Matayo 8

Yesu djì tsátsá dhì nà nì li-rónga

(Mak 1:40-45; Lwk 5:12-16)

1Yesu ngû tdè bbi ngòw djúddù ro, bbalè mí njuw dyòw tdè à. 2Ddì nì kpatss̀ cha ndèy tdè ndèy nza tsátsá dhì nà nì, kâ shì à dè. À kâ ndèy tdyòw-tey kwò à njìó, à kâ tdrà, “Ddrǒngóli, ya nyi jì ro, nyi dho léy ma rónga djǐ, ndaní ma ngú thí.”

3Yesu ddà ndèy-dhokpa ónga ndèymí à kâ à rónga mbu, à kâ tdrà, “Manì jǐ ma kwó nyi tsotso. Déy thí.” Ndùw fú kpatss̀ ró dhi djì. 4Yesu kâ tdrà à dhò, “Rr, nzǐ tdra í lò njàddí li dhò. Chú ra, nyi dhò Ddrǎ-ngá dyǎ-dja dè, ndaní à njǎ nyi rónga ngû thí ddiy. Ndèymí bbú bbudha cha Musa jà nì,#8:4 Lawi 14:1-32. ndaní à dhǒ bbalè wánì dhò nyi rónga ngû thí.”

Yesu lêy la-dzàdha-djá djú ddrǒngóli ngá nokpa rónga djì

(Lwk 7:1-10)

5Yesu tsùw tdè Kapernawumu mí ddrǒngó ní bba ò ro, Roma mí la-dzàdha-djá mí ngúw djú ddrǒngóli rà à dè. À dhîy Yesu kwó ndèy tsotso. 6À kâ tdrà, “Ddrǒngóli, màtsá nokpa nì dhi nà dzá ra djú. À dho bbiy nzǐ ndèymí à nì ndèy nza ngǎjìní.”

7Yesu kâ tdrà à dhò, “Ma rà rà ndèymí ma rà ley à rónga djǐ.”

8La-dzàdha-djá djú ddrǒngóli kâ lò ngù. “Ddrǒngóli, ma kâ nzá ma léy nyi shǐ màtsá ngà dzá, chú tdra lò rò ndèymí màtsá ngá nokpa rónga rà djì. 9Manì màtsá drò-dró ní ndrǔ nà, ndèymí ma ddí nì cha manì ì djú nga njǎ nì la-dzàdha-djá nà. Ya ma jà ddì li dhò, à rǎ, à ra nì ndùw, njàddí li dhò, à ngú, à ngú nì ndùw. Ndèymí ya ma jà màtsá piy dhò à njey í ddiy, à njèy nì ndùw.”

10Yesu rr̀ tdè fú lò mí nga nà, à ónga ꞌwìy ndèymí à tdrà ndèy kodjò dyǒw nì kpa dhò, “Manì nyì dhò dìchú ní lò tdrǎ, ma chùw nzá li rò Israeli-ddúw kàó ndèy nì ùwdha nà í li níchú nì. 11Manì tdrǎ nyì dho, bíy ní bbalè cha ì nì ngǎ Israeli-ddúw ní nì, rà shì itsś shi nì mí nga là djúddù ndèymí itsś chey nì mí nga là djúddù. Ndrǔ rà ddrǒngó ní madha mí nyû nyù ddìngaó Abrahamu, Isaka ndèymí Yakobbo mà nà rakpa mí pey-mí-nga ò. 12Chú Israeli-ddúw cha ì kà ì déy rakpa mí pey-mí-nga ó nì, ka rà bbla rúgò, tèy-tèy nga ò. Fulè ndrǔ rà dzz̀ ì kuw kádha nà.”

13Yesu kâ tdrà la-dzàdha-djá djú ddrǒngóli dhò, “Ra bba, ndèymí cha nyi ùw nì ddiy, rà ndèy njèy.” La-dzàdha-djá djú ddrǒngóli ngá nokpa rónga kâ dji ndùw.

Yesu djì bíy ní bbalè rónga

(Mak 1:29-34; Lwk 4:38-41)

14Yesu rà tdè Petro bbâ, ndèymí fulè à njà Petro mí djânì dhi nà ra djú ndèy rónga gbîy ddiy nà. 15À lòw à-dhokpa, ndèymí à rónga kâ djì. À ngbîy ndèy ru ka nyû thì Yesu dhò.

16Ngítss̀ djú nga shì tdè ro, bbalè mbà bíy ní ndrǔ Yesu dè cha ì tdè ì ó che thíy nà nì. Yesu ddâ che thíy ddì nì lò-hwo nà ndèymí à djì tdè cha ì tdè dhi nà nì bbalè rónga wá. 17Í tuw nà, nabi Isaya tdrà tdè à ró nì lò njèy ndèy dìchú,

“À ddâ màdhí li-rónga ndéydha

ndèymí à tdûw mà ró dhi.”#8:17 Isaya 53:4.

