Leewwitotika Maxaafa 10
10
Naadabinna Abihu Hunjeexa Cubbo
1Naadabinna Abihute hinaaxxi lame Aaroonixxi labbaxxi oose umo umo insa'nenge'ni mitte mitte balcho aaxxeexxi kashilo itti hana uggite; iso'ni hana ixaana uggiteexxi Duuchchi Woddik Gootti'a shiqishshe; iitta shiqinshaashsha Duuchchi Woddik Gootti ajaja gopheemmaxxee itti balchoke'ni aa'ne shiqinsheexxi giira seerinxemmabaan; 2Tennenaa'ni kexxeexxa dedhanga Duuchchi Woddik Gootti ergeexxi giira insa'ne ittee'na Duuchchi Woddik Gootti edo renne.
3Muusenna Aaroonii'i hiyyee qici, «Duuchchi Woddik Gootti:
‹Ani edo shiqe ani'a ergatemaake duuchcha'n,
woyyumma anxa leellishanon;
Arda duuchcha'ninna
ani ulfeessemannon› hiyye haaso'eek konneten» hiyye.
Aarooninna cuqqi hiyyebaan.
4Muusenna Uzi'eeli hinaake Aaroonike annike dayyixxa labbaxxxa oose Misha'eeliinna Elitsafanii'i ye'eexxi «Amme konne anni ha'nookike dayyixxe ooseka rensha Mageni ulfinniki leellammake seemmati giissineeke fooqixxe hulabaa'n hoyyitine olla'a konnenaa'ni bayyise» hiyye. 5Insa'nenna qeesummatixxa seema renshakenaa'ni fulchinebaangi Muuse ajajemmashshani okkone olla'ibaa'n fulchine.
6Ookkoneechchi uduma Muuse Aaroonii'i, iittani Ali'aazaaritenna Itamaari hiyyendaaxxa lamiinxa Aroonxa oose «Yaadine umo haaxxitinoqen; seemmatanna dartinoqqen; iitta assitinoole kinni reya rertinaan; Magenikinna ardake'ni mufatee'na yo'oxxi daggaan; yaane kinni dayyuwwi ha'nooki Isira'eeliki manni Mageni ergeexxe giirani itemeeke manni'a oodha dandeetinaan. 7Duuchchi Woddike Gootti ajajeexxe hariirtetixxe zayiteni hariirendine Magenoke gargar foyendinemmaxxe Mageni ulfinni leellammake duunkaaniinxe e'yatixxe huddumenaa'ni kexxine me'itinoqe'e; kexxine me'itinoole reya rertinaan» hiyye; insa'nena Muuse ajajeeshshani kande.
Qeesoletika Seera
8Duuchchi Woddiki Gootti Aarooni'i 9«Atinna atixxi oose woyinetika bulbulo yookaan wele machchositaaxxa ha'wa ha'witine Mageni ulfinni leellammake duunkaani giddi'a e'yitinoqee heqqedhdhe; ha'witine e'yitinoole rertinaan; kunni seerinna ha'noba uduma ila ha'nooxxe duuchcha'ni heqqemiyyo hasissaan. 10Ha'nonna Magenokee woyyoomekenna woyyomebaakixxe oddo'ni, iittani batto'ebaakixxenna batto'eekixxe oddo'ni hexxexxa gargarunte ege'niyyo hasissaan; 11Ani Duuchchi Woddik Gootti Muusexxe anga'ni uwwenneka seera anka Isira'eelike arda duuchcha'ni barsiisse» hiyye.
12Muuse Aarooniinna lame Aaroonixxa oose Ali'aazaarinna Itamaari, «Magenoke shiqee'na gateeke cincatike midhatike tolchanaa'ni bulle aaxxinne gamami makemebaaxxa kebbo ra'isse; isenna Duuchchi Woddike Gootta'a hara woyyittete kaddemmaxxee tolchimalchi bira itte. 13Magenoke shiqaake ciincatike midhatike tolchinaa'ni ati'aanna oose atixxe uwwemeeke qoobbo kademmaxxee woyyitte bakka'ni itte. Tenne assitinaashsha Mageni anee ajaje'een.#Lew. 6:14-18. 14Yaane kinni lele'miisatixxa cormenna iimi'a ke'isineexxa luka atixxi labbaxxinna meyyaaxxi oose ca'ichcha booncho'n itte; tinninna Isira'eeliki ardi shiqishaake mittumatike tolcha kadeemmaxxe'e kunte fulchinaaki atikenna atixxe ooseke qoobbon. 15Mooro'i Duuchchi Woddike Gootti'a itatike tolcha kade shiqqaa wodda lukanna cormme lele'misatike tolcha assine idangaani; kunni duuchchinna Duuchchi Woddik Gootti ajajemmashani ati'aanna atixxe oose'a duuchchi woddi'a uwwemeeke qoobbo kade hedhaani» hiyye.
16Muuse cubbo biratike tolchi'a shiqeemmaka recco hitta assineexxa qore ciinceesineexxa afe; tennexxee Muuse gatteexxa Aaroonixxa labbaxxa oose'ni Ali'aazaari'ninna Itamaari'ni mufataashsha assitemmaxxee'e, 17«Cubbo biratee shiqeemmaka tolchcha mayee woyyitte bakka'ni itagophphine? Isi Duuchchi Woddikie Gootti'a hara woyyomeeki giddii'n mitteke kadeemmaxxe'e; isoonna Mageni ardinxa cubbo gattowwaali hiyyatee ha'no'a uwwe'eken.#Lew. 6:24-26. 18Eegi munde Mageni ulfinniki leellammake seemmati giissineeke fooqi giddi'a e'ya gophpheechchini ani ha'noo ajajeneshshani shiqeeka tolcha eettene woyyitte bakka'nini ittinamman» hiyye. 19Aarooninna «Sila adana cubbo biratee shiqeeka tolcha iteennele Mageni gammadaamma? Telchonna ardi cubbo biratee shiqaaka tolchanna ciincatika tolcha iyyedage'een; yaane kinni fuggoxxi ane'ni gelte gatte» hiyye hiisse. 20Muusenna Aaroonika hiissichcho laqe gammade.
Currently Selected:
Leewwitotika Maxaafa 10: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
