Jean 19

1Kèchida nè Pilate ba Jésus, bèl’a nè gafi. 2Toulougou o chini tène, gou jou a nè ndoutou. Ouo̱ pi toulou pourpre o tè a. 3Kèchida ndo ouo̱ yoko di ka té a o mè; ouo̱ to oui̱ne h’a o, è gui: Ouoromo, ouane ko juif o! Ndo ouo̱ mbèl’a o. 4Kèchida nè Pilate ho zane da; a to oui̱ne ho juif o, è gui: Joko, mi ba a ho nè h’ènè‐o di zane nè, sè k’ènè i̱ngi tana o oui̱ne mi tè pa namo ko‐a pome nè. 5Jésus ho zane, gou ndoutou tène nè hi jou è, dè toulou pourpre. Pilate to oui̱ne ho ouo̱‐o, è gui: Joko ouaïlè o no mo. 6Ko di̱ngguè sacrificateur o dè kapita o hè jok’a, ndo ouo̱ himo o, è gui: Mbod’a jou croix! mbod’a jou croix! Nè Pilate to oui̱ne ho ouo̱‐o, è gui: B’a nè tè ’nè, ènè mbod’a jou croix o, oui̱ne mi tè pa namo ko‐a pome nè. 7Ndo juif o pikifiè h’a, è gui: Mboulou k’alè hè aï, nè mboulou k’alè é h’a fi oui̱ne a to oui̱ne, è gui: È nè Bi̱‐ouili kè Nzapa ouo̱. 8Kè Pilate hè zili oui̱ne d‐è, nè kili gbé a gana i̱nggati. 9A lé ko toa to‐mbangga da; a aka Jésus, è gui: Mè nè bo gui̱ndi? Jésus pikifiè h’a nè. 10Kèchida nè Pilate to oui̱ne h’a, è gui: Mè to oui̱ne do‐m’ nè ndi? Mè tè i̱ngi tana, è gui: Ngaïli mbodo mè jou croix hè éli‐m’; ngaïli pi mè nou hè éli‐m’ ouo̱ nè ndi? 11Jésus pikifiè h’a, è gui: Ngaïli dè mo do‐m’ éli mè bènè, bè n’è tèno nè li‐zane mè nè. No mo hi, nè oui nè ha‐m’ ho mè hi, déè di̱ngguè namo gana mè. 12Kèchida di kè Pilate fa liouara pi a nou. Ndo juif o himo dingo̱ne, è gui: Mè pi a nou, ko mè bènè ouigara kè César go. Ouili nè dè ouane hi, k’a nè oui‐sène kè César. 13Kè Pilate hè zili oui̱ne d‐è, n’a mbo Jésus ho nè di zane mè. A doungounou ngo gui̱ndi‐to‐mbangga, sènè ma olo yara, yin’a nè Pavé; nè nou hébreu né Gabbatha. — 14K’è nè po‐ouichi dafa mo Pâque; kè l’heure dong‐po. — Pilate to oui̱ne ho juif o, è gui: Jo̱ ouane k’ènè‐o no mo. 15Ndo ouo̱ himo o, è gui: B’a dida, b’a dida, mbod’a jou croix! Pilate to oui̱ne ho ouo̱‐o, è gui: Mi mbodo ouane k’ènè‐o jou croix ndi? Ndo dîngguè sacrificateur pikifiè h’a o, è gui: Ouane k’alè pome‐iè nè César. 16Kèchida n’a ha a ho ouo̱‐o oui̱ne mbod’a jou croix.

Ouo̱ ba Jésus, ouo̱ mbo a o nèno. 17Jésus ba croix k‐è, ma sènè ma olo yara, yin’a nè hébreu nè Golgotha, kè gui, kara‐jou‐ouili. 18Olo yara hi, no mo ndo ouo̱ mbod’a jou croix o sènè hi; do ma ouili o do a litou, ma pome nè ouara galè, ma nè ouara ouili ko, nè Jésus nè bo̱bo̱. 19Pilate dè mbèti, é jou croix, è gui: Jésus Nazareth, ouane ko juif o. 20Juif o ouinè toro mbèti hi, oui̱ne olo yara ndo ouo̱ mbodo Jésus o jou croix sènè hi, o̱yèlè dè sarli̱ nè. Mbèti hi nè nou hébreu, dè nou grec, dè nou latin. 21Dingguè sacrificateur ko juif o to oui̱ne o hè Pilate, è gui: Mè ya dè, gui: A nè ouane ko juif o ouo̱ nè. Mè dè, gui: A toa, è gui: È nè ouane ko juif o. 22Pilate pikifiè ho ouo̱‐o, è gui: Mo no‐m’ dè hi, k’è no mo no‐m’ déè hi iè.

