Jean 18

1Kè Jésus hè to oui̱ne mo n‐o o ou‐è sa, n’è nèno do disciple da k‐è o di ouara koulou zili̱ Cèdron di, fo hè sènè hi; a ma ngo fo do disciple da k‐a o. 2Judas, nè ha a ho ouo̱‐o hi, i̱ngi olo yara h‐è, oui̱ne Jésus do disciple da k‐è o to di jou ma doungounè nè sènè hi. 3Judas kara toulougou o dè kapita o, ndo sacrificateur o do pharisien o toumbou hi; a kara ouo̱‐o a té a; a nèno dè lanterne o, ouo̱ dou oui o nè ouaka, ouo̱ kara do mo boulo o. 4Jésus i̱ngi tana mo ndo ouo̱ tèno guènè dè do a hi, n’a nèno di ti ouo̱‐o mè; a aka ouo̱‐o, è gui: Enè fa o nè ndo ndi? 5Ndo ouo̱ pikifiè h’a o, è gui: Alè fa nè Jésus Nazareth. Nè Jésus to oui̱ne ho ouo̱‐o, è gui: Mi no mo. Kè Judas, nè ha a ho ouo̱‐o hi, hè do ouo̱‐o. 6Didi nè Jésus toa nè oui̱ne d‐è, è gui: Mi no mo ouo̱ hi, ndo ouo̱ yoko di zane nè donggo ouo̱, ouo̱ ara a nou o. 7A aka ouo̱‐o da, è gui: Enè fa o nè ndo ndi? Ndo ouo̱‐o gui: Alè fa nè Jésus Nazareth ouo̱. 8Jésus pikifiè ho ouo̱‐o, è gui: Mi toa h’ènè‐o di, è gui: Mi no mo ouo̱. O̱nemo ènè fa no‐m’ o, n’ènè é o ouino‐o ou‐è, ho ouo̱ nèno o. 9N’a toa oui̱ne d‐è hèmonggo sè kè oui̱ne d‐è n’a toa i̱nggati, è gui: Ma ouino‐o no mè ha ho‐m’ hi, pome tè yo go ouo̱, dè bara oui̱ne. 10Simon Pierre, nè ba pa hè él’a hi, dak’a, gono nè zèlè ma oui‐gossala kè ba di̱ngguè sarificateur nè ouara ouili ko. Yini oui‐gossala nè Malchus. 11Jésus to oui̱ne hè Pierre, è gui: Mè pi ba pa ko‐mè ko kob’a da. Mi tè no̱ kopo nè Sème ha ho‐m’ oui̱ne no̱ hi go ndi?

12O toulougou o, dè capitaine, dè kapita ko juif o, ba Jésus; ouo̱ hèl’a o. 13Ouo̱ b’a o i̱nggati nèno dida Anne; oui̱ne Anne nè ko̱fè Caïphe. Caïphe nè ba di̱ngguè sacrificateur nè pè hi. 14Caïphe nè oui nè toa oui̱ne ho juif o, è gui: Ma ouili pome hè tèno fi oui̱ne namo ko ouili o ouo̱ hi.

15Simon Pierre o dè ma disciple pome, nèno pata Jésus. Di̱ngguè sacrificateur i̱ngi disciple hi. A lé dè Jésus di ka toa kè ba di̱ngguè sacrificateur mè. 16Nè Pierre mono k‐è nè ka nou toa zane di. Nè badi disciple, nè ba di̱ngguè sacrificateur i̱ngi hi, ho zane, aka oui‐pama‐nou‐toa oui̱ne é hè Pierre lé ko toa. 17Kèchida nè ma ouiko‐gossala, nè pama nou toa hi, to oui̱ne hè Pierre, è gui: Mè bo, mè bènè ma disciple kè ouaïlè go ndi? Nè Pierre to oui̱ne h’a, è gui: Bè no‐m’ go. 18Oui‐gossala o, dè kapita o, hè aï. Ouo̱ lè oui, ko ouo̱ dou-ngouonou k’a o oui̱ne guè ouinè. Kè Pierre yolo do ouo̱‐o ka oui hi.

