पेरेरित 7
7
पन्चायतम इस्तिफनक भासन
1तब सभेस बर्कि पुजारिले इस्तिफनका पुछल्के, “एकर्स्या जुन आरोप तोरा लगाइल छो उ साँच्चेक स्यो?”
2इस्तिफनले जबाफ देति एनामे कहल्के, “गे हम्र बाप आ दाजुभाइसब, हम्र कहल बात सुन्। आपन्सिक पुर्खा अब्राहाम हारान देसम रहस अगा मेसोपोटामिया देसम रहत छलो। ओहेलग महिमाक पर्मेसोर ओक्रलग देखा परिक#उत्पति १२:१ 3एनामे कहल्के, ‘तुइं आप्न देस आ आप्न मानुकसिका छोरिक निकल। अनि हम तोरा जुन देस देखाइबो ओहे देसम जो।’ 4ओहेस अब्राहाम कल्दि कहलाहार ठावस निक्लिक हारान देसम आइक रहले। अनि ओक्र बाप मोर्ले त पर्मेसोरले ओक्रा ओइ देसस यि देसम आनल्को, जत अखन तोर्स्या रहछ।#उत्पति ११:३१; उत्पति १२:४ 5ओक्रा यि देसम जग्गा-जमिन त बर्कि दुरिक बात स्यो, एगो टाङ राख्लाहार पनि ठाउँ देल नाइ छले। तैयो पर्मेसोरले यि देस तोर सन्तानसिका देबो कहिक अब्राहामका बाचा करल्के। पर्मेसोरले बाचा कर्ल समै तलिक अब्राहामका एकोगो सन्तान नाइ छले।#उत्पति १२:७; १३:१५; १५:१८; १७:८ 6पर्मेसोरले अब्राहामका आरो एनामे कहल छले, ‘तोर सन्तानसिका दस्रो देसम जाइक रह पर्तो। अनि ओइ देसक मानुकस्या तोर सन्तानसिका नोकर बनाइक चार सइ बरिस तलिक थुप्रे सताइतो।#उत्पति १५:१३-१४ 7तर तोर सन्तानसिका नोकर बनाइक सताइलाहार मानुकसिका हम सजाए देबो। अनि तोर सन्तानस्या ओइ देसस एहे ठावम आइक हम्र सेबा कर्तो।’#प्रस्थान ३:१२ 8तब पर्मेसोरले अब्राहामसङ बाचा बाह्नल्के आ ओक्र चिनहक रुपम खत्ना कर्लाहार नियम देल्के। ओहेस जब अब्राहामक बेटा इस्हाकक जनम भेले त आठ दिनम ओक्र खत्ना करल्के। अनि इस्हाकले आप्न बेटा याकुबक खत्ना करल्के आ याकुबले पनि आप्न बार्होगो बेटासिक खत्ना करल्के। एकर्स्याहि आपन्सिक बार कुलक पुर्खासब स्यो।#उत्पति १७:१०-१४; उत्पति २१:२-४; उत्पति २५:२६; उत्पति २९:३१; ३५:१८
9“आपन्सिक पुर्खास्या आप्न भाइ योसेफसङ रिसिबि करिक मिस्र देसम ओक्रा बेचि देल्को। तर पर्मेसोर ओक्रसङ छले।#उत्पति ३७:११; उत्पति ३७:२८; उत्पति ३९:२-२१ 10ओहेस पर्मेसोरले योसेफका सभे दुखस छुट्करा दैक मिस्र देसक रजा फारोक नजरम एक्दम बुद्धिमान बनाइल्के। एहे कारन मिस्र देसक रजा फारोले आप्न पुरा देस आ राजमहलक हाकिम योसेफका बनाइल्के।#उत्पति ४१:३९-४१ 11ओहे समैम पुरा मिस्र देस आ आपन्सिक पुर्खासब रहलाहार यि कनान देसम पनि बर्कि अनिकाल पर्ले। एहे कारनस आपन्सिक पुर्खासिका खाइ-पिय लागि एक्दम मस्किल भेले।#उत्पति ४२:१-२ 12तर जब याकुबले मिस्र देसम अन छो कहिक सुनल्के त ओइले आप्न बेटासिका अन किन लागि ओत पठाइल्के। ओकर्स्या अग्ला बाजि ओत गेल छले। 13अनि दस्रो बाजि ओकर्स्या अन किन ओत गेले त योसेफले आप्न दाजुभाइसिका आप्न परिचय देल्के। एनामे फारोका पनि योसेफक परिबारक बारेम थाहा भेले।#उत्पति ४५:१; उत्पति ४५:१६ 14तब योसेफले आप्न बाप याकुब आ ओक्र परिबारम भेल सभेका मिस्र देसम बलाइल्के। ओकर्स्या जम्मा पचहतर जना छले।#उत्पति ४५:९-१०; ४५:१७-१८; उत्पति ४६:२७ 15ओहेस याकुब मिस्र देस गेले आ ओहे देसम मोर्ले। अनि आपन्सिक पुर्खासब पनि ओहेलग मोर्लो।#उत्पति ४६:१-७; उत्पति ४९:३३ 16पछास ओकर्सिक लासका सेकेम कहलाहार ठावम लगाइक गारल्के। उ जमिन अब्राहामले हमोरक बेटासिलगस किन्ल छले।#उत्पति २३:३-१६; ३३:१९; ५०:७-१३; यहोसु २४:३२
17“तर जब पर्मेसोरले अब्राहामसङ कर्ल बाचा पुरा भेल्हार समै लक्चाइले त ओकर्स्या झन-झन मिस्र देसम थुप्रे हब्ति गेले। 18ओहे समैम मिस्र देसम एक जना लया रजा एले, जक्रा योसेफक बारेम कथ्यो थाहा नाइ छले। 19ओइले आपन्सिक पुर्खासिका धोखा दैक एतेक सताइल्को कि इस्राएलिसिक भर्खर जनम भेल बच्चासब मोरुस कहिक बाहारम फेक लगाबेक। 20ओहे समैम मोसाक जनम भेले। उ पर्मेसोरक नजरम एक्दम छग्बर छले। ओक्रा तिन महिना तलिक बाप-मतारले घरेम घुसारिक ओक्र देख्भाल करल्के। 21तर जब ओक्रा घुसारिक राख नाइ सकल्के त बाहारम लगाइक राखि देल्के। अनि फारोक बेटिले ओक्रा भेटाइक लगाइल्के आ आप्ने बेटा बनाइक पालल्के। 22एनामे मोसाले मिस्र देसक सभे ग्यान-बुद्धिक सिछ्या पाइक बात-चित आ काम कर लागि एक्दम सक्तिसालि भेले।
23“तर जब मोसा चालिस बरिसक भेले त ओइले आप्न इस्राएलि दाजुभाइसिका भेट्लाहार बिचार करल्के। 24एक दिन् एक जना मिस्रिले एक जना इस्राएलिका पिट्त देखिक मोसाले इस्राएलिका बचाइल्के। अनि पिट्लाहार मिस्रिका चाहिं मारिक ओक्र बद्ला लेल्के। 25पर्मेसोरले मोसाक मार्फत इस्राएलिसिका छुट्करा देल्हार बात ओकर्स्या बुझुस कहिक मोसाले सोच्ल छले तर ओकर्स्या बुझ नाइ सकल्के। 26ओक्र दस्रो दिन् दुइ जना इस्राएलिका आप्ने-आप्नेम झग्रा कर्ल देखिक मोसाले ओकर्सिका मिलाइलाहार कोसिस करिक एनामे कहल्के, ‘ए भाइसब, तोर्स्या त आप्ने मानुकस्या, तैयो किर आपसम झग्रा कर्छ?’ 27तर जुन मानुकले आप्न परोसिका हेपिक झग्रा कर्ति छले ओइले मोसाका धकल्ति एनामे कहल्के, ‘तोरा कोन हमर्सिक हाकिम आ फैसला कर्लाहार बनाइल्को? 28कि कालु उ मिस्रिका मार्ल जक्या हम्राहु मार खोज्छ?’ 29यि बात सुनिक मोसा मिस्र देसस भागिक मिधान देसम पर्देसि भइक रह लग्ले। ओइ देसम रहत खुमा ओक्रा दुइगो बेटासब भेले।
