Jã 14
14
Jeju i ðob kaw ro Luwaht kï Bøw
1Ot kadïn kamsï dasï ta paa. I ndï adïn kamsï Luwah a ne, admïn kamsï tø. 2Kam þet lo Bøwm kujg în tit. Îla titbe al a ne, neni m'elsï ta 'nten al, kïta m'ndï m'aw kï m'ðago lo kïtasï. 3Îla m'aw m'ðago lo kïtasï a ne, m'am m'tel m'ðe m'øisï kï romt, kïtakad lon m'ndït a ne, i ndïnt tø. 4I gerïn lo în m'ndï m'awt, i gerïn ðoba tø. 5Tomas ela an: Bïraþe, kï ger lo'n, i ndï awt al, titbãi hã j'asï ger ðoba a? 6Jeju ela an: Mî ðob, mî rota, mî kumkajin de mad kï asï ðe ro Bøwt goto, na kïtakulïm tã. 7Kan ila i germïn a ne, a gerïn Bøwm ho. Na tajigla i gerïna, oona tø. 8Pilip ela an: Bïraþe øj'j Bøw ðang a asïj. 9Jeju ela an: M'ndï nat sesï maði nu ye la Pilip i gerïm al yo? De'n oom a ne, oo Bøw; titbãi i ndï el an: M'øjsï Bøw a? 10I ger køikøi kad m'ndï kam Bøwt, na Bøw ndï kammt ale? Tag'n m'ndï m'elsï ye, m'un kïdøm hã m'elsï al, na Bøwïn ndï kammt la ndï ða kïla lon ye. 11I taan ta lom lon m'el m'an: Mî kam Bøwt, na Bøw i kammt ho, na îla i be al a ne adïn kamsï kïlag'n m'ða. 12Rota rota la m'ndï m'elsï ye, de'n ndï adïm kamïn a ne, a ðakïlag'n m'ndï ða nõ ho a ðakïlag kïbo tøi îgïn non kïta m'ndï m'aw ro Bøwt. 13Nya ði a i køn Bøw kam tømt a ne, m'a m'ða nyàa nõ, kïtakad Bøw ngahn køsïgon kam ngont. 14Îla i køn nya mad kam tømt a ne, m'a m'ða nyàa nõ.
Jeju an: N'an la kï Ndil kïkunjðang kad ða kï ngéndoog lon
(Oo Jã 16:5 teen 15,33; Pil 4:6 teen 7)
15Îla i tarmïn a ne i ngomïn go Mberkïndag lom. 16Na mî m'am kø Bøw, na a la kï Ngesølkam mad adsï kïtakad ndï sesï nat mbãkïnõt, 17i Ndil rota în deg kï døningt asïn høa kï rodt al, kïta oona al, gerïna al ho, na în i gerïna, ndï nat sesï, i kamsït tø. 18M'am nyasï nganhalgt al, na m'am tel m'ðe rosït. 19Nãi kaglo sî baitø kad deg kï døningt oomïn al, na în a oomïn kïta, m'ndï kumkajir na a i ndïn kumkajir ho. 20Ndøt'n non a i gerïn køikøi, m'ndï kam Bøwmt, i ndïn kammt, mî tø m'ndï kamsït. 21De'n ndï kï mberkïndag lom, ndï ngomgod tø a ne, î la ndï tarïm ye. De'n ndï tarïm a ne, a i ngetar lo Bøwm, m'a m'tara, na m'a m'ada gerïm. 22Judas, i Judas Iskariot al, ela an: Bïraþe ði ða nya ad kï geri na deg kï døningt gerïn al a? 23Jeju tura an: Îla de mad ndï tarïm a ne, a ngomgo ta lom na Bøw a tara; mî kï Bøwm j'a kï ðe roat, j'a kï hø lo ndïj roat. 24De'n ndï tarïm al a ne, ndï ngom gotag lom al. Na ta'n i ndï oon dø i lom al, na i lo Bøw kï ngelam. 25Tag'n non m'elsï lon m'ndïn nat sesï þaitø. 26Na ngesølkam ad i Ndil kïkunjðang'n Bøw a lan kam tømt, îla a ndoosï nyag tube, a ga kamsï dø nyagt tube'n m'elsï ye. 27Kamsøl lom la m'ndï nya m'adsï ye, m'adsï kamsøllomlom, m'ndï m'adsï tit'n dunia ndï adsïn al. Ot kadïn kamsï dasï ta paa, ot kadïn kamsï gang man. 28Oon dø ta'n m'elsï m'an: M'ndï m'aw na m'am m'tel m'ðe rosït nõ. Îla i tarmïn a ne, ni a i ðan ronel kïta m'ndï m'aw ro Bøwt. I kïbo tøim. 29Na tajigla m'elsï nyag 'nten kete tã kad nyag'n non ðen, kïtakad lon a ðan nya a ne a i gerïn ne køikøi. 30M'a m'elsï ta mad gog al ta, kïta ngekõþe kï døningt'n ðan ndï ðe na aw kï tøg dømt al; 31na kïtakad deg kï døningt gerïn kad m'ndï m'tar Bøw na m'ndï m'ða kïgo Mberkïndat'n Bøw adïm ye, i þain dõ ad kï j'awïn nu.
Currently Selected:
Jã 14: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.