पेरेरित 10
10
कर्नेलियसले पत्रुसका बलाब पठाइल
1कैसरिया सहरम कर्नेलियस कहलाहार एक जना मानुक छले। उ रोमि सेनाक इटालि कहलाहार समुहक कप्तान छले। 2उ पर्मेसोरक भक्त छले। ओइले आ ओक्र पुरा परिबारले पर्मेसोरक डर मानेक। अनि खुसि भइक मानुकसिका दान दिएक आ पर्मेसोरका पर्थना करेक। 3एक दिन् दिनक तिन बजेभर कर्नेलियसले एगो दर्सन देखल्के। ओइ दर्सनम पर्मेसोरक सोर्गदुत आइक ओक्रा एनामे कहल्के, “ए कर्नेलिएस!”
4कर्नेलियसले डेराइति सोर्गदुतका ताकल्के आ एनामे कहल्के, “कथि कहछ प्रभु।”
तब सोर्गदुतले ओक्रा कहल्के, “तोर पर्थना आ मानुकसिका देल तोर दान पर्मेसोरले सुइकार कर्ल छो।
5“ओहेस आब् तुइं योप्पा सहरम सिमोन कहलाहार पत्रुसका बलाब लागि मानुकसब पठा। 6उ छल्लाक काम कर्लाहार सिमोनक घरम रहल छो। ओक्र घर समुन्द्रक कातेम छो।” 7जब ओक्रसङ बात कर्लाहार सोर्गदुत गेले त कर्नेलियसले आप्न दुइ जना नोकर आ एक जना ओक्र सेबा कर्लाहार भक्त सिपाहिका बलाइल्के। 8अनि ओकर्सिका सभे बातसब कहिक योप्पा सहर पठाइल्के।
9ओक्र दस्रो दिन् ओकर्स्या दिनक बार बजेभर योप्पा सहरक लगम पुग्ले। ओहे जुमा पत्रुस घरक कौसिम पर्थना कर गेले। 10पर्थना करिरहल जुमा पत्रुसका बर्कि घार भुख लगिक कथ्यो खाइ लागि मन लग्ले। तर अरु मानुकस्या खनाइ तयार कर्ति-कर्ति पत्रुसले एगो दर्सन देखल्के। 11ओइले दर्सनम सोर्ग खुजल्ल आ ओतस चारो कोनम घुरिस बाह्न्ल एगो बर्कि तन्ना जक्या चिज पिर्थिबिभर झार्त देखल्के। 12ओइ तन्नाम पिर्थिबिक सभे खालक चारगो टाङ भेल पसुसब, घिसर्लाहार जन्तु आ अकासक फुदिसब छले। 13तब पत्रुसले एना कहिक कहल एगो अबाज सुनल्के, “ए पत्रुस, आब् तुइं उठ् आ एकर्सिका मारिक खो।”
14तर पत्रुसले कहल्के, “नाइ प्रभु, हम यि सब नाइ खेबो किरकि हम कह्याहु असुद्द चिजसब खाइल नाइ स्यो।”
15पत्रुसले दस्रो बाजि पनि उ अबाज एना कहत सुनल्के, “पर्मेसोरले जुन चिजका सुद्द कर्ल छो ओक्रा तुइं असुद्द नाइ कह।” 16तिन बाजि तलिक ओनामे भेले। अनि उ तन्ना चत्दबर सोर्गभर लगाइल्के।
17जब पत्रुसले आप्न देख्ल दर्सनक अर्थ कथि हब सक्तो कहिक सोच्ति छले त कर्नेलियसले पठाइल मानुकस्या सिमोनक घरका पत्ता लगाइक ओक्र घरक मुह्राहिम आइक ठेर्याइले। 18अनि कस्याइक एनामे पुछल्के, “सिमोन कहलाहार पत्रुस अइलग छो?”
19पत्रुसले उजुमा पनि आप्न देख्ल दर्सनक बारेम सोच्ति छले। तब पबित्र आत्माले ओक्रा कहल्के, “ए सिमोन, तिन जना मानुकले तोरा खोज्ति छो। 20ओहेस आब् तुइं उठिक तर् जो आ बिना हिच्किचाइक ओकर्सिसङ जो किरकि हमि ओकर्सिका पठाइ स्यो।” 21तब पत्रुस तर् एले आ ओकर्सिका कहल्के, “तोर्स्या जक्रा खोज्ति स्या उ मानुक हमि स्यो। तोर्स्या हम्रा कह कथि कामस एत आइल स्या?”
22ओकर्स्या पत्रुसका कहल्के, “हमर्सिका रोमि कप्तान कर्नेलियसले पठाइल स्यो। उ एक्दम इमान्दार आ पर्मेसोरक डर मान्लाहार मानुक स्यो। ओक्रा सभे यहुदि जातक मानुकस्या एक्दम इज्जत कर्छो। एक दिन् ओक्रा पर्मेसोरक सोर्गदुतले दर्सन दैक तोरा आप्न घरम बलाइक पर्मेसोरक बचन सुन् कहिक आग्या देल कारनस ओइले हमर्सिका तोरा बलाब पठाइल छो।” 23तब पत्रुसले ओकर्सिका घर भित्रि बलाइक ओकर्सिक सेबा-सत्कार करल्के। उ रात ओकर्स्या ओहेलग रहले। अनि दस्रो दिन् पत्रुस आ योप्पा सहरक कुन्हुँ-कुन्हुँ बिस्वासिसब पनि ओकर्सिसङ गेले।
24ओइ सहरस गेल दस्रो दिन् ओकर्स्या कैसरिया पुग्ले। कर्नेलियसले अगाहि आप्न मानुकसब आ सङ्सिका बलाइक ओकर्सिका अस्याइल छले। 25जब पत्रुस कर्नेलियसक घरम ढुक लग्ले त कर्नेलियसले पत्रुसक टाङम गोरलागल्के। 26तर पत्रुसले ओक्रा उठाइति एनामे कहल्के, “भेलो-भेलो, एना नाइ कर् किरकि हमु त मानुक स्यो।” 27अनि पत्रुस ओक्रसङ बात कर्ति घर भित्रि ढुक्ले। ओइलग थुप्रे मानुकसब पत्रुसले धेर्याइल देखल्के। 28तब पत्रुसले ओकर्सिका कहल्के, “तोर्सिका यि थाहा छिति छो, हमर्सिक यहुदि नियम अन्सार दस्रो जातक मानुकसिसङ सङ्गत कर आ ओकर्सिक घरम जाइ हमर्सिका ठिक नाइ स्यो। तर पर्मेसोरले हम्रा कुन्हुँ मानुकका अपबित्र आ असुद्द नाइ सम्झिह्य कहिक कहल्को। 29ओहेस तुइं हम्रा बलाब पठाइति बितिन बिना अन्कनाइक तोरलग एल्यो। ले आब् कह, तुइं हम्रा किर बलाइल स्या?”