23Kèchida ko toulougou o mbodo nè Jésus jou croix hi, ndo ouo̱ kara toulou ko‐a; ouo̱ kèkosanga o nara, patè toulougou o pome, pome. Ouo̱ ba di̱ngguè toulou da k‐a o bo, ndo fourou o nè ngo mè iyaaa mono nè dido̱ mè. 24Ouo̱ to nè bo̱bo̱ ouo̱‐o, è gui: O ya ak’a nè, o bi‐mbadiè sè k’o i̱ngi tana ouili bèi nè tè b’a hi. Ouo̱ dè o hèmonggo, sè kè Mbèti kè Nzapa dè bara oui̱ne, è gui:

Ouo̱ kèkosanga toulou ko‐m’ o.

Ouo̱ bi‐mbadi di̱ngguè toulou ko‐m’.

Joko mo ndo toulougou o déè hi no mo. 25Na kè Jésus dè y’aï, Marie, ko kè Clopas, dè Marie Magdala, hè ka croix da Jésus hi. 26Jésus joko na k‐è, dè ma disciple n’a koa ouinè, hè ka té a hi. A to oui̱ne hè na ko‐a, è gui: Ouiko, mè joko bi̱‐ouili ko‐mè. 27Kèchida n’a to oui̱ne hè disciple, è gui: Mè joko, na ko‐mè no mo. Kèchida nè disciple hi ba na kè Jésus didi, chi nè dida k‐è mè.

28Kèchida olo i, nè Jésus i̱ngi tana nè mo nè oli sa nè hi, sè kè Mbèti kè Nzapa dè bara oui̱ne; a to oui̱ne ho ouo̱‐o, è gui: Hèlè li gbè mi. 29Olo yara hi, kè pa‐li hè aï, vinaïgre dounou. O toulougou o ba éponge, é nou ti hysope, pi do̱ vinaïgre, yoko di ka tè Jésus nè, oui̱ne é nou a. 30Kè Jésus hè ba vainïgre hi, n’a to ouîne, è gui: Mo nè oli sa. Kèchida n’a joumou jou a, a fi.

31Sè da kili‐to ouo̱‐o tè o̱ ngo croxi nè po‐ouichi sabbat, — oui̱ne è nè di̱ngguè ouichi sabbat dafa Pâque, — juif o aka Pilate oui̱ne bini gounoukou ouino ndo ouo̱ mbodo jou croix o hi, hè kara ouo̱‐o jou croix dida. 32Toulougou o nèno, bini gounoukou akoutiè, kèchida ndo ouo̱ bini gounoukou ma, mdo ouo̱ mbodo jou croix do a o hi. 33Ko ouo̱ yoko o dida Jésus nè, ndo ouo̱ joko o k’a fiè, ouo̱ bini gounoukou a o go. 34Ma toulougou pome doumou om’a nè sèlè; to̱ bara li a dè li. 35Ouili nè jokodaka hi, nè oui to oui̱ne olo‐nou, oui̱ne olo‐nou a nè bara oui̱ne. A i̱ngi a to nè bara oui̱ne, sè k’ènè i̱ngi nè ko sèlè ’nè‐o bo. 36Mo n‐o o ou‐è ma nè oli, sè k’è dè bara oui̱ne, hèmo nè Mbèti kè Nzapa toa nè higo, è gui: Bara té a pome tè bini go ouo̱. 37Ma olo yara Mbèti kè Nzapa bo toa oui̱ne, è gui: Ouo̱ tè joko oui o ndo ouo̱ doumou om’a o hi ouo̱.

38Kèchida olo i, nè Joseph, sarli̱ ko‐a nè Arimathée, n’è nè disciple kè Jésus, k’è houssou houssou, oui̱ne kili ko juif o hi, nèno aka Pilate oui̱ne ba kili‐tè Jésus. Pilate kodaka. Kèchida n’a nèno, a ba kili‐tè Jésus. 39Nicodème, nè tèno nè zè i̱nggati dida Jésus nè hi, a tèno bo, a kara yomebo myrrhe dè aloès oui olo livre o pèlè pome; a zanga nè ma. 40Ouo̱ ba kili‐tè Jésus; ouo̱ hèl’è o nè toulou dè yomeb’a hi, oui̱ne nè doli̱ hèlè fio sarli̱ ko juif o. 41Olo yara ndo ouo̱ mbodo Jésus jou croix o sènè hi, fo hè sènè; dè mbé ko̱‐fio, ndo ouo̱ tè gounou fio o ko a nè hi. 42Olo ayra no mo ndo ouo̱ gounou kili‐tè Jésus o sènè hi, nèda oui̱ne dafa mo Pâque ko juif o, oui̱ne ko̱‐fio hi o̱yèlè nè.

Currently Selected:

Jean 19: GBANU

Highlight

Copy