पेरेरित 6
6
सात जना मानुकसिका छान्ल
1ओइ समैम जब प्रभु येसुका बिस्वास कर्लाहार मानुकसब बह्र्ति गेले त हिब्रु भसा बज्लाहार यहुदिसिक बिरोधम गिरिक भसा बज्लाहार यहुदिस्या गन-गन कर लग्ले। किरकि सब्दिन खाइलाहार चिज बाँट्त खुमा हमर्सिक बिध्वासिका वास्ता नाइ हब्छो कहिक गिरिक भसा बज्लाहार यहुदिस्या कहेक। 2एहे कारन बार्हो जना पेरेरितस्या अरु सभे चेलासिका बलाइक एनामे कहल्के, “हमर्स्या पर्मेसोरक बचन पर्चार कर छोरिक खुवाइलाहार कामम समै बिताब ठिक नाइ स्यो। 3ओहेस ए दाजुभाइ आ दिदि-बहिनसब, तोर्सिक बिचस पबित्र आत्मा आ ग्यानस भोर्ल अनि सभे मानुकसिस आदर पाइल सात जना मानुकसिका छान। हमर्स्या ओकर्सिएका यि कामक जिम्मा देबो। 4अनि हमर्स्या चाहिं पुरा समै पर्थना आ पर्मेसोरक बचन पर्चार कर्लाहार कामम लग्ल रहबो।”
5पेरेरितसिक यि बात सभेका मन पर्ले। ओहेस ओकर्स्या बिस्वास आ पबित्र आत्मास भोर्ल इस्तिफन, फिलिप, पर्खरस, निक्नोर, तिमोथि, पर्मिनास आ यहुदि धर्मका अगा बिस्वास कर्ल एन्टिओखिया सहरक निकोलाउसका छानल्के। 6तब ओकर्स्या उ सात जनाका पेरेरितसिक अगाम आनल्के। अनि पेरेरितस्या पर्थना करिक ओकर्सिक उप्रिम आप्न हाथ राखल्के।
7एनामे पर्मेसोरक बचन फैलति गेले आ यरुसलेमम बिस्वासिसब झन-झन बह्र्ति गेले। अनि थुप्रे यहुदि पुजारिस्या पनि प्रभु येसुका बिस्वास करल्के।
इस्तिफन पक्राउ पर्ल
8इस्तिफनले पर्मेसोरस थुप्रे आसिक आ सक्ति पाइक मानुकसिक अगाम बर्कि-बर्कि अचम्मक काम आ चिनहसब देखाबेक। 9तर कुन्हुँ-कुन्हुँ बन्धनस छुट्करा कहलाहार सभाघरक मानुकस्या चाहिं इस्तिफनक बिरोध करिक बाद-बिबाद कर लग्ले। ओकर्स्या कुरेनि, अलेक्जेन्डरिया, किलिकिया आ एसिया पर्देसक मानुकसब छले। 10तर पबित्र आत्माले इस्तिफनका बज लागि एहेन बुद्धि देल्के कि ओक्र अगाम कुन्हुँ टिक नाइ सक्ले। 11ओहेस ओकर्स्या सुटुक्के मानुकसिका उक्साइक एनामे कह लगाइल्के, “हमर्स्या एक्रा मोसा आ पर्मेसोरक बिरोधम नाइ अस्लि बातसब कहत सुन्ल्यो।” 12एनामे ओकर्स्या ओइलगक मानुक, अगुवा आ धर्मगुरुसिका उक्साइक इस्तिफनका पक्रल्के आ बर्कि पन्चायतक अगाम लगाइल्के। 13तब ओकर्स्या झुठा गबाहसिका आनिक एनामे कह लगाइल्के, “यि मानुकले जह्या पनि पबित्र मन्दिर आ धार्मिक नियमक बिरोधम बज्ति रहछो। 14किरकि हमर्स्या एक्रा एनामे कहत सुन्ल्यो, नासरतक येसुले यि मन्दिरका भर्काइ देतो आ मोसाले सिखाइल चाल-चलन पनि बद्लि देतो।” 15अनि जब बर्कि पन्चायतम आइल मानुकस्या इस्तिफनका एकहोरो ताकल्के त ओक्र अनुहार सोर्गदुतक जक्या देखल्के।
Currently Selected:
पेरेरित 6: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
