Marcos 1
1
So'me Juan 'me chiláxanataxanaxaic d'aqtaxaatapeelégue di' totelégue 'aléua
(Mateo 3.1-12; Lucas 3.1-9, 15-17; Juan 1.19-28)
1Naqaida jeda'me 'éeta joca'li ỹímta 'uo da'me 'ónaxaic qadipí'ic 'me ỹ'axat da' ladic so' lec'óxot ñi' Dios, lenaxat Jesucristo.
2So' l'aqtáxanaxanec ñi' Dios, lenaxat Isaías, ỹidíñi joca'li da'me 'enaac:
Jaỹim Dios samaq ga' ỹ'aqtáxanaxanec qomle da' se'uáuaxangue da' 'at'ague,
qaidi ỹaqátaxata't ga' 'adadic.
3Qaa'le 'uo so' siỹaxaua chimaqtapeelégue so' totelégue 'aléua, da'me liỹáxanaxac 'enaac:
'Auqátaxañiita't ga' ladic qomle ñi' qadesaliaxanec, ỹátaqta 'an'ónaxachiit'egue.
4Qana'chi 'éeta so' Juan joca'li nachiláxatac so' siỹaxadipi, huét'a so' totelégue 'aléua. Qana'chi ỹ'axátem jeso'me da' ỹigue'm naua' loico, qana'chi qonachiláxan, qaidi qoỹapalaxa't naua' loico. 5Qaa'le janac da' qonaquiáxana so'me ỹima na' chiỹaqá'a di' 'aléua Judea qataxa di' noic t'ádaic Jerusalén. Qana'chi jen'me ỹ'axa't naua' loico, qana'chi so' Juan nachiláxanataxanỹi so' ñáchi Jordán.
6Naua' louo so' Juan n'oxonaqa, chiỹaqaỹi jen' laỹoxot jen' naanáxanaq, qataxa so' nesáataxaqui síiỹac ló'oc. Qana'chi ỹalíctac jan' qosiiquioxoi qataxa na' ma'ague lí'i. 7Qana'chi jeso'me d'aqtaxáatapeguem na' siỹaxadipi, 'enaaco':
—'Uo na' siỹaxaua jaỹim nec'atetalégue, jena'me ỹátaqta 'uo da' lañoqtaxanaxac, sa sená'am. Qataxa sa saiỹet da' ñaqaliiñ'ot da' sesodéegue naua' lapela'te leque'te. 8Jaỹim 'ami ñachiláxanỹilo na' noxop, qaláxasa jena'me 'ami nachiláxanỹilo ga' Espíritu Santo.
Da' nachiláxanataguec so' Jesús
(Mateo 3.13-17; Lucas 3.21-22)
9Jesaa'me noloqo'te, qana'chi so' Jesús nivíta, chiỹaqá'a di' noic lenaxat Nazaret, jidi'me huá'a di' 'aléua Galilea. Qana'chi so' Juan nachiláxan huá'ña di' ñáchi Jordán. 10Qana'chi joca'li 'chi nenoxoseem'ot so' noxop, qana'chi so' Jesús ỹilosée'ma di' piỹem da' qoỹ'ouáchiỹi, qataxa so' Espíritu Santo 'me naỹá'ña jeso'me, 'ená'am na' doqoto'. 11Qana'chi qodemachíỹa so' n'aqtac chimaqpecot di' piỹem, 'enaac:
—'Am 'me 'am ỹalec, na'chi'am 'me ỹátaqta ỹauotaxat. 'Am 'me ỹátaqta 'anmat da' ỹamaic.
Da' n'iinaguec so' Jesús
(Mateo 4.1-11; Lucas 4.1-13)
12Qana'chi so' Espíritu Santo sa huaỹáloq qa'en jeso'me da' talégue so' totelégue 'aléua. 13Qana'chi huét'a so' Jesús saua' cuarenta noloqo'te, huétapegooue jen' ỹisidipi. Qaama'le so' qadó'o paiỹac Satanás ỹ'iỹen so'me. Qaama'le janac na' Dios lamaxa'spi da' lecochiỹa jeso'me.
