YouVersion Logo
Search Icon

2 Tesalonicenses 1

1
So' Pablo qataxa saua' liquiáxa'u ỹidénaqteeta jaso' lidíise' so' 'amaqténataxanaxaicpi
1Jaỹim Pablo, jaỹim huet'asop ñi' Silvano qataxa ñi' Timoteo. Naỹi 'ami samaxalo jan' ỹidíise, 'ami ỹaqai'ỹolqa 'amaqténataxanaxaiqa 'me noic let'ádaic Tesalónica lase'. 'Ami 'me 'auqochíita'uo ñi' qadet'a Dios qataxa so' qadesaliaxanec Jesucristo. 2Sétaaque da' 'auacoñiiỹet da' niỹálaqtaxanaxac qataxa da' n'emáxac 'me chiỹoqo'ot ñi' qadet'a Dios qataxa so' qadesaliaxanec Jesucristo.
Ñi' Dios ỹí'et ga' ne'uaxánaguec na' loico ló'olpi qomle n'iỹílaq so' Cristo
3'Ami qadaqáỹa', qo'mi qolqat'ot da' sanaqátapecot da' qantónaxac ñi'me Dios, ỹasouaxat da' 'oñíita. Da'me ỹátaqta lasoxoc, qá'a da'me 'adipí'ii ỹátaqta nichíctaseguem qataxa da' loqopi'chi ñi' 'oonolec da' ỹauotec ga' laqáỹa, ỹátaqta jalcote da' nichíctaiỹi. 4Chan'eesa qo'mi ỹátaqta jalcote da' qadi'ỹoxodénataxanaxac da' 'oñíita da' s'aqtaxanqátapeguem jen'me ỹ'amaqten ñi' Dios, da'me 'anapogáxadenaxaquii qataxa da' 'adip'iỹáxaquii, temaqaidi da' 'ovíitanỹi ỹima na' 'ancanáguiquii qataxa na' 'an'queténaxaquii. 5Da'me dójo' di'ỹoq qa'en da'me ñi' Dios ỹátaqta sa 'te nepáten qomle nimit na' siỹaxadipi, qá'a ñi'me ỹilá'a da' 'oñíita da' ỹátaqta 'aunoxoñiiuó'o ga'me maliaxa nátauo l'onataxanaxac, da'me 'uo da' naỹi da' 'an'queténaxaquii.
6Qá'a na'chi lasoxoc da' ñi' Dios ỹa'uo qomle ga' ne'queténaxac na' ỹauótaaque da' 'an'queténaxaquii, 7qataxa da' 'ami nemataxanee'guesopa qomle na' 'an'queténaxaquii, nataq'en da' qo'mi, ga'me nolo' qomle n'iỹílaq so' qadesaliaxanec Jesús, chiỹoqo'ot na' piỹem da' naloxon, naquétaaue na' sega'me dóle' l'edáxa qataxa na' chiỹaqséguem Dios lamaxa'spi 'me dañoqtaxanacpi. 8Naga da' ỹa'uo da' ne'uaxánaguec na' sa 'te ỹoqo'cha ñi' Dios qataxa sa ỹalaxagueta naua' 'ónaxaiqa qadip'ico 'me ỹ'axátetac so' qadesaliaxanec Jesucristo. 9Jen'me sa lec'óxotolec da' ne'uaxánaguec ỹátaqta jalcote, qaỹa 'te ga' loiquiaqa' qoỹin, qataxa qoỹiỹotái'ỹa, ỹátaqta sa neuóiuo qoỹin da' qaidi sa 'te ỹauañíỹi da' li'ỹoxodic qataxa da' lañoqtaxanaxac so' qadesaliaxanec, 10ga'me nolo' qomle n'iỹílaq so'me da' qoỹi'ỹoxoden, ỹi'ỹoxoden jen' mai'chi lalémaxasetpi, qataxa ỹ'aalát'ec ỹima na' 'amaqténataxanaxaicpi. Qá'a 'ami 'me 'au'amaqchíñii da'me 'ami s'axátaqtapeema.
11Naqaida 'me 'uo da' 'ami ñitamnaqatalóo'te da' 'oñíita, siỹáxanaqat'ot ñi' qadet'a Dios da' maliaxa 'ami lecochiique da' ỹátaqta 'en 'oquiitelégue da' ladíquiaxac da' 'uo da' 'ami ỹiỹáxanalo. Nataq'en ñitamnaqatapecot ñi' Dios 'me qaỹa 'te ỹaqalánaac da' maliaxa ỹipaquetelégue ỹima jen'me ỹiỹamqáchiiñi 'me 'oñíitapeecpi qataxa da' l'onataxanaxac da' 'adip'iỹáxaquii. 12Qaqaidi da' lenaxat so' qadesaliaxanec Jesucristo 'uo da' li'ỹoxodic ỹasouaxat da' 'ad'óiỹaxaquii. Qataxa so'me 'ami ỹanema da' 'adi'ỹoxodíquii, qá'a naqaida da' 'éeta da' liỹálaqtaxanaxac ñi' qadet'a Dios qataxa so' qadesaliaxanec Jesucristo.

Currently Selected:

2 Tesalonicenses 1: PLGNT93

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy