Tito 1
1
So' Pablo dedáxa'na so' Tito
1Jaỹim Pablo, na'chaỹim lelatac ñi' Dios qataxa jaỹim lamaxasec so' Jesucristo da' ỹicochiỹa da' lip'iỹáxac na' liquiỹacpi ñi' Dios, qaidi jen'me ỹaateton da' 'eesa lasoxoc da'me qad'amaqténataxanaxac, 2qataxa ỹaỹáteeta nataq'en da' quitaxac da' n'óiỹaxac 'me sa n'aidé'na. Ñi' Dios 'me sa doqovínaxan, ñi'me 'me ỹ'axátet'a josii'chi da'me n'óiỹaxac ca'li maliaxa qaỹa jen' 'aléua. 3Qataxa ca'li ỹivíta so' lalóqo' qa'en ñi'me Dios 'me qadec'alaxaqui da' qo'mi ỹaatetonaxanque da' l'aqtac, qana'chi jaỹim ỹipotanot da' s'axáteegue da'me l'aqtac. 4'Am Tito, 'ená'am da' 'am ỹaleesa, qá'a chiỹoqo'ot jaỹim da' 'adip'iỹáxac 'me qo'mi huetaavlo. 'Am sedénaqtena jan' ỹide, qá'a sétaaque da' 'am taỹot na' n'ágaxanataxanaxac, qataxa da' nichoxodénataxanaxac, qataxa da' n'emáxac 'me chiỹoqo'ot ñi' qadet'a Dios, nataq'en so' qadesaliaxanec Jesucristo 'me qadec'alaxaqui.
Da' l'onataxanaxac so' Tito ca'li netalégue jaso' nepe Creta
5Ca'li 'am sepotáa'ña jadi' nepe Creta, qá'a sétaaque da' 'aviỹamaxachiñi na' maliaxa da' sa semat, qataxa da' 'aua'uo na' lasoxola'pi na' 'amaqténataxanaxaicpi 'me neta'ñalo naua' noiqa. Naqaida 'me 'am sepotan'ot da' 'au'axat: 6Ga' lasoxola' na' 'amaqténataxanaxaicpi sa 'te taa'le n'aqtagueco naua' sa ỹiỹamadídiñi, qataxa 'oonole qa'en jaga' loua, qataxa d'amaqténataxa'n gaua' lec'óqo'te, qaidi qaỹa 'te ga' n'aqtaguec, qá'a sa ỹiỹamaxañi ga' n'onataguec, qataxa 'uootaxa da' sa ỹalaq. 7Qá'a ga'me lemala' qoỹin na' 'amaqténataxanaxaicpi, ga'me lemala' da' ỹilo'ogue ỹima na' l'onataxanaxacpi ñi' Dios. Chan'eesa n'óota qomle 'en ỹachimaqáchiiñi da' l'óiỹaxac. Sa 'te págaqtenaxaic da' damaxasóxon, qataxa sa 'te co'ỹaqaic, sa ỹómaxaic, sa 'te sa ỹoxó'ña, sa 'te naueela't da' pecaic da' naquitét'a jan' laicaua plata. 8Jaldáta da' neloséguem, na'chi 'eeta't qaỹa 'te ỹiga da' ỹilo'oguet ga' laqáỹa da' nesapichaq, qataxa ỹiỹamadíchidiñi naua' ỹauapiỹi. Nelotela't, 'ónaxaicaloic, huosóta, nalóchiiñi da' l'óiỹaxac. 9Ỹátaqta n'añaxatec da' n'aqtac 'me ỹataqtelégue lasoxoc da'me sóxote qoỹapaxaguenec, qaidi nataq'en ỹ'añaqtet ga' laqáỹa da' ỹidolégue da' 'ónaxaic napaxaguenataxanaxac, qataxa náchiiñi qa'en na' lauel ga' nep'aguénoqo't.
10Qá'a ma'le jalcote na' sa ỹataxalégue, lamá'a na' judiopi. Jen'me naua' losáxaco 'chi 'amaqtáqaiqa, qataxa ỹoqoviitalégue na' siỹaxadipi. 11Jen'me n'óota da' qoỹapadínỹi na' nedégaxat, qá'a ỹátaqta n'áxachichiiñi naua' n'acháqa'te, qá'a dapaxaguenataxanec da' sa lasoxoc, qá'a sétaaque da' 'chi ỹacoot'aguet jan' laicaua plata.
12'Uo so' ỹátenaxanaxaic joca'li 'me l'acháqa' di' Creta. So'me ca'li ỹ'axat na' mai'chi laỹi, 'enaac da' l'aqtac: “Jen' Creta lé'ecpi ỹátaqta qovínaxanaxaicpi, qataxa 'ouáqaicpi 'ená'am ga' síiỹac, qataxa sa cat'olec ga' jaloq, qataxa huálaicpi.” 13Qain'me 'eesa da' l'aqtac. Chan'eesa ỹátaqta 'avidaxatot naỹi jen'me, qaidi ỹiỹamaxañi da' lip'iỹáxac, 14qataxa qaidi sa 'te ỹoqocha'alo naua' 'chi senaxaco 'me chiỹaqáaue na' judiopi, qataxa na' lelatáxanaxac na'me sóxote cá'ai da' 'eesa lasoxoc.
15Ga' siỹaxaua, da' ỹoqovíchiỹi da' leenataxac, qana'chi jen'me chaqáina ỹima da' ỹoqovíchiỹi qa'en. Qaláxasa na' maliaxa sa d'amaqténataxan, qataxa na' sa huoso da' leenataxac, jen'me qaỹa 'te ga' 'en ỹoqovíchiỹi. Qá'a da' leenataxac qataxa da' laviliỹáxac ỹátaqta paanaxadaic. 16Jen'me 'enapeela't da' ỹaateton ñi' Dios, qaláxasa da' lasoxoc ỹátaqta sa nateneguet. Qá'a ỹátaqta sa qoỹamaneguet, qataxa sa ỹalaq, qataxa sa ló'o gamachaqaiga n'onataxanaxac ỹiỹamqáchiiñi.
Currently Selected:
Tito 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.