛ ɔsu ɛnyi akwɛyi e le mu ombu wu ifumo. 2<<Bagayidu Ɔsu Agiripa, mi mu ɔnyɛ gyɔɔ te ɔnɛnɛ mi rima mu keyi ŋɔ kaa la mi gbɔ ɛnwu mi ma meka iyi iso iyi bɔkɔ Azhu o so lɛɛbi mu reshi mi. 3Iyi bi shi mi mu ɔnyɛ ika gba akwu te ŋɔ yitu iyi ukwu uwu Azhu mbala apula iyi bɔkɔ umba o rilɔmbu ma yi. Kwuwongwu ɔlɛ mi kpa ŋa ɛshɛku, ka yidu ka pwa opwu uwa mi.
4<< Azhu lɛɛbi o yitu iyi iyimo mi ngba kwuyengwu bɔkɔ mi umɛshɛri. O yitu iyi iyilareyi mi bi yi, iyo mu ɛzhi mi mbala Ɔzhɛrusalɛ munɛ. 5Gba umba o nyama te o so ongbulolo, umba o yi mi diridiri-e te mi kwu Ofarisi, uzhi uwu enzu umba bɔkɔ o mbwalu ɛrama iyi Omosisi mamari. 6Mi rima munɛ ɔnɛnɛ kwongwu mi mbwalu iso iyi bɔkɔ Ukpo e so e shi mɛzhi la asɔkwu nzu le. 7Ɛlɛ gba lunzu uwola lopo undu asɔkwu nzu o fulo eyi te li nyɔlɔma le, tabɔkɔ o lɛ Ukpo utu la ɔnu. Bagayidu ɔsu, akwu kwongwu ɔlɛ gba Azhu o bo mi mu udaba ŋa le. 8Kimbe ki wo bɔkɔ lu nyama te Ukpo e do te e yi enzu umba bɔkɔ o kpomo mo?
9<< Kwuye kwɔngu Imi mi ma mate ifate la mi so iso iyira mu reshi ingyi Ɔzhizɔsii uwu Ɔnazarɛti. 10Ɛlɛ gba Imi mi wo le mu Ɔzhɛrusalɛ. Eboshi umbakɔ o shi mi kapa, akwɛyi mi fu enzu umba bɔkɔ o mbwalu Ukpo ele gyɔɔ mu ugu ugyi. kwuyengwu wa to keyi umba Azhu o shi kapa te lo ngbɛmba ma awu mi nyama mi kyo tete. 11Mi koko mi fulama mu idaba iyi ɛlu ikpala iyi Azhu akwɛyi mi yi mbo mi lo mbo inyashi, mi kpa mba mɛga kaa lo zɔ te umba ɔ mbwalu Ɔzhizɔsi fo. Mi wo anya mba nzhii ba mi mbwalu mba mu ese-ese iyi bɔkɔ akwiyi Izirɛ mo kaa mi lo mbo inyashi.
Ɔpɔlu E So Iyi Bɔkɔ I Wo Bɔkɔ A Na Ɔzhizɔsi
(Iwomo Iyi Wa zɛ ilɔ 9.1-19; 22.6-16)
12Ɔnu uwufo mi sheye mu Ɔdamasikɔ kaa mi lo wa mbwalu inyashi. Watokeyi umba ebwoshi o shi mi ekpasu kaa la mi wo tayi. 13Bagayidu ɔsu Agiripa, ta bɔkɔ mi yi mu ɔgwuzɛ mu ɔnɔnda akwɛyi ɛbɛ iyɛku i wɔ moshi i kpo mami, ɛbɛ ɛnyi iwuluma i ka ɔnu ma, akwɛyi i lo mi mbala enzu umba bɔkɔ ɔ zɛ mbala mi meka. 14Kinzu lɛɛbi ki kpeyi mbwɛ mɛzhi akwɛyi mi pwa opwu uwu onzu uwufo u siso mbala mi mu kenzu unga Iburu u yo mi te, <Ɔsɔlu Ɔsɔlu kimbe ki shi bɔkɔ ŋɔ lo mi inyashi te?> Kanɛ ngɛlɛ ŋɔ nɛ ɛŋɔ mo akwu imi mo. A kwu erendo ka kiri ewa mbala mi, Ɔkwu ŋɔ.>
15<<Akwɛyi mi yo wu kwuyo te, << < Uŋɔ ŋɔ kwu uwe ngyɔɔ Ada?> a gba mi opwu te, << < Imi mi kwu Ɔzhizɔsii, uwu ŋɔ ye wu mu inyashi ilomo awu.> 16Kekelele, yimo kaa rima! Imi mi wa ŋa meyi kaa mi za ŋa te wo mi ɛduma. Akwɛyi ŋɔ za la enzu kiya ingyi bɔkɔ ŋɔ ma lɛɛbi ingyi bɔkɔ ŋɔ ma, mbala iyifo iyi bɔkɔ mi bi zɔ ŋɔ. 17Mi wa ŋa ma mu ewo iyi ɛmɛnɛ ŋɔ Azhu mbala umba bɔkɔ akwu Azhu mo. Imi mi lɔ ŋɔ ma munyi mbo. 18Mi lɔ ŋɔ kaa so ka wu mbo eyi mo kaa lo kwu ira ɔsu lo ma ɛbɛ, kaa lo lafya la onzu uwoyi imbwalu ma, ka lɔ mbwalu Ukpo, akwɛyi Ukpo a gba la ingbomo mbo a kpa mba, akwɛyi e shi mbo kizɛ mekeka iyi enzu umba bɔkɔ o kwudifulo ma mi.>
Ɔpɔlu E So Iso Mɛka Iyi Ɛduma Wu
19<<Kwuwongwu ɔlɛ, Bagayidu Ɔsu Agiripa, Imi mi mbwalu iso iyi bɔkɔ opwu uwu Ɔzhizɔsi u wɔ moshi u so mi te la mi wo. 20Mi ye kambwu la anu itama iyi Ɔzhizɔsi la Azhu umba bɔkɔ o yi mu Ɔdamasikɔ keyi, akwɛyi mi ta la umba bɔkɔ o yi mu Ɔzhɛrusalɛ mbala umba bɔkɔ o yi mu ɛzhi iyi Ozhudiya lɛɛbi. Mizhikembo ɛnyi mi za la enzu umba bɔkɔ akwu Azhu mo tete, te lo kwu ira ɔsu kaa lo mbwalu Ukpo. Luzɛ mba la lu zɔ te umba o kwu ira ɔsu kego. 21Kwuwongwu ɔlɛ gba Azhu o yi mi mo mu ɔtɛpu le akwɛyi o gyite lo ngbɛ mi ma. 22Ukpo ba a mbwa mi ma nzhii kwɔfyi ɔnɛ, bɔkɔ mi rima munɛ kaa la mi so uwewe ɛmɛshɛri mbala enzumbakɔ, iso iyi Ɔzhizɔsi. Mi tanu iyi kiya ingyi bɔkɔ anukenzu mbala Omosisi mafyi wu a zɔ te ri wo le kɛɛkyi, 23mi za mba te Okrasi ele, a ma inyashi akwɛyi e kpomo, uwu gba akwu onzu uwu kwonze uwu bɔkɔ Ukpo e yi wu mo mu kwuvɔ le, akwɛyi a nya la ɛbɛ la enzu wu, Azhu mbala enzu umba bɔkɔ akwu Azhu mo.>> 24Tabɔkɔ Ɔpɔlu e yi mu ombu wu ifumo, iyi kiya ingyi bɔkɔ uwu e wo mbala anu itama iyi ɔgwuzɛ ɔlɛ akwɛyi Ofesitu a kpa wu ɛyi te, <<Ŋɔ kporishi re! Ɔpɔlu, ɛzu iyi ŋɔ wa gyɔɔ le ngyɔɔ i ta ŋa rishi re?.>> 25Ɔpɔlu ba a gba wu opwu te, <<Mi kporishi mo, onzu uwakwuu Ofesitu, iso iyi mi yi mu isomo le akwu ongbulolo mbala iyesheshi. 26Ɔsu Agiripa e yitu iyi apula ɛlɛ lɛɛbi, kwongwu ɛlɛ mi so wu iso fɔɔ bi, Imi mi yitu te e yitu yi lɛɛbi, kwongwu apula ɛlɛ lɛɛbi o wo yi mu ɛmba mo. 27Ɔsu Agiripa, ŋɔ nyama te iso iyi anukenzu o so awu akwu ongbulolo? Mi yitu te ŋɔ nyama layi.>>
28Akwɛyi ɔsu Agiripa a za la Ɔpɔlu te, <<Mu kwuye kwukɛkyi kwɔlɛ ŋɔ ma mate ŋɔ fulo mi egbo mo kaa lami kwu u mbwalu Okrasi re?>> 29Ɔpɔlu a gba wu opwu te, <<La kwuye kwukɛkyi la kwuye gbulɔlɔ, mi nda Ukpo te uŋɔ mbala enzu lɛɛbi umba bɔkɔ o yi munɛ le, akwu wa mbwalu kyamate Imi mi kwu tayi. Tetete mi gyite lunyi lo loyi ɛyɛ kyamate bɔkɔ o lo mi ele mo.>> 30Akwɛyi Ɔsu, ogwomina, Ɔbɛnasi mbala enzu lɛɛbi o yi mo 31Mizhikembo iyi o lafya la udaba awu, o ba eza mbala esu kwuye gyɔɔ akwɛyi o mbwa yi te, <<Onzu ele e ngbo ɛrama iyi Oroma ma mo, iyi bɔkɔ i do te lo ngbɛ wu ma, naa lo ta wu mu Ugugyi mo.>> 32Ɔsu Agiripa a za la Ofesitu te, << Akwu kwuwongu onzu ele a ka la ombu wu mbaa u zɔ ombu, Ɔsu uwu Oroma Osiza-a le mo, ŋɔ bi lu wu afyima kaa le sheyimo iya wu.>>
Currently Selected:
Iwomo 26: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
