पेरेरित 12
12
पत्रुस जेलम पर्ल
1ओहे समैम रजा हेरोदले मन्डलिक कुन्हुँ-कुन्हुँ बिस्वासिसिका पक्रिक एक्दम सताब लग्ले। 2ओइले युहन्नाक दाजु याकुबका पनि तर्बारस मार लगाइल्के। 3यि कामस यहुदिसब खुसि भेल देखिक ओइले पत्रुसका पनि पक्र लगाइल्के। यि घट्ना खमिर नाइ घाल्ल रोटि खाइलाहार पब्निक समैम भेल छले। 4हेरोदले पत्रुसका पक्रिक जेलम घालल्के आ सिपाहिसिक चार-चार जनाक चारगो समुह बनाइक ओग्र लागि राखल्के। हेरोदले निस्तार पब्निक पछा पत्रुसका यहुदिसिक अगाम लगाइलाहार बिचार करिक ओना कर्ल छले।#प्रस्थान १२:१-२७ 5एनामे पत्रुसका जेलम राखल्के तर मन्डलिक सभे मानुकस्या ओक्र लागि एके मनक भइक पर्मेसोरका पर्थना कर्ति छले।
पत्रुस जेलस छुट्ल
6हेरोदले मानुकसिक अगाम पत्रुसका लगाब खोज्ल दिनक अग्ला रात पत्रुस दुइ जना सिपाहिसिक बिचम सुत्ल छले। ओक्रा दुइगो जिजिरस बाह्न्ल छले। अनि अरु सिपाहिसब चाहिं जेलक मुह्राम चौकन्ना भइक बेठ्ल छले। 7ओहे जुमा प्रभुक एगो सोर्गदुत अन्चकिएम ओइलग देखा पर्ले आ जेलक कोठाम इजोत चम्कले। अनि सोर्गदुतले पत्रुसका कान्हँम घच्घचाइति “ए पत्रुस, झप्सिन उठ्” कहिक ओक्रा जगाइल्के। अनि ओक्र हाथका बाह्न्ल जिजिरसब खुजल्ले। 8तब सोर्गदुतले पत्रुसका कहल्के, “झप्सिन कप्रा आ जुत्ता पिन।” अनि पत्रुसले ओनाहिमे करल्के। पछास सोर्गदुतले फेरि पत्रुसका कहल्के, “होर्नि होरिक हम्र पछा-पछा या।” 9ओहेस पत्रुस सोर्गदुतक पछा-पछा जेलस बाहार गेले। तर सोर्गदुतले कर्ल यि काम साँच्चेक स्यो कहिक ओक्रा थाहे नाइ छले किरकि ओइले हम त सप्ना देख्ति स्यो कहिक सोच्ल छले। 10जब ओकर्स्या अग्ला आ दस्रो ओगर्लाहार सिपाहिसिक समुहका नाङ्हिंक सहरम ढुक्लाहार फलामक केबारिलग पुग्ले त उ केबारि आप्नि ओकर्सिक लागि खुजल्ले। अनि ओकर्स्या बाहार निक्लिक एगो गल्लिबाक जाइत खुमा उ सोर्गदुतले पत्रुसका छोरिक गेले।
11तब पत्रुसक होस खुजल्ले आ एनामे कहल्के, “आब् हम्रा साँच्चेक थाहा भेलो कि प्रभुले आप्न सोर्गदुतका पठाइक हम्रा हेरोदक हाथस आ यहुदिस्या हम्रसङ जे कर खोज्ल छलो उ सभेस छुट्करा देल छो।”
12पत्रुसले यि बात थाहा पाइति बितिन उ मर्कुस कहलाहार युहन्नाक मतार मरियमक घरम गेले। ओइलग थुप्रे मानुकसब धेर्याइक पर्थना कर्ति छले। 13अनि पत्रुसले केबारि ढक्ढकाइल्के त रोदा कहलाहार एक जना नोकर्नि केबारि खुजाल एले। 14तर ओइले पत्रुसक सोर चिन्हिंक खुसि भइक केबारिए नाइ खुजालिक दोग्ति भित्रि गेले आ “पत्रुस त मुह्राहिम ठेर्याइल छो” कहिक कहल्के। 15यि बात सुनिक ओकर्स्या रोदाका कहल्के, “तुइं बौलाहिल कि कथि?” तर रोदाले साँच्चेक स्यो कहिक झन जिद्दि कर्ति कहल्के। ओहेस ओकर्स्या जबाफ देल्के, “उ पत्रुसका सहयोग कर्लाहार सोर्गदुत रहतो।”
16तर पत्रुसले चाहिं केबारिका ढक्ढकाइति रहले। अनि ओकर्स्या केबारि खुजालल्के त पत्रुसका देखिक छक पर्ले। 17तब पत्रुसले हाथस इसारा करिक ओकर्सिका चुप कराइल्के आ पर्मेसोरले केनामे ओक्रा जेलस बाहार निकालल्के उ सभे बातसब ओकर्सिका सुनाइल्के। अनि यि बात याकुब आ अरु बिस्वासिसिका पनि सुनाह्य कहिक ओइलगस दस्रो ठावम गेले।
18जब बिहान भेले त पत्रुसका कथि भेलो कहिक ओघर्लाहार सिपाहिसिक बिचम बर्कि खैला-बैला भेले। 19हेरोदले सभे ठावम पत्रुसका खोज लगाइल्के तर कतु नाइ भेटाइल्के त सिपाहिसिक जाँच् करिक ओकर्सिका फाँसिक सजाए देल्के। यि घट्नाक पछा रजा हेरोदले यहुदिया पर्देसका छोरिक कैसरिया सहर गेले आ ओहेलग रह लग्ले।
हेरोद मोर्ल
20ओहे समैम रजा हेरोद टुरोस आ सिदोन सहरक मानुकसिसङ एक्दम पिटाइल छले। ओहेस दुनुगो सहरक मानुकस्या मिलिक बलस्तस कहलाहार हेरोदक इमान्दार सेबकका खुसामत करिक हेरोदसङ मिलाप कर लागि बिन्ति करल्के। किरकि ओकर्स्या रजा हेरोदेक पर्देसस खाइलाहार चिजसब लगाबेक।
21जब उ दुइगो सहरक मानुकसिसङ बात-चित कर लागि तोक्ल दिन् एले त हेरोदले रजाक पिन्लाहर पोसाक पिन्हिंक राजगद्दिम बेठ्ले आ ओकर्सिक अगाम भासन कर लग्ले। 22ओक्र भासन सुनिक मानुकस्या चिच्याइति एनामे कह लग्ले, “यि त मानुकक बोलि नाइ स्यो तर पर्मेसोरक बोलि स्यो।” 23हेरोदले पर्मेसोरका आदर नाइ देल कारनस ओहे जुमा प्रभुक एगो सोर्गदुतले ओक्रा बर्कि बिरामिस थला पारल्के अनि उ स्याउँ-स्याउँ पिल्वा फरिक मोर्ले।
24तर पर्मेसोरक बचन झन-झन फैलति गेले आ बिस्वासिसब पनि बह्र्ति गेले।
25जब बर्नबास आ साउलले आप्न काम पुरा करि सकल्के त ओकर्स्या मर्कुस कहलाहार युहन्नाका पनि सङि लइक यरुसलेम सहरस घुम्ले।
Currently Selected:
पेरेरित 12: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