30तब कर्नेलियसले कहल्के, “यि तिन दिन् अगाक बात स्यो। जब हम दिनक तिन बजेभर घरम पर्थना कर्ति छल्यो, ओहे जुमा अन्चकिएक उज्र सेत्ते नुङा पिन्ल एक जना मानुक हम्र अगाम आइक ठेर्याइलो, 31आ एनामे कहल्को, ‘ए कर्नेलिएस, पर्मेसोरले तोर पर्थनाका सुन्ल छो आ मानुकसिका देल तोर दानका पनि सम्झल छो। 32ओहेस तुइं योप्पा सहरम सिमोन कहलाहार पत्रुसका बलाब लागि मानुकसब पठा। उ छल्लाक काम कर्लाहार सिमोनक घरम रहल छो। ओक्र घर समुन्द्रक काटम छो।’ 33ओहेस हम चट्दबर तोरा बलाब लागि मानुकसब पठाइल्यो। अनि तुइं एत आइक एक्दम अस्लि कर्ल। अखन हमर्स्या सभे जना पर्मेसोरले तोरा आग्या देल बातसब सुन लागि प्रभुक अगाम धेर्याइल स्यो।”
कर्नेलियसक घरम पत्रुसले पर्चार कर्ल
34तब पत्रुसले कहल्के, “आब् हम साँच्चेक बुझ्ल्यो कि पर्मेसोरले कक्रोसङ पक्छेपात नाइ कर्छो कहिक।#ब्यबस्था १०:१७ 35तर जुन मानुकस्या पर्मेसोरक डर मानिक ठिक काम कर्छो, ओकर्सिका मत्रे पर्मेसोरले मन पराइछो, चाहे उ कुन्हुँ जातक हउस। 36पर्मेसोरले येसुक मार्फतेस सान्ति देल्हार खुसिक खबर इस्राएलक मानुकसिलग पठाइल स्यो आ ओहे सभेक प्रभु स्यो कहिक तोर्सिका थाहे छो। 37एहे खबर युहन्नाले पर्चार कर्ल बप्तिस्माक पछा गालिल पर्देसस सुरु भइक पुरा यहुदियाभोरि फैलल बात तोर्सिका थाहे छो। 38पर्मेसोरले ओहे नासरतक येसुका पबित्र आत्मा आ सक्तिस अभिसेक करल्को। अनि येसुले भलाइक कामसब कर्ति आ भुत लगिक दुख पाइल मानुकसिका अस्लि कर्ति सभे ठावम गेलो किरकि पर्मेसोर येसुसङ छलो। 39येसुले जुन कामसब यहुदिसिक देस आ यरुसलेम सहरम करल्को उ सभे बातक हमर्स्या गबाह स्यो। ओकर्स्या येसुका कुरुसम लट्काइक मारल्को। 40तर पर्मेसोरले तेस्रो दिनम फेरि येसुका जिउँत करिक मानुकसिक अगाम पर्कट करल्को। 41सभे मानुकसिक अगाम त पर्कट नाइ करल्को तर जकर्सिका पर्मेसोरले गबाह बन लागि चुन्ल छलो, ओकर्सिक अगाम मत्रे पर्कट करल्को, उ गबाह हमर्स्याहि स्यो। येसु फेरि जिउँत भेलो त हमर्स्याहि ओक्रसङ खेल्यो-पिल्यो। 42ओहेले हमर्सिका खुसिक खबर पर्चार कर आ पर्मेसोरले ओक्राहि मोर्ल आ जिउँत मानुकसिक फैसला कर लागि चुन्ल स्यो कहिक गबाहि दिअ लागि हमर्सिका आग्या देल छो। 43अगमबक्तास्या पनि येसुक बारेम एनामे गबाहि देल छो, ‘येसुका बिस्वास कर्लाहार सभेले ओक्र नामस पापक छेमा पाइतो।’”
दस्रो जातक मानुकस्या पबित्र आत्मा पाइल
44पत्रुस बज्ति-बज्ति बचन सुन्लाहार सभेक उप्रिम पबित्र आत्मा एले। 45पर्मेसोरले दस्रो जातक मानुकसिका पनि पबित्र आत्माक बरदान देल देखिक पत्रुससङ आइल यहुदि बिस्वासिसब छक पर्ले। 46किरकि यहुदि बिस्वासिस्या ओकर्सिका दस्रो भसाम बज्ति पर्मेसोरक पर्संसा कर्त सुनल्के। 47तब पत्रुसले एनामे कहल्के, “आपन्सिएक जक्या पबित्र आत्मा पाइलाहार यि मानुकसिका पानिक बप्तिस्मा लिअस कोन रोक सक्तो?” 48ओहेस पत्रुसले येसु खिरिस्टक नामम ओकर्सिका बप्तिस्मा दिअ लागि आग्या देल्के। पछास ओकर्स्या कन्हेक दिन् हमर्सिएसङ रह कहिक पत्रुसका बिन्ति करल्के।
Currently Selected:
पेरेरित 10: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
