Smasmalkra 1
1
Tânka sut ba bahki baman sa
1-2Naha nani sika Smasmalkra, Debit luhpia Jerusalem ra king aimaki kan ba, aisin ba:
¡Wan rayaka na, tânkas!
¡Wan rayaka na, tânkas!
¡Tânka sut ba, bahki man sa!
3¿Upla ba dîa yamni sakisa,
naha tasba ra wark takan man ba wina?
4Upla ba aisubi takisa,
bara upla ba pruisa,
sakuna tasba ba, aihka takras ban bâra sa.
5Wan yu bal ulisa, yu ba sin dimisa,
bara kli pat ai pliska ra tawisa
kli bal takaia dukiara.
6Pâsa ba waupasa ra krawisa
bara ningkara yahbra ra tawi auya
pâsa ba kli kli tawisa.
Tawi bara kli tawi krawisa.
7Awala laya nani sut ba, kabu ra auya,
sakuna kabu ba sip banhras sa;
bara awala laya nani ba kli ai pliska ra tawi auya,
kli ai yabalka kata bâk balaia dukiara.
8Upla kumi sin sip sturi aisaras sa,
nahki diara nani sut bui swapki;
upla bui kaikras bara aitani kat sip walras sa,
wan âuyapah takaia pitka.
9Diara nani kan wina âpu kan ba bâra kabia apia,
diara kum sip daukbia apia,
kainara daukras kan sa kaka.
¡Naha tasba ra diara raya âpu sa!
10Upla âpu kabia apia, naku wibia ba:
“¡Naha sika diara raya ba!”
Sakuna baha ba pat bâra kan,
mani nani ailal wan kanra kan ba wina.
11Dîa takan ba sut,
upla âuya tiwan sa,
bara naika takaia dukia sut ba sin,
âuya tiwaia ra tawbia,
dîa ningkara takbia ba sin.
Smasmalkra diara lan takan ba
12Yang, Smasmalkra sna, Israel luhpia nani kingka kapri, Jerusalem tawanka ra. 13Bara yang kupi aiska ni tânka plikri, sins lâka ba wal, naha tasba ra diara nani dauki ba. ¡Gâd bui twilkaia dukia wirha nani upla purara sunan ba, baha wal witinka nani ba yaka bawaia dukiara! 14Bara sip kapri kaikaia naha tasba ra diara nani dauki ba bahki sa, pâsa ra wan mihta ni alkaia baku.
15¡Diara warha ba sip wapni daukras, diara âpu ba dukiara sin kulkaia apia!
16-17Bara yang naku kupi ra lukri: “Man nani nâra ai brisma, upla kum kau tara, kau sinskira, baha nani sut, yang kainira Jerusalem ra,#1 Ki 4.29-31. king aimakan nani ba wal; kupi ba sins lâka bara diara tânka briaia lâka nani manis briri, bara diara tanis lâka warha nani sut tânka brisatni, sakuna baha sin pâsa ra alkaia baku takisa.” 18Kasak sa sins lâka tara briaia ba, trabil nani ailal sa, kau lan takisa, kau sin pât brisa.
Currently Selected:
Smasmalkra 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua