1 Pedro 1
1
Jeso'me Pedro ỹamaxa jaso' lidíise so' 'amaqténataxanaxaicpi 'me nelagaxa
1Jaỹim Pedro, jaỹim lamaxasec so' Jesucristo, sedelégue jan' ỹide da' samaxa ỹima jena'me nelagaxatacpi 'me sa naqtelóo'te naua' lañoqo'te, jena'me netalóo'te diaua' 'ale'u Ponto, Galacia, Capadocia, Asia qataxa di' Bitinia. 2'Ami 'me chi'ena 'ami da' liquiỹáqa ñi' qadet'a Dios joca'li maliaxa qaỹa jen' 'aléua, da' ỹachiỹoxotaỹi qa'en jeso'me lepaqal da' 'ami ỹiỹotai'ỹalo, da' qaidi 'aualaqaiỹet jiñi'me, qataxa qaidi ỹátaqta 'ami ỹoqovíte' 'e'n naua' letauo' so' Jesucristo. Jaỹim sétaaque da' 'auacoñiiỹet da' qaỹa 'te joue nichoxodénataxanaxac qataxa n'emáxac.
Jeda'me quitaxac 'me qaỹa 'te loiquiaqa'
3Ỹátaqta si'ỹoxodénaq qomle ñi' qadet'a Dios 'me let'a so' qadesaliaxanec Jesucristo. Qá'a jiñi'me ỹachiỹoxotaỹi jeda'me let'ádaic lichoxodénataxanaxac da' ỹitaxa qo'mi ỹ'añaqte't, ỹachiỹoxotaỹi so' Jesucristo joca'li ỹitaxa nec'alaxadiséguem. Naqaida da' qaỹa 'te loiquiaqa' qa'en da' qanaquitaxac, 4qataxa ỹí'et da' 'ami 'auacoñiiỹet jega'me ỹaloxóotac ñi'me Dios 'me huet'ague da' piỹem, jega'me sa qoỹañoxot da' qoỹoláxachiỹi, 'uootaxa qoỹisepaxanaqtet, 'uootaxa daqaxaỹáñi da' 'ená'am jega' 'auaqapi la'uo. 5Qataxa ỹasouaxat da' 'ami 'uo da' 'adip'iỹáxaquii ñi'me Dios, qana'chi jiñi'me 'ami nequepaxatetalóo'te qa'e'n da' l'añaxac, da' qaidi 'avidi'ỹaguet ga' nec'alaxa 'me ỹaqátaxata't jiñi'me da' 'ami ỹaatetonaxanaxanque gaua' p'átreegue noloqo'te.
6Chan'eesa naqaida da' tadeeto' ỹátaqta 'ami madet'ape, temaqaidi da' 'uootaxa 'ami ỹiuen da' cada'acolec da' 'uo da' 'an'queténaxaquii, ỹasouaxat jen'me saqalóta 'an'iinaỹiquii. 7Qá'a jeda'me 'adip'iỹáxaquii 'ená'am jaga' laicaua oro da' ỹiuen da' qoỹapiinec ga' dóle', qaidi qoỹaỹáten da' ỹátaqta nó'in. Jega'me nip'iỹáxac 'me ỹátaqta nala'aguet da' n'iinaguec, qana'chi ỹátaqta napacalégue da' lodiac jaga' oro 'me 'uo ga' loiquiaqa'. Chan'eesa 'ami dójo' 'adip'iỹáxaquii da' 'uootaxa na'chi 'eeta't da' qoỹ'iỹen, qana'chi ỹátaqta 'uo da' niỹamaxadénataguec, qataxa 'uo da' li'ỹoxodic qataxa 'uo da' ni'ỹoxodénataguec qomle ỹivíta da' ỹitaxa naloxon so' Jesucristo.
8Qá'a 'ami ỹátaqta 'auauochíỹic so' Jesucristo, temaqaidi da' sa 'auauañíiỹi; qataxa da' 'au'amaqchíñii naỹi, temaqaidi da' maliaxa da' sa 'auloi'ỹot, qalqaiga ỹátaqta let'ádaic da' 'antónaxaquii qataxa ỹ'oxodaic, chan'eesa jeda'me sa qoỹóvi' da' qoỹ'axategue. 9Qá'a 'ami ma'le 'auacoñiiỹet da' lec'alaxa da' 'ad'óiỹaxaquii, qá'a naqaida da' ỹátaqta 'éetapeec da' 'adip'iỹáxaquii.
10Jeso'me 'uáichiiñi huó'e so' l'aqtáxanaxanecpi ñi' Dios joca'li ỹátaqta nimitétac qataxa ỹinatétapeec ga' ladíquiaxac dójo' nec'alaxa, qataxa jeso'me ỹ'axátetac da' lichoxodénataxanaxac ñi' Dios 'me sétaaque da' 'ami ỹanema. 11Qataxa so' lepaqal so' Cristo chi'ena joca'li ỹaỹátenaxanaxanec jeso' l'aqtáxanaxanecpi ñi'me Dios jeda'me taỹá'a ne'queténaxac qataxa da' li'ỹoxodic 'me nec'ataxanáuo. Qana'chi so' n'aqtáxanaxanecpi sétaaque da' ỹátaqta ỹaateton jái'chogamaxa siỹaxaua qataxa ga' nolo' 'me huáaue jega'me ỹ'axátet'aguet so' Espíritu Santo 'me huet'aguet jeso'me. 12Qaláxasa jiñi'me Dios ỹaỹátenaxanaxanec jeso'me da' dójo' huétapeec sa lalémaxaset, qá'a jeda'me sétaaque da' qo'mi talóo'te. Chan'eesa naqaida da' 'ami qoỹ'axátetapeema da' 'ami ỹ'axatema jen' ỹ'añaqtet so' Espíritu Santo 'me chiỹoqo'ot di' piỹem 'me ỹ'axátetac da' n'aqtaxanaxac 'me chiỹaqaỹi da' nec'alaxa. Jeda'me nataq'en naqaida da' sétaaque ỹaỹáten joca'li jen'me chiỹaqséguem lamaxa'spi ñi'me Dios.
