१ थेसलोनिकिर 5
5
उर्बस ही बरना ही खतरी सपड़ारका र'आ
1लेकिन अना भ'इ-बहिनरो, उर्बस इकला अउर एका बेड़ा बर'ओस ब'अना पत्त नू निमा गे टुड़ना चाड़ मल्ला। 2एन्देरगेका माख़ा बिरी खलबस बरचका लेखा उर्बस ही उल्ला बर'ओ ब'अना कत्था निम अपनेम बेस्सकुना अख़दर।#मत्तिस २४:४३; लुकस १२:३९; २ पतरुसस ३:१० 3एकाबिरी आलर, “हुरमी तरा सान्ती र'ई अउर एन्देर सस्ती हूँ मल्ला” ब'आ लक्का मनोर, ताब भरिदेह मन्जका मुक्कर गे नुन्जचका लेखा अन्चोख'एम आर म'इयाँ सस्ती बर'ओ, अउर आ खिलपत ती ने हूँ बोंगा पोल्लोर। 4लेकिन अना भ'इ-बहिनरो, निम उख़ा नू मलकर। औंगे उर्बस ही बरना उल्ला निमरिन खलबस लेखा हयकट मला नन्त'ओ। 5एन्देरगेका निम होरमर बिल्ली ही अउर उल्ला ही ख़द्दर हिकदर, नाम माख़ा ता अउर उख़ा ता ख़द्दत मलदत। 6औंगे नाम दोसरर लेखा मला ख़न्द्र'ओत, लेकिन होसियार मनोत की एजरका र'ओत। 7एन्देरगेका ख़न्द्र'उर माख़म ख़न्द्रनर अउर मध उनू आलर माख़म उंखनर। 8लेकिन नाम उल्लन्ता ख़द्दत हिकदत, औंगे नाम होसियार र'ओत। अउर पत्त'अना अउर चोन्हन देह ही रक्छा नना गे कवच ही रुप नू अत्तोत अउर बछरना ही असरन कुक्कन रक्छा नन्ना टोपी ही रुप नू अत्तोत।#यसायाहस ५९:१७; एफिसिर ६:१३-१७ 9एन्देरगेका धर्मेस नमन कयर ही खतरी मला, लेकिन नम्हय उर्बा येसू ख्रिस्तस ती बछरनन ख़क्खा नेक'आ ब'आ की चज्जका र'अदस। 10नाम उज्जका र'ओत या केच्चका र'ओत, नाम आस गनेम उज्जोत ब'आ की आस नम्हय खतरी केच्चस। 11औंगे निम दोसररिन डिढ़ चि'आ, अउर निम दोसररिन बड़ियर नन्ना नलख नना, एकन्नेकी निम नन्तेम हूँ र'अदर।
पावलस पत्त'उर गे चिच्चका सलहा
12अना भ'इ-बहिनरो, एम निमरिन बिन्ती नन्दम का निम्हय मझी नू जिया तिम उर्बस ही नलख ननू अउर निमन चेताब चि'ऊ अगुवरिन आदर नना। 13अउर आर ही नलख ही चड्डे आरिन चोन्हा गने कोहड़े आदर नना अउर निम-निम नू मेल-जोल मना की र'आ।
14अना भ'इ-बहिनरो, एम निमा गे उपदेस चि'अदम का लन्डिर गे चेताब चि'आ, हदियार'उर गे डिढ़ चि'आ, कमजोर आलरिन संगरा नना अउर होरमर गने सह'आ की र'आ। 15याद नना, निम मलदव ही बदला नू मलदव मला नना। लेकिन सगरो उल्ला दोसररिन अउर होरमा आलरिन सोग्गे नना।
16सगरो रिझरका र'आ। 17सगरो गोहरारनुम र'आ। 18एक'अन्नेम बेड़ा नू हूँ धन्नेबाद चि'आ, एन्देरगेका ख्रिस्त येसुस नू धर्मेस निम्हय ती इदिनुम बेद्दस।
19नेम्हा बोलतस ही चिच्चन अमा तेभ'आ। 20धर्मेस ती बरचका मुन्द कत्था तेंगनन अमा दुस'आ। 21लेकिन हुरमी कत्था ही जाँच नना अउर एकदा बेस्स र'ई, अइय्या नुम लक्का र'आ। 22हुरमी मलदव कत्था गुट्ठी ती गेच्छा र'आ।
23नमा गे सान्ती चि'ऊ धर्मेस निमन हुरमी कत्था नू नेम्हा उइय्या नेक'आ, अउर निम्हय सौसे बोलतन, जियन अउर देहन नम्हय उर्बा येसू ख्रिस्तस ही बरना बेड़ा नू निर्दोस उइय्या नेक'अन। 24निमरिन मिख़ू धर्मेस पत्त'अना जोगे र'अदस। आस इदिन ननोस दुम।
25अना भ'इ-बहिनरो, एम्हय खतरी गोहरार'आ चि'आ।
26होरमा भ'इ-बहिनरिन नेम्हा चोन्हा गने मोंजरा ननके।
27एन निमन उर्बस ही नामे नू पेसदन का ई चिठिन पढ़के की होरमा भ'इ-बहिनरिन मेन्त'अके।
28नम्हय उर्बा येसू ख्रिस्तस ही अनुग्रह निम्हय गने मनन नेक'आ।
Currently Selected:
१ थेसलोनिकिर 5: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
