पेरेरित 5
5
हननिया आ सफिरा
1तर हननिया कहलाहार एक जना मानुक आ ओक्र बहु सफिराले चाहिं आप्न कनेक सना जमिन बेचल्के, 2आ दुनु जनाले सल्लाहा करिक उ जमिनक कनेक सना ढेवा आप्नेसङ राखल्के। अनि बाँकि ढेवा चाहिं पेरेरितसिका लगाइक देल्के। 3तर पत्रुसले ओक्रा कहल्के, “ए हननिया, तुइं किर सैतानका आप्न मनम अधिकार कर दैक पबित्र आत्माका ठक्छ? जमिन बेच्ल कनेक सना ढेवा आप्नेसङ राखिक एत्के स्यो कहिक किर ठक्छ? 4उ जमिन बेचस अगा तोरे नाइ छलो झन? अनि बेचि सक्ल तैयो उ जमिनक सभे ढेवा तोरे अधिकारम नाइ छलो झन? एहेन काम कर्लाहार सोच् तोर मनम केनामे एलो? तुइं मानुकसिका नाइ तर पर्मेसोरका ठक्ल स्या।” 5यि बात सुन्ति बितिन हननिया धर्तिम ढल्ले आ मोर्ले। यि बात सुन्लाहार सभेक मनम डर ढुक्ले। 6तब जबान मानुकसब आइक लासका नुङाम सेंरल्के आ बाहार लगाइक गारि देल्के।
7ओक्र तिन घन्टा पछास हननियाक बहु भित्रि एले। तर ओक्रा आप्न साइं मोर्ल थाहा नाइ छले। 8तब पत्रुसले ओक्रा पुछल्के, “तुइं हम्रा कह त तोर्स्या उ जमिन एत्के ढेवाम बेच्ल छल?”
ओइले उत्तर देल्के, “हँ, एत्केम बेच्ल छल्यो।”
9तर पत्रुसले ओक्रा कहल्के, “तोर्स्या केनामे प्रभुक आत्माका छल कर लागि सहमत भेल? देख्, तोर साइंका गार्लाहार मानुकसब भर्खर मुह्राम पुग्ल छो। ओकर्स्या तोराहु बोकिक लगाइतो।” 10ओहे जुमा उ पत्रुसक टाङलग ढलिक मोर्ले। अनि उ जबान मानुकसब भित्रि एले त ओक्रा मोर्ल देखिक ओक्र लासका बोकिक लगाइल्के आ ओक्रे साइंक काटेम गारि देल्के। 11यि घट्नाक कारनस मन्डलिक बिस्वासिसब आ सुन्लाहार सभे मानुकसब एक्दम डेराइले।
पेरेरितस्या थुप्रे बिरामिसिका अस्लि कर्ल
12पछास पेरेरितसिक हाथस थुप्रे अचम्मक काम आ चिनहसब मानुकसिक बिचम हब लग्ले। प्रभु येसुका बिस्वास कर्लाहार सभे जना मन्दिरक सुलेमान कहलाहार दुहारिम एके मनक भइक धेर्याबेक। 13तर बिस्वास नाइ कर्लाहार मानुकसिका चाहिं ओकर्सिक समुहम मिल्लाहार पनि हिम्मत नाइ हबेक। तैयो मानुकस्या ओकर्सिका एक्दम इज्जत करेक। 14अनि प्रभु येसुका बिस्वास कर्लाहार जनि आ मरदसब झन-झन थपाइति गेले। 15पेरेरितस्या कर्ल अचम्मक काम देखिक थुप्रे मानुकस्या बिरामिसिका पैरा-पैराम आनेक आ पत्रुस आब्त खुमा ओक्र छाहा परुस कहिक बिछोनासिम सुताइ दिएक। 16यरुसलेम आस्पासक सहरस पनि थुप्रे मानुकस्या बिरामि आ भुत लग्ल मानुकसिका आनेक अनि ओकर्स्या सभे अस्लि हबेक।
पेरेरितसिका सताइल
17यि देखिक सभेस बर्कि पुजारि आ ओक्र सदुकि सङ्स्या डाहा करिक पेरेरितसिक बिरोध कर लग्ले। 18ओहेस ओकर्स्या पेरेरितसिका पक्रिक जेलम घालि देल्के। 19तर राति खुमा प्रभुक एक जना सोर्गदुतले जेलक केबारिका खुजालिक ओकर्सिका बाहार आनल्के आ एनामे कहल्के, 20“तोर्स्या जो आ मन्दिरम ठेर्याइक यि लया जिबनक बारेम सभेका सुना।” 21ओहेस ओकर्स्या बिहानि मन्दिर गेले आ मानुकसिका सिछ्या दिअ लग्ले। तर सभेस बर्कि पुजारि आ ओक्र सङस्या चाहिं इस्राएलिसिक सभे अगुवासिका बलाइक बर्कि पन्चायत राखल्के। अनि पेरेरितसिका जेलस आन लागि सिपाहिसिका पठाइल्के।
