१ थेसलोनिकिर 4
4
धर्मेसिन खुस नन्ना जिन्गी
1फेच्चा नू अना भ'इ-बहिनरो, निम उर्बा येसुस ही मन्जका करने एम निमरिन धर्मेस गे पसिंग पड़ारना जिन्गी एकसे उज्जा पड़ार'ई ब'आ की निमरिन सिखबाचका र'अदम। निम पहले ती हूँ एन्नेम उज्जनुम बरचका र'अदर। अन्नेम ई पत्त नू और बग्गे उर्बस नू बढरनुम कला ब'आ की बिन्ती नन्दम। 2एन्देरगेका एम निमरिन उर्बा येसुस ती ख़क्खका एन्दरा-एन्दरा पेसका गुट्ठी रहचकम, अदिन निम अख़दर। 3एन्देरगेका धर्मेस ही मने इदिम र'ई का निम नेम्हा मना अउर बेभिचार ती गेच्छा र'आ। 4नेम्हा अउर आदर ती अपना देहन एकसे अधिन नू उइय्या पड़ार'ई, अदिन निम होरमर गे अख़'आ पड़ार'ओ। 5धर्मेसिन मला चिन्ह'ऊ आलर लेखा निम बेभिचार नन्ना मलदव विचार मला सोच'आ। 6ई पत्त नू नेक'उम गुनहा ननोर की तंग्हय पत्त'ऊ भ'इयोर ही बिड़दो नू मलदव मला नना नेक'आ, एन्देरगेका एन्ने हुरमी कत्था गुट्ठी ही बदला उर्बस दुम हो'अदस। एम निमरिन तो ई पत्त नू पहले तिम चेताबाचका रहचकम। 7एन्देरगेका धर्मेस नमन असुध ही खतरी मला लेकिन नेम्हा मना की जिन्गी उज्जा गे मिख़का र'अदस। 8औंगे ने ई कत्थन मला इन्जरदस आस आलरिन मला लेकिन धर्मेसिन मला इन्जरदस, एका धर्मेस निमा गे तंग्हय नेम्हा बोलतसिन चि'अदस।
9लेकिन भ'इ-बहिनरिन चोन्हा नन्ना ही पत्त नू निमा गे टुड़ना चाड़ मल्ला एन्देरगेका दोसररिन चोन्हा नना पड़ार'ई ब'आ की निम अपनेम हूँ धर्मेस ती सिखरका र'अदर। 10गोट्टा माकेडोनिया ता भ'इ-बहिनरिन निम मानिम चोन्हा नन्दर। लेकिन अना भ'इ-बहिनरो, निम और बग्गे अन्नेम नन्ते कला ब'आ की एम निमा गे डिढ़ चि'अदम। 11अउर एम निमरिन पेसका लेखा निम सान्ती ही जिन्गी उज्जा, अपना नलखनुम ध्यान चि'आ अउर अपना ख़ेक्खा तिम नलख नना गे कोसिस नना। 12एन्ने ननोर होले दोसरा आलर हूँ निमरिन आदर ननोर। अउर निमा गे एन्दर'उम चिज ही चाड़ मनी होले दोसरर ही असरा मला एःरा पड़ार'ओ।
उर्बस फेर बर'आ लगदस
13लेकिन भ'इ-बहिनरो, निम केच्चका पत्त'उर ही पत्त नू एन्दरा हूँ बल्लुर लेखा मला मना ब'अनन एम बेद्दम। अउर येसुस नू असरा मला मन्जका आलर लेखा सोक हूँ मला नना। 14एन्देरगेका एम पत्त'अदम का, येसुस केच्चका ती फेर उज्जा चोचस एन्नेम येसुस नू पत्त'ऊ केच्चका आलरिन धर्मेस फेर केच्चा ती उज्जत'ओस की येसुस गनेम संगे ओन्दर'ओस।
15उर्बस ही बचन लेखा एम निमरिन ब'अदम का नाम ज्या गोड़े उर्बस ही बरना उल्ला गुटी उज्ज'ओत, एन्दर'उम ननोत की हूँ नाम अबड़ा केच्चकर ती अगू आसिन भेट नना गे काला पोल्लोत।#१ कोरिन्थिर १५:५१-५२ 16एन्देरगेका उर्बस तानिम पेसका ही चिच्चयारना गने, हुरमी ती कोहाँ मेर्ख़ादुतस ही अवाज गने अउर धर्मेस ही तुरही उरचका बेड़ा नू उर्बस मेर्ख़ा ती एत्तोस अउर आहबाकिम ख्रिस्तस नू ने पत्ताचर की केच्चका रहचर आर होरमर ती पहले उज्जा चो'ओर। 17अदिही ख़ोख़ा नाम ख़ेख़ेल नू उज्जुर उर्बसिन भेट नना गे आर गनेम बदाली नू उठबतार'ओत, अउर एन्नेकी नाम सगरो उल्ला उर्बस गनेम र'ओत। 18औंगे निम इबड़ा कत्था गुट्ठी ती दोसररिन डिढ़ चि'अना नलख नना।
Currently Selected:
१ थेसलोनिकिर 4: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
