Abd 1
1
Takïgang dø Edomt kïta nyakïto kï ða kï Jakob
1Nya 'nten dø adïn Abdias.
Bïraþe Luwah elta dø Edomt titbe:
J'oo hoita mad kokïro Bïraþet
na la ngombangkïla mad ku girrdegt dangdang an:
I þãi dõ, ad j'aw
kï ðøøn kï Edom.
Bïraþe gangta dø Edomt
2Oo, m'a m'teli kïdu ku girrdegt dangdang,
a î nya kïkid ngãibe.
3Buro kïga kï kamit ad i so mut,
în i ndï mbïna mbãggt,
în i ndï dø logt kïdõ.
Na î kïþe el kamit an:
Nõ a øsï lam mbã kïningt a?
4Bïraþe el an:
Ke neni i þai kïdõ kï bøgi tit yel kuro be,
ke neni i ða kuj loi ku kïmëgt kaa,
ko nu m'a m'øsï m'lai kï ningt.
5Îla ngeþoog kï ngetir nya pur
andïn kam kujt loi ndø,
na ød roi al.
A øin nyag loi tube ale?
Îla ngeja kand nduu ðen roit ye
a nyan ndeg kand nduu kad deg þurïn ale?
6Ah, tit'n tirïn ne nyag lo Edom kï ngoka Esaw pur.
Teen kï dø nyamajg loa kï yaro tube kï tïga.
7Deg'n lan kød nat sei ye tuþai mbã kï ðobnint.
Îgïn în sei kï lapia ye goolïn,
ngekel kan: Nin madkïlaig
îngïn san nyasa loi ye,
yan gum nõit, na i ger nya mad kamt al.
8Titbe Bïraþe: El an:
Ndøt'n non m'a m'nuj ngeterrg kï Edom
kï ngégernyag kï Mbalbo Esaw kø
9Ah Teman, ro gõðøøg loi, rod a ndad yat't
kïta tubeg'n în Îgïn ko Mbalbo Esawt
a tølïnd tube.
10Edom Kïtø nyaðai kïlo ngetøgt ndoorrïn ngonkõi Jakob ye
rosøl a ðai
na a gangïn kø mbãkïnõt.
11Ndøt'n i ða takumat,
ndøt'n mbahg øin nyamajg loa
lon mbahg andïn ta tabit loa kam þebot loa
na yan yuk dø Jerusalemt
kad'n kegïn ne nya majg kï tit ye,
î tø, î tit kïkïða kudt ho.
12Edom sumba kad i ða ronel dø degt kï
Juda al, ndøt'n tuj son dødt,
sumba kad i ga buro
ndøt'n jarobãit teen dø degt kï Juda al.
Ot tee tai kïbobe kïta tajïn ke kidïn ngonkõi
ndø kamkølt
13Kïtøði and kï tabit kand kamþet lo deg lom a?
kaglon tuj teen dødt,
ke i ða ronel dø daiyogt lod
kam ndøt'n nyag lod tube tujïn,
kïtøði i nda jii dø nyamajgt lod
ndø'n kamkølt teen dødt.
14Kïtøði aw i ða ta tø ðobt
kad i tøl deg loa kï ngékãi tee ta yot,
kïtøði deg loa 'nten ta yot nãin a ne,
i lad ji madngetaat
ndø jarobãit a?
15Kïtø ndø lo Bïraþe i nderrbe, i ndø'n mî Bïraþe
M'a m'gangta dø girrdegt tube.
M'a m'ða sei tit'n i ðan kï deg ho,
kïlaðai a tel so døit gog.
Tetðøø lo ngan Israelg
16Tit'n i ãin ne nya dø mbalbot lom kïjaþat
titbe tø la girrdeg tube a ãin nyakãi kïkanj nya ta.
A ãin, a lan yalïm
Kamla a tujïnd kø ye.
17Na ndegag kï teen ta yot, a ndïn kï død dõ dø Mbalbo Siõt,
a i lo kïjaþat
na ngaka Jakob a taan nyakagþe lod gog.
18Ngaka Jakob kï Jojep a telïn tit horr,
Na ngaka Esaw a în tit mu,
Horr a õnd mugj ad goton,
Dekïða ku ngaka Edomt a nãi kï døn dõ al,
Mî Bïraþe la m'elta ye.
19Ngéndï Negeb ko kïjikõ, a taan Mbalbo Esaw,
ngendï kam dïlambot a taan døning lo Pilistiag,
a taan døning Epraim kï døning Samari
na Benjami a taa døning Galaad.
20Ngan Israelag îgïn awïn þe þert a telïn koosï ngéðøøg
a taan døning lo Kanaag mbã kï Sarepta
na þerg kï Jerusalemg'n ndïn Separad
a taan þebog kï døning Negebt.
21Deg'n ajïn ye, alïn dø mbalbo Siõt
kïta kõþe dø Mbalbogt lo Esaw
Taa ne, Bïraþe a i ngar lod.
Currently Selected:
Abd 1: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.