19Ba di̱ngguè sacrificateur aka Jésus oui̱ne o disciple ko‐a o, dè oui̱ne n’a oussou hi. 20Jésus pikifiè h’a, è gui: Mi to oui̱ne ho oui‐nou o nè bassa. Mi oussou oui̱ne doungounè nè ko synagogue dè ko temple, olo yara ndo juif o to di jou ma o hi. Mi tè to ma oui̱ne nè do̱ houssi nè. 21Nè oui̱ne gui ho mè aka no‐m’ gui̱ndi? Mè aka ndo ouino‐o nè zili da oui̱ne ko‐m’ i̱nggati hi. Ouo̱ i̱ngi oui̱ne d‐è o no‐m’ to hi. 22Kèchida olo oui̱ne d‐è, nè ma kapita pome nè yolo aï mbèlè Jésus; a to oui̱ne h’a, è gui: Mè pikifi oui̱ne hè ba di̱ngguè sacrificateur hèmonggo ndi? 23Jésus to oui̱ne h’a, è gui: Mi toa nè oui̱ne hè dinè, no mè toda k‐a, ho‐m’ zili; ko mi toa nè dé oui̱ne, nè nè gui ho mè mbèlè no‐m’ gui̱ndi? 24Kèchida nè Anne toumb’a nè olo hèl’a hi dida Caïphe, ba di̱ngguè sacrificateur mé.

25Kè Simon Pierre hè aï; k’è doungounou ka oui. Nè ma ouili to oui̱ne h’a, è gui: Mè bo, mè bènè disciple kè ouaïlè go ndi? N’a bè. A to oui̱ne ho ouo̱‐o, è gui: Bè no‐m’ go. 26Ma oui‐gossala kè ba di̱ngguè sacrificateur pome, pome sarli̱ dè oui nè Pierre gono zèl’a hi, to oui̱ne h’a, è gui: Mi joko mè sènè fo mè do a go ndi? 27Nè Pierre bè da. Kè didi nè ouili‐koro himo.

28Ouo̱ ba Jésus o da Caïphe nè, nèno di ko toa‐mbangga mè; nè toutouli. Ouo̱ lé toa o go da ndi tè ba to ouo̱‐o, sè ko ouo̱ yongo Pâque o. 29Pilate ho zane oui̱ne nèno dida ouo̱‐o mè. A aka ouo̱‐o, è gui: Nè oui̱ne gui h’ènè pa o dè ouaïlè gui̱ndi? 30Ndo ouo̱ pikifiè h’a o, è gui: O̱nemo a ya o̱ nè oui‐namo nè, nd’alè tè b’a tèno ho mè go. 31Kèchida olo oui̱ne d‐è, nè Pilate to oui̱ne ho ouo̱‐o, è gui: B’a nè tè ’nè, ènè to mbangg’a o, hèmo nè mboulou k’ènè‐o toa nè higo. Ndo juif o to oui̱ne h’a, è gui: Alè bènè oui gbè ouili go. 32Nèdaka sè kè oui̱ne d‐è nè Jésus toa nè, oui̱ne oussou liouara fio n’a tè fi nè hi, dè bara oui̱ne.

33Pilate lé ko toa‐mbangga; k’è samo hè Jésus, ak’a, è gui: Mè nè ouane ko juif o ndi? 34Nè Jésus pikifiè h’a, è gui: No mè ho mè to nè to mè, kèo̱nè kè nè ma ouili o hè toa oui̱ne ko‐m’ ho mè è ndi? 35Nè Pilate, è gui: Mi nè juif ndi? Nè oui nouli̱ ko‐mè dè di̱ngguè sacrificateur o hè ha mè ho‐m’. Nè gui ho mè déè gui̱ndi? 36Jésus pikifiè h’a, è gui: Bè nou‐ouane ko‐m’ nè sènè nou h‐è go. O̱nemo nou‐ouane ko‐m’ oa nè sènè nou nè, ndo ouili ko‐m’ o bi‐boulo jou‐m’, do juif o tè ba‐m’. Nou‐ouane ko‐m’ bènè sènè nou h‐è go. 37Pilate to oui̱ne h’a, è gui: Mè nè onane ndi? Nè Jésus pikifiè h’a, è gui: No mo no mè to hi, mi nè ouane. Ouo̱ kouo‐m’ o, mi tèno di sènè nou nè guènè to oui̱ne olo nou bara oui̱ne. Ma ouili bèi nè koa zili bara oui̱ne hi, n’è zili guèlè‐m’. 38Pilate pikifiè h’a, è gui: Bara oui̱ne nè gui̱ndi?

K’a to oui̱ne d‐è sa, n’a ho zane de guènè nèno dida o juif o mè. A to oui̱ne ho ouo̱‐o, è gui: Mi tè pa namo ko‐a pome nè. 39Nèdaka n’è nè doli̱ k’ènè‐o, no‐m’ pi mè oui‐kanga nou pome nè po‐ouichi fête Pâque, ènè koa o mi pi ouane ko juif o nou ndi? 40Ndo ouo̱ himo o da dingo̱ne: Bè n’a go; pi nè Barabbas nou. Barabbas nè oui‐jou.

Currently Selected:

Jean 18: GBANU

Highlight

Copy