Yesu dyòwdha mí tǔw-tǔw ní nga

(Lwk 9:57-62)

18Yesu njà tdè bbalè mí njuw nì ndèy ròluw gbrǔ ro, à jà ndèy kodjú kpa dhò ì dǎ chálè dzi Galilaya mí ju-ddà djòluw. 19Děy nzá ndrǔ dà ní, Musa-ngá yǎdha mí li-gwíydha-dja kâ shì à dè ndèymí à kâ tdrà, “Li-gwíydha-dja, ma rà nyi dyòw wá nyi nì rǎ mí nga òluw.”

20Yesu ngù lò à dhò, “Tsó téy nyà nì ìdhí ddùdha mí nga nà ndèymí rì nì ì dzà-kí nà, chú ma Ndrǔ-Ddùw#8:20 Ndrǔ-Ddùw. Nja klǒw nì lò-hwo ndèy tey nà. nì ngǎ nga rò ní cha ma dho ndanà ma rónga shù ǒmá nì.”

21Njàddí à kodjú kpa kàó ddì li tdrà à dhò, “Ddrǒngóli, bba ma rǎ nji màtsá djǎnì tdòw.”

22Chú Yesu kâ tdrà à dhò, “Dyòw ma, ndèymí bbà ì dhì nì ndrǔ tdǒw ì, ì dhì nì ndrǔ nà.”#8:22 Ddì nì mí dhi nì cha ì nì nzǐ Kristo dyǒw nì ndrǔ. Rwo nì mi dhi nì cha ì dhì í ì rónga ó nì ndrǔ.

Yesu lêy rí ní vi dèy

(Mak 4:35-41; Lwk 8:22-25)

23Fú ddiy-dzzdjú, Yesu tsùw ngǒ ò ndèymí à kodjú kpa rà à nà. 24Fú nganà, ddrǒngó ní rí ní vi kâ shì chǔ ju-ddà djú, ndèymí dda lòw dey kì ngǒ ò. Chú Yesu tdè ddǔw ddùdha ní. 25À kodjú kpa rà à dè ndèymí ndrǔ chî à. Ndrǔ kâ tdrà, “Ddrǒngóli pá mà! Mà nì rǎ dhì.”

26Yesu kâ tdrà ndrǔ dhò, “Ddudhò nyì ní nyí nà? Nyìdhí ùwdha ní drá ddudhò?” À ngbîy ndèy ru ndèymí à jà ju-ddà dhò ndèymí vi nà, “Nyì dey!” Fú nganà, rí ní vi ndèymí dda djú nga kâ ddà. 27À kodjú kpa ónga ꞌwìy wá. Ndrǔ tdrà, “Í ní ŋǎchú ní li? Vi ndèymí ju-ddà nà ddí njey cha à tdrà níchú!”

Yesu ddâ rwo nì kpa ó che thíy

(Mak 5:1-20; Lwk 8:26-39)

28Yesu dà tdè Galilaya mí ju-ddà djòluw Gaddara mí ngòw ò ro, à njûw ndèy rwo nì kpa ní ndrǔ nà ì shì ngòw ó ka glùw nì tdôw-dzì óddù nì. Fú kpa tdè ì ó che thíy nà ndèymí ndrǔ tdè ndrìy. À lêy bbalè dêy bbiy nzǐ fú tuw nà. 29Ndrǔ swâ rí ní ì chuw nà, “Ddrà mí Ddùwnì, ddu ní ndèy mà kàó nyi nà? Nyi shǐ ingá nyi bbú nzadha mà dhò děy nzá mí ddu shì ní?”

30Fú nga nà, bíy ní djòw mí njuw tdè ndrǔ kuwtsó nga nyǔ. 31Che thíy kâ Yesu kwo, “Ya nyi nì rǎ mà dìy ro, chó mà chá djòw mí njuw ò.”

32Yesu tdrà ndrǔ dhò, “Nyì ra!” Ndrǔ kâ rà ndèymí ndrǔ kâ tsùw djòw ò. Wánì fú djòw kâ kòw bbi ngòw djúddù ju-ddà ò ndèymí ndrǔ kâ pbù ju-ddà ò. 33Ì tdè djòw rónga pbǒ nì kpa kâ kòw ndèymí ndrǔ rà ddrǒngó ní bba ò, cha ndrǔ tdrà wánì ngèy cha ndèy njèy ndèy che thíy nà nì kpa ró nì. 34Wánì ndrǔ cha ì tdè ddrǒngó ní bba ó nì, rà tdè ì njúw ì Yesu nà. Ndrǔ njà à ro, ndrǔ kwô à, à bbǎ ìdhí bba.

Currently Selected:

Matayo 8: NDRULO

Highlight

Copy