Yokana 21
21
1Akaulo kaŋun kitakanikin bobo Yesu ikesisiak kaŋolol naka Tiberia; kitakanikin kwanata: 2#Yok 1:45. kejaas nepepe Simon Petero, ka Tomas loenyaritai Didumo, ka Natanael, loko Kana loko Galilaya, ka odwe luka Sebedayo, ka ice iarei kokesisiakake. 3#Luk 5:5. Kotema Simon Petero kes atiar, “Alosi ailok.” Kotemasi atiar, “Isio da kiupari kajo.” Kolomasi, kodokasi ataker; konye kakuar kaŋin mam ikamuna ibore.
4 #
Yok 20:14; Luk 24:16. Napiwalari akwap kobwo Yesu koitolima; konye mam ikesisiak ajenete ebe erai ŋesi Yesu. 5#Luk 24:41. Kosodi kotema Yesu kes atiar, “Idwe, ejaas yes idinyaman?” Koboŋokis ebe, “Mam.” 6#Luk 5:6. Kotema kes atiar, “Kocakakisi eboi kowai lokoteten loka ataker, idumunete yesi.” Kosodete kocakakis, kwana do mam epedorete airiun kanuka aipues naka lukecor. 7#Yok 13:23. Kosodi ekesisian lokemina Yesu kotema Petero atiar, “Ŋes Ejakait.” Nakiiraria Simon Petero ebe ŋes Ejakait, konap akenapito (naarai kimujalal), kibirokin aŋolol, 8Konye kopotu ikesisiak ice kotoma ataker, iriitos eboi ileleba lukecor, naarai mam kelwanikina kaneeonit, konye bala iyadin akwatat.
9Kosodi nakedokuniata oitolima koanyut kanen akim naka atotol, ibwaikinitai yenikecor ka emugati da. 10Kotema Yesu kes atiar, “Koyaut lukecor ice luikamunito.” 11Kosodi kodoka Simon Petero ataker kiriu eboi oitolima, ileleba lukecor luepolok, akwatat ka akaisakany ka luuni: karaida kipu kwaŋin, mam eboi eŋeda, 12Kotema Yesu kes atiar, “Kopotu konyama.” Kwabo emamei ediopet kokesisiak loketitiŋikini aiŋit ŋes ebe, “Iŋai bo ijo?” Kojenut ebe kerai Ejakait. 13#Yok 6:11. Kobu Yesu, kolem emugati koinak kes, ka yenikecor da kwape kwaŋin. 14#Yok 20:19,26. Ŋin ŋes irwan nakiwuniet nakitakanikinor Yesu ikekesisiak kedau ajarun kokatwak.
15 #
Yok 1:42. Nakedauniata ainyam, kotema Yesu Simon Petero atiar, “Simon, okoku loka Yona, kimina eoŋ aitelekarit lu?” Kotema ŋes atiar, “Eebo, Ejakait, ijo ijeni ebe kamina.” Kotema ŋes atiar, “Kitadakenenei idwe luka amerekekinika.” 16#1 Pet 5:2,4. Kolimok bobo nakiareit ebe, “Simon, okoku loka Yona, kimina eoŋ?” Kotema ŋes atiar, “Eebo, Ejakait, ijo ijeni ebe kamina,” Kotema ŋes atiar, “Kipisenenei akamerekekin.” 17#Yok 13:38; 16:30. Kolimok irwan nakiwuniet ebe, “Simon okoku loka Yona, kimina eoŋ?” Kokadak Petero naarai abu kolimok irwan nakiwuniet ebe, “Kimina eoŋ?” Kotema ŋes atiar, “Ejakait, ijeni akiro kere; ijeni kamina.” Kotema Yesu ŋes atiar, “Kitadakenenei akamerekekin. 18#Mat 16:22; 26:39. Abeit, abeit, katemari jo atiar, Nairaar kolo ikatumunan ikapakini bon, ilosi neikoto: konye naimojoŋia iriori akonikanin, kisikapi ece, kiyaŋaari nemam ikoto.” 19#Yok 13:36. Kinera ŋun itodikini atwanare naetopolooria Edeke. Nakedaunia einer ŋun, kotema atiar, “Kotupunai.”
20 #
Yok 13:23. Kibelokin Petero, koany ekesisian lokemina Yesu etupit, ŋes ŋol lokegoŋakina katorob naka Yesu kapak kaya naka inyamat lukatiboŋ, loabala ebe, “Ejakait, iŋai bo kibilakini ebotet?” 21Aso keanyu Petero ŋol, kotema ŋesi Yesu atiar, “Ejakait, ido bo lo ikwaikinio ai?” 22Kotema Yesu ŋes atiar, “Arai akoto ŋol aidarit aitodol neabunio, ipodo bo ijo inyo? Kotupunai ijo eoŋ.” 23Kisiarakin akirot ŋin oinacan, ebe mam ekesisian ŋol etwani, konye mam kebala Yesu ebe mam etwani; konye ebe, “Arai akoto ŋol aidarit aitodol neabunio, ipodo bo ijo inyo?”
24 #
Yok 15:27. Ŋol ŋes ekesisian ŋol loitejenuni akiro ŋun, loewadikai ŋun; kijeni oni ebe akeitejenun erai nakabeit. 25#Yok 20:30. Ejaas da akiro ace nuipu nueswamat Yesu, arai kiwadikatai ŋinidiopet, aomit ti mam akwapin ilosikinos iitabon lutikiwadikai.
Currently Selected:
Yokana 21: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.