Ntendwa 11

Petulo awatamwiiza Wayahudi mbui za Konolio

1Waagiiwa wa Yesu na wantu wamzumiao Klistu wekwekaao Yudea wakategeeza kuwa wantu wesao kuwa Wayuhudi wahokea Mbui ya Muungu. 2Kwaivyo Petulo ekuuyaho Yelusalemu, wantu wekumzumiao Klistu wekuwao wagwiswa, wakahigana na Petulo na kumwamba, 3“Wee kuita na kwekaa na wantu wesao kuwa Wayahudi na wesao kugwiswa na hata ukada nao!” 4Petulo akavoka kuwasosoea pwii yada yekugosolwayo kuvokea aho bosi.

5Akagombeka, “Msi umwe nekuwaho navika mwe mzi wa Yopa, Muungu akanionyesha kintu pwii inga shuka khuu ikaseezwa asi kuawa uwanga kwa Muungu uku itozwa kwa phembe zakwe nne ikaikwa hehi yangu. 6Nikasungiia mda ndani kwa vitana nikoona wanyama wa miundi mine na wanyama wa kwe mzituni na wanyama wabuutikao na wadege wa uwanga. 7Naho nikategeeza mgutio ukanamba, ‘Petulo enuka udumue singo ude!’ 8Akini miye nikamba, ‘Aah Zumbe, miye khizati kuda vintu vyekuemezwavyo na Muungu kuigwa na vyesavyokukundigwa kuigwa.’ 9Uda mgutio ukategeezeka vituhu kuawa uwanga kwa Muungu ukagombeka, ‘Usekuvyetanga khavifaa kuigwa vintu ambavyo Muungu kavigosoa viigwe.’ 10Mbui iyo ikagosoka maa ntatu na vikaawa aho vyose vikavuzwa uwanga kwa Muungu. 11Ahoaho wantu watatu wekuwao waagiiwa kwangu kulawa Kaisalia wakabua he nyumba nekuwayo nikekaa. 12Muye wa Muungu ukanamba niite hamwe nao na nesekuemea, awa wandugu mtandatu wakaita hamwe na miye adi Kaisalia na uko tikengia mwe nyumba ya Konolio. 13Yee akatigombeka ni viivihi ekumuonavyo mndima wa uwanga kwa Muungu kagooka nyumbani kwakwe na kumwamba, ‘Mwaagiie mntu mzi wa Yopa akamwetange mntu yumwe etangwae Simoni kwa zina ntuhu Petulo. 14Yee endaakugombeke mbui ambayo wee na wanduguzo mwendamuoholwe.’ 15Naho nekuvokahodu kutamwiiya, Muye wa Muungu ukawezea inga wekutezeavyo swie aho bosi. 16Naho nikakhumbuka mbui ambazo Zumbe nee kagombeka, ‘Yohana kabatiiza kwa mazi, akini nywie mwendambatiizwe kwa Muye wa Muungu.’ 17Naho ikawa Muungu nae kawekha funge diadia wantu wesao kuwa Wayahudi inga diadia ekutekhado swie tekumzumiaho Zumbe Yesu Klistu, uwo miye nndai hata nigeeze kuhigana na Muungu?”

18Wekutegeezaho ayo, wakabada kuhigana nae wakamtogoa Muungu wakamba, “Muungu kawekha wantu wesao kuwa Wayahudi phasi ya kubada mavigaviga wadahe kwekhigwa ugima wa kae na kae!”

Zumwezumwe da wantu wamzumiao Klistu wa uko Antiokio

19Wantu wada wekweambazikao kuawana na suumizi yekulawiayo kisingi cha ufe wa Sitefano, watuhu nee waguukia hae adi Foinike na Kipulo na Antiokio, nawo nee wawa wakabiikia ida Mbui kwa Wayahudi ikedu. 20Akini wamwe wa wazumizi wekulawao mzi wa Kipulo na Kilene wakaita Antiokio wakaiambaza iyo mbui kwa wantu wesao kuwa Wayahudi wakawabiikia Mbui Yedi ya Zumbe Yesu. 21Zumbe nee kawaambiza na ntaazia khuu ya wantu ikazumia na kumhitukia Zumbe.

22Mbui ida ikategeezeka kwa wazumizi wa Yesu Klistu wa Yelusalemu, nee wamuagiia Balinaba aite Antiokio. 23Ekubuaho uko na koona ambavyo Muungu ekuwajaiavyo wada wantu, akatamiwa muno na kuwakunda wose wekae kwa kwevana na Zumbe kwa mioyo yao yose. 24Balinaba nekawa mntu yedi na mwekuongoewa na Muye wa Muungu na uzumizi, zumwezumwe kuu da wantu dikamzumia Zumbe.

25Naho Balinaba akaita mzi wa Taso kumwondeza Sauli. 26Ekumuonaho akamueta mzi wa Antiokio, naho wose waidi wakekaa na wada wantu wekumzumiiyao Klistu kwa mwaka umwe wakahinya zumwezumwe kuu da wantu. Uko Antiokio wahina nee wetangwa Waklistu kwa maa ya bosi.

27Kisingi ichoicho, wamwe wa waoni wakeza Antiokio kuawa Yelusalemu. 28Nee yumwe wao akagooka etangwae Agabo na kwa udaho wa Muye akoona kuwa kundakuwe na gumbo mwe si yose. Gumbo ido nee dilawiiya kisingi cha ugookezi wa Klaudio. 29Wada wahina wakaamua kadii ya udaho wakwe egae chochose ili kuwaambiza wada wantu wekumzumiao Klistu wekuwao wekaa mzi wa Yudea. 30Nee wagosoa ivyo na wakawaagiiya Balinaba na Sauli wawegaie msango wadaa wa wantu wekumzumiao Klistu.

Currently Selected:

Ntendwa 11: NTBBL2025

Highlight

Copy