So' Jesús huét'a di' Galilea joca'li ỹímta d'onataxan
(Mateo 4.12-17; Lucas 4.14-15)
14Joca'li sóxote qoỹanáaue jaso' necointáxanaxaqui so' Juan, qana'chi so' Jesús taỹa di' Galilea. Huá'a, qana'chi ỹ'axáteegue da'me 'ónaxaic qadipí'ic 'me ỹ'axat da'me l'onataxanaxac ñi' Dios da' ỹimata'a'téna. 15'Eet'oi:
—Sóxote nauaqa't na' lalóqo' da'me ỹivíta da' l'onataxanaxac ñi' Dios da' ỹimata'a'téna. 'Aviimii' qomle naua' 'adoicódii', qataxa 'au'amaqchíñii jeda'me n'aqtaxanaxac 'me nec'alaxaqui.
So' Jesús ỹiỹáxanalo saua' cuatro ỹ'ácoxoiqa
(Mateo 4.18-22; Lucas 5.1-11)
16So' Jesús quet'ot so' loxogue jaso' peróna 'me huá'a di' Galilea. Huá'a, joca'li ỹilá'a so' Simón qataxa so' laqáỹa Andrés, ỹalquétrapiiñi jaso' naséelaxai', qá'a ỹ'ácoxoiqa. 17Qana'chi 'enaac so' Jesús:
—Jaỹim 'oquiiỹiỹi, qana'chi 'ami sanaỹilo da' 'ami ló'ol jen' siỹaxadipi, 'aviñí'ỹam ga' ỹ'ácoxoic.
18Qana'chi ỹachídai'ndi jaso' naséelaxai', qana'chi quetegue so'me.
19Qana'chi ỹitaxa jec so' Jesús. Qaỹat'ague, qataxa ỹilá'a so' Jacobo qataxa so' laqáỹa Juan, Zebedeo lec'óqo'te, nétranỹi jaso' lilicota', naulátrac jaso' naséelaxai'. 20Qana'chi ỹitaxa nepodai', qana'chi quéd'ai so' let'a' Zebedeo, ỹiimeteguet jaso' lilicota' qataxa so' lamaxa'spi, qaama'le quetegue so' Jesús.
So' siỹaxaua 'me 'uo so' lé'ec nataqtáqaic
(Lucas 4.31-37)
21Joca'li ỹivídede'ta di' noic Capernaum so' nolo' 'me mataxaqui, qana'chi so' Jesús táaue jeso' lemáxaqui na' judiopi, qana'chi dapaxaguenataxáatac. 22Qana'chi so' siỹaxadipi 'uo da' l'aalaxac naua' 'enapegalo, qá'a jeso'me naua' lapaxaguenataxanaxaco 'ená'am ga'me p'asáiỹi, qataxa sa 'ená'am jen'me ỹima'aguet na' naqátaxacpi. 23Qana'chi jeso'me lemáxaqui so'me noic 'me l'acháqa'di 'uo so' siỹaxaua 'me nétaaue so' né'ec 'me nataqtáqaic. Qana'chi ỹ'alaq, 'enaaco':
24—¿Tá'nooqo'chi qo'mi 'aunóxotetapee'ualo, 'am Jesús, Nazaret lé'ec? ¿Qo'mi 'auanagalo jóona da'me qo'mi 'anoláxachidiñi? Jaỹim 'am saateton, qataxa saỹáten da' na'chi'am 'me lalémaxaset ñi' Dios.
25Qaláxasa so' Jesús nelaxa so' né'ec nataqtáqaic, 'enaac:
—¡'Ad'emáqta, 'ocá'ai na'me siỹaxaua!
26Qana'chi jeso'me né'ec nataqtáqaic ỹicopicháqtet so'me siỹaxaua, qataxa neten da' ỹ'alaq, na'chi cá'ai so'me. 27Qana'chi ỹima na' siỹaxadipi dó'i. Qataxa mai'chi nenatétapega't, 'enapega'to':
—¿Jái'chi da'me dójo'? ¿Qo'li dálaxaic napaxaguenataxanaxac? ¡Da'me dójo' siỹaxaua 'chi ỹátaqta 'uo da' lañoqtaxanaxac, cha ỹivíd'a jen' né'ecpi ỹamaxáiỹi, qataxa ỹalaxaguet!
28Qana'chi sa huaỹáloq da'me qoỹaỹáten'a't so' Jesús ỹima di'me 'aléua Galilea.