30“जब चालिस बरिस बित्ले त सिनै पाहारक उजाड ठावम जिगिरहल झाङिक आगिम एक जना सोर्गदुत मोसालग देखा पर्ले। 31जब मोसाले यि देखल्के त उ छक पर्ले। अनि अस्लिमे देख लागि लगम गेले त परमप्रभुले एनामे कहल अबाज ओइले सुनल्के, 32‘हम तोर पुर्खा अब्राहाम, इस्हाक आ याकुबक पर्मेसोर स्यो।’ यि बात सुनिक मोसा लद-लद काँप लग्ले आ ओइभर ताक लागि पनि हिम्मत नाइ करल्के। 33तब परमप्रभुले मोसाका कहल्के, ‘तोर टाङक जुत्ता खुजाल किरकि जुन ठावम तुइं ठेर्याइल स्या उ पबित्र छो। 34मिस्र देसम रहल हम्र पर्जाक दुख हम साँच्चेक देख्ल स्यो। अनि ओकर्सिक कान्ल आ पुकार पनि हम सुन्ल स्यो। ओहेस हम ओकर्सिका छुट्करा दिअ लागि तर् आइल स्यो। यि कामक लागि आब् हम तोरा मिस्र देस पठाइबो।’
35“जुन मोसाका ओक्र आप्ने मानुकस्या ‘तोरा कोन हमर्सिक हाकिम आ फैसला कर्लाहार बनाइल्को?’ कहिक इन्कार कर्ल छलो, ओक्राहि पर्मेसोरले जिगिरहल झाङिम देखा पर्ल सोर्गदुतक मार्फत हाकिम आ फैसला कर्लाहार बनाइक पठाइल्को। 36ओहे मोसाले मिस्र देसम, लाल समुन्द्रम आ उजाड ठावम चालिस बरिस तलिक थुप्रे अचम्मक कामसब करिक इस्राएलिसिका मिस्र देसस बाहार निकालिक आनल्को। 37ओहे मोसाले इस्राएलिसिका एनामे कहल छलो, ‘पर्मेसोरले तोर्सिएक दाजुभाइक बिचस हम्रे जक्या एक जना अगमबक्ताका तोर्सिलग पठाइ देतो।’ 38ओहे मोसा इस्राएलिसब उजाड ठावम धेर्याइत खुमा ओइलग छलो। अनि सोर्गदुत ओहे मोसा आ आपन्सिक पुर्खासिसङ सिनै पाहारम बजोक। ओहेले सोर्गदुतक मार्फत जिबन देल्हार बचन पाइक आपन्सिक पुर्खासिका देल्को अनि आपन्स्या पाइल स्या।
39“तर आपन्सिक पुर्खास्या ओक्र कहल बात नाइ मानल्को। ओकर्स्या मोसाका इन्कार करिक फेरि मिस्र देस घुमिक जाइ खोजेक। 40ओहेस ओकर्स्या मोसाक दाजु हारुनका एनामे कहल्के, ‘हमर्सिक लागि पैरा देखाइलाहार देब्तासब बनाइदे किरकि हमर्सिका मिस्र देसस निकालिक आन्लाहार मोसाका कथि भेलो हमर्सिका थाहा नाइ छो?’ 41ओहेस ओकर्स्या एगो बछाक मुर्ति बनाइक उ मुर्तिक अगाम बलि चर्हाइल्को आ आप्ने हाथस बनाइल मुर्तिक लागि खुसि मनाइल्को। 42एहे कारन पर्मेसोरले ओकर्सिभरस आप्न मुह् घुमाइक ओकर्सिका अकासक तरासिक पुजा कर लागि छोरि देल्को।
ओक्र बारेम अगमबक्तासिक कितापम पनि एनामे निख्ल छो,
‘ए इस्राएलक मानुकसब, तोर्स्या चालिस बरिस तलिक
जुन बलि उजाड ठावम चर्हाइल उ हम्र लागि नाइ छलो।
43तोर्स्या त मोलेख देब्ताक पाल,
आ रेफन देब्ताक तरासिक मुर्तिका बोकिक लगाइल।
जुन मुर्तिसब तोर्स्या पुजा कर लागि बनाइल छल।
एहे कारन हम तोर्सिका बेबिलोन देसस पनि बर्कि दुरि भगाइ देबो।’
44“उजाड ठावम आपन्सिक पुर्खासिसङ पर्मेसोरक भक्ति कर्लाहार पाल छलो। उ पाल पर्मेसोरले मोसाका देखाइल नमुना अन्सार बनाइल छलो। 45ओहे पालका आपन्सिक पुर्खास्या यहोसुक अगुवाइम यि देसम आनल्को। यि देस अगा दस्रो जातक मानुकसिक हाथम छलो तर पर्मेसोरले ओकर्सिका यि देसस भगाइक आपन्सिक पुर्खासिका देल्को। उजुमास लइक दाउदक समै तलिक उ पाल ओकर्सिसङ छलो। 46रजा दाउदले पर्मेसोरक दया पाइल कारनस ओइले याकुबक पर्मेसोरक लागि एगो मन्दिर बनाइलाहार अनुमति माङल्के। 47तर पर्मेसोरक लागि मन्दिर ओक्र बेटा सुलेमानले बनाइल्को।
48“तर हाथस बनाइल मन्दिरसिम माहान पर्मेसोर नाइ रहछो। एक्र बारेम अगमबक्तास्या पनि एनामे कहल छो,
49‘पर्मेसोरले कहछो, सोर्ग हम्र राजगद्दि स्यो,
आ पिर्थिबि चाहिं हम्र टाङ राख्लाहार पिर्ह्या स्यो।
तोर्स्या हम्र लागि केहेन खालक मन्दिर बनाइब?
आ हम्र जिराइलाहार ठाउँ कत छो?
50कथि यि सभे चिज हमि बनाइल नाइ स्यो झन?’
51“ए अटेरि मानुकसब, कठोर मन आ पर्मेसोरक बचन सुन नाइ चाहिलाहार मानुकसब, तोर्स्या सब्दिन पबित्र आत्माक बिरोध कर्छ। जेनामे तोर्सिक पुर्खास्या करोक ओनाहिमे तोर्स्याहु कर्छ। 52तोर्सिक पुर्खास्या कुन अगमबक्ताका नाइ सताइल्को? ओकर्स्या उ अगमबक्तासिका पनि मारल्को जकर्स्या अगाहि पर्मेसोरक धर्मि सेबक आब्ति छो कहिक खबर सुनाइल छलो। अनि तोर्स्या चाहिं ओहे धर्मि सेबकका धोखा दैक पक्राइक मार्ल। 53तोर्स्या सोर्गदुतक मार्फत पर्मेसोरक धार्मिक नियम त पाइल तर ओक्र पालन नाइ कर्ल।”
इस्तिफनका मार्ल
54इस्तिफनक बात सुनिक पन्चायतम आइल सभे मानुकसब पिटस खम-खम भइक दाँतका कट्कटाब लग्ले। 55तर इस्तिफनले पबित्र आत्मास भोरिक सोर्गभर ताकल्के त पर्मेसोरक महिमा आ येसुका पर्मेसोरक दहिना काटम ठेर्याइल देखिक 56एनामे कहल्के, “देख्, हम सोर्ग खुजल्ल आ मानुकक बेटाका पर्मेसोरक दहिना काटम ठेर्याइल देख्ति स्यो।”
57यि बात सुन्ति बितिन ओकर्स्या कस्याइक चिच्याइले आ आप्न-आप्न कानसब मुनिक इस्तिफनका पिट लागि झप्टल्के। 58अनि ओकर्स्या इस्तिफनका घिस्याइति सहरस बाहार निकालल्के आ पाखनस मार लग्ले। उजुमा गबाहस्या आप्न कप्रासब साउल कहलाहार छउँराका ओग्र लगाइल छले। 59ओकर्स्या पाख्नस मार्त खुमा इस्तिफनले एनामे पर्थना करल्के, “हे प्रभु येसु, हम्र आत्माका सुइकार कर्।” 60तब इस्तिफनले ठेउन्या मारिक कस्याइक एनामे कहल्के, “हे प्रभु, यि पापक दोस एकर्सिका नाइ लगुस।” एतेक कहिक ओक्र परान गेले।
Currently Selected:
पेरेरित 7: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
