Dèmo kè Apôtre o 3

1Pierre dè Jean danga dè ma o di ko temple mè, nè l’heure mbéa‐pome‐kè‐bou: kè nè l’heure toro Nzapa.

2Kè ma oui‐koum pome, nè na ko‐a kouo n’a mè nè tiè, hè aï, ouo̱ b’a o, ouo̱ é a o nè ka nou temple, ndo ouo̱ sa yin’a nè Belle hi, nè ouichi nè oli, sè k’a gofo‐mo éli ouino‐o nè tè ko temple hi. 3Nè ouaïli’è joko Pierre dè Jean nènèno o guènè lé ko temple hi, n’a gofo‐mo éli ouo̱‐o. 4Nè Pierre dè Jean chi guènè pi̱ a hè joko, ndo ouo̱ to oui̱ne h’a o, ègui̱: Mè joko’lè. 5N’a chi guènè pi̱ ouo̱‐o hè joko, k’a kèlè mo ndo ouo̱ tè ha h’a o hi. 6Kè olo i, nè Pierre to oui̱ne h’a ègui̱: Ngui̱nzè éli‐m’ bènè, dè l’or bènè; mo éli‐m’, no‐m’ koa ha ho mè: nè yini Jésus‐Christ kè Nazareth, mè kilingo̱ne, mè nèno. 7N’a ba él’a nè ouara ouili‐ko, a éngone. Didi, kè ngaïli téèno tè yang’a o, nè ba niè‐yang’a o boulou. 8A kilingo̱ne nè pi̱di̱, a chi guènè nèno. A lé ko temple do ouo̱‐o, a nèno, a pi̱di, a chi guènè é Nzapa sènè.

9Nè ba doko ouo̱‐o joko n’a nèno, k’a é nè Nzapa sènè hi. 10Ndo ouo̱ i̱ng’a o, kè n’a n’a doungounou nè ka nou temple, ndo ouo̱ sa yin’a nè Belle, oui̱ne gofo‐mo hi; ndo ouo̱ koukou oui̱ne o ouinè, so‐kili gono ouo̱‐o bo nèda mo nè ma hi. 11Hèmo n’a ko you nè té‐a tè Pierre dè Jean nè higo, ndo ba doko ouili o koukou oui̱ne, ndo ouo̱ ayou di ka to ouo̱‐o nè, di nou toa ndo ouo̱ sa yin’a nè Salomon hi.

12Nè Pierre joko mo hi, n’è to oui̱ne ho ba doko ouili o, ègui̱:

O oui‐ouili Israëlite o, nè oui̱ne gui h’ènè koukou nè oui̱ne mo hi gui̱ndi? Nè oui̱ne gui h’ènè pi̱ nd’alè, k’ènè joko nè o, hèmo nè nè ngaïli kè’lè bè tè’lè dè démo kè’lè, h’alè déè nè kè ouaïl’è nèno higo gui̱ndi? 13Nè Nzapa kè Abraham, dè Isaac, dè Jacob, Nzapa kè Sème kè’lè o, nè ha gloire hè Oui‐tome k’è, Jésus, n’ènè b’a o, ènè h’a hè Pilate, ènè kafa tè’nè‐o té‐a nè bali è, nè koadaka oui̱ne pi a nou hi. 14Ènè kafa tè’nè‐o tè oui, nè nè Saint nè Bolon ouili hi; n’ènè aka k’ènè‐o nè oui̱ne pi oui‐gbè‐ouili nou è. 15Ènè gbéè Ouane monotouni o, nè Nzapa toun’a nè bo̱ fio o; alè nè oui‐to‐tome‐olo‐nou mo hi. 16Nèda i̱ngi yin’a nè ko sèlè, nomo nè yin’a ha nè ngaïli hè ouaïl’è, n’ènè jok’a o, ènè i̱ng’a o: nè i̱ng’a nè ko sèlè, nomo n’a déè nè zèlè kè ouaïl’è nè bali’nè‐o nè oli hi.

17Kinè, o yan o, mi i̱ngi tana k’ènè déè o nè ndouli, do ouane k’ènè‐o. 18Nzapa déè mo nè oli hèmo n’a toa nè i̱nggati ho prophète ko‐a o higo, ègui̱: Christ k’è hè himi ouo̱.

19Nèda mo hi, n’ènè raka namo k’ènè‐o di̱, ènè para liouara k’ènè‐o bo, sè kè namo k’ènè‐o sa, 20sè kè ouichi nè ouili tè doungou nè dèmè‐sèlè da Seigneur hi tèno, sè k’a toumbou oui n’a toa oui̱ne toumb’a, nè nè Jésus‐Christ hi, h’ènè‐o. 21A ouiè o̱ mono li‐zane mè, iyaaa hè ma nè po‐ouichi dafa mo nè oli sè, hèmo nè Nzapa toa nè nè nou saint prophète k’è o higo. 22Moïse toa oui̱ne, ègui̱: Seigneur, Nzapa k’ènè‐o hè ba ma yan k’ènè‐o bo̱bo̱’nè‐o hi, nè prophète hè mi go; n’ènè zili da oui̱ne mo n’a tè to h’ènè‐o hi. 23Ouili bèi nè ko zili oui̱ne kè prophète h‐è go hi, ndo ouo̱ gbé a, ouo̱ b’a bo̱bo̱ ouili o dida. 24Nè Samuel, do ma prophète o pat’a hi, to oui̱ne o bo po‐ouichi no‐o mè hi. 25Ènè‐o nè bi̱‐oui‐ouili kè prophète o, dè alliance nè Nzapa toa oui̱ne h’a ho sème kè’lè, hè Abraham, ègui̱: Ba doko bala ouili o nè oli di sènè nou h‐è hè pa démo nèda bala pata bi̱ no mè o ouo̱. 26Nèda’nè‐o i̱nggati, nomo nè Nzapa tounou nè Oui‐tome k’è (Jésus‐Christ), n’a toumbou nè oui̱ne é dé oui̱ne jou’nè‐o hi, nomo n’a jiki n’ènè‐o nè ouara namo k’ènè‐o pome, pome, dida hi.

Currently Selected:

Dèmo kè Apôtre o 3: GBANU

Highlight

Copy