Bikoluwa ndia Bhakwenda 15

Si̱dha-si̱dhana ka Yelusalemu

1Bhakpa bemoti̱ bhatuka ka Yu̱deya nibhaki̱bi̱ka ka Anti̱oki̱ya egesa bhai̱ki̱li̱za bhiyo; “Bhuai̱be nibhaku̱ti̱ni̱ sigikilia ka kilagilo ndia Mambombi̱ ampesi̱a Musa, kokuzunua.” 2Yoho adhuwa ndu̱lu̱ Paulo na Balanaba nibhakihanula nabho. Paulo na Balanaba imamoti̱ na bhai̱ki̱li̱za ndibhetolo nibhakibhubhuwa yabho ka Yelusalemu takanana na bhakwenda na bhangbeku ka nsonga yoho. 3Menjo bhantika Paulo na Balanaba imamoti̱ na bhaluku ndibhetolo, toli̱ nibhalia ki̱ya, bhatomba ka kyalo ndia ka Foi̱ni̱ke na ka Samali̱ya, nibhakibhutolia bhai̱ki̱li̱za ka kyalo injo nesi̱ Bhakpa ndibha kali Bhayu̱daya bhatandi̱ki̱ lami̱a Mambombi̱. Makulu yoho abhudhedha bhai̱ki̱li̱za bhoponi. 4Ndia bhaki̱dha ka Yelusalemu, bhai̱ki̱li̱za na bhakwenda imamoti̱ na bhangbeku ndibha Bhayu̱daya bhabhutangililia toli̱ Paulo na Balanaba nibhakibhutolia poni ndia Mambombi̱ akoli̱o kolilia kowabho.

5No bhai̱ki̱li̱za ndibha bhabhi̱ ka kpata ndia Bhafali̱sayo nibhakitelema nibhakibhugia bhiyo; “Bhakpa ndibha kali Bhayu̱daya bhagbokiliani̱ bhabhutine toli̱ bhagbe kilagilo ndia Musa.”

6Bhakwenda na bhangbeku nibhaki̱si̱dha-si̱dhana ongabe nsonga yoho. 7Ndia bhadhakia hanula, Petelo nakitelema nakibhugia bhiyo; “Bhanamami, bhu̱i̱bi̱ nesi̱ kalasi̱o Mambombi̱ anibhuwa kowa bhenu̱ andu̱lu̱ nibhutebeze Bhakpa ndibha kali Bhayu̱daya Makulu Mabhonga ndia angbei̱be Yesu andu̱lu̱ bhahi̱ki̱li̱ze. 8Mambombi̱ mindia ai̱bi̱ kweli̱li̱kana ndia bhakpa, ahani̱sa nesi̱ abhubhala Bhakpa ndibha kali Bhayu̱daya ndia abhu̱pesi̱a Mwoyo Mawelikana eti abhu̱bi̱kebe nesi̱ na bhesu̱ akikola. 9Kasolola sobhe sasu̱ Bhayu̱daya na Bhakpa ndibha kali Bhayu̱daya. Abhugani̱li̱a kibi ndiabho nanga bhahi̱ki̱li̱za. 10Toli̱ bhukukabha lengesa Mambombi̱ kaku̱mbesa Bhakpa ndibha kali Bhayu̱daya nku̱mba ndia bhatatasu̱ bhakaku̱mba na bhesu̱ ndie bhikikitoka ku̱mbai̱ nangeki? 11No kili na hi̱ki̱li̱za eti kizunua kolilia ka kobhu̱ ndia Sali̱a Yesu nesi̱ nabho bhakibha.”

12Bhakpa poni bhadakiana nibhamuokiani Balanaba na Paulo katoliabhobe sazi̱bi̱li̱ai̱be na ndia akitina nki̱li̱ ndia bhakoli̱o ka Bhakpa ndibha kali Bhayu̱daya ka mani̱ ndia Mambombi̱. 13Ndia bhadhakia onga du̱mbi̱ Yakobbo naki̱bhu̱si̱ki̱aku̱ bhiyo; “Bhanamami bhuniokiane, 14Si̱moni̱ akitolia nesi̱ Mambombi̱ ateketa bi̱kaki ka Bhakpa ndibha kali Bhayu̱daya bhuwabhobe bhakpa ndibhaki.” 15Ndia Bhanabbi̱ bhaongabe agbei̱be nsonga yoho nesi̱ bhahandi̱ki̱ bhiyo;

16“Nidaki̱si̱ki̱a,

si̱ki̱sabe kusali̱a ndia Dhau̱dhi̱.

Nitodhe nialike,

kusali̱a ndiaki ndia abhi̱ nagu̱.

17Andu̱lu̱ Bhayu̱daya poni na Bhakpa ndibha kali Bhayu̱daya ndibha bhabi̱si̱ku̱ i̱nami ngu̱ko bhanikabhe emi Sali̱a Mambombi̱,

Mambombi̱ mindia akikolaga kima yoho, aongi̱ bhinjo#Amosi̱ 9:11-12

18kima ndia adhuwa ni̱ki̱ki̱hi̱ba tukai̱ kala.”

19Yakobbo nakigia bhiyo; “Ti̱-no emi nikibhuhabhula eti bhikilikibhukomisa Bhakpa ndibha kali Bhayu̱daya bi̱kabho kindia Mambombi̱. 20Bhuai̱be kibhuhandikilie katoliabho eti bhadhuwe liya liaga ndia bhabhubhembi̱li̱ bhakihongano imamoti̱ na njubha, bhadhuwe liya bhanyama ndibha bhekweli̱o toli̱ bhadhuwe li̱ana. 21Nanga kilagilo ndia Musa bhatebezi̱ ka tau̱ni̱ poni tukilia kala toli̱ bhakisomaga ka Ndabho kindia Bhayu̱daya yabhalami̱li̱aga tolo poni ka Sabbato.”

Bbaluwa ka Bhakpa ndibha kali Bhayu̱daya ndibha bhahi̱ki̱li̱zi̱o

22Du̱mbi̱ bhakwenda na bhangbeku ndibha Bhayu̱daya na bhai̱ki̱li̱za poni, nibhakitinaku̱ bhuwa bhaluku ndibhabho bhebhali tikabho ka tau̱ni̱ ndia ka Anti̱oki̱ya ndia ka Si̱li̱ya nibhali na Paulo imamoti̱ na Balanaba. Bhambuwa Yu̱da mindia yabhangiagaku̱ Balasaba na Silasi, bhaluku ndibhabhi̱ bhasali̱a ndibha bhai̱ki̱li̱za 23Nibhaki̱ya na bbaluwa yoho ka Anti̱oki̱ya nibhahandi̱ki̱ bhiyo;

“Bbaluwa yoho atu̱ki̱ ka bhakwenda na bhangbeku na bhanamanu̱ ka Yelusalemu, kibhuhandi̱ki̱li̱ Bhakpa ndibha kali Bhayu̱daya ndibha bhahi̱ki̱li̱zi̱o ka Anti̱oki̱ya na Si̱li̱ya na Ki̱li̱ki̱ya. Kibhumati̱si̱a bhenu̱ poni.

24Ki̱oki̱ nesi̱ bemoti̱ ndibha bhakitukabe ndie bhikibhubhali̱sani̱ toli̱ bhagbei̱ talibaniza hi̱ki̱li̱za ndianu̱ na ndia bhagbei̱ ongai̱. 25Ti̱-no, kyekumesa bhuwa bhaluku bemoti̱ tikabho na bhabhotuasu̱ ndibhe ki̱bhu̱ku̱ndi̱o Balanaba imamoti̱ na Paulo 26bhaluku ndibha bhepesi̱ku̱ kolilia Yesu Ki̱li̱si̱to. 27Ki̱nti̱ki̱ Yu̱da imamoti̱ na Silasi bi̱ka moti̱sa ndie kihandi̱ki̱ ka bbaluwa. 28Mwoyo Mawelikana imamoti̱ na bhakwenda na bhangbeku kibhaliana eti bhikili ki̱bhu̱bi̱sabe nku̱mba ndietolo ndia kali ka kilagilo yoho. 29Bhuai̱be bhudhuwe liya liaga ndia bhabhubhembi̱li̱ bhakihongano imamoti̱ na njubha, bhudhuwe liya bhanyama ndibha bhekweli̱o toli̱ bhudhuwe li̱ana. Bhukudhuwa kima yoho, bhukubha kulungi.

Bhwesage.”

30Du̱mbi̱ bhaluku bhehe nibhaki̱mei̱sa yabho yasi ka Anti̱oki̱ya, kindia bhasi̱dha-si̱dhana na bhai̱ki̱li̱za nibhaki̱bhu̱pesi̱a bbaluwa. 31Bhai̱ki̱li̱za ndia bhasoma bbaluwa injo, bhadhedhelua nanga makulu sa si̱ki̱sabhoku̱ mani̱ ndia bhatakana ka bbaluwa. 32Yu̱da na Silasi ndibhabhi̱ bhanabbi̱ bhatodhiaga ka kigambo ndia abhi̱ ka bbaluwa yoho ndia abhu̱si̱ki̱saku̱ bhai̱ki̱li̱za mani̱. 33Tolo mamadha ndia akoliabe, nibhaki̱mei̱sa toli̱ bhai̱ki̱li̱za nibhakibhulaka na nki̱sa sa dudhukana si̱ki̱abho ka bhenjo ndibha yabhabhu̱ti̱ki̱o. 34Toli̱ Silasi naki̱ti̱gaku̱.#15:34 Kitabo ndietolo kali na nkala yoho. 35Paulo na Balanaba nibhaki̱ti̱ga ka Anti̱oki̱ya na bhakpa ndibhetolo kindia bhatebeza na egesa kigambo ndia Sali̱a Yesu.

Paulo na Balanaba nibhakitukanabe

36Tolo nalakoli̱be, Paulo nakingia Balanaba bhiyo; “Odhuwe ki̱si̱ki̱eku̱ kibhumamikiliane bhai̱ki̱li̱za ka tau̱ni̱ poni kindie kitebeza kigambo ndia Sali̱a ki̱zi̱be nesi̱ bhaliyo ka hi̱ki̱li̱za ndiabho.” 37Balanaba nakikabha eti bhai̱ye na Yohana Maliko, 38no Paulo katangia nibhagbokiliani̱ i̱ya na Yohana Maliko nanga abhutetililia ka Panfi̱li̱ya ndia bhakadhakimbe mulimo ndiabho. 39Nibhakitandika tongana si̱ni̱ ndia adhuwa nibhakitukanabe. Balanaba naki̱ya na Yohana Maliko nibhakidhaya meli̱ yabho ka Ki̱pu̱lo, 40no Paulo naki̱ya na Silasi, bhai̱ki̱li̱za nibhakibhusabilia kobhu̱ ndia Sali̱a Yesu bha nabho ka gendo ndiabho. 41Atomba ka Si̱li̱ya na Ki̱li̱ki̱ya nalia ki̱bhu̱si̱ki̱saku̱ bhai̱ki̱li̱za mani̱.

Currently Selected:

Bikoluwa ndia Bhakwenda 15: KWAMBA

Highlight

Copy