So' Jesús ỹiméegue qa'en jaso' li'ỹodo so' Pedro
(Mateo 8.14-15; Lucas 4.38-39)
29Joca'li qocá'ai so' nemáxaqui, qana'chi so' Jesús náictapee'to saua' Jacobo qataxa so' Juan da' ỹic'ádeta ga' l'acháqa' so' Simón qataxa so' Andrés. 30Qaláxasa jaso' li'ỹodo so' Simón sa nichaatapiỹe't, qá'a jaso'me lapoqot jen' nipiỹ'axa. Qana'chi qoỹ'axátem so' Jesús da' jaso'me ỹilhuaac. 31Qana'chi so' Jesús láca'uo jaso'me, qana'chi lasáq'a jen' louaq da' ỹañíseguem. Qana'chi jaso'me qaỹa so' lipiỹ'axa, qana'chi 'éetapeeguemga.
So' Jesús jalcote so' ỹiméegue qa'en
(Mateo 8.16-17; Lucas 4.40-41)
32Joca'li ma'le ỹinoxoñi jaso' c'atena, sóxote n'álñi, qana'chi qonauée'uo so' Jesús ỹima na' leuaxaicpi, qataxa na'me 'uo na' lé'ec nataqtáqaic. 33Qana'chi ỹima na' l'acháqa'di, lapoosop so' som. 34Qana'chi so' Jesús ỹátaqta jalcote na' ỹiméegue qa'en jeso'me leuaxaicpi 'me ỹodapecachi na' lapite'na, nataq'en jalcote na' ỹ'odáiỹi na' lé'ec nataqtáqaic, qataxa sa ỹasenem da' dose na' né'ecpi, qá'a jen'me ỹátaqta ỹaateton jeso'me.
So' Jesús d'aqtaxaatapeelégue di' Galilea
(Lucas 4.42-44)
35Joca'li sóxote ỹá'agueteda, qana'chi ñíseguem so' Jesús, tái'ỹa so' totelégue 'aléua 'me p'áiỹi so' noic, qana'chi netamen. 36Chan'eesa so' Simón qataxa saua' liquiáxa'u nimitétraaque jeso'me. 37Qaama'le ỹauáata, qana'chi d'aqtaxaatem jeso'me, 'enapega'salo:
—Ỹima 'am qonmitétaaque.
38Qaláxasa so'me 'enáacjo':
—Qotaxalo qomle naua' n'acháqa'te laqáỹa' 'me sa qaỹadapiỹi, qaidi nataq'en s'axatema da'me n'aqtac, qá'a naqaida 'me 'uo da' ñanac.
39Chan'eesa so' Jesús quetalégue di' 'aléua Galilea, dapaxaguenataxáatapegoovlo naua' lemáxaqui' na' judiopi, qataxa ỹichiỹódaiỹi na' né'ecpi 'me nataqtáqaicpi.
So' Jesús ỹiméegue qa'en so' dola ló'oc
(Mateo 8.1-4; Lucas 5.12-16)
40Qaa'le janac so' siỹaxaua dola na' ló'oc, nichicot so' Jesús, qana'chi ỹisóidiñi naua' liliictel. Qana'chi 'enaac:
—Da'me 'aviỹamaxaden, qaama'le 'auañoxot da' jaỹim ỹiméegue 'auen.
41Qana'chi so' Jesús ỹátaqta 'uo da' lichoxodénataxanaxac so'me. Qaama'le ỹipotelégue, qana'chi 'enaac:
—Já'a, siỹamaxaden. Naỹi 'am n'óota.
42Chan'eesa joca'li 'chi nasaxáiỹi da' l'aqtac, qana'chi jec so' noláxa, cá'ai so' siỹaxaua, qana'chi n'óota. 43Qana'chi so' Jesús ỹátaqta 'enapéga jeso'me, qaláxasa da' laqátaxac 'enaac:
44—Péga, 'ená'te 'uo' ga'me 'au'aqtaxanem. Qaláxasa 'oc, 'analoxóne'uo ñi'me l'aqtáxanaxanec na' siỹaxadipi da' qodetaxaỹapégue' ñi' Dios, qataxa 'auaneuo qomle jaga' 'adasaqáse 'me 'éetapega joca'li so' Moisés da' ỹan ga'me sóxote n'óota, qaidi ỹima qoỹaỹáten da' ma'le 'am n'óota.
45Qaláxasa so'me siỹaxaua joca'li jec, qana'chi jecot da' d'aqtaxanem ỹima na' siỹaxadipi, da'me 'éeta joca'li. Chan'eesa so' Jesús na'chi sa naloxóne'uo na' noicpi. 'Chi quetalóo'te naua' totelóo'te 'ale'u, qaláxasa nataq'en chiỹoqot'eelo jen' nec'áta so'me.
Currently Selected:
Marcos 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.