२ थेसलोनिकिर 3
3
पावलस गोहरार'आ गे बिन्ती नन्दस
1फेच्चा नू अना भ'इ-बहिनरो, एम्हय खतरी गोहरार'आ का उर्बस ही दवसमाचार चौगुड़ तरा चाँड़े बिड़र'आ नेक'आ अउर महबा गने इन्जरतार'आ नेक'आ, एकन्नेकी निम्हय मझी नू हूँ मन्जकी रहचा। 2अउर गोहरार'आ का एम पपहा अउर मलदव आलर ती बछर'आ ओंगा नेक'आ, एन्देरगेका बग्गे आलर धर्मेस ही दवसमाचारन मल पत्त'अनर।
3लेकिन उर्बस पत्त'अना जोगे र'अदस अउर आस निमन बड़ियर ननोस अउर सैतान ती बछाब'ओस। 4अउर एम एका कत्थन पेसकादम अदिन निम नन्दर अउर नन्तेम र'ओर ब'अना पत्त नू एम उर्बस नू भरोसा उइका र'अदम।
5धर्मेस निमरिन नन्जका चोन्हा अउर ख्रिस्तस ही सहना सवंग बुझर'आ गे उर्बस दुम निमरिन एकतब'आ नेक'आ।
लन्डिर गे चेताब
6अक्कू अना भ'इ-बहिनरो, नम्हय उर्बा येसू ख्रिस्तस ही नामे नू एम निमरिन पेसदम का एम्हय ती सिख्रका लेखा मल एकनर अउर लन्डी र'अनर आर ती तरकुटी र'आ। 7एन्देरगेका एकसे एम्हय देखासिखी नना पड़ार'ई ब'अना कत्था निम अपनेम अख़दर। एन्देरगेका एम निम्हय मझी नू रहचकम ख़ने लन्डी मन्जकम की मला रहचकम। 8अउर एम नेख़'अम मन्डिन बेगर दाम ही मल ओन्डकम लेकिन निम मधे नेख़ाय मैंया हूँ ओत्था मला मना नेक'आ ब'आ की एम उल्ला-माख़ा कोहड़े मेहनत नन्नुम नलख नना लक्कम। 9एम्हय गने अधिकार मलका ती मला, लेकिन एम्हय देखासिखी नना ब'अना उदेस्य ती निम्हय खतरी एम एमन ओन्टा उदहारन कमचका र'अदम। 10एन्देरगेका निम्हय गने रहचकम ख़ने एम निमन पेसका रहचकम का, “अगर नेक'उम नलख मल नन्नर होले आर मन्डी हूँ मला ओना नेक'आ।”
11एन्देरगेका एम मेन्जका र'अदम का निम्हय मझी ती कय गोड़ेर लन्डी जिन्गी उज्जदर। आर एन्देर नलख हूँ मल नन्नर लेकिन दोसरर ही नलखन बिगड़'आ गे ख़ेक्खन सजनर। 12अक्कू एन्ने आलरिन उर्बा येसू ख्रिस्तस ही नामे नू एम पेसदम अउर चेताब'अदम का आर छछेम तंग्हय नलखन नना नेक'आ अउर उज्जा-बिज्जा नेक'आ।
13लेकिन भ'इ-बहिनरो, निम दव नलख नना गे अमके ख़ड़दा। 14ई चिठी नू एम्हय बाचका कत्थन अगर एक'अम आलस मल पेस्रदस होले, आ आलसिन चिन्ह'आ की उइय्या अउर आस गने संगहत अमके उइया का आस ई चड्डे अपनेम लज्जे मोख़ोस। 15अन्नू हूँ आसिन बैरी लेखा अमके सोच'आ लेकिन भ'इस लेखा नना की आसिन चेताब'अके।
फेच्चा मोंजरा
16अक्कू सान्ती चि'ऊ उर्बस तानुम हुरमी बेड़ा, हुरमी खल्ल ती निमा गे सान्ती चि'आ नेक'आ। उर्बस निम्हय होरमर गने र'आ नेक'आ।
17एन पावल एंग्हय ख़ेक्खा ती ई मोंजरन टुड़दन। एंग्हय हुरमी चिठी गुट्ठी नू ई चिन्हा दुम र'ई। एन एन्नेकिम टुड़दन।
18नम्हय उर्बा येसू ख्रिस्तस ही अनुग्रह निम्हय होरमर गने र'आ नेक'आ।
Currently Selected:
२ थेसलोनिकिर 3: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