22तर सिपाहिस्या जेलम आइक ताकल्के त पेरेरितसब जेलम नाइ छले। ओहेस ओकर्स्या घुमिक एले आ एनामे कहल्के, 23“हमर्स्या ओत पुग्ल्यो त जेलम अस्लिमे तला लगाइल देख्ल्यो। अनि सिपाहिसब पनि मुह्राइम ठेर्याइल छलो। तर केबारिका खुजालिक ताकल्यो त भित्रिम कुन्हुँ नाइ छलो!” 24जब यि बात मन्दिरक कप्तान आ मुल पुजारिस्या सुनल्के त ओकर्स्या पेरेरितसिका कथि भेलो कहिक चिन्ताम पर्ले। 25ओहे जुमा एक जना मानुक आइक ओकर्सिका एनामे खबर देल्के, “तोर्स्या जुन मानुकसिका जेलम बन् कर्ल छल, ओकर्स्या त मन्दिरम मानुकसिका सिछ्या देति छो।” 26तब मन्दिरक कप्तान सिपाहिसिसङ पेरेरितसिका लिअ गेले आ बिना जबरजस्ति करिक लइक एले किरकि मानुकस्या पाखनस मार्तो कि कहिक ओकर्स्या डेराइले।
27अनि ओकर्स्या पेरेरितसिका आनिक बर्कि पन्चायतक अगाम ठेर्याब लगाइल्के आ सभेस बर्कि पुजारिले ओकर्सिका एनामे कहल्के, 28“हमर्स्या अगाहि तोर्सिका कहल छल्यो कि येसुक नामम कथ्यो सिछ्या नाइ धिह्य कहिक तर तोर्स्या त आप्न सिछ्यास पुरा यरुसलेम भोरि सक्ल आ ओक्र हत्याक दोस पनि हमर्सिक उप्रिम लगाब खोज्छ।”#मत्ति २७:२५
29तर पत्रुस आ अरु पेरेरितस्या एनामे जबाफ देल्के, “हमर्स्या मानुकसिक बातस बेसि पर्मेसोरले कहल बातका पालन कर पर्तो। 30तोर्स्या येसुका कुरुसम#5:30 कुरुस: यि पदम गिरिक भसाम काठ आ गाछम कहिक जनाइल छो। लट्काइक मार्ल तर हमर्सिक पुर्खाक पर्मेसोरले ओक्रा फेरि जिउँत करल्को। 31अनि इस्राएलिस्या पस्चताप करिक पापक छेमा पाउस कहिक पर्मेसोरले येसुका रजा आ मुक्ति देल्हार बनाइक आप्न दहिना काटम बेठाइल छो। 32यि सभे बातक हमर्स्या गबाह स्यो आ पर्मेसोरले आप्न आग्या पालन कर्लाहार्सिका देल पबित्र आत्माले पनि गबाहि देछो।”
33यि बात सुनिक पन्चायतम आइल सभे मानुकसब पिटस खम-खम भइक पेरेरितसिका मार खोजल्के। 34तर एक जना गम्लिएल कहलाहार फरिसि दलक धर्मगुरु जक्रा सभेले इज्जत करेक। उ पन्चायतक बिचम ठेर्याइले आ एक घरियाक लागि पेरेरितसिका पन्चायतस बाहार पठाइल्के। 35अनि ओइ पन्चायतम आइल मानुकसिका एनामे कहल्के, “ए इस्राएलक मानुकसब, तोर्स्या यि मानुकसिका जे कर खोज्ल स्या ओइम होसियार रह। 36किरकि आजुस भले बरिस अगा एक जना थुदास कहलाहारले पनि हमु कथ्यो स्यो कहिक दाबि कर्ल छलो। ओक्राहु लग्भग चार सइ मानुकले पछ्याइल छलो। तर ओक्रा मारल्को त ओक्रा पछ्याइलाहारसब पनि छिरोबित भइक ओराइलो। 37ओक्र पछास मानुकसिक गन्तिक समैम गालिलक यहुदा कहलाहार एलो। ओहोले थुप्रे मानुकसिका आप्नभर कर्ल छलो। तर ओक्राहु मारल्को त ओक्रा पछ्याइलाहार मानुकसब पनि छिरोबित भेलो। 38ओहेस अखन्क घट्नाक बारेम हम तोर्सिका यि सल्लाह देस्यो। एकर्सिका छोरि धि आ एकर्सिस बर्कि दुरि रह किरकि यि योजना आ काम मानुकसिक रहतो त एकर्स्या आप्नि ओराइक जेतो। 39तर यि योजना पर्मेसोरक रहतो त तोर्स्या रोक नाइ सक्ब। नत्रे त तोर्स्या पर्मेसोरक बिरोध कर्ल ठहर्ब।”
40तब ओकर्स्या पेरेरितसिका भित्रि बलाइक पिट लगाइल्के आ “येसुक बारेम कह्याहु पर्चार नाइ कर्ह्य” कहिक छोरि देल्के। 41तब पेरेरितसब पन्चायतस निक्लिक बाहार गेले आ येसुक नामम अप्मान सहलाहार लायकक भेल्यो कहिक एक्दम खुसि भेले। 42ओक्र पछास सब्दिन ओकर्स्या मन्दिर आ मानुकसिक घर-घरम जाइक येसुवे मुक्ति देल्हार खिरिस्ट स्यो कहिक सिखाब आ पर्चार कर लग्ले।
Currently Selected:
पेरेरित 5: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