Ñi'me Dios sétaaque da' ỹoqovíta da' qad'óiỹaxac
13Chan'eesa 'ónaxaic da' ỹátaqta 'aviỹamaxachíichiiñi jega'me 'av'íchii, qataxa ỹátaqta 'anlóiteegue, qataxa ỹátaqta 'auemachiỹo'ot ỹima da' 'adip'iỹáxaquii ñi'me Dios ỹasouaxat da' lichoxodénataxanaxac 'me 'ami ỹanema qomle ỹivíta da' naloxon so' Jesucristo. 14Qá'a 'ami 'aviñí'ỹam ga' nec'óxot 'me ỹátaqta láxadaic, 'ena't qomle da' 'av'íchii jen'me 'oñíitapeecpi joca'li maliaxa da' sa 'auaatetoñii ñi'me Dios. 15Na'chidato' qomle da' 'ovíitaaue da' n'óiỹaxac 'me ỹátaqta ỹoqovíta, qá'a jiñi'me Dios 'me 'ami ỹiỹaxanalo, jiñi'me ỹátaqta ỹoqovíta. 16Qá'a jenaa'me nidii's l'aqtaqa ñi' Dios 'eet'oi: “'Ami ỹátaqta ỹoqovíta qomle da' 'adasoxoquii, qá'a jaỹim ỹátaqta jaỹim ỹoqovíta.”
17Qá'a 'ami da' 'aviỹáxañiitapega ñi'me Dios da' ỹátaqta 'adet'ai, 'me sa liquiỹac jen' siỹaxadipi da' nimit ñi' 'oonolec jega'me loic, qana'chi ỹátaqta 'au'óiỹa toqo' jiñi'me 'ena'uaque naua' noloqo'te naỹi da' maliaxa 'oviitalégue jen' 'aléua. 18Qá'a ñi'me Dios 'ami nec'alaxatee'guesopa da' n'óiỹaxac 'me ỹátaqta qaỹa 'te ga' náỹi, 'me 'ami ỹipotan'agueta jeso'me huá'au 'adet'aipi; qataxa 'ami ỹátaqta 'auaỹáchiñii da' laso'víỹaxac dójo' nec'alaxa da' sa laso'vi qoỹin ga' taỹá'a da' ỹiméta da' 'ená'am jaga' laicaua oro, 'uootaxa jaga' laicaua plata, 19qá'a na'chisáate' saua' letauo' so' Cristo 'me ỹátaqta let'ádaic da' laso'víỹaxa'j joca'li 'ená'am ga' n'aanaxate lec'óxot 'me qaỹa ga' le'quemáxaset qataxa ỹoqovíta da' qoỹalaat, qana'chi qoỹaneuo da' qoỹigóoue. 20So' Cristo chi'ena da' qoỹaqátaxata't joca'li maliaxa qaỹa jen' 'aléua da' qoỹan, qaláxasa na'chinauáte' naỹi naua' p'átreegue noloqo'te, qana'chi di'ỹoq jeso'me, ỹasouaxat da' 'oñíita. 21Chiỹoqóchiỹi so' Cristo da' tadeeto' 'ami 'au'amaqchíñii ñi'me Dios, 'me ỹitaxa nec'alaxadiséguem jeso'me qataxa ỹanem da' li'ỹoxodic, chan'eesa 'ami 'ap'íi'ỹa qataxa 'anaquichiit'ot jiñi'me.
22Naỹi da' chiỹoqóchiỹi so' Espíritu Santo da' 'ami 'aualaqailégue da' n'aqtaxanaxac 'me ỹátaqta 'eesa, qana'chi ỹátaqta 'aviỹóita da' 'ad'óiỹaxaquii, qaidi ỹátaqta 'auauochíỹic jen' 'adaỹii. Chan'eesa ñi' 'oonolec da' 'oñíita ỹátaqta ỹimáuo qa'en jan' liquidiaqte qataxa ỹima da' l'añaxac da' ỹauotec ga' laqáỹa. 23Qá'a 'ami dálaxaic da' 'adañoxoquii, qaláxasa dójo' 'adañoxoquii sa naqaida da' chiỹaqaỹilo saua' ỹ'oqochiilo 'adet'áldii' 'me taỹa'alo da' qaỹaua, qá'a naqaida da' l'aqtac ñi'me Dios 'me nec'alétaiỹi qataxa qaỹa 'te loiquiaqa'. 24Qá'a naua' nidii's n'aqtaqa 'enáacjo':
Ỹima jen' ỹodapecachi siỹaxadipi 'ená'am ga' 'chi 'auaqapi,
qataxa da'me l'amaqchic 'ená'am jega' la'uo jen' 'auaqapi.
Jen' 'auaqapi taỹá'a da' daqaqa qataxa n'áqañi jen' la'uo,
25qaláxasa da' l'aqtac ñi' qadesaliaxanec Dios qaỹa 'te loiquiaqa'.
Dójo' n'aqtac naqaida da' n'aqtaxanaxac 'me chiỹaqaỹi da' nec'alaxa 'me 'ami qoỹ'axátetapeema.
Currently Selected:
1 Pedro 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.