Mui Psalm 50
50
1God, God a Lord e ere: e soie walumalau ure ana sato ko qaa oto ko lai su.
2God e raa tautaa: mwaanie Sion hanue e kohi.
3God ikie kei lae mai; e saa toli rohu ike: ola dunge kei weru i naona, na mawasidengi na rodohono kei deu keli ana.
4Kei soi tai lengi na mai i haha: ana kei leie mwala ingeie.
5Uri, Mui inoni maai ineu, kire ke ruru mei: muini e rapeie haalunge ani ununge.
6Tai lengi kei unutahangainie odotainge ingeie: ana ngea God kei lei oto.
7Mwala ineu, omu ke rorongo, na nehe si ereere: Israel, neke unue hunio: ineu God, God ioe.
8Nou saa mamakolataine mu ununge ioe hunio: ana oko arareau onioni ana ununge.
9Nou saa uretohune nga kau ana nume ioe: wa nga sheep ana para ioe.
10Ana taena ngaa poo ni meesu toolaku oto haleite: na taena nga kau ani toloi henue.
11Nou meni hahaitelie mui menu ani toloi henue: na mui poo e tatangasie mu ote toolaku oto haliite.
12Uriana noko hiolo, nou saa haaisi unui hunio ani: ana ahutana walumalau tootoolaku, na walutana nga ola ani.
13O unue uri nekei alaamadi anga nga hasioi keu: wa uri nekei inuhie nga mei epu eni sheep?
14Oke ununu saana God pei paalahelana: oke haatooa mu wala o nei qongi hunie ini e Liutaa ani.
15Oke totolongainieu maholo oko oo haamasio: na nekei haaurio, hunie oke haamanikulueu.
16Tae a God e ere hunie inoni ni orahaa uri: Atei ni e haraio hunie oke houleinie mu haatolanga ineu; na hunie oke sisihoana haalunge ineu?
17No oko heitohea haananaunge: na o sikeasie oto walaku mwaanio.
18Ana oko leesie nga inoni pelipeli, na okei haatainie oto: na oko ooruru peira masi.
19O toliasie oto mola wawamu hunie wala tataala: oko eroero ana meamu.
20O dodongai hunie oke ere tataala hunia asimu: o talei heotainia kalena nikemu.
21O teurine; na nou toli rohu; oto o unue uri nou sada peio: tae nekie ere ni haananaulemu, na nekei ladowariheni hunio.
22Mwalana, kira puotainia God, omu ke neineisae ana leu ie: mwane nou opa hiteliomu, na nga ini saa hei haauri omu lou.
23Nga ini ko unu i sieku pei lahelaku, nge kei haamanikulueu: nge nekei unutahanie haauringe a God hunie nga ini ko lae isulie tala odo.
Currently Selected:
Mui Psalm 50: apbPSA
Highlight
Share
Copy
Want to have your highlights saved across all your devices? Sign up or sign in
First published as part of the Anglican Prayer Book by the Melanesian Press, 1946.
