Ester 1
1
King Asuero bui plun tara daukan ba
1Naha na Asuero#Esd 4.6. yua nani ra takan, Asuero India tasbaya ba wina, Etiopía tasbaya ba kat tasba nani 127 kingka aimaki bara tâ bri kan piua ra. 2Baha yua nani ra, pura wihtka aimaki kan ba lika Susa kan kahbaika pliska bri ba ra kan.
3Bara witin king aimakan ba wina, mani 3 luan ningkara, ai warkka uplika nani ra lilia tara pali daukan, Persia wih Media wal tasbaya wihtka nani kau karnakira nani ba mawanra. 4Baku ai karnika tara bara ai dukia kukan bri ba witin nani ra marikaia dukiara, bara sin ai prana bri ba marikaia wisi baha lilia daukan. Naha liliaka na mani bakriki dauki kan, 5bara liliaka ba luan ningkara, king ba lilia tara wala daukan yu 7, king watla latka ba kat. Susa kan kahbaika pliska bri ba ra upla nani iwi kan ba sut, upla tara ba wina sirpi ba kat asla paiwi daukan. 6Bara watla latka ba kwala mapla pihni bara mapla siakni ni skahkan; bara kwalka paman awa nani ba balianta kwalka, kiwa nani ba walpa klauhira nani ra wilkan kan, bara iwaika ba gul bara silbar ni paskan kan; baha purkara sin tasba ba walpa mapla siksa wih pihni wal lalauban kan. 7Bara diaia kapka nani ba gul ni daukan kan, kapka nani ba sât sât kan, kumi wala ba wal, bara wain ba pura lui laiwi kan, dîa king ai brinka kan ba kat dauki kan. 8Ban sakuna, king ba mita adar yaban wihtka nani king watla klin dauki nani pura kakaira nani ra, upla kumi ra sin taibi muni dakakbiara, sakuna paiwan uplika bani ba, nahki pali diaia ai brinka ba kat witin nani ra yabia. 9Baku natka ra sin, kwin mairin Vasti ba lilia tara daukan, king Asuero watla wihtka maya mairin nani aikuki baman.
10Lapta yu 7 lilia ba dauki kan bilara, king kupia ba wain din ba tâka mita lilia tara takan, bara adar yaban Mehumán, Biztá, Harboná, Bigtá, Abagtá, Zetar, Carcás, baha nani 7 ba witin ai uplika aihwa kulki kan ba, 11kwin mairin Vasti ba prana dauki muni, king kraunka ba wal brih balbia taim upla nani kaikaia dukiara, wihta tara nani sut ra ai prana ba marikaia dukiara, kan witin ba mairin pranakira pali kan ba mita, rait pali witin ba mairin painkira kan. 12Bara king ba, waitna kulkanka tara bri kan nani ba blikan, kwin mairin ba paiwi brih balaia; sakuna kwin mairin Vasti ba balaia apia win, bara king ba ai kupia kasak sauhkan. 13Bamna king ba lâ tânka brabrira nani aikuki aisi lâ tânka plikata, kan baha yua ra king ba ai natka kan, lâ nani tânka brabrira nani ba wal aisi kaikaia. 14Baha nani tilara king kau lamara kan nani ba, naha uplika nani kan: Carsená, Setar, Admata, Tarsis, Meres, Marsená, Memucán; naha uplika 7 nani ba wihtka tara nani kan, witin nani ba king kupia krakraukra nani kan, bara Persia wihki Media wina kata, daknika tilara lalka kum kan, bara tasbaya tara wâl ba purara karnika bri kata. 15Bara king ba makabi walan:
—¿Lâ tânka kat, dîa pali daukaia sa ki kwin mairin Vasti ba wal, kan king Asuero adar yaban balbia bara ai bîla lulki balras kan ba?
16Bara Memucán king lâka daknika kumika mita king ra win:
—Kwin mairin Vasti ba king tara ba mapara baman buras, sakuna baha daukanka ba wihtka tara nani ra, bara tawan nani king Asuero mina mununhtara nani ba mapara sin buan sa. 17Bara naha kwin mairin Vasti daukan ba mairin wala nani sut ba walbia kaka, witin nani sin ai maya waitna nani ra kulkanka uya yabia apia, bara wibia: ‘King Asuero ba kwin mairin Vasti brih balaia blikan, sakuna witin balaia apia win.’ 18Bara wark lalka maya mairin nani, Persia bara Media wal ra iwi nani ba, naha kwin mairin daukan ba walbia ba ra, naiwa pali ai maya waitna nani ra aisabia, bara mairin nani ba waitna nani ra uya kulkbia apia, baha wina unsaban lâka balbia. 19Baku bamna, king tara ba aitani lukisa kaka, yamni kabia naha dukiara lâ kum ulbi mangkaia, Persia bara Media wal lâka nani ba tilara, bara lâka ba sin krikan kaia apia sa:#Est 8.8; Dn 6.8. ‘Vasti ba aima kumi sin kli king Asuero mawanra balbia apia.’ Bara sin kau kanra yamni pali kabia, witin wal kau mairin kasak ba king ai maya briaia. 20Baha lâka king mita adar yabia ba, ai kingka tasbaya aiska ra walan kaia sa; baku lika mairin sut ai maya waitna nani ra kulkbia, tara wina sirpi ba kat.
21King bara wihta tara nani sut aikuki, Memucán aisin ba aitani pali kulkan, bahamna king ba Memucán lukanka ba kat daukan. 22Bara king tasbaya aiska ra wauhtaya nani ulbi blikan, tawan tara nani ra bara tawan sirpi nani ra sin, witin nani dîa twisa aisi kan ba kat ulban, bara win: “Waitna bani ai watla bilara karnika bri ba ra marikaia sa; baku sin sturka na, ai walka ra kau pain aisabia, ai tasbaya uplika nani dîa bîla witin nani aisisa kaka baha bîla kat aisi maisa pakbia.”
Currently Selected:
Ester 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua