Iwomo 25
25
Ɔpɔlu E Lo Ewa Mbaa Ofesitu
1Ofesitu uwu bɔkɔ akwu ogomina uwopo ŋale, e bo mu Oseseriya, akwɛyi mizhikembo iyi afyi ela a ka mu Ɔzhɛrusalɛ, 2mba wa to keyi umba ebwoshi mbala enzu umbakɔ umba Azhu o bo mu idu wu akwɛyi o to iso iyi Ɔpɔlu lɛɛbi o so wu. 3O kpa Ofesitu ɛshɛku, kaa le to ombu la sha mba, kaa lo to Ɔpɔlu ma lo so wo mu Ɔzhɛrusalɛ, kwongwu o wo okwura te umba o kwu o gbo wu mu ɔgwuzɛ akwɛyi o ngbɛ wu ma mu . 4Ofesitu a gba mba opwu te, <<Ɔpɔlu o ra wu mu Oseseriya, Imi mafyi mi sheyimo mɔmɔ afyi ɛlɛ. 5La lu ŋa enzumbakɔ yi umbafo kaa lo zɛ mbala mi. Gba e wo iyira akwɛyi o fu ombu uwamba mɔmɔ>>
6Mizhikembo iyi bɔkɔ Ofesitu e wo afyi eranda naa afyi uwo mbala mba akwɛyi a ka mu Oseseriya. Tabɔkɔ eyi i lama akwɛyi Ofesitu a ka ŋɔma mu udaba uwu ombu izɔma akwɛyi a lɔma te lo bo la Ɔpɔlu mu idu wu. 7Tabɔkɔ Ɔpɔlu e fye mo mu udaba uwu ombu izɔma akwɛyi Azhu umba bɔkɔ o wɔ mu Ɔzhɛrusalɛ o lowu kwukpo akwɛyi o mu o lo wu te e wo iyira gyɔɔ, umba ba o yi u uzɔgɔ uwu iso ɛnyi ukpukpɛnyi mo.
8Akwɛyi Ɔpɔlu e le mu ombu wu ifumo, a zɔ te: <<Imi mi wo kiya kikpikpɛnyi te ingyi bɔkɔ mi ngbo ɛrama iyi Azhu naa ɔtɛpu naa Osiza Ɔsu uwu Oroma ma mo.>>
9Ofesitu ba a gyite Azhu lo mu ɔnyɛ mbala ombu izɔma wu, akwɛyi e yo Ɔpɔlu kwuyo te <<Ŋɔ nyama kaa mi so la iso ŋɔ mu Ɔzhɛrusalɛ kaa rima mu idu mi ka gba opwu mu iso iyi bɔkɔ o so ma ŋa le lɛɛbi?>>
10Ɔpɔlu ba a gba opwu te, <<Ayi mo, kekelele Imi mi rima mu keyi ŋɔ mu udaba uwu Osiza mba bɔkɔ i fate lo zɔ ombu mi. Imi mi wo Azhu ira ikpikpɛnyi te mo, kyamate uŋɔ mafyi, ŋɔ yitu ŋɔ mamari tayi. 11Gba mi wo kiya ingyira ingyi bɔkɔ ri do lukwu mo, Imi mi nyama te lo ngbɛ mi ma. Gba apula lɛɛbi iyi bɔkɔ Azhu o wa mu reshi mi le iyi tayi mo, onzu ukpukpɛnyi e yi munɛ uwu bɔkɔ e domo te e to mi e shi mbo mo. Imi mi re lo ombu mi mba Osiza ɔsu uwu Oroma!>>
12Mizhikembo iyi Ofesitu a ta amasa mbala wa to keyi umba udaba uwu ombu izɔma awu akwɛyi a za la Ɔpɔlu te, << Uŋɔ ba ŋɔ lo ewa mba Osiza awu, ŋɔ re mba Osiza!>>
Ɔpɔlu Midu Iyi Agiripa Mbala Ɔbɛnasi
13Mizhikembo iyi afyi bwɛɛ ɔsu Agiripa mbala Ɔbɛnasi o bo mu Oseseriya kaa lo bwa Ofesitu ma. 14Umba o to afyi gyɔɔ mbala Ofesitu akwɛyi Ofesitu a ba ɔsu Agiripa eza iyi Ɔpɔlu kaa la ta wu amasa. A za wu te: <<Onzu uwufo e yi munɛ uwu bɔkɔ Ofelisi a ta wu mu ugu ugyi akwɛyi a lu wu afyima mɔmɔ. 15kwuye ungwu mi ka mu Ɔzhɛrusalɛ, u to keyi uwu ebwoshi mbala enzumbakɔ umba Azhu o bo lo ewa wu munyi mi meka iyira iyi bɔkɔ o zɔ te e wo akwɛyi o za mi te la mi to ombu la riwu kaa lo ngbɛ wu ma.
16<<Imi ba mi za mba te gba o lo ewa iyi onzu, kinzu enzu umba Oroma ki to ombu ki riwu kɛlɛlɛ bi mo. Akwu mɛga kaa onzu uwu bɔkɔ o lo ewa wu awu kaa la rima mu keyi unga enzu umba bɔkɔ o lo ewa wu awu kaa le fu ombu uwawu dɛ. 17kwuyengwu o bomo munɛ mbala mi, mi gyite iso ɛnyi li to kwuye gyɔɔ mo, akwɛyi eyi i lama mi ka mu udaba uwu ombu izɔma akwɛyi mi lɔma te lo fye la Ɔpɔlu ma mɛmi. 18kwuyengwu wa to keyi umba Azhu o fu ombu uwamba, mu ombu mba uwu bɔkɔ o fu le mi ma iyira iyi bɔkɔ mi fulo eyi te mi ma meka wu mo. 19Kiya ingyi ki ta mba kambwu mbala Ɔpɔlu gba akwu mekeka iyi ɔgwuzɛ uwu o mbwalu Ukpo mbala onzu uwufo uwu o ya wu te Ɔzhizɔsi uwu bɔkɔ e kpomo-o, Ɔpɔlu ba a zɔ te e degbo la reyi. 20Imi ba mi yi ɔgwuzɛ uwu bɔkɔ mi zɛ kaa mi zɔ ombu ɔnwu mo; gba mi yo Ɔpɔlu kwuyo te naa a nyama kaa le so mu Ɔzhɛrusalɛ kaa le fu ombu uwawu ŋa? 21Tabɔkɔ Ɔpɔlu a zɔ te e re la ombu wu mba Osiza ɔsu uwu Oroma, akwɛyi Mi zɔ te lo kwo wu mu igbomo nzhii ba kwuye ungwu bɔkɔ mi re wu mbaa Osiza ɔsu uwu Oroma.>>
22Akwɛyi Agiripa a za la Ofesitu te, <<Mi gyi te la mi pwa iso iyi onzu ele mafyi mi tete.>>
Ofesitu a gba wu opwu te, <<Kwɔnyi kwɔlɛ ŋɔ pwa wu.>>
23Tabɔkɔ eyi i lama akwɛyi Agiripa mbala Ɔbɛnasi o kwu apula iyi abwa o lo mu ɛnwu akwɛyi o fe mo mu udaba uwu ombu izɔma awu mbala enzu gyɔɔ mbala umba bɔkɔ o yi atu iyɛku mbala wa to keyi umba kwuse kwɔngu. Akwɛyi Ofesitu a lɔma te lo fye la Ɔpɔlu ma mɛmi. 24Ofesitu a zɔ te: <<Ɔsu Agiripa, mbala enzu lɛɛbi umba bɔkɔ o yi munɛ mbala nzu, lu ma onzu ele! Azhu lɛɛbi o ka kwupwu mu reshi wu mu Ɔzhɛrusalɛ mbala mu Oseseriya munɛ, o wo ovyo te ifate onzu ele le yi kwunyɔ fo. 25Imi ba mi ma kiya kikpikpɛnyi te ingyi bɔkɔ e wo bɔkɔ ri do lukwu ma mo, uwu ba a zɔ te e re la ombu wu mba Osiza, inyi gba ishi mi lɔwu a ka mu Oromu le. 26Imi ba mi yi kiya kikpikpɛnyi te ingyi bɔkɔ mi ka mu reshi wu kaa mi kala Osiza ɔsu uwu Oroma mo, kwongwu ɔlɛ gba mi bo wu mu keyi yi lɛɛbi mbala Bagayidu Ɔsu Agiripa, kaa yo wu eyo le, igboshimo la mi fya kiya ingyi mi ka mu reshi wu. 27Mo, mu imama mi, akwu refyo te kaa mi lɔ la onzu uwu bɔkɔ e yi ugu ugyi la Osiza ɔsu uwu Oroma ba ikyo mbala kiya kpakara ingyi bɔkɔ mi ka mu reshi wu mo.>>
Currently Selected:
Iwomo 25: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
