Lukasi 11

Yesu kanguahunda ahundwa bhake kunnyupa Chapanga

Matayu 6:9-13; 7:7-11

1Linjubha limu Yesu kakibhegha kumoo kumo pakinnyupa Chapanga. Pakayomolite kuyupa, yumoo ywa ahundwa bhake kakinng'ombela, “Bambo, tungughuyupa ghutuhunde kunnyupa Chapanga, handa bhula Yohane pakaahundite ahundwa bhake.”

2Yesu kakiaghombela, “Pammegha mukunnyupa Chapanga nnongele naha,

‘Tate, ghwetu ghuubheghite kunani

lihina lyako lihokamilwe,

Ghubhutwa ghwako ghuhike.

3Ghutupeghe nalelo hilyo hyetu hya kila linjubha.

4Gutulekekehe ulemwa ghwetu,

kiyaha twenga tungualekekeha bhoha bhaatutendela uhokelo.

Na ghukotoke kutuyingila mumang'eho.’ ”

5Mbole Yesu kakiaghombela ahundwa bhake, “Tulongele yumoo ywenu ywakabheghite na nng'anja ghwake, na kakighenda ku lubhagha lwake pakilo, kakanng'ombele, ‘Ghanja, nje ghunnyahikile mangate mandatu chonde! 6Kiyaha nng'anja ghwangu kanhikila pakibha mu mwanja ghwake na nenga mmegha nakyo ng'obhe kya kunpegha.’ 7Naywo nge kakannyangule kakali mu nyumba, ‘Ghukotoke kunng'aha ndata kala nlyango. Nenga na bhana bhangu tughonja kala ndayumuka ng'obhe kukupegha kilibhi.’ 8Kulyaghila, nunguaghombela, mundu aywo katayumuka ng'obhe kunpegha aywo mangate kiyaha ndo ghanja ghwake, peni kiyaha yula mundu kaabhona ng'obhe honi, kughendelela kuyupa hinu aywo mundu katayimuka na kunpegha kilibhi kyohele kyakakipalite. 9Hinu ningubhaghombela, nnyupe na mwenga maakamuhwa, npalahe na mwenga matabhona, makatite hodi na mwenga maayughulighwa. 10Kiyaha ywohele yunakuyupa kaakamuhwa yunakupalaha kaabhona na yula yunakutite hodi kaahughulighwa. 11Bhuli, kabhegha ywohele mu mwenga ywene mwana ghwake pakannyupite homba, kaanpegha liyoka kihyengo kya homba? 12Ebu pakannyupa lihumbi kaanpegha kipinini? 13Mwenga mabhandu bha mahakataho, mungumanya kuapeha bhana bhenu hilibhi hya maha, yabhegha bhuli kwa Tate ghwenu ghwa kunani katabhapegha ng'obhe mwenga Nhuki ghwake mwene Chapanga bhala bhaannyupa?”

Yesu na Belisebuli

Matayu 12:22-30; Maliki 3:20-27

14Hinu Yesu kakibhegha mu kulibhuha lindilu kuhuma kwa mundu ywanga kughomba. Lila lindilu pakammukite yula mundu ywanga kughomba kamu kakiyanda kuyobhela, nalo lumati lwa bhandu lukikangacha. 15Peni amoo bhandu bhakilongela, “Kangughabhuha mandilu kwa makakala ghakakamuhitwe na Belisebuli, yula kilongohi ghwa mandilu.”

16Bhandu bhangi bhakinng'eha kwa kunpala kakatende naho kuhuma kunani kwa Chapanga, kubhoneha kukita kakiteghekwa na Chapanga. 17Yesu pakimanya mahwacho ghabhe, kakiaghombela, “Ghubhutwa ghwohele ghunakumetukana himati himati hinakupingikihana ghwakanjaghanika, ubhwabhu abhu lubhagha lwoheli luubheghite na bhulwa lwa pwilinganika. 18Handa ghubhutwa ghwa Nchipila naghwo ghungulikan ghwene, utabhala ghwabhe ghwatengeleheka bhuli? Nungubhaghombela naha mwenga kiyaha mwenga mungulongela kukita nungughabhingabhinga mandilu kwa makakala gha Belisebuli. 19Hinu, handa nenga nungughabhuha mandilu kwa makakala gha Belisebuli, hata ahundwa bhenu ubhwabhu angughabhuha kwa makakala ghake hinu ahundwa bhenu bhaadumula nongwa ayi ya nenga na mwenga kukita mmegha tela ng'obhe. 20Peni handa nenga nungughabhuha mandilu kwa makakala gha Chapanga, nmanyi kukita Ghubhutwa ghwa Chapanga ghubhahikila.”

21“Mundu yuna makakala pakakamula mikoha kulukingika lubhagha lyake, ghoha ghakabheghite naghwo ghaabhegha muuhihimilo. 22Peni pakahika mundu yuna makakala kupitingana kwa yombe aywo katanpukila na kuntuta na kunhotola mbole katanpoka mikoha yake hyoha yakayidumbilite na kuyitola hilibhi hyaki hyoha.”

23“Mundu ywohele ywanga kubhegha papamu na nenga, kagumbingikiha, na ywohele ywa nga kukongoha papamu na nenga, kangupwilinganya.”

Kubhuya kwa lindilu

Matayu 12:43-45

24“Lindilu pakammuka mundu, kataghenda kuuyumu kupalaha pa kupumulila, peni handa kapabhona ng'obhe katalongela, ‘Ndabhuya ku kitutubhi kyangu kunhumite.’ 25Paabhuya na kukibhona kila kitutubhi kipyaghilwa na kulembwa maha, 26ndo kataghenda na kughatola mandilu ghangi nhano na abhili ahakata kupitingana kwa mwene nabho bhaayingila na kutama amwo. Ku uhiko njimba ya yula mundu yabhegha tepatepa kupitingana kya ulongohi.”

Uyelelo ghwa hoto

27Yesu pakabheghite mu kulongela agha, nndala yumo ywakabheghite pakati ya lula lumati kakikweha lilobhe pakilongela, “Kanonelwa nndala ywakakupapite na kukunyongeha!”

28Yesu kakinnyanga, “Peni bhanonelwa muno bhala bhaaliyihwa lilagho lya Chapanga na kuliyitikila.”

Bhandu angupala nhabho

Matayu 12:38-42

29Lumati lwa bhandu palubheghite mu kuyonjokeheka, Yesu kakighendelela kuaghombela, “Aki ndo kibheleko kya uhakata, kingupalaha naho peni kya kamuhwa ng'obhe naho yohele ngati nga yila ya Yona. 30Kiyaha handa bhula Yona pakabheghite naho kwa bhandu bha Ninawi, ubhwabhu abhu Mwana ghwa Mundu kaabhegha naho kwa kibheleko aki. 31Linjubha lya toso mutwa nndala ghwa Kusi katayima papamu na bhandu bha kibheleko aki, naywo pakiyimiha uhokelo ghwa kibheleko aki, kiyaha mwene kakibhegha mumwanja kuhuma kutali kahike kughayihwa malango gha Sulemani. Peni apa mmegha nkulu kupitingana Solomoni! 32Linjubha lya toso, bhandu bha Ninawi bhaayima papamu na kibheleko aki na kubhoneha kukita kibheleko aki kihakata, kiyaha bhene bhakilipetula paannyihwite Yona pakilandamiha. Peni apa mmegha nkulu kupitingana Yona!”

Lung'ali lya mmili

Matayu 5:15; 6:22-23

33“Kahone mundu ywakakwatiti limbamba na kulihiha ebu kuligubika na nkambo, maha bhangulibhika pakinyuta kyake ngati bhandu bhoha bhalubhone lung'ali. 34Liho ndo limbamba lya mmili ghwako. Handa liho lyako lingubhona tela, mmili ghwako ghwoha ghwabhegha mu lung'ali. Peni handa liho lyako libhoho, mmili ghwako ghwoha ghwabhegha mu lubhindu. 35Hinu, ghulilolekee, lung'ali lughubheghite mu ghwenga ghukotoke kubhegha lubhindu. 36Hinu, handa mmili ghwako ghwoha ghukwila lung'ali, kya nga kipalamande kiibheghite mu lubhindu, ndo mmili aghwo ghwang'aliha tela handa bhula limbamba mulughung'aliha kwa lung'ali lwake.”

Yesu kanguabhayila Akaafalisayo na ahunda bha malaghilo

Matayu 23:1-36; Maliki 12:38-40

37Yesu pakayomolite kuyobhela, nfalisayo yumu kakinnyupa Yesu kaghende kulubhagha lwake kwa kya hilyo. Yesu kakiyingila na kutama na kulyegha. 38Yula Nfalisayo kakikangacha kukita Yesu kakikuha ng'obhe mabhoko ghake kukali na kulyegha hilyo, handa payibheghite hitohe yabhe. 39Ndo Bambo kaking'ombela, “Mwenga makaafalisayo mungughulula nnobho na kipumbulu kya panje, peni mu mwenga yimema bhulwa na uhakata. 40Mwenga ahila mahala! Mungumanya ng'obhe kukita Chapanga ywakabhumbite panje ndo aywo aywo ywakabhumbite nkati? 41Hinu, handa pamuapegha makapukwa himuyibheghite naywo, na hilibhi hyoha yimuyitendite yabhegha nyanyi kwa Chapanga.”

42“Peni yaabhegha mipinguhi ya kyabhuli kwa mwenga Makaafalisayo kiyaha mungunpegha Chapanga kimati kya mbinda mabhoko yimo kwa manyahi gha midadangala, na mahambanyungu na makolo gha manyahi matangalo, kangi munguakuluha bhandu na mungunpala ng'obhe Chapanga. Yinguanogha kuyilolekeha huti mihalo aywo kyanga kughabhaya na ghala ghangi ghaannogheha Chapanga.”

43“Ghwaabhegha npinguhi ghwa kyabhuli kwa mwenga Makaafalisayo, kiyaha mwenga mungupala kutama mu hiteho hya kuulongolo pakuhokamilwa mu hitutubhi hya kukonganila, na kulamuhwa kwa kuhokamilwa mu ulongolo ghwa bhandu. 44Gwaabhegha npinguhi ghwa kyabuli kwa mwenga Makaafalisayo, kiyaha mwenga ndo handa mandogholo gha nga matumbila, ghene bhandu bhangughalibhata kya nga kumanya.”

45Nhunda yumo ghwa malaghilo kakinnyanga pakilongela, “Pa ghulongela mihalo ayi ghungutuligha na twenga ubhwabhu.”

46Yesu kakinnyanga, “Ghwabhegha npinguhi ghwakyabhuli kwa mwenga ahunda bha malaghilo kiyaha munguapapiha bhandu mihigho ya nga kuhotola kuyitola, na mwenga mungubhatangatila ng'obhe nga kwa kuyinula kikonji. 47Gwaabhegha npinguhi ghwa kyabhuli kwa mwenga, kiyaha munguachengela mandogholo ambuye bha Chapanga bha akomitwe na atate bhenu. 48Hinu, mwenga ndo ayimiho na munguyitikila ndendelo ya aghohi bhenu, kiyaha bhene bhakiakoma abho ambuye bha Chapanga na mwenga munguchengela mandogholo ghabhe. 49Hinu, Chapanga kakilongela naha mu malango ghake, ‘Ndabhayeghela ambuye na andumitumi, peni amoo bhangi mabhakoma na bhangi mamubhabamanda.’ 50Hinu kibheleko aki kyaatoswa kwakya mwahi ghwa ambuye bhoha bha Chapanga bhaakomitwe kutandila kuyimikwa kwa nnima aghu. 51Kutandila mwahi ghwa Abeli mbaka Sakalia, ywakakomitwe pakati ya likuta na pakya Chapanga Mukitutubhi kya Chapanga. Kulyaghila nunguaghombela, kibheleko aki kyaatoswa kwa kya agho ghoha.”

52“Ghwaabhegha npinguhi ghwa kyabhuli kwa mwenga ahunda ghwa malaghilo, kiyaha mungukibhua kihughulo kya nlyango ghwa mahala gha kunmanya Chapanga. Mabhene munguyingila ng'obhe na bhala bha apalite kuyingila munguakanikiha.”

53Yesu pakabheghite mukubhuka akwo, ahunda bha malaghilo na Akaafalisayo bhakiyanda kunpingikiha muno na kunnyuka kwa ngonyo tangalo, 54apati kuntyegha na kunkamula pakilongela kyohele kihakata.

Currently Selected:

Lukasi 11: NTNBL2025

Highlight